Ngaira Ana Ekaretia Iesu Kristo ibukiia Aika Itiaki ni Boong aika Kaitira

Imwiin karekean te kakao nakon,“nakomai ao nooria”¹ I kaea te taromauri n Ana Ekaretia Iesu Kristo ibukiia Aika Itiaki ni Boong aika Kaitira te moan tai ngke 26 au ririki. I a bon tibwa maenako ma moan kainabau. Iai natiu te mwaane ae teniua ana ririki. Ao I namakina ae akea korakora ao I maaku. Ngke I rin te kateitei, e onrake nanou n te namakin ae tamaroa ngke I nora te onimaki ma te kukurei irouia aomata ake irarikiu. N te koaua “bon te katantan man te angibuaka ae korakora.”² Teniua te wiiki imwiina, I karaoa te berita ae tabu n te bwabetito ma Tamau are i Karawa ao n moana mwanangau bwa ana reirei Iesu, e ngae ngke maiu e aki kororaoi inanon te mwananga anne.

I bon irou karekean taian kakabwaia mai karawa, a na riai ni tauraoi bwaai man maiun te rabwata ao te tamnei. Ana euangkerio Iesu Kristo e a tia ni kaokaki ao n tataekinaki; auti ni bootaki a tia ni kateaki ao n onobwaiaki; iai katean teia taan kairiiri. mairoun te burabeti nakoia taan kairiiri n taabo nako; ao te mwaanga ae e onrake irouia membwa aika a tabu ake a tauraoi ni mwaneai ma natiu ngkai ti karokoaki nakon te Tia Kamaiu, “kamwarakeaki n ana taeka te Atua aika a raraoi,”³ ao n anganaki te tai ni beku.⁴

Man moani karikani bwaai, E nooria te Atua bwa ana riai ni bobotaki ao ni baarongaaki Natina⁵ “karekan te aki mamate [nakoira] ao te maeu ae akea tokina irouia aomata.”⁶ Ma te kaantaninga anne n au iango, E anganira te kaetieti ni katei taabo ni nebonebo⁷ ike ti karekea iai te ataibwai ao taian otenanti ibukin te kamaiuaki ao te karietataaki; karaoi ao ni kawakin berita aika a tabu ake ana kabaeira ma Iesu Kristo;⁸ a kabaeaki ma “mwaakan te aron Atua”;⁹ ao ni bootaki n taainako ni ururinga Iesu ao n kakorakoraira Irouna.¹⁰ Aron bairean te Ekaretia ao ana kateitei a karaoaki ibukin karikirakean tamneira. “Te Ekaretia … bona te tabo ni katantan are ti na katea iai ara utu ae akea tokina.”¹¹

Ngke I maroro ma raraou ae rinanon te kaangaanga, I titirakinna bwa e uara maiuna ma ana kataumwane. E kaekaai ma ranimatana, bwa e buokaki iroun ana bitiobi man kabonganaan te mwane n aki mamatam. E taku riki, “I aki ataia bwa N na mena iaa ma au utu ngke arona bwa akea te Ekaretia.” I kaeka, “Te Ekaretia bon aomata ake a kaainna. Boni ngaiia are a anga aia angabwai n aki mamatam ma nanoia ae anganga ao ni kukurei ni buokiira ngaira ake ti kainnanoia. Ko a karekea uaan aia onimaki ao nanomwaakaia ni iriira Iesu Kristo.”

Raou aika taan iriira Kristo, ti na aki kamwiinibaea te mwakuri ae kamimi are e karaoia te Uea rinanora, Ana Ekaretia, n aki tarai kairuara. N tabetai ti riki bwa taan anganga ao n tabetai ti riki bwa taan butimwaai, ma ngaira ni kabane bon ti teuana n utu iroun Kristo. Ana Ekaretia bon te kateitei are E anga bwa e na kairira ao ni kakabwaiara ngkai ti nebonebo Nakoina ao ni beku imarenara.

