Rikim Mai Iroun te Atua ao Tokin Kawaim ae Akea Tokina
I kaoko bwa ko na kabotoa maium iaon Iesu Kristo ao n uringii moan koaua ake n aia boto ni Iango Ataeinaine.
Nakoia tititati aika kam tangiraki, kam rabwa ibukin menamii ikai. I namakina te karineaki ni ira buakon te tetere ibukiia aine n te maungatabu ni kabuta aio. Ni bootaki tabeua E reke naba au tai ni irii aia kiraati Ataeinaine. Ma N a kaota te bwai ae e rangi ni mataata—Tiaki ngai te kairake, ao tiaki ngai te aine! Ma e ngae n anne, I reiakinna, ae I namakina aki katinanikuau ngkana I iriia Ataeinaine n taekina te boto ni Iango ibukiia Ataeinaine. Te reirei ae nano ae e reiakinaki n aia boto ni Iango Ataeinaine1 e kakawaki ibukiia ataeinaine, ma e kaineti nakoira ni kabane, ni ikotaki ma ngaira ake tiaki ataeinaine.
E taku aia boto ni Iango Ataeinaine, “Ngai te nati aine ae tatangiraki irouia kaaro ake i karawa, ma rikiu mai karawa ao tokin kawaiu ae akea tokina.”2 Iai aua koaua aika kakawaki ae kona ni kuneaki n te rongorongo aei. Te moan, bon ngkoe te nati te aine ae tangiraki. Akea te bwai ae ko karaoia—ke ko aki karaoia—ae e na bita anne. E tangiriko te Atua ibukina bwa bon ngkoe Natina te aine n tamnei. N tabetai ti na bae n aki namakina Ana tangira, ma e mena ikanne n taainako. E koro raoi Ana tangira te Atua.3 Ara konabwai n namakina te tangira anne e bon aki.
Te Tamnei bon te mwakoro ae kakawaki n te reitaki ma Ana tangira te Atua nakoira.4 E ngae n anne ana kairoro te Tamnei ae Raoiroi e kona ni karooaki “man namakin aika korakora, n aron te un, kairiribai,” … [ke] te maaku … n aron kataakin noran kangkangin te kureebe inanon am taini kana te beba ae moan te tena. … [Kangkangin teuana] e taonanako ni kabane are teuana.”5 Ai bon arona naba, te anua are e kararoaira ma te Tamnei ae Raoiroi, ni ikotaki ma te bure,6 e karika kangaangan nooran Ana tangira te Atua ibukira.
N ae titebo, ara namakin n ana tangira te Atua e na bae ni kerikaaki man taian kakaewenako aika riki ao man aorakin te rabwata ke te iango, irarikin bwaai riki tabeua. Ni keti aikai ni kabane, taeka n ibuobuoki mai irouia taan kairiiri aika a onimakinaki ke taan rabakau aika mwaatai a kona n ibuobuoki n taainako. Ti kona naba ni karikirakea arora ni butimwaea Ana tangira te Atua man titirakinara, “E teimatoa au tangira ibukin te Atua ke I ti tangiria ngkana e nakoraoi au bong ma e karako ngkana e nakobuaka au bong?”
Te kauoua ni koaua bwa bon iai ara karo i karawa, te tama ao te tina.7 Te reirei iaon Tinara are i Karawa e roko man te kaotioti ao bon te koaua ae kaokoroira ngaira Aika Itiaki ni Boong aika Kaitira. Beretitenti Dallin H. Oaks e taekina kakaawakin te koaua aei: “Ara koaua ni kamtebwaian te Atua e moanaki mai irouia kaaro i karawa. Te bwai ae te kabanea n rietaata ae ti tangiria bon te riki n ai aroia.”8
E rangi ni karako ae e a tia ni kaotaki iaon Tinara i Karawa, ma ae ti ataia ngkai e bon kakimototoaki rongorongona n te gospel topic essays ae e kuneaki inanon ara Gospel Library.9 Ngkana ko a tia ni wareware ni baike inanona, ko na atai bwaai ni kabane ake I atai iaon te atuu n reirei aei. Au iango bwa I atai riki aika a mwaiti. Ngkoe naba tao iai am titiraki ao ko tangiria ni kunei riki kaeka aika mwaiti. Ukeran te atatai riki ae korakora bon te mwakoro ae kakawaki n rikiraken maiun tamneira, ma taiaoka taratara raoi. Mwiin te iango e aki kona n onea mwiin te kaotioti.
