Kamimin Kristo ma Ana Euangkerio
Ke e riki uringan baike a noori matara ao n namakin nanora bwa kakorakoraan te nano ni mimi n ana mwakuri ni kamaiu te Tia Kamaiu.
Iai raoraou, te tia reirei n te kuura n reirei ae rietata, e wanawana, e koroi boki aika a bati, ao bon te tia irira Iesu Kristo ae kakaonimaki. E a tia n roko n te Aba n Tabu irabwi te tai ni kaean te bowi, karaoan te kakae, ao karaoan te kaneweaba. E taku ana taeka bwa ni katoa tai are e roko iai n te aba are e nakonako iai Iesu, e mimi bwa e reke irouna te reirei ae boou, tamaroa, ao kakaongora iaon te Tia Kamaiu. Ana mwakuri iaon te aba, ao Abana ae tangiraki. Te nano ni mimi aio e teretere ngkana e rarangai baike e reiakin n te Aba ae Tabu ao e kakaongora, ao te nano ni mimi aio boni ngaia aan ana tokanikai aika korakora ao ana mwakuri ni maiuna.
N au tai n ongora ana karaki ao n namakina korakoran nanona, I tabe n iangoia bwa mwaitira te korakora ae tabu, eng, ae ti kona ao n riai n namakinna n Ana euangkerio Iesu Kristo ao te bitaki are e na uotia nakon maiura n iriira Iesu ao kawaira ni karekea te maiu ae akea tokina. Te nano aei bon namakinan rootakin te nano, te mimi, te kuba are reke irouia naake a katei aan maiuia iroun te Tia Kamaiu ao Ana reirei, ao naake a kananorinanoia kioina bwa e maeka i nanon maiua. Te nano ni mimi aei, e roko mairoun te Tamnei ae Raoiroi, e karekea te ungannano ni maiuakina ana reirei Kristo.1
A koreaki ni koroboki aika a tabu aron kaotin te namakin aei. Te katooto, Itaia, e kaota nanona ni kakaitau nakon te Uea rinanon ana nebonebo nako Ina.2 Naake a ongora n ana reirei Iesu n te tinakaoke i Kaberenaum a bon mimi n Ana reirei ao angin nanona ae korakora n Ana angareirei.3 Bon te namakin naba aei are e ninia nanon Iotebwa Timiti ngke e wareki kiibu man ana boki Iakobo n te Baibara te moan mwakoro n Iakobo, are e kaumakia bwa e na ukoukora te rabakau mairoun te Atua.4
Tariu ma mwaaneu aika a tangiraki, ngkana ti mimi iroun Iesu Kristo ao n Ana Euangkerio, ti bati ni kukurei, ti unga ni karaoa ana mwakuri te Atua, ao ti ataa bain te Uea ni bwaai nako. N reitaki ma anne, e tamaroa riki ara kamatebwai n ana taeka te Atua; ara tataro, e nanonaki raoi; ara nebonebo, e karinerine; ara mwakuri n abanuean te Atua, e botumwaka. Mwakuri aikai a ibuobuoki nakon ana mwakuri te Tamnei ae Raoiroi inanon maiura.5 Ngaia are, e kakorakoraki ara koaua iroun te Tia Kamaiu ma Ana euangkerio, e maiu Kristo i nanora,6 ao tein maiura e “wakaa man rikirake irouna, ao e nene n te onimaki, … ni maeka ma te nano ni kakaitau.”7 Ngkana aio tein maiura, e marurung tamneira ao ti kamanoaki man te bwaka n te kamwane ae kangai bwa e kabotu te maiu ni kiritian.
