Konwacack Engan in Kraist

Leum el tiacna siyuck Aaronic Priesthood fuhsr lasr uh in oruh ma nuhkwewa, tuhsruhktuh ma El siyuck uh ahklut ac ahknuhnak.

Ke kuhtuh yac tari ah, sucu srihsrihk se lasr inge puhlakihn ma sucu puhkantwen puhla ke facluh puhtatlac se inge. Mukul se ma srihk emet nahtuhsr ah, Tanner Christian Lund, el weack cancer. El tuhlihk na wowo se, oacna ke tuhlihk yac yuc uh enenuh in angwe uh. El pwacr ac suhlallacl, ac ke pacl sac pacna, arulacna puhla nguhn muhtahl. Inut ac lipufacn, koluk ac wo. Ke el srihk ah ac lwen nuhkwewa el ahkfohsye kuht ke kain in ohiyac lal, kuht nuhnkuh lah elac mahtuhlah ac ekihn sie mwet pahluh kuh sie mwet pihsrapasr ke lohm in fihl mani ngi. Lah mac kuh mac, atacn elac fihliyac pacna akucl lal fin facluh.

Na tohkoh el maswack na upac. Ke yac tolu tari ah, ono ke ke pacl inge sang kahsrwellah, wi pac ayaol ke koanon sri lal, suc ma el sruokyac mas pneumonia, suc enenuh elan muhta wik 10 ke ventilator se tiac etwacl. Ke usrnguck ac mwenmwen, el kwelac ke puhluhn pacl fototo se, tuhsruhk tok cancer lal ah fohlohk.

Ke pacl fototo met liki na elac misac ah, mas se lal Tanner inge utyak nuh lun sri lal ah, ac finne el eis ono n fokoko nuh ke ngal, el srwackna ngal. Upac nuh sel in tuyak liki ma kiyacl. Sie litutacng in Sacnri, ninac kiacl, Kalleen, tuhkuh nuh ke infuhkihl lal in irongilyac met liki sucu uh som nuh ke alu ah. El lut ke el liyacack lah ke kuhtuh innek el sifacna nuknukyang ac muhta siskacn ma kiyacl ah, kampare oruh in puhtiniyac wes se lal ah. Kalleen el pihtuhki muhta yohrohl. “Tanner,” el fahk, “pwacye kom kuhna in som nuh ke alu ah? Sahp kom enenuh in muhta ac monglac misenge.”

El ngweti liye infohk uh. Deacon se pa el. Oasr quorum lal. Ac oasr ma kunacl.

“Nga pa e pahsi kuhfa luhn leum misenge uh.”

“Kwacl, nga etuh lah oasr mwet kuh in oruh ma se ngwacn lom.”

“Ahok,” el fahk, “tuhsruhk … nga liye atacn ngwetngwet luhn mwet uh ke elos liyeyuc ke nga pahsi kuhfa luhn lwem uh. Nga muh kahsrwelos.”

Oruh Kalleen el kahsrwel puhtiniyac wes lal ah ac kapriyac nektai lal ah, ac eltahl yuhlac som nuh ke alu ah. Kahlwem, oasr ma yohk srihpac sikyak.

Nga tuhkuh nuh ke alu uh liki toeni se ma orek met ac nga arulacna lut ke nga liyaclwack Tanner el muhta ke tahk luhn deacon ah. Kalleen el mahmah fahk nuh sihk lah efuh el asr insac ac ma el fahk ah: “Kahsruh mwet uh.”

Oruh nga liye ke deacon ah tuyak fahsr nuh ke tepuh in kuhfa luhn leum ah. El kahkahsrihk funglac nuh ke sie pac deacon ah ke priests ah elos sang ahluh in fuhlao ah. Ac Tanner el mukwiyak nuh ke acn oreklac lal ah ac sruokyac sahflahiyacn sahk soko in ahksuwohsyacl lac ke el us kuhfa luhn leum ac sang nuh sin mwet ah.

Oacna in nohfohn ahtron muhtuhn mwet uh an kacl, fwefwelac ke kampare lal in oruh ma kunacl uh. Ke kuhtuh srihpac Tanner el akacsruhi mwe lutlut mihs se ke el sang kuhiyacl, ac kahkahsrihk na nuh ke tahk nuh ke tahk—insuhf wacngihn aunsuhf se lal ah sroksrok ke fioh—ahol Mwet in Molwelah ke sie innek ma deacon uh oruh uh. Mahno fokoko se lal ah ingena el futunlac kuhtuhsrihk, muhsahllah, ac mihsaclihk, luhngse in kweok in kahsruh ke us akuhl ke Iwaclah luhn Mwet in Molwelah nuh ke moul lasr uh.

