Srihkeyuck, Ahkpwacyeiyuck, ac Ahkwoyeyucklac

Tamuhlwel ac tahmtahel sacohk wiyuck, nga kuloh lah nga kuh in sramsram nuh sum misenge. Finsrak luhk uh pa in in sang ahkkweyeyuck ke pacl se ma moul uh upac ac kihruhruh uh. Nuh sin kuhtuh suwos, pacl se ingacn pa ingena. Fin tiac, pacl sacn efah tuhkuh.

Tiac ma suhpwacr se pa liyeyuck ingacn. Ma pwacye se—sifilpac wo—ke srihpen srihpac lal God ke oraclah luhn facluh se inge. Srihpac sac pa in sang tuhlihk nahtuhl in kuh in ahkpwacyei muh elos kuh ac luhngse in sulaclah ma pwacye ke pacl se upac uh. Ke elos e oruh uh, ohiyaclos ac kuh in eklac ac elos eklac oacna el. El etuh lah ma se inge enenuh luhlahlfongi yohk kacl.

Inkaiyacn ma nga etuh uh ma tuhkuh sin sucu luhk. Ke nga sahp yac alkosr ah, ninac kiyuck ah siyuck nga ac tamuhlwel wiyuck ah in weluhl fuhswack mah ke imac se lasr wuctah ah. Na, atacn fihsrwacsr orekma se inge, tuhsruhk kuht muhta New Jersey. Kwacna muhta af. Fohkfohk ah toasr na upac. Mah koluk ah el kap pihsrpihsr liki fukun sahk ah.

Nga esam ahngyahng luhk ke mah koluk ah wotlac ke puok, a okah kac ah srwemlah na ke fohk fuhrahrrahr toasr sac. Ninac kiyuck ah ac tamuhlwel wiyuck ah elos som na met ke tahk laltahl ah. Nga sang kuhiyuck, a nga pahtlac liki met ah.

“Ma se inge arulacna upac!” Nga wowoyak fahk.

El te pahkomuhtuhkyak, a el isrwacsr na fahk, “O, Hal, pwacye upac. Ac na pana ngwacn. Moul uh el mwe srihkeyuck se.”

Ke pacl se ngwacn, nga etuh lah kahs lal an pwacye ac e kalweni na in pwacye ke moul luhk fahsruh.

Srihpen isrwacsr in luhngse lal Ninac ah kahlwemi nuh sihk ke yac ekahsr tohkoh ke nga riti ke Pahpah Luhng ac Jisus Kraist sramsramkihn srihpac lalos in oraclah facluh se inge ac sang nuh sin nguhn nahtuhl in puhla moul in mahno.

God El fahk lah elos ac srihke kuht in liye lah kuht ac kuh in oruh ma nuh kwewa ma Leum God lasr ac sapkihn nuh sesr uh.

“Ac kuht fin karihngihn lohm luhlahp se emet sesr; ac fah tuhtahflah pihsacsr, ac kuht fin tiac karihngihn lohm luhlahp se emet sesr uh; ac fah wacngihn wolacna luhn facluh ke tohkohsrahi sefanna weluhlos suc karihngihn lohm luhlahp se emet selos uh; ac elos suc karihngihn lohm luhlahp se ahkluo selos an fah laisyucklac wolacna nuh selos ne tok ma pahtpaht.”¹

Kom ac nga eis suliyuck se in srihkeyuck ac in ahkpwacyei muh kuht e sulaclah in liyacacng masap lal God ke kuht ac tilac muhta yohrohl Pahpah Luhng.

Finne solsol lal Pahpah Luhng ah el solsol ke luhngse, Setuhn el furohklah sie tahfuh tolu sijn tuhlihk nguhn ah in ukwacl ac lain plwacn lal Pahpah Luhng nuh ke kapwack ac engan ma pahtpaht. Ke srihpen lain lal Setuhn ah, sisilac el wi pac mwet ukwacl ah. Ingena el oruh in puhkantwen mwet el furohklah luhkwel God ke moul se ingena ngwe.

Mwet ma eis plwacn lal oruh ke srihpen luhlahlfongi kacl Jisus Kraist, suc sulaclah in ekihn Mwet in Molwelah ac Iwaclah lasr. Sahp pacl sac kuht acna nuhnkuh muh oacna sie mwe muhnahs in mahno ac oasr sesr ac oacna sie kuh koluk ma e lain kuht uh, kuh luhn ma wo e yohk liki na ma koluk.