Te botu aei e riki man buan nanora teutana imwin teutana ao ti kaki baira man maiuakinan Ana euangkerio te Uea. E moanaki ngke ti namakinna bwa bwa a bane n tia n reke iroura te rabakau ao kakabwaia ibukin kukureira n te maiu aei. Te anua aei, eng, e unika inanora kakeaan bongan kakabwaia, ao mai ikanne, are ti a toki naba man karaoan bwaai aika a kakaawaki n Ana euangkerio Iesu Kristo8 ao ara berita aika a tabu. Te bwai ae e na riki, ti tabe ni kararoaira mairoun te Uea; ao ni kamamaara ara konabwai n “ongo i Rouna,”9 ao n ribaa ma ni kakea bongan mimitongin Ana mwakuri. Te nanokokoraki n ara koaua ake ti a tia ni karekei e kona n ninia ara iango ao nanora, ike ti a kai rotaki iai n ana kariiri te tia kakaitara.10
Te Mitinare ae Aiden Wilson Tozer, te tia koroboki ae te Kiritian ae ninikoria, e koreia, “Oin kukureim i bon iroum bon ana kairiribai ae kamamate te rikirake n te maiu n tamnei.”11 Tiaki raoi aei ae riki nakoia ana aomata Nibwaai teutana te tai imwiin bungiakin Kristo? A “moanna n aki mimi n te kanikina ke te kamimi mai karawa, … n “[aki kakoauai] bwaai ni kabane ake a tia n ongo man noori.” Ngaia are Tatan, e “kamataki mataia ma ni kairiia nako ni kakoaua bwa ana reirei Kristo bon te bwai ae burababa man akea manena.”12
Tariu ao mwaaneu, n Ana tangira ae korakora man akea tiana ao ataakin anuara n aomata,13 e a tia te Tia Kamaiu ni katauraoa te kawai bwa ti na aki mwane n te kai ni kamwane ae te botu ni karaoan ae raoiroi. Ana kakao te Tia Kamaiu, e anganira te taratara ae abwabwaki, n te aonaaba ae mangaongao are ti maeka iai, “Reiakina taekau, ao ongo n au taeka; nakonako ma te nimamannei n Tamneiu ao ko na karekea te rau mai irou.”14 Ngkana ti butimwaea ana kakao te Tia Kamaiu, ti kaota ara nanorinano, nanora ni kan reireiaki, ao ara kantaninga ni kan riki n ai Arona.15 Kanoan te kakao aei bon te beku i Rouna ao buokaia natin te Atua “ma nanora ni kabane, marurungira, ara iango, ao korakorara.”16 Eng aan ara waaki inanon maiura, bon uoua tuua aika a korakora: tangiran te Uea Atuara ao tangiraia kaain rarikira n ai arora.17
Te aeka n anua aei boni katein te Tia Kamaiu ao e teretere ni bwaai ake E karaoi n Ana mwakuri iaon te aba.18 Ngaia are, ngkana ti rineia ma te koaua bwa ti na anga nanora ni kabane nako Ina ao n reirei man Ana katoto,19 e rikirake kinaakina iroura. E rikirake ungan nanora ao ara kantaninga n ira te kainibaire are ti bon riai n iria, te banna ae ti riai ni kaotia, ao tuua aika ti riai n irii. E rikirake naba rabakaura, wanawanara, kateira aika a tabu, ao tangiran te Atua ao kaain rarikira.20 Akea au nanokokoraki bwa e na raka ana kona n namakina korakoran ma ana tangira te Tia Kamaiu inanon maiura, e na kakorakora ara onimaki, nanora ni karaoa ae raoiroi, ao nanora ni beku i Rouna ao tabemwang.21 Irarikin anne, e na korakora ara kaitau ibukin kakabwaia ao kakaewenako ake ti kaitarai inanon maiura ao n riki bwa ara nebo ni koaua.22
Raou aika tangiraki, bwaai aikai a na kakorakora nanora n te euangkerio ao ni kaungaira nakon kawakinan ara berita ma te Uea—riki inanon taai ni kataaki ao kakaewenako aika ti kaitara ma ngaai. E koaua, a riki bwaai aikai ngkana ti kamatebwai ana reirei te Tia Kamaiu ma te onimaki ao te nano ae koaua,23 ni kataia ni karikirakei Kateina inanon maiura.24 Irarikin anne, ti riai ni kaania rinanon te rairannano,25 n ukoukora kabwaraan ara bure mai Rouna ao mwaakana ni kamaiu inanon maiura ao kawakinan Ana tua nako. E berita te Uea bwa E na kairi kawaira ngkana ti onimakinna ma nanora ni kabane, n reitaki ma Ngaia ni bwaai nako ao n aki mwiokoa oin ara ataibwai.26
I kaitibo ma temanna te mmwane, arana Wes are raora n te maungatabu n te bong aei, e butimwaea te kakao bwa e reirei taekan Iesu ao Ana euangkerio ao e a tibwa noora kamimin Ana tangira n te maan ae 27 te ririki imwin kararoakina man kawain te berita. E karaki nakoiu n taku bwa e roko te rongorongo irouna n te Facebook mairoun te mitinare, ae Unimwaane Jones, are mwakuri n ana aono Wes imwain mwanangana nako Panama. Unimwaane Jones ngke e nora ana profile Wes, ao n aki ataia ae bon kaain te Ekaretia, e wirikirikinaki iroun te Tamnei ae Raoiroi n ataia bwa e riai n reitaki ma Wes. E ira te wirikiriki are e karekea. E mimi Wes n te kan reitaki aei ao e ataia bwa ngaia e kinaaki iroun te Uea e ngae ngke e a tia n teiraroa man kawain te berita.
