Karaoa ae te Kabanea Ni Kakawaki

Te tai ae e aki maan n nako, raoraou ae tangiraki e namakinna bwa e na riai ni kawara temanna te aine n ana uoote. E aki kubara te wirikiriki arei bukina bwa e aki rang ni kinaa—e bon aki boo ma aongina. Ma ibukina e a okioki te iango arei nakoina, e a motikia bwa e nang mwakuriia te wirikiriki arei. Ibukina bwa e a kaman aki mweengaraoi ibukin te kakawari ae karina, e matoa n ana iango bwa ngkana iai uotana nakon tarina arei e na buokia ni kabebetea nakon nanona. N etina e bon aki kona ni mwananga n akea uotana! Ngaia are e a kabooa teuana ana boora n aiti kuriim, ao e a nako ni kawaina are e bon raraomaeakinna bwa e na riki bwa te kakawari ae angamae.

E karebwerebwe n ana mataroa neierei, ao e aki maan ao e a kaukaki iroun te tari arei. E anga te aiti kuriim raoraou aio inanon te baeki ni boobwai, ao e a waaki aia kakaraki. E aki maan imwiina ao e a moanna n ataia raoraou aio bukin kainanoakin te kakawari aei. Inanon aia tai n tekateka i moan te auti, te aine aio e a kaotii mwaitin kangaanga ake e kaaitarai. Imwiin teuana aia aoa n kakaraki iaan abueen taraan te bong, raoraou aio e a ataia ae e a mara te aiti kuriim rinanon te baeki ni boobwai.

E takarua, “I a kabwara au bure kai e a mara am aiti kuriim!”

Te aine aio e kaeka ma te kukurei, “E raoiroi! I bon aki kaakanii bwaai aika renganaki n te miriki!”

Inanon te mii, te Atua e tuanga te burabeti Riaai, “Ko na kakabwaiaki Riaai, ibukin baike ko a tia ni karaoi.”¹

Ma, te riki bwa ana reirei Iesu Kristo e kainnanoa ae raka riki nakon ae tii te kantaninga ke kakoauaakina. E kainnanoa te kekeiaki, te kakamwakuri, ao te kakaonimaki. E kainanoia bwa ti na karaoia, taan riki bwa “taan toua mwiin ana taeka, ao tiaki tii taan ongora.”²

N aron are e mara te aiti kuriim, tera ae kakawaki riki? Te aiti kuriim? Ke ae raoraou arei e karaoa te bwai ae bebete?

Iai au taneiai ma temanna te ataeinnaine ike e a tuangai te titirak ae nako mai inanona: “Titita Craven, ko kanga n ataia ae bwaai nako n te Ekaretia e koaua? Bwa ai bon akea te bwai ae I namakinna.”

Imwain ae nang bon tawe naba ni kaekaa, I a titirakinna moa n au titiraki tabeua. “E uara am kamatebwai ni koroboki aika a tabu.”

E kaekaai, “I aki wawarekii koroboki aika a tabu.”

I titiraki, “Ao am utu?” Kam kamatebwaia Nakomai, Iriirai ni bootaki?”

E taku neiei,“ti aki.”

I titirakinna ibukin ana tataro: “Tera ae ko namakinna ngkana ko tataro?”

E kaekaai: “I aki taatataro.”

Au kaeka nakoina e a beebete: “Ngkana ko tangiria ni kan ataa te bwai teuana, ko riai naba ni karaoa te bwai teuana.”

Ti aki anne te koaua nakon bwaai ni kabane ti kan reiakinna ke n ataia? I a kaoa raraou ae boou aio bwa e na karaoa ana euangkerio Iesu Kristo: te tataro, te kamatebwai, te beku ibukiia tabemwaang, ao onimakinan te Atua. Te rairaki e bon aki kona n riki ngkana akea te bwai ae karaoaki. E roko rinanon mwaakan te Tamnei ae Raoiroi ngkai ti karaoa te kekeiaki ae nako mai nanora man te bubutii, te ukeuke, ao te karebwerebwe. E riki man karaoana.³

N Reirei ao Berita aika Tabu, e taekinna te Atua inanon taai aika bati, “E aki kakawaki.”⁴ E karikai bwa N na karaua n iangoia bwa ngkana iai bwaai aika aki kakawaki, ke n kee kakawakiia, e na bon riai n iai bwaai aika kakawaki riki. N ara kekeiaki ni karaoi bwaai ke waaki tabeua, ti na bae n titirakiniira, “Tera ae kakawaki riki?”