Pahpah Tuhmasr Inkuhsrao ac Jisus Kraist etuh ac luhngse kom. Elos kena tuh kom in fohlohklac nuh yohrohltahl ac eklac oacna eltahl. Oraclah wo lom pa oraclah wo lalos uh. Kom puhlakihn luhngse se ingacn ahkpwacyeiyuck sin Nguhn Muhtahl ke kom riti kuh lohng kahs inge uh: “Inge liye, pa inge orekma luhk ac wolacna luhk—pa in oruh in sikyak moul ma pahtpaht luhn mwet uh.”²

Oasr kuh sel God elan oruh innek lasr in fihsrwacsr. El kihteyac tuhlihk Israel ah manna ke elos tuh forfor suk acn wihlwihl. Leum ke el tuh moul in mahno ac kahsruh ah onwelah mwet mas, fohlohkohnwack mwet misac, ac ahkmisyelah inkof. Tukun sifilpac moulyak lal, el ikucslah “kaclpous nuh selos ma sruhuh.”³

Ne ohinge Mwet Pahluh Joseph Smith, sie mwet pahluh wo sin mwet pahluh lal, kweok lun acn in kaclpous ac lutiyuck mwe lutlut se ma kuht nohfohn eis wo kac ac enenuh ke srihkeyuck luhlahlfongi lasr: Fin Joseph Smith el totolac nuh in luhf uh kuh nuh in poun mwet ahkmas uh, ac ituckyang nuh sel in misac; fin el totolac nuh acn loal uh; fin noanoa uh sonol ahkkolukyacl; fin eng upac uh tuhkuh oacna mwet lokoalok lal; fin inkuhsrao nwacnwaclah ke lohsr, ac ma nuh kwewa tuhkweni in mayak; ac yohk liki nuh kwewa, fin wihsen acn in ma koluk uh ikucslah inwacluhl yohk tohkohl, el enenuh in etuh lah ma inge nuh kwewa ma ac sang paholah se nuh sel, ac ma ac wo nuh sel se.⁴

Sahp kom e nuhnkuh lah efuh God luhngse ac Kuh emeet el fuhlwelah srihkeyuck ke moul lasr uh in arulacna upac. Ma ke srihpen el etuh lah kuht enenuh in kapwack ke nwacsnwacs luhn nguhn ac ohiyac in muh kuh in muhta yohrohl wi sucu lasr ne tok ma pahtpaht. In oruh in in kuh in sikyak ma se inge, Pahpah tuhmasr Inkuhsrao el use Mwet in Molwelah se ac kuh lasr in sifacna sulaclah ke luhlahlfongi lasr in liyacacng masap lal ac in auliyak kuht in fahsr yohrohl.

Plwacn luhn Pahpah Tuhmasr Inkuhsrao nuh ke engan pa in eklac oacna Wen Kuloh nahtuhl, Jisus Kraist. Ke ma nuhkwewa, Mwet in Molwelah pa mwe srihkasrak se ma w emeet in kol kuht uh. El tiac kahingkihn enenuh se lal in ahkpwacyeiyacl sifacna. El muhtweng nohfohn nuh sin tuhlihk nuh kwewa nuhtin Pahpah Lucng, in moli ma suhfal luhn ma koluk lasr. El puhla kweok luhn nohfohn ma muhta tari fin facluh ac e tuhfah tuhkuh nuh fin facluh uh.

Ke kom nuhnkuh muh fuhkah luhpan kweok kom kuh in kuhtanglah kacl, esamuhl. El kweokkihn ma kom kweok kac uh el in muh kuh in etuh lah elac fuhkah sruhk komyak. El kuh in tiac eslah ma toasr lom, tuhsruhk elac usot nuh sum kuh, ahkkweye, ac finsrak. El etuh inkacnek uh. El puhlakihn nohfohn ngal luhn mwet uh. El kuhtanglah mwe kweok luhn nohfohn.

