Kaintamwarake n Onimaki

Tera aron kakaewenako aika matoa n te maiu n roota ara onimaki iroun Iesu Kristo? Ao tera ana mwakuri ara onimaki n te kimwareirei ao te rau are ti karekea n te maiu aio?

Bon inanon te ririki 1977. E tang te tareboon, ao te rongorongo ae e uruaki iai nanora. Inanon aia kamwaing Carolyn ao Doug Tebbs nakon mwengaia ae boou imwiin reken aia beeba n reirei. A roko kaain te kooram n unimwaane n ibuobuoki ni karaai aia bwai nakon te van. Doug, e taraia bwa e itiaki te kawai imwain ae e na baeki, e tara riki buuki te kabanea n tai. Te bwai ae aki nooria bon natina te aine ae uarereke, Jennie, e karina ni biri nako akuun te kaa. N te tai ae waekoa, e bua maiun natia ae bati n tangiraki, ae Jennie.

Tera ae nang riki imwiina? E na reke te unraa ae korakora imarenaia Carolyn ma Doug n te maraki ao te rawawata ae riao, ke tao e na kakorakora aia reitaki ao ni kamatoai aia onimaki n ana baire Tamara are i Karawa?

E bon bane te tai ae maan n rawawataia, ma e reke irouia te nano bwa a na aki bwarannano ma a na “reitanako iaon [kawaia].”¹ N te aro aei ao te taanga ae kakateke aei a karikirake anuan Kristo. E a bati riki aia motinnano. E a korakora riki aia nanoanga. A kakoaua bwa, n Ana tai te Atua, E na onei karawawatakiia nakon kabwaiaia.²

E boni ngae ngke e aki waekoa ni bua ke n toki te maraki ma te rawawata, a kabebeteaki Carolyn ao Doug n te kantaninga are man aia teimatoa inanon te euangkerio, Jennie ae bati n tangiraki irouia, bon natia n te tai ae akea tokina.³

Bannaia aei e kakorakora au onimaki n ana babaire te Atua. Ti aki atai bwaai ni kabane. Ma E atai. E tua te Uea nakon Iotebwa Timiti n te Karabuti i Liberty bwa “ni kabane bwaai aikai a na anganiko te kataneiai, ao bon ibukin kabwaiam. Natin te Aomata e a tia n rinanon ae buakaka riki ni bwaai akanne ni kabane. Ko kakannato riki nakoina?”⁴

Ngkai ti butimwaea ana kantaninga te Uea, E reireiniira arora n nakonako ma Ngaia.⁵ Ngke I mitinare inanon kairakeu i Tahiti, I tuangaki bwa N na buoka te ataei ae uarereke ae e aoraki. Ti katokai baira iaon atuuna ao ni kakabwaia bwa e na marurung. E a tabe n okira marurungina, ma e a manga moan aoraki naba. Te kauatai ti kakabwaiaa ma bon titebo naba te bwai ae riki. E a manga roko riki te kateniua ni bubuti. Ti bubutia te Uea bwa e na karaoaki Nanona. N te tai ae waekoa imwiina, te tamnei ae uarereke aei e okira mweengana i karawa.

Ma e rau nanora. Ti tangira te ataei bwa e na maiu, ma bon iai ana babaire te Uea. Butimwaean Nanona ao tiaki nanora bon kiingin te rau n taainako.

Ara onimaki ae uarereke iroun Iesu Kristo ngkai ti moana reiakinan Arona e kona n tiku inanora ngkai ti kaitarai kakaewenako n te maiu. E kona ara onimaki i Rouna ni kairira n tokanikai iaon kaangaangan te maiu. E koaua, ti na kunea bwa iai te bebete n te itera are teuana iaon kaangaangan te maiu⁶ ngkai ti “[teimatoa] i nanon Kristo, ma te kaantaninga ae tamaroa ma ni kororaoi.”⁷

Teuana oin bukin te maiu aei bwa ti na karikii atibu aika a tutuki n riki bwa atibu ni kaintamwarake ike ti tamarakea iai te bwai ae I aranna bwa “te kaintamwarake n onimaki.” E kona ni keerake ao ni kerikaaki ni kaineti ma rinerine ake ti karaoi.