Tabeman aine a kabwarabure nakoiu, n aia iango bwa a tia n aki kakaonimaki n te Bootaki n Aine ibukina ngke a beku n Moanrinan ke te Bootaki n Ataeinaine. Taari akanne bon tabeman mai ibuakoia kaain te Bootaki n Aine aika a bon rangi ni kakaonimaki ibukina bwa a buokiia ara ataei aika a kakawaki ao ni karikirakea aia onimaki kairake.

Te Bootaki n Aine e aki tianaki inanon ruu n taian kateirei, te angareirei n te Taabati, botaki ni kakukurei, ke te Beretitentii n taabo ke n ake tabeua. Te Bootaki n Aine bon aine ni berita aika a tabu n te Ekaretia; bon ngaira—n tatabemaniira ao ngaira ni kabanekomiunite n te aonaaba ibukin te nanoanga ao te beku. Ara “komiunite n te aonaaba n nanoanga ao ni beku”.”¹² N taabo nako ao ni kabane ake ti nako iai, ngaira n taainako bon mwakoron te Botaaki n Aine ngkai ti kekeiaki-mwaaka ni kakoroi kaantaninga, ibukiia aine bwa ana katiaa ana mwakuri te Atua n tatabemaniia ma aanga riki ni ibuobuoki ake ana karaoaki¹³ man katauraoan te buoka, “buokan te kainano, buokaia aoraki, buokan nanoua, buokaia ake aki tau ootaia—buokan katokan kawai ni kabane ake a totokoi… kimwareirei ao rikirake.”¹⁴

E riki naba aekakin anne inanon aia kooram unimwaane ao bootaki nako n te Ekaretia ibukin rooro nako, ni ikotaki ma ara ataei ao ara kairake. Te Ekaretia e riaon riki taian kateitei ao aron teia ma baireaia taan kairiiri; te Ekaretia bon ngaira, kaaina ni kabane. Ngaira bon ana Ekaretia Iesu Kristo ibukiia Aika Itiaki ni Boong aika Kaitira, ma Kristo mai i moa ao te burabeti bwa Ana tia taetae. E taku te Uea:

Nooria, aio au reirei—ane e raira nanona ao e nakoiu, titebo ma au ekaretia. …

Ao ngkai… ane kaain au ekaretia, ao n teimatoa n au ekaretia ni karokoa te toki, ngaia ae N na kateia i aon au bwaa”¹⁵

Tarira ao mwanera, ti riai n ataia bwa ti rangi n tekeraoi ngkai ti riki bwa kain ana Ekaretia Iesu Kristo, ike ti konaa n booti ara onimaki, nanora, korakoraara, iango, ao baira ni karaoa Ana kakai aika a kamimi. “Bwa rabwatan [ana Ekaretia Kristo] tiaki ti temanna, ma a mwaiti.”¹⁶

E taku te ataeinimwaane nakon tinana, “Ngke I uarereke, ni katoa tai ngkana I anga teuana te taaraa n te kabwianibwai, n au iango ao man ane teuana te taaraa e kabwanina katean te auti ni bootaki. “E aki kangare anne?”

Ma riingakin nanona, e kaeka, “E rangi n tamaroa! Ko katamneia anne n am iango?”

“Eng!” e taku ma te nano ni korakora. “A rangi n tikiraoi, ao mirion mwaitiia!”¹⁷

Raraou aika kam tangiraki, ti a karekea ara onimaki n ai aron teteei ao ni kimwareirei n ataakina bwa e ngae ngke e uarereke ara konabwai a bon karaoa te bitaki ae korakora n aban n uean te Atua.

