Botumwakara n Irira Iesu ni Boong aika Kaitira

Te inaomata n rinerine bon ana bwaintituaraoi te Atua ae moan te kakawaki nakoia Natina ni kabane.¹ Ti “inaomata n rinea te inaomata ao te maiu ae akea tokina, rinanon te Tia Raoi ae korakora ibukiia aomata ni kabane, ke n rinea te tautoronaki ma te mate, n aron ana tautaeka ma mwaakan te riaboro.”² Te Atua e aki kona n taumatoaira bwa ti na karaoa ae raoiroi, ao e aki kona naba te riaboro n taumatoaira bwa ti na karaoa ae buakaka.³ E ngae ngke a iangoia tabeman bwa te maiu ae mamate bon te kakabo imarenan te Atua ao te tia kakaitara, te taeka mai iroun te Tia Kamaiu “ao Tatan e mabu ao e kakeaaki. … Bon korakorara are e [kataaki]—ma tiaki korakoran te Atua.”⁴

Ma ngaia are n tokin te tai ao ti na kana uaan ara rinerine ake ti a tia n unikii.⁵ Ma e kangaa aron katinean ara iango, ma nanora, ma ara taeka, ao ara mwakuri ibukin kaotan ara tangira ibukin ara Tia Kamaiu, Ana toro ake e a tia n rineiia, ao Ana Ekaretia are e a tia ni manga kaokaki? E rangi ni kakawaki riki iroura ara bwabetito, te nakoa n ibonga, ma ara berita aika ti karaoi n te tembora nakon tangirara n te aonaaba aei ke mwaitin kaotan “tangiram” iaon bwaai n reitaki n te intanete? E korakora riki ara tangira ibukin te Uea ma Ana tua nakon ara tangira ibukin bwaai riki ke tabeman riki n te maiu aei?

Ai kaman ana mwakuri teuare buakaka ni kataia n urua aron ana mwakuri Kristo ma Ana burabeti. N aron taraakina ngkai, ao ana tua ara Tia Kamaiu, a tia ni kamwinibaeaki irouia aika mwaiti ni boong aikai. A katinanikuaki ana taan uarongorongo te Atua ake a reiakin koaua aika “matoatoa”. Te Tia Kamaiu naba e aranaki bwa “te aomata ae buakaka, ae te tia nim wain,”⁶ ao ni bukinaki bwa te tia kamangaoi nanoia te botanaomata ao te tia kaunuun. Koraki ake aki konai uotaia man kataia ni kamwanea “a kataia ni karaoi aanga are a na kamwanea inanon ana maroro,”⁷ ao Ana “botaki” ake tenaan moan Kiritian “n taabo ni kabane … a taetae ni kabuakaka.”⁸

A kaitaraaki Te Tia Kamaiu ma Ana taan iriria irouia taan kaitara mai inanoaa ao mai tinaniku, ao ti taneiai naba iai. N te bong aei ao e a kuri kangaanga riki ae ti na maiu ma te korakora n aki kauntabaaki man waaki n te aonaaba aei. N tauraoi n iriira te Tia Kamaiu bon te kaniwanga, ma n tabetai ao ti kona ni manga iraraang n aia kariiri tabemwaang nakoira n aron te taetae ni kaikonaki are “amarake, moi, ao kimareirei”⁹ are ti kona n manga tarariaoa aron ara onimaki iroun Kristo, ara ongotaeka, ma ara rairannano iaan te koaua are ti kona n aranna bwa e riai imatan te Atua te bure ae uarereke bwa E rangi ni bati n Tangiriira.

Ni Bwanaana “are nako mai [Irouna] ke mai irouia [Ana] toro,”¹⁰ ao e taekinna ngkoa te Tia Kamaiu bwa “ane a na roko boong aika a na rawa iai n ongo te rieirei ae kamaiu; ma ane a na kauataoia rake taan reirei n ai aron oin aia kaibabaru” ao ana mwaiti aika “a na kantannakoi taningaia man te koaua, ao ane a na bitaki nakoni karaki aika a na rawa iai n ongo te reirei are kamaiua aki koaua”?¹¹ Ao e aki kaman taekina nanokawakina ngke “ma akea manen taromauriau i rouia, ngkai a reirei aia tua aomata ba aia taeka n reirei”?¹² Ao e aki kaman kauringiira “ana tei rake aomata mai buakomi n atongi baika bwaoua, bwa aonga ni katikiia taian reirei ri mwiia”?¹³ E aki kaman nooria bwa “te buakaka [e na atongaki bwa] te raoiroi, ao te raoiroi bwa te buakaka,”¹⁴ ao bwa “ana kairiribai te aomata ana utu”?¹⁵