Iango ni katautau a aki kona ni kairiko nakon atatai n tamnei, ma e kona ni kairira nakon te mwamwanaaki ke ni bita ara nonoori man te bwai are e a tia ni kaotaki.10 Te katooto, te Tia Kamaiu e reireiniia Ana reirei, “Ngaia are kam na aki toki n tataro n tainako nakon te Tama n Arau.”11 Ti iira te baeten aei ao ni kaineta ara taromauri nakon Tamara are i Karawa n aran Iesu Kristo ao ti aki tataro nakon Tinara are i Karawa.12
Ma ngke e moan rineia burabeti te Atua, a tia ni kariaiakaki bwa a na taetae Ibukina. Ma aki taekinii reirei aika oteaki “man oin [aia] iango”13 ke n reirei baika a tuai ni kaotaki. Iangoa te taeka man te O Tetemanti iroun te burabeti ae Baraam, are e karangaki n te mwane ni kamaraato ni kabuakakaia Tibun Iteraera ni bwaibwai i Moaba. E taku Baraam, “Ngkana tao e anganai [uean Moaba] te tirewa ma te koora ae e on ana auti iai, I aki kona n ri aon ana taeka Iehova ae Atuau, ni karaoa ae karako riki ke ae maiti riki.”14 Burabeti ni boong aikai iai naba kabaeaia n aron anne. Kairoroan kaotioti mai iroun te Atua bon te kainikatonga ao a na akea mwiina. N oneamwina, ti na tataninga te Uea ao ni bon Ana tai E na kaotii Ana koaua rinanon te kawai are E a tia ni katauraoia.15
Te kateniua ni koaua n te mwakoro ni kaukuuki n aia boto ni Iango Ataeinaine bwa bon iai “rikira mai i karawa.” Aio bon te mwakoro ae kakawaki bwa antai raoi ngaira. Bon te “riki” man te maiu n tamnei ae e reke mai irouia ara karo i karawa,15 ao e aki tangira mwakuriana man ara itera. Bon aio kinaakira ae kakawaki, n aki ongea bwa e kangaa riki rinean kinaakira ibon iroura. Te mataata iaon te koaua ae e rangi n nano aei e kakawaki ibukira ni kabane ma e moamoa riki nakoia aomata n te karinan ake a tia inanon rongorongoia ni kakerikaakaki, aonikaiaki, ke n tauaki aroia. Uringnga bwa kinaakim ae moan te kakawaki e toma ma rikim ae mairoun te Atua ngkai bon natin te Atua ngkoe.
Te kaaua ni koaua bwa bon iai “tokin kawaira ae akea tokina.” Tokin kawaira aei e na aki kairoroaki iaora. Imwiin te mate, ti na karekea are ti bon tau nako iai ao “ni kukurei n [ti] te bwai are [ti] tauraoi ni karekea.”17 Ataakin tokin kawaira ae akea tokina e boboto iaon ara rinerine. E kainanoa karaoan ao kawakinan berita aika tabu. Kawain te berita ae tabu aei bon te kawai n roko nakon Kristo ao e boboto iaon koaua aika eti raoi ao akea tokiia, ao tuua aika aki bibitaki. Ti aki kona ni karaoi oin kawaira ao ni kantaningaa mwiin Ana berita te Atua. Kantaningaan Ana kakabwaia ngkai ti aki irii tuua aika akea tokiia ake a boto iaona18 e bon te kaairua, n aron iangoan ae ti kona n riinga te tiboobu ae kabuebue ao ni “iangoa” ae tina aki buee.