Ara kaantaninga n Abanueana bon karokoara ngaira aikai nakon Kristo. Ngkai ti wareki n koroboki aika a tabu, te Tia Kamaiu e anga ana kakao nakoia Niibwaite:

“Iai ibuakomi ae aoraki? Uotia mai nakoiu. Iai ibuakomi aika … rotaki n anga nako? Kairiaa mai ao N na katoka aorakiia, bwa iai au nanoanga nakoimi; ao e a onrake nanou n tenanoanga.

“… I nooria bwa am onimaki e tau bwa N na riai ni kamaeuko.”¹⁸

Ti aki n ae a bane ni iai ara kaangaanga ae ti konaa ni uotia nakon waen te Tia Kamaiu? Ngkai iai mai buakora aika iai aia kaangaanga n rabwataia, a bati riki aika a kaaitarai kangangan te nano ni kakauntaeka, tabeman a rinanon te kanganga ni kanakoraoa aia reitaki ma tabeman, ao ti bane ni ukora te rau n ara tai ni kataaki. Ngaira ni kabane ti rootaki n aanga tabeua.

Ti warekia bwa “a bane aomata ake a uanao, n teuana te tai, ni mwananga ma aia aoraki ao … ma aomata ni kabane ake a karawawataaki n aekaia nako; ao e boni katoka aorakiia ni kabane ake a uotaki nakoia.

“Ao a boni bane ni kabane, ake a katokaki aorakiia ao ake a marurung, ni bobaraaki i waena, man taromauriia.”¹⁹

Mairoun te ataeinimwaane ae uarereke are e kabwakaa ana kabwianibwai ma te onimaki, nakon te tina ae akea buuna are e kainanoa ana akoi ae kororaoi te Uea, nakon te karo ae keiaki ni katauraoi ibukiia ana utu, nakoia ara bakatibu ake a kainanoa te otenanti ni kamaeuaki ao ni karietataaki, nakoira n tatabemaniira ake ti kaboui ara berita aika a tabu ma te Atua ni katoa wiiki, ti kainanoira i bon iroura, ao ti konaa ni karokoira n tatabemanira nakon ana kamaiu te Tia Kamaiu are bon te tia kabooi maeura.

Mwaneu ao tariu aika kam tangiraki, tina iriira ana wewete Iesu Kristo ni uotii rabwatara ao rawawatara Nakoina. Ngkana ti roko Irouna ao n uotiia naake ti tangira Nakoina, E noori ara onimaki. E na kanakoraoa maiuia, ao E na kanakoraoi maiura.

Ngkai “taan iriira Kristo ae a rau,”²⁰ ti kakorakoraira n riki “bwa teuana nanora ao teuana ara iango”²¹ ao n nanorinano; aantaeka; nimamanei; kai bubutiaki; onrake n te tataonannano ao taotaonakinnano ae korakora; nanoraoi ni bwaai ni kabane; wanawana ni kawakinan ana tua te Atua n taai ni kabane; onrake n te onimaki, kantaninga, ao te tangira ae kororaoi; ni kakorakora ana mwakuri aika a raraoi.²² Ti kakorakoraira n riki n aekan Iesu Kristo.

I kakoaua bwa ngkai ana Ekaretia Kristo, boni ngaira rinanon are “ara Tia Kamaiu ao Tia Kabooi Maiura, Iesu Kristo, e na karaoi tabeua mai buakon ana mwakuri aika a rangi ni kamimi ma ngkai ao ngkana E a manga roko.”²³

E taku te Uea:

“Noria, N na kawaekoa au mwakuri n taina.

“Ao I angani ngkami … te tua bwa kam na botii ngkami ni kabane, ao barongai ngkami, ao ni katauraoi ngkami, ao ni kaitiakii ngkami; eng, kaitiaka nanomi, ao ni kaitiaka baimi ao waemi imwaiu, bwa I aonga ni kaitiaki ngkami.”²⁴

Ke ti kaeka nakon te wewete ae mairoun te Atua ao ni kimwareirei, barongaaki, ao kaitiakiira bon au tataro ae nanorinano n aran Iesu Kristo, amen.