Ao tera arora? Ti na tabeaianga ke ni maaku? Tina maiuakina ara koaua ma te nano korakora? Koauana raoi e bon aki! Inanon ara onimaki iroun Kristo ao tiaki riai ni maaka aia kairoro ni kakamaaku ke aia kairiribai aomata.¹⁶ Ma ara Tia Kamaiu ae bweniira ao te kairiiri mai irouia ara burabeti aika maiu, “antai ae kona n ekira nako?”¹⁷ Ti a kataia n aki nanokokoraki, n aki taraia bwa e bure, n ninikoria, n ungannanoia, ni kakaonimaki, n aki maaku ngkana ti taua ieta otan te Uea ni boong aika kaitira.¹⁸

E kamataataa raoi te Tia Kamaiu “ba ane kaota tauani bukiu i mataia aomata, ao Ngai I a manga kaota naba tauani bukina i matan Tamau. … Ma ane kaakeai i mataia aomata, ao Ngai I a manga kaakea naba i matan Tamau.”¹⁹

N aron ae ti nooria n tabetai, a taku tabeman bwa bon te Atua ae roko n akea ana tua, ma ti na kakoauaa aio n ana taeka te Unimwane ae D. Todd Christofferson, ae kangai “bwa te Atua ae akea te bwai ae e na tangiria mai iroura bon ti te arona ma te Atua ae akea ngaia.”²⁰

Tabeman a manga bon rinei kanoan tuua ake a kona n irii, ma ti riai ni kukurei ni kariaia ana kakao te Tia Kamaiu ma te kukure bwa ti na “maiu man taeka ni kabane ake a otinako man wiin te Atua.”²¹

Irouia aika mwaiti aika a kakoaua bwa e riai te Uea ma ana Ekaretia ni ira “te bwai [are] tangiria nanora,”²² ma ti riai n ataia bwa e bure aei “tai kakairi iroun te koraki ae bati ni karaoa ae buakaka”²³ bukina bwa “aki kona aomata ni kaeta te bwai ae e a tia te Atua n taekinna bwa e bure.”²⁴

“O uringnga, uringnga … matoatoan [e ngae n anne a kamaiuaki] ana tua te Atua.”²⁵ Reireinakiia n te aro ae mataata e bon kona ni manga taraaki irouia bwa te waaki ae kaaitara ma aia iango. Tia kaota ara tangira ma te karinerine nakon natin te Atua ae uota te koaua ae kaokoro ma are iroura.

Ti kona n kariaia ao n karineia tabeman n aki irii aia koaua ma aia mwakuri aika aki ira nanon te Uea. Bon ake kainanoakira bwa ti na kamwinibaea te koaua iaon aia koaua ma aia kairoro aomata.

Aki boraoi Tion ma Bwaburon. “Akea te aomata ae kona n toro irouia uoman tooka.”²⁶ Tia uringa ana taeka te Tia Kamaiu are titirakiniira, “Kam aera ngkai kam atongai ba te, Uea, Uea, ao kam aki tou mwin au taeka?”²⁷

Tia kaota ara tangira nakon te Uea rinanon ara nanomatoa, ao nanora ni kan ongotaeka.

Ngkana ko bae ibuakon irirakin te Tia Kamaiu ao ana waaki te aonaaba ao taiaoka kauringnga bwa te Tia Kamaiu e a tia “ni kanakoa te kakao … , bwa te bai n nanoanga e aroraki [nakoia], ao e taku: Rirananom, ao n na butimwei ngkami.”²⁸

Beretitenti Russell M. Nelson e reirei bwa Iesu Kristo “e na karaoi tabeua Ana mwakuri aika korakora imarenan taai aikai ni karokoa te tai are ena oki iai.”²⁹ Ma e reireiniira naba bwa “te koraki ake a rineia bwa a na ira te Uea a na bon tokanikai man te bwainikirinaki.”³⁰ N arora “n atongaki ba ti riai ni kamamaaeaki ibukin Arana”³¹ ao are ana kona n riki bwa raora ngkana ti “kariaia Bwanaana ao ni moanibwaia iaon bwaai ni kabane.”³²

“E na kabwaia,” e taku te Tia Kamaiu, “ane aki bwaka i Rou.”³³ Ti reiakinna n taabo ni kabane bwa “e bati te rau irouia akana tangira am taeka: ao akea kabwakaia teutana.”³⁴ Akea! Ti a titirakiniira bon iroura, “Ma I botumaka ibukin te tai ae tau aei, ao ngkana e roko te karawawataki ke te bwainikirinaki i bukin te taeka, ao I rotaki iai.?³⁵ I tei ni matoa ngkai iaon tebwa ae Iesu Kristo ma Ana Toro?”