Kom tuhfweyuhklac ac ahkkweyeyuhk sin Mwet In Molwelah luhngse se, suc etuh in kol kom ke srikeyuhk nuhkwewa ma kom sun uh. Alma el luti:

“Ac El fah som, kweok ke kain in waek ac ongaiyac ac mwe sruhf nuhkwewa; ac ohinge tuh kahs uh in ahkpwacyeiyucklac suc fahk lah El fah eis nuh Facl kweok ac mas luhn mwet Lal.

“Ac El fah eis nuh Facl misac, tuh Elan kuh in tuhlahlihk mwe kapihr luhn misac ma kapriyac mwet Lal; ac El fah eis nuh Facl mas lalos, tuh insiacl in sesseslah ke pahkotwen, fal nuh ke mahno, tuh Elan kuh in etuh fal nuh ke mahno lah El ac kahsruh fuhkah mwet Lal fal nuh ke mas lalos.”⁵

Sie innek ma elac kahsrwe kom kac uh pa in suli kom in esamuhl pacl nuhkwewa ac fahsr nuh yohrohl. El pahtok kuht.

“Fahsru nu yuruk, kowos su orekma ac totola, tuh nga fah sot mongla nu suwos.

“Eis srenenuh luhk nuh fowos ac lutlut keik, tuh nga fakpacp ac inse puhsisacl; ac kowos fah konwacack monglac.”⁶

Innek se ma e uskom nuh yohrohl uh pa in riti ke kahs lal, in ahsrosri luhlahlfongi nuh ke auliyak, in sulaclah in pacptaislac ac ahkkweyeyuhklac sin mwet sollac lal, ac in liyacacng olwelah lom nuh sel God. El suhpuh Nguhn Muhtahl nuh sum in mwe tahfweyom, mwet in ahkkweye kom, ac mwe kol.

Ke kom moul suwohs nuhke mwe sang luhn Nguhn Muhtahl, Leum el kuh in pwen kom nuh ke loangwelah finne ke kom tiac kuh in liye innek uh. Nuh sihk, El kwacna use nuh sihk step se tok kuh step luo ngwacn oruh uh. Suhpuhs pacl el use nuh sihk ngwacn liye ma e sikyak ke pacl fahsruh uh, ne ohinge finne pacl suhpuhs ma el use ngwacn liye pacl fahsruh inge el kol ma nga e oruh ke lwen nuhkwewa ke moul luhk uh.

Leum el ahkuhtweyac:

Kuht tiac kuh in liye ke muhtahsr sifacna uh—ke pacl ingena—plwacn luhn God lasr uh ke ma suc ac tuhkuh tohkoh ac wolacna ma ac tuhkuh tukun pacl upac yohk.

Ohinge tukun ma upac yohk uh mwe insewowo e tuhkuh.⁷

Mwe insewowo se ma yohk emeet ma e tuhkuh ke kuht ahkpwacyei kuht lah kuht tu na kuh ke olwelah lasr ke pacl upac lasr pa eklac se ke moul in mwet lasr uh. Ke kuht sulaclah in liyacacng olwelah lasr uh, kuh lal Jisus Kraist ac mwe insewowo ke Iwaclah lal kuh orekma nuh facsr. Insiacsr kuh in ahkfihsrwacsryeyuhklac in luhngse, in nuhnak muhnahs, ac in suli mwet sahyac in tuhkuh nuh yohrohl Mwet in Molwelah. Luhlahlfongi lasr kacl Leum yohkwelihk. Sahngweng lasr srihkeni.

Ingena, finne mwe insewowo olweyucklac ke kain pacl upac inge, kuht tiacna suk ma upac. Ke moul facluh lasr, oasr pacl wowo lasr in srihke kuht sifacna, in kuhtanglah mwe srihke upac in oacna Mwet in Molwelah lasr ac Pahpah Tuhmasr Inkuhsrao.

In weacng pac, kuht enenuh in akihlen ma upac luhn mwet sahyac ac srihke in kahsrwelos. E arulacna upac ke ac srihfeyuck pac kuht sifacna uh. Tuhsruhktuh kuht ac konwacack lah ke kuht e sruhkwack ma toasr luhn sie mwet sahyac uh, finne in kuhtasrihk na, fintohkohsr ac fokokoiyac kuht ac puhla sie kahlwem ke lohsr uh.