Ngkai ti uaiakina kakorakoran ara onimaki iroun te Tia Kamaiu, tao ti tuai kona n nora ana tangira te Atua ibukira, ao tao ti ongeaba nakon ana tua ibukina bwa bon tabera. Namakinan te kairua e kona n riki naba bwa kaungakira ao tiaki te tangira. Ti bae n tuai n namakina te reitaki raoi Nakoina.

Ngkai ti ukora karikirakean ara onimaki, tao e bure otara n ana reirei Iakobo. E kauringiira bwa “te onimaki are akea ana makuri e matebuaka.”⁸ Ti kona ni bwaka ngkana ti taku bwa e bon nakoira bairean bwaai ni kabane. Ngkana e riao ara onimaki n ara konabwai e kona n tuuka karekean mwaakan karawa.

Ma ngkai ti waakirake n ara onimaki ae koaua iroun Iesu Kristo, a moanna ni bitaki nanora. Ti ataia bwa te ongotaeka ao te onimaki iroun te Tia Kamaiu bon te kawai bwa e aonga ni memena Tamneina iroura n taai nako.⁹ Te ongeaba, ai tiaki te bwai ae kaboneike ma e riki bwa te bwai ae uaiakinaki.¹⁰ Ti ataia bwa te ongotaeka n ana tua te Atua e anganiira te konaa n onimakinaki Irouna. Irian te onimakinaki aei bon rikiraken te oota. E kairii kawaira te ota aei ao ni kaota kawaira are ti na toua.

Eng, e bati riki. N rikiraken ara onimaki iroun te Tia Kamaiu, ti nora te bitaki ae uarereke are airi ma ara atatai n ara reitaki ma te Atua—bitakin te nano ae “Tera ae I tangiria?” nakon “Tera ae e tangiria te Atua?” N aron te Tia Kamaiu, ti tangiria ni mwakuri “ma akea au taeka, ma bon ane i Roum.”¹¹ Ti kani karaoa ana mwakuri te Atua ao n riki bwa bwaai ni mwakuri i nanon baina.¹²

Rikirakera bon te bwai ae akea tokina. E reirei Beretitenti Russell M. Nelson bwa e bati riki ae tangiria Tamara are i Karawa bwa ti na ataia.¹³ Bwa ngkai ti rikirake, ti mataata raoi n te bwai are e reirei te Uea nakon Iotebwa Timiti: Bwa ngkana kam kawakini au tua nako kam na karekea bwanininna, ao ni kamimitongaki irou; … I tuangkami, kam na karekea te akoi ibukin te akoi.”¹⁴

Bwa rietara ngaira n te kaitamwarake n onimaki, e a nakon ara rinerine. E reirei Unimwaane Neil L. Andersen, “E aki reke te Onimakin te manennanti ma man te rinerine.”¹⁵ Ti kona n rineia ni karaoi babaire ake a na karikirakea ara onimaki iroun te Tia Kamaiu.

Iangoa mwiin aia rinerine Reimwan ao Remuera ngke a ruorikaaki ni kaintamwaraken te onimaki, ao Nibwaai e tabe ni kekerake. Iai riki te katoto ae matata irarikin okoron ana kaeka Nibwaai ae “N na nako ao N na karaoi,”¹⁶ ma aia taeka maa Reimwan ao Remuera, imwin nooran te anera “E na kanga te Uea n anga?”¹⁷

Te nanokokoraki e tuuka ara konabwai n noori taian kakai, ma ara onimaki iroun te Tia Kamaiu, e kauka mwaakan karawa.

E ngae ngke e mamaara ara onimaki, E na arora baina te Uea nakoira n taainako.¹⁸ N ririki aika bwakanako I mwiokoaki bwa N na manga baronga te titeiki i Nigeria. N te kabanea ni miniti, iai te bitaki nakon te tai. Iai te mwaanen te tieiki are e baireia bwa e na kitana te taaun ni moan bongin te namwakaina ibukin te maungatabu. E aki tangiria bwa e na weteaki bwa te beretitenti n te titeiki.

Inanon mwanangana, e reke n te kabuanibwai ae karina, ma e aki ikoaki. E roko irouna te iango ae kangai bwa bukin tera ngkai e katanaki maiuna. E tirobaea ana babaire are e a tia ni karaoia. E rairananona ao n nanorinano n ira te maungatabu n taina ae boou. Ao eng, e weteaki bwa te beretitenti ae booun te titeiki.