Ke kuht liye ke el oruh ma kunacl ke deacon se uh use nuh sesr in nuhnkuh sienna pac—ke kuhfa luhn leum, ke Mwet in Molwelah, ac ke deacon ac mwet luti ac priests.

Nga nuhnkuh ke mwe mwenmwen se ma tiac sruhmuhnyuhk ma pahtokuhl ke litutacng sac in lohng ke puhlaik nuh ke pahng mihs, srihsrihk sac in kahsruh, ac ke kuhiyacn ac koanon nohfohn mwet fuhsr kapwack lasr ke elos sifacna pahtokkuhltahl in lohng pahng luhn mwet pahluh in sang nuh ke mweun luhn God ac in wi orekma ke molwelah ac moul ma pahtpaht.

Pacl nuhkwewa deacon se sruok ahluh in kuhfa luhn leum, ahkacsmakihnyeyuhk kuht ke sramsram muhtal ke mongo sahflah, ke Gethsemane, ke Calvary, ac ke imac in kuhlyuhk. Ke Mwet in Molwelah el fahk nuh sin mwet tuhma lutlut la, “Ma se inge oruh in esamyuc,” ¹ El oacyacpac sramsram nuh ke fihl nuh ke fihl nuh sesr kais sie. El sruhmuhn ke ma usrnguhk ma El ac use ke deacon, mwet luti, ac priests ke elos se kihte kuhfa luhn leum ac suli tuhlihk nahtuhl in eis mwe sang iwaclah lal.

Nohfohn na akucl ke mwe kuhfa luhn leum el srihsrngikuht nuh ke mwe sang se ingacn. Kuht nuhnkuh fuhlao se ma el tuh ip srihsrihliyac ah—ac fuhlao ma priests ingena inge, aholuhl, ip srihsrihki. Kuht nuhnkuh ke kalmeyacn kof se ahkmuhtahlyeyuhklac, pacl sac ac ingena, ke pruhe nuh ke kuhfa luhn leum el kihteyuck liki inwaclun priest fuhsr nuh ke insiacsr ac nuh ke inkuhsrao, ahksasucye olwelah lasr ma kuhpahsri kuht nuh ke kuh in molwelah luhn Kraist. Kuht kuh in nuhnkuh ke meac kalmac ke deacon se el us kuhfa muhtahl nuh sesr, tu oacna ke el oruh ke Jisus el tu fin el oasr insac, siyuck in eislah ma toasr lasr ac kweok lasr.

Wo ohiyac, mukul fuhsr ac muhtwacn fuhsr tena enenuh in maswack in konwacack engan ac srihpac ke kahsruh Mwet in Molwelah.

Elder David A. Bednar el luti lah in kapwack ac ekihn misinacri uh, kuht enenuh in oruh ma misinacri oruh, ac, “lain nuh ke lain ac ma wo nuh ke ma wo, … [kuht] kuh in kahkahsrihk ekihn sie misinacri … ma Mwet in Molwelah el ke.” ²

Ac oacyacpac, fin kuht kena “in oacna Jisus.” ³ kuht enenuh in oruh ma Jisus el oruh, ac ke sie pohloh kahs na sun, Leum el ahkuhtweyac lah meac El oruh: El fahk, “Ohinge liye, pa inge orekma luhk ac wolacna luhk—in use moul wacngihn misac ac moul pahtpaht luhn mwet.” ⁴

Ma kunacl Mwet in Molwelah ingena ac ne tok pa in kahsruh Pahpah tuhmwacl in karihngihn tuhlihk nahtuhl.

Ac innek pwacye se emet in konwacack engan ke moul se inge uh pa in weluhl Kraist in kahsruh mwet sahyac.

Pa inge ma pwacye se ma mokle tuhlihk ac u luhn mwet fuhsr.

Nohfohn mukwikwi luhn tuhlihk ac mwet fuhsr ac nohfohn mwe lutlut luhn tuhlihk ac mwet fuhsr uh ma ke kahsruh mwet fuhsr in eklac oacna Jisus ke weluhl ke orekma Lal ke molwelah ac moul ma pahtpaht.