Tao ko ataia ae rimoa I bubuokiia aoraki ake a mamara mamaaia. Mwiin tuoakiia ae koaua a bon karekeaki man irakin babaire aika a kateaki, n aron katokana are e tia n nooraki mai imwaaina. Ma irarikin ataakin aei, tabeman aoraki a kataia ni karinii babaire aika a kaokoro n aron katokana. A taku, “I aki tangiria n anai riki bwai n aoraki aika mwaiti” ke “I aki tangiria n rinanon te tutuo ae mwaiti.” Eng, bon iai inaomataia aoraki ni karaoi oin aia babaire, ma ngkana a tannako man te babaire ae tamaroa n aron katokana, e na iai te kangaanga mwiina. Aoraki ake iai aorakin buroiia a aki kona n rinea te kawai ae memeere ao imwiina a bukina aia taokita n te buroo ibukin mwiina ae aki tamaroa.
E bon koaua aei naba nakoira. Tamara are i Karawa e katauraoi kawai ae irakina a na uotiira nakon mwiia ae akea tokina. Ti inaomata n rinerine, ma ti aki konaa n rinea te bwai ae e na riki imwiin aki irakin te kawai are e kaotaki.19 E taku te Uea, “Ane e urua te tua, ao n aki maiuakina te tua, ma ni ukoukouria n riki n tua i bon irouia, … e aki kona ni katabuaki n te tua, ke n te nanoanga, te motiraoi, ke te motikitaeka.”20 Ti aki kona ni katannako man ana kawai Tamara are i Karawa ao imwiina ti bukinna ibukin mwiina ae aki tamaroa.
Te kauoua ni barakarabe inanon aia boto ni Iango Ataeinaine e kangai: “Ngkai ana reirei Iesu Kristo, I kataia n riki n ai Arona. I ukoukori ao ni mwakuriia oin au kaotioti ao ni buokiia tabeman n Arana ae tabu.” Ti konaa ni karikirakea te koaua iaon Iesu Kristo man te mwakuri n onimaki.21 Ti kona ni karekei bwai n tangira n tamnei “n ataia bwa Iesu Kristo bon Natin te Atua, ao bwa e tauraki ibukin buren te aonaaba.” Ke ti kona ni karekea te bwai n tangira ni kakoaua man aia taeka naake a bon ataia,22 ni karokoa ae ti ataia i bon iroura. Ti kona n ira ana reirei te Tia Kamaiu ao ni buokiia tabeman n roko Nakoina. N te kawai aei, ti reitaki ma Ngaia n Ana mwakuri.23
E taku riki aia boto ni Iango Ataeinaine, “N na tei bwa te tia kakoaua ibukin te Atua n taainako ao ni bwaai nako ao n taabo nako.” Ni kabane membwa n te Ekaretia a kainanoaki bwa taan kakoaua iroun te Atua,23 e ngae ngke Abotoro ao Kaitingaun a katauaki bwa taan kakoaua aika onoti n aran Kristo.25 Iangoa te kaboo n te takakaro ae te butibooro are bon ti te tia kawakina te kouru ae e tararuaa te kouru. N akean aia ibuobuoki taan takakaro n te tiim ake tabeman, e bon aki kona te tia kawakina te kouru ni kanakoraoa tuukan te kouru, ao e na bon aki toki ni konaaki te tiim. Ai arona naba, a bane ni kainanoaki aomata nako n ana tiim te Atua.25
Te kabanea ni barakarabe n aia boto ni Iango Ataeinaine e moanaki man: “Ngkai I kataia bwa N na tau ibukin te karietataaki, I kawakina te bwaintituaraoi ibukin te rairannano ao n ukoukora ae tamaroa riki ni katoa bong.” Ibukin ana anganano ni kamaiu te Tia Kamaiu, ti kona n raira n nano, n reirei man ara kairua, ao n aki kabuakakaaki irouia. Beretitenti Russell M. Nelson e reirei: “A rangi ni mwaiti aomata aika a taraa te rairannano bwa te katuua. … Ma te namakin n te katuaeaki aei e riki mai iroun Tatan. E kataia n totokoira bwa ti naaki taraa Iesu Kristo, are e tei ma baina aika a tangaina, kantaningaia ao n tangiria ni kamaiu, ni kabwara bure, ni kaitiaki, ni kakorakora, ni kaitiaki, ao ni kaitiakiira.”27