E reirei Unimwaane Neal A. Maxwell: “Tii man kaboraoan maiura ma ana kantaninga te Atua ae reke iai te kukurei ae bwanin. Te bwai ae aki te kainibaire aei e aki karekea te kukurei ae bwanin.”¹⁹

Imwiin karaoan “bwaai ni kabane aika a wene ni mwaakara,” e a boo taina bwa “ti na tei … n noora ana kamaiu te Atua.”²⁰ I noora aei ngke I mwakuri bwa te tari n ibuobuoki nakoia te utu ae McCormick. E mare n te maan ae 21 te ririki, e beku ma te kakaonimaki Mary Kay inanon weteana. Bon tiaki kaain te Ekaretia Ben ao akea nanona ni kan riki karin, ma ibukin tangira buuna, e motikia teuaei bwa e na ira kainnabana n taromauri.

N te Tabati teuana, I karekea te namakin bwa N na anga au koaua nakon Ken. I titirakinna ngkana I kona n tibwatibwa. E bebete man oota raoi ana kaeka: “I aki, ko rabwa.”

I aki rang ota raoi. E roko irouE te wirikiriki ao ni kataia n iria. E kaririiaki nanou ni baireia bwa I a tia ni karaoa tabeu. Ma imwiin te tataro ao manga iangoana riki, I kona n noori bwa e ngae ngke a eti baike I iangoi, I bon katan iaon wanawau ao teutana iaon te Uea.

Imwiina I a oki ma te kantaninga ae kaokoro. N na bon tii nako bwa te bwai ni mwakuri ni bain te Uea n akea riki nanou nakon ae N na ira te Tamnei. N ikotaki ma toau ae kakaonimaki, ae Gerald Cardon, ti a rin ni mweengan te utu ae McCormick.

N te tai ae waekoa imwiina, I namakina te wirikiriki bwa N nakaoa Gerald bwa e na anenea “I Know That My Redeemer Lives.”²¹ E taraai kanga e mata n titiraki, ma reken te onimaki n au onimaki, e karaoia. Te tamnei ae tamaroa e kaona nanon te ruu. E roko te wirikiriki bwa e na kaoaki Mary Kay ao Kristin, natiia te aine, bwa e na tibwaua ana koaua. Ngke a tia ni karaoia, e rikirake ni korakora namakinan te Tamnei. Ni koauana, imwiin kaotan ana koaua Kristin, a bon waanako raninmatan Ken iaon ubuna.²²

Bon te Atua ae onomwi ni karaoa te tararua. A aki tii riingaki naano ma a bitaki n akea tokina. Uabwi-ma teuana te ririki n aki kakoaua a kaitiakaki nako man mwaakan te Tamnei ae Raoiroi. Teuana te wiiki imwina, e bwabetitoaki Ken. Teuana te ririki imwiina, a kabaeaki Ken ao Mary Kay n ana auti te Uea ibukin ngkai ao n aki toki.

Ti a bane n tia ngaira ni kabane n rinanon te baere e nanonaki n oneimwiin ara kantaninga ma ana kantaninga te Uea, ao e rikirake ara onimaki Irouna.

Taiaoka iangoi titiraki ake a taekinaki irouia ana burabeti te Atua ngkai ko kataia n tamwarakea kaintamwaraken te onimaki:

E a tia n nako te kainikatonga mai irou?²³

E kona n reke nnen teutana ana taeka te Atua inanou.?²⁴

I kariaia bwa e na oneaki karawawatau nakon taian kakabwaia ibukiu?²⁵

I tauraoi n anaaki au baire nakon nanon ana baire te Tama?²⁶

Ngkana I a tia n namakina te kan anenea kunan te tangira nikabomwi, I kona n namakinna ngkai?²⁷

I kariaia te Atua bwa boton au iango inanon maiu?²⁸

Ngkana ko kunea bwa e kauntaba kawaim ae ngkai ma am onimaki iroun te Tia Kamaiu, ngkanne taiaoka kakaea kawaim n oki Nakoina. Karietataakim ao naan nako kanoam e bon katan iaona.

Ti bia unika koraan te onimaki i kabin nanora. Ti bia ribanai koraa aikai ngkai ti kabaira nakon te Tia Kamaiu man karinean berita ake ti karaoi ma Ngaia. N aran Iesu Kristo, amen.