Ke ma se inge, Leum pa mwet in srihkasrak lasr uh. Fin sahksin luhn Golgotha, ke el kweokkihn mwe ngal na upac ma el kuh in misac kac fin tiac el pa Wen Kuloh nahtuhl God uh, el ngwet nuh yurin mwet ahkkohsyacl ah ac fahk nuh sin Pahpah Tuhmwacl, “Nuhnak muhnahs selos; ke srihpen elos tiac etuh ma elos oruh uh.”⁸ Ke pacl se el kweok luhn nohfohn mwet ma e fah moul fin facluh uh, El ngwetlah liyacl, fin sahkseng soko ah, John ac ninac ahsor kiacl ac kahsrwel ke pacl upac lal:

“Ke Jisus el liyacack ninac kiacl ah, ac mwet tuhma lutlut se tu siskacl ah, suc el luhngse, el fahk nuh sin ninac kiacl, Muhtwacn, liye mukul nuhtum!

“Na el fahkwacng nuh sin mwet tuhma lutlut sac, Liye ninac kiom! Ac ke ao sac tohkoh fahlac na mwet tuhma lutlut sac usacllah nuh ke lohm sel sifacna.”⁹

Ke mukwikwi lal ke lwen se ma muhtahl emeet ke lwen uh, el sang, moul lal kacsr kais sie, tiac kahsruh muhkwena el use ke moul se inge tuhsruhk moul ma pahtpaht ke pacl se ac tuhkuh inge.

Nga liye tari mwet in kapwack ke elos kuhtanglah ma upac ke luhlahlfongi. Ke alu uh misenge oasr srihkasrak. Mwet uh elos pahtokyuck in puhtati nuh ke niyaclos ke ma upac. Ke luhlahlfongi in kuhtanglah ac sang kuhiyaclos, elos eklac oacna Mwet in Molwelah ac Pahpah Tuhmasr Inkuhsrao.

Nga lotwelah pac sie mwe lutlut sin ninac kiyuck. Ke el fuhsr el maskihn diphtheria ac luhkuhn na misac. Tok kuhtuh na el maskihn sri ke fintohkohl ah. Pahpah tuhmwacl ah fuhsr na misac, oruh ninac kiyuck ac tamuhlwel wiyacl kahsruh ninac kiyacltahl ah.

Lusen moul lal, el puhla ma tuhkuh ke ma upac ke mas. Ke yac singucul ma el moul sahflah ah, el enenuh ono pucspucs. Tuhsruhk tukun ma nuhkwewa, el ahkpwacyei luhlahlfongi lal nuh sin Leum, finne ke el mas na an na ke ma kiacl. Petsac se muhkwena an ke sinkac se ke infuhkihl lal ma kacl Jisus. Kahs sahflah lal nuh sihk ke el oan fin mwe oan kiyacl apkuhran misac: “Hal, puhsrem oacna kom maskihnyuck. Kom enenuh karihngihn kom sifacna.”

Ke kuhfwen mas lal ah mwet se ma sramsram sahflah ah pa Elder Spencer W. Kimball. Tukun el fahk kuhtuh ke ma upac lal ac luhlahlfongi kampare lal, el fahk ma se inge: “Kuhtuh suwos acna nuhnkuh lah efuh Mildred elan kweok upac ac kweok ke puhluhn pacl na loeloes se. Nga e fahk nuh sum lah efuh. Ke srihpen Leum el ke ahkwoyacllah kuhtuhsrihk.”

Nga ahkkahlwemye kuloh luhk ke mempuhr puhkantwen ke alu luhn Jisus Kraist suc us ma toasr ke luhlahlfongi tiacna tikuclkucl ac mwet suc kahsruh mwet sahyac in us ma toasr lalos ke Leum el suk in sifilpacna ahkwoyacltahllah kuhtuhsrihk uh. Nga ahkkahlwemye pac luhngse ac kaksak nuh sin mwet karingin mwet ac mwet kol fin facluh nohfohn suc kahsruh mwet sahyac ke elos ac sucu lalos uh kampare ke ahkwoyeyuck uh.

Nga fahkwack lah kuht tuhlihk nuhtin Pahpah Tuhmasr Inkuhsrao, suc luhngse kuht. Nga puhla luhngse lal Prestuhn Russell M. Nelson nuh sesr nohfohn. El pa mwet pahluh lal Leum fin facluh misenge uh. Nga olwelah na pwacye ac fahkwack ke ine muhtahl Leum Jisus Kraist, amen.