Ngkana ti raira n nano ma te nano ni koaua, akea te maneka n tamnei ae e na tiku, n aki tabe bwa tera ae ti a tia ni karaoia, aekakira aron kaakaiakina, ke mwaitira te tai ae ti aki toki iai ni kakaraoia.28 Ni mwaitin te tai ae ti raira nanora iai ao n ukora kabwaraan ara bure ma nanora ni koaua, a kona ni kabwaraaki ara bure.29 Ai tamaroara te bwain tangira mai iroun ara Tia Kamaiu, Iesu Kristo!30 Te Tamnei ae Raoiroi e kona ni kaota koauana ae e a tia ni kabwaraaki ara bure. Ngkai ti namakina te kimwareirei ao te rau,31 e mauna nako namakinan te kairua,32 ao ti aaki manga karawawataaki man ara bure.33
E ngae ngke imwiin te raira n nano ae koaua, ma, ae ti na bon bwaka. Te bwaka tiaki nanona ae te tia raira nanona akea konabwaina ma tao e ti riki man mamaaran te aomata. E karaunano ataakina ae “Te Uea e taraa te mamaara n ae kaokoro ma are E [nooria] n te kakaaitara.” Ti na aki nanououa n ana konabwai te Tia Kamaiu ni buokiira n ara nano mamaarara, ibukina “bwa ngkana e taetae te Uea iaon te mamaara, e aki toki n taekinna ma te akoi.”33
Aia boto ni Iango Ataeinaine e motikaki, “Ma te onimaki, N na kakorakora mweengau ao au utu, ni karaoi ao ni kawakin berita aika tabu, ao ni karekei otenanti ao kakabwaia man te tembora ae tabu.” Kakorakoraan te mweenga ao te utu tao e nanonaki ni karaoan te moan itoman n te kakaonimaki ae reireitaki, uotakin te mwioko n onimaki, ke ni kaokana.35 N aki tabe bwa tera, te korakora e roko rinanon te onimaki iroun Iesu Kristo ao man karaoan berita aika tabu.
N te tembora, ti reiakinna bwa antai ngaira ao ti mwananga mai iaa. Te tia ataibwai iaon rabakau mai Rome ae Cicero e taku, “N aki mutiakina te bwai ae riki imwaain ae ko bungiaki bon tikum bwa ai te teei nako naba ngkoe.”36 Eng, e bon, katiteboa ma rongorongon bwain aon te aba, ma ana nonori ae nano e kona ni karababaaki. Ti teimatoa ni maeka bwa ataei ngkana ti bangabwai n taian nonoori aika akea tokiia ake ti karekei n te tembora. Ikekei ti rikirake inanon te Uea, “karekea bwaninin te Tamnei ae Raoiroi,”37 ao n rangi n nanomatoa bwa taan iriira te Tia Kamaiu.38 Ngkai ti kawakin ara berita, ti karekea mwaakan te Atua inanon maiura.39
I kaoko bwa ko na kabotoa maium iaon Iesu Kristo ao n uringii moan koaua ake n aia boto ni Iango Ataeinaine. Ngkana ko kariaia, e na kairiko te Tamnei ae Raoiroi. Tamara are i Karawa e tangiriko bwa ko na riki bwa te Tia Bwaibwai Irouna ao ni karekei Ana bwai ni kabane.40 E aki kona n anganiko riki iaona. E aki kona ni beritaniko riki iaona. E tangiriko riki nakon ae ko ataia ao bwa ko na kukurei n te maiu aei ao n te maiu are e na roko. N aran Iesu Kristo, amen.