Man te tai anne, A moana aia rereitaki Wes ma mitinare. A karaoa aia mwakuri n ibuobuoki Elder Jone ao toana n reitaki ma koaua ake a buoka Wes ni manga karekea te nano ni mimi iroun te Tia Kamaiu ao Ana euangkerio. E manga kaura ain ana koaua n te koaua ao ana tangira te Tia Kamaiu ibukina. E namakina te rau Wes mairoun te Tia Karaunano ao ni karekea te korakora are kainnanoia n oki nakon te nanai. E karakinna bwa aei are kaoka marurungin tamneina ao ana iango ao ni buokia ni kanakoa namakinan te un are e ikoiko inanona ibukina bwa e rinanon kangaanga aika a matoa.
N aron are e taekinna raoraou are te tia reirei, iai n taainako te bwai ae tamaroa ma ni kamimi n rongorongo Iesu Kristo ma Ana euangkerio.27 E a tia te Uea n anga berita aika tamaroa nakoia aomata, ao ngaira, ake ti ukoukoria man maiuakin Ana taeka inanon maiura. “E taku nakon Enoka, Nooria [e mena] Tamneiu i aom, ngaia are am taeka ni kabane N na kariaia; ao a na mwaing maunga imwaaim, ao karaanga a na bita kawaia; ao ko na mena irou, ao Ngai iroum.”28 Ana taeka rinanon Ana toro te Uea ae Beniamina, “kam na aranaki bwa natin Kristo, natina mwaane, ao natina aine; bwa taraia, n te bong aio ao e a tia ni manga bungia tamneimi; bwa kam taekinna bwa a bitaki nanomi rinanon onimakinan arana; mangaia ae kam a bungiaki irouna ao kam a riki bwa natina mwaane ao aine ngkami.”29
Ngaia are, ngkana e koaua man waaki nako ara reirei iroun te Tia Kamaiu ao n ira Ana katoto, I berita nakoimi, n Arana, bwa a na karinaki kateina aika tabu n ara iango ma nanora,30 n te aro bwa ti na riki n ai Arona, ao ni mwananga ma Ngaia.31
Tariu ao mwaaneu aika tangiraki, Au tataro bwa ti na kateimatoa te nano ni mimi iroun Iesu Kristo ao Ana tangira ae bwanin, akea tiana, man kororaoi. Ke e riki uringan baike a noori matara ao n namakin nanora bwa kakorakoraan te nano ni mimi n ana kamaiu te Tia Kamaiu, are e kamaoi ikoakira n tamnei ao ikoakin ara iango ao ni kaanira ma Ngaia. Ke ti mimi n ana berita aika tabu ake inanon bain te Tama ao are E katauraoi ibukia naake a kakaonimaki:
“Ami bwai te abanuea ao kakabwaia mai iai bon ami bwai, ao kaubwain are akea tokina bon ami bwai.
Ao ane e butimwaai bwaai ni kabane ma te karabwarabwa e na kamimitongiaki.”32
Iesu bon te Tia Kamaiua te aonaba, ao aio Ana Ekaretia. I kaota au koaua ni koaua aikai n aran ara Tia Kamaiu ae kamimi, tabu, man rine, Iesu Kristo, amen.