Witeo: “Ngkami Aine Are E a Kaman Noori Ngkami”
N te 1979 Beretitenti Spencer W. Kimball e mena n te onaoraki ao e tuanga buna, Camilla, bwa e na wareka ana taetae n aia bowi ni maungatabu aine.
Titita Camilla Kimball: “Mwaitin te rikirake ae korakora are e na roko nakon te Ekaretia ni kabanean boong e roko ibukina bwa ena mwaiti aine aika raraoi n te aonaaba (aika e teimatoa te maiu n tamnei irouia) a na kairaki nanoia nakon te Ekaretia n te mwaiti ae korakora. E na riki aei n te tai are aine n te Ekaretia a kaota te raoiroi ao te wanawana ni maiuia ao n te tai are aine n te Ekareia a taraaki bwa a onoti ao a kaokoro—n aroia ni kukurei—n okoro ma aine n te aonaaba.”1
Beretitenti Russell M. Nelson: “Mwaneu aika kam tangiraki, ngkami ake bon toara aika kam kakawaki n tain te kabanea ni waaki aei, te bong are e a kaman noria Beretitenti Kimball bon te bong aei. Ngkami bon aine ake e a kaman noriia! Tamaroam, otam, am tangira, am atatai, am onimaki, ao maium ae raoiroi e na anai nanoia aine n te aonaaba, n raonaki ma aia utu, nakon te Ekaretia n te mwaiti ae aki kona ni warekaki!
“Ti … kainnanoa korakorami, aron rairakimi, matoan nanomi, ami konabwai ni kairiiri, wanawanami, ao bwanaami. Abanuean te Atua e bon aki kona ni bwanin ngkana akea aine aika a karaoi berita aika a tabu, ao man kawakini, aine aika a kona n taetae ma te mwaaka ao man ana kariaia te Atua! …
“… Bwa tera nakoami, tera are kam mena i nanona, ti kainnanoa ami iango, ami nonoori, ao ami namakin. Ti kainnanoi ngkami bwa kam na kabaibati n taetae inanon uoote ao ni kauntiran te titeiki. Ti kainnanoia aine ake a tia ni mare bwa a na anga aia iango bwa ‘taan tibwatibwa ao rao ni bwanin ngkai kam katiteuanaaki ma kainnabami n tararua ami utu. Ae mareaki ke e aki, aine ngkami aika iai iroumi te konabwai ao te taratara ae onoti are kam a tia ni karekei bwa bwaintituaraoi mairoun te Atua. Ngaira mwaane ti aki kona ni katotoonga aromi ae onoti anne.
“Ti ataia bwa te kabanea ni mwakuri n te karikibwai bon karikan te aine! Ti kainnanoi korakorami! …
“… I karabwai ngkami, mwaneu aika kam tangiraki, ao ni kakabwaiai ngkami bwa kam na rikirake nakon tokin aromi, ni kakoroa namon ami karikibwai, ngkai ti bane n ibuobuoki n te mwakuri ae tabu aei. Ngaira ni kabane, ti na ibuobuoki ni katauraoa te aonaaba ibukin Kauaokin te Tia Kamaiu.”2