N aia koaua taan kauntaekaa te koaua ao a taku bwa te koaua bon te bwai ae karikaki man aia iango aomata, ao bon akea raoi te koaua ke te riai. Te bwai raoi ae a kataia n taekinna bwa bon akea te bure,³⁶ bwa “tera te bwai [ae karaoia] te aomata bon akea burena,”³⁷ bon te taeka n rabakau ae kakatonga iai teuare buakaka! Ti na riai n taratara raoi irouia kameanti ake a kunikainiia ni kuniia tiibu ao a bon teimatoa ni mwakuri “[ni kabonganai] rabakauiia ibukin rabunan [aia] mwakuri aika buakaka.”³⁸

Ngkana ti kan riki raoi bwa ana taan iriira Kristo, ao ti na kakaea kawaira. Bwa imwiina, ao ena manga anai nanora teuare buakaka n ana aanga aika mwaiti. Ma ngkai ngaira ana reirei Iesu aika kakaonimaki “ti aki kainanoa te kabwara bure ibukin ara koaua ke ni kerikaaki man are ti ataia bwa e koaua.”³⁹

Ni kainakina, te taeka ibukiia 15 ana toro te Atua aika a tekateka i akuu. Ao ngkai kaain te aonaaba “a taku nakoia aika a matairiki, Tai noraba; ao nakoia burabeti, Tai taekinia,”⁴⁰ aomata aika kakaonimaki ana “baunaki naba ma te kakabwaia mai eta, eng, ao ma tua aika tiaki ti tabeua, ao ma kaotioti i nanon taia.”⁴¹

N aron ae ti ataia, a riki aomata aikai bwa taan kataere nakoia te koraki ake aki kukurei n ana taeka te Atua n aron are a kaman taekinna burabeti. Naake a totokoa te burabeti aki ataia ae “akea te taetae ni burabeti teuana i nanon te koroboki ae tabu ae [na] konaki ni kaetaki iroun te aomata n oin nanona” ke man nanon te aomata “ma [ana] aomata te Atua a [taetae ngkai] ake [a] kairaki iroun te Tamnei ae Raoiroi.”⁴²

N aron Bauro, mwaane aika mairoun te Atua aikai “aki… maamaa n taekina aia koaua ibukin te Uea” ao ni kairaki Iaan “Ana babair[e]”⁴³ n tarana bwa te reirei ae reiakinaki aei bon tiaki aia reirei ma bon Ana reirei Teuare gaia are weteiia. N aron naba Betero, ae eaki “kona ma e ti taekin bwaai aika [a] tia n noori ao n ongo.”⁴⁴ I kakoaua bwa te Moan Beretitentii ao te Kooram n te Tengaun ma Uoman bon mwaane aika raoiroi ao ni bwaina te kokoaua aika a tatangira te Atua ao Natina, aika a tangiraki Irouna. Aia taeka ae ti riai ni karekei n aron ae bon man oin wiin te Uea “ma te taotaonaki n nano ao te onimaki ni kabanea. Bwa man karaoan bwaai aikai mataroan moone e na aki tokanikai i [aora] … ao te Uea ae te Atua E na kamaenakoa mwaakan te roo mai [moara].”⁴⁵

“Bon akea te bai teuana ae konaa ni kakerikaaka aron rikiraken ana waaki”;⁴⁶ e na waaki nako inanon te tokanikai n iai ngai ke akea, ngaia are “ko na rineia n te bong aei, bwa antai ae ko na toro irouna.”⁴⁷ Tai kaburababaaki ke ni kamwaningaaki n ana kaberoro teuare buakaka are roko man te kateitei ae moan te korakora ma ni buubura. Bwanaaia ni kairoro e bon aki bootau ma te bwana ae maaraara, ma ni bebete ao naano aika uruaki ao tamnei aika raraoma.

I kakoaua bwa e maiu Kristo, bon ara Tia Kamaiu ao te Tia Kabooi Maiura, ao E kaira Ana Ekaretia rinanon te Moan Beretitentii ao te kooram n Abotoro n te Tengaun ma Uoman, ni kakoaua bwa tiaki “katiotioaki, ma ni kamwaeieieaki nako n te angi nako ae te reirei nako.”⁴⁸

“Ana reirei ni koaua Iesu Kristo,” E reirei Beretitenti Nelson, “iai nanoia ni kaotiia, ni kabaibati n taetae, ao ni kaokoroia mairouia aomata n te aonaaba. Bon aomata aika aki mamaaku, a bane nanoia, ao ni botumwaaka.”⁴⁹

Tariu ao mwaneu, bon te bong ae tamaroa n riki n tamaroa! N aran Iesu Kristo ae tabu, amen.