Tuhlihk ac mwet fuhsr el kuhfwen mwe orekma se in kahsruh tuhlihk praimacri nuhkwewa ac mwet fuhsr in kapwack ke mwe lutlut luhn God ac in eis luhlahlfongi lalos ke atacn liye lalos ke innek nuh ke engan. Elos kuh in luhngse ac suk innek nuh ke innek muhtahl, ma elos ac pacptaislac kac ac ahkpwacyeiyeyucklac ke mwe sang luhn nguhn muhtahl ac wi quorums ac lutlut luhn muhtwacn fuhsr ke pacl na sa, ma elos e puhla engan ke kahsruh mwet sahyac ke orekma oacna Kraist ac orekma in kahsruh. Elos e oraclah finsrak lalos, yohk kuh srihk, ma e use pahlacns nuh ke moul lalos uh ke elos se eklac oacna Mwet in Molwelah uh. Toeni luhlahp ac puk nuh ke Kuh luhn Mwet Fuhsr, ac Friend, ac Gospel Living app e kahsrwelos in konwacack engan in Kraist. Elos e ahkolah nuh ke mwe insewowo ke usyacn pwepuh in lwelah nuh tempuhl lalos ac puhlah nguhn lal Elijah ke mokleyuck luhn Nguhn Muhtahl ke elos e suk mwe insewowo ke tempuhl ac ma mahtuh ke sucu lalos. Elos e kolyuck ke mwe insewowo luhn petriark. Ke kuhtuh pacl tok, elos e fah liyaclos sifacna ke elos e utyak nuh lun tempuhl ac ahkinsewowoyeyuck ke kuh ac in konwacack engan we ke elos kuhpahsri, nuh sin sucu lalos uh, ne tok ma pahtpaht, finne mac kuh mac sikyak.

Lain eng upac ke mas se fahsrwelihk fin facluh ac ongaiyac, orekma nuh ke olwelah fohnlah ke tuhlihk sasuc ac prokram luhn mwet fuhsr el srwackna fahsr—tuhsruhk asr silahklahk. Mwet fuhsr lasr uh tiac kuh in sano facluh in sifacna wollac met liki elos etwaclah Mwet in Molwelah. Kuhtuh sulaclah ma muh elos ac tiac sulaclah elos fin kahlwem kac ohiyac pwacye lalos—ac Ohiyacl.

Pwacnwacng pahng in salka tuhkuh ke mweun lal God me in ahkolah nuh ke “paho nuhkwewa fin oak an!”

Ninac ac pahpah, tuhlihk mukul nuhtuwos enenwe kom in ahkkweyelos ingena ke luhngse in upac liki na kom oruh ke pacl somlah ke elos ma ke ma srihsrihk kain se ke pin in opi ah. Ninac ac pahpah an, pristut ac mwet kol luhn muhtwacn fuhsr, fin mwet fuhsr lowos an puhlakihn ma upac, Tuhlihk ac Mwet fuhsr e tuhfah kahsrwelos in pwenuhlos nuh yurun Mwet in Molwelah, ac Mwet in Molwelah elac tuhfah sang nuh selos mislac. ⁵

Quorum ac prestuhn ke kuhlahs an, tuyak na met ac eis acn fal lom ke orekma luhn God.

Pisaps, toeniyac ki lowos an nuh ke ma luhn prestuhn luhn quorums an, ac quorums lom—ac ward lom—e eklac ma pahtpaht

Ac nuh sum fihl se tuhkuh ngwe, nga fahkwack, ke sie mwet etuh, lah kom pa tuhlihk mukul ac tuhlihk muhtwacn sacohklacna nuhtin God ac oasr orekma El ahkolah nuh sum in oruh.

Ke kom kapkapwack nuh ke kuhiyacn ma kunom, ke insiowos nohfohn,kuhiyom, nuhnak, ac kuh, kom e luhngse God ac liyacacng olwelah lom ac luhlahlfongi ke pristut Lal ke kom orekma in ahkinsewowoye mwet sahyac uh, muhtwacwacack e lohm sum sifacna.

Nga pruhe tuh kom in srihke, ke ke kuh liki na met ah fal nuh ke pacl se inge, in kahsruh, ahkfokokoye luhlahlfongi, auliyak, ac in wollac ke kais sie lwen, in fal in eis mwe insewowo ke tempuhl ac engan wacngihn sahflahiyac ma tuhkuh muhkwena ke wosasuc lal Jisus Kraist. Nga pruhe tuh kom in ahkolah in ekihn sie misinacri kampare, mukul tuhmwac kuh muhtwacn kiyac pwacye, pahpah kuh ninac kuhlwacng ma olweyuhklac nuh sum muh kom kuh in ekihn ke kom mwet uhma lutlut pwacye lal Jisus Kraist.

Ac lwelah tuh kowos kahsruh ahkolah facluh ke Tuhkuh Ahk Luo, in suli mwet nuhkwewa in tuhkuh nuh yurun Kraist ac eis mwe insewowo ke Iwaclah Lal. Ke inen Jisus Kraist, amen.