Taan katanoata a aki toki n kaboonganai taeka n anai nanora n aron “ Rangi ni kakawaki” ke “E Riai n Reke” ma te kantaninga bwa e na anai nanora bwa ti na kakoauaa bwa te bwai are e na kabonakoaki e riai ibukin kukureira ke arora-ni maiu. Ma te bwai are a kaboonakoa e bon rangi ni kakawaki? E na bon riai n iai iroura? E bon rangi ni kakawaki?

Aikai tabeua titiraki ae ko na iangoi. Tera ae kakawaki riki?

• Mwaitin te “like” ae ti na karekea n ara katokatoka n te intanete? Ke mwaitin tangirakira ma kakawakira iroun Tamara ae i Karawa?

• Bwainakin kunikai ake a tibwa otinako? Ke kaotan ara karinerine nakon rabwatara man bwainakin kunnikai aika a riai?

• Kunean kaekaan ara titiraki rinanon te intanete? Ke karekean te kaeka mai iroun te Atua rinanon te Tamnei ae Raoiroi?

• Tangiran ae mwaiti riki? Ke tina nanoraoi ke ni kukurei ma are ti a tia n anganaki?

E reirei Beretitenti Russell M. Nelson:

“Ma te Tamnei ae Raoiroi bwa toami, ko konaa n noora kateia aomata aika rangi ni kinaaki ae e a moanna n eeka nako ae bon kateira. Ko kona n timwaati riki nakon te roro are imwaaim.

“Katea te kainibaire ibukin te aonaaba ni kabutaa!”⁵

E reke n te kekeiaki n nano mwaaka iaon bwaai aika kakawaki ni koaua ibukin te kukurei ae e aki totoki. Bon akea riki te bwai ae e na rangi ni kukurei iai Taatan bwa ti na aki atai kakawakira ae aki toki, kairakira bwa ti na bakataea ara tai ae e nang kakawaki, ara taarena, ke korakorara n Tamnei iaon bwaai aika aki kakawaki. I kaoira n tatabemaniira bwa ti na nene n ara tataro bwa ti na atai bwaai aika kamwaninganakoira man karaoan ae kakawaki riki.

Ana tia reirei natira te mwaane n te koraki teniua e reireiniia ana ataei bwa a na “bwaotina kaburoroia.” Bon te kauring nakoia ana ataei aika kairake ae bon ngaiia taan kaira aia iango ao anne bukina a na kona naba ni kairii bwaai aike a karaoi. I kauringai naba ibon irou bwa N na “bwaotina au kaburoro” ngkana I a kunea bwa I a moanna ni kaakaan ma baika aki rangi ni kakawaki.

Temanna ataein te kauarinan e tuangai bwa e a moanna n riki bwa te bwai ae kabuta irouia tabeman kairaken te Ekaretia bwa ana mwanuokinii tuua ma te babaire ae e baarongaaki ibukin te rairannano imwiina. “Kanga bon te aeka ni meetera ae rine,” anne are I a tuangaki. N etina te Atua e na teimatoa n kabwarai aia bure ake a nanorinano n raira nanoia “ma te nano ae koaua.”⁶ Ma ana Mwakuri ni Kamaiu te Tia Kamaiu n nanoanga e na riai n aki kamanenaaki n te aro ni manrerei. Ti ataa te kaikonaki are te tiibu temanna are e bua. E bon eti, te tia kaawakin tiibu e na kiitaniia tiibu ake 99 bwa e na kakaea temanna are e a bua. Ma ko konaa ni katamneia te kimwareirei ibukiia nake 99 ae a uotia nakon te Tia kaawakin tiibu ae Raoiroi. Naake a teimatoa n ikarekebai ao a ibuobuoki imarenaia n maiuakinii aia berita aika tabu? Ko konaa n katamneia bwa e na aekara te aonaaba ke am reirei ke am tabo ni mwakuri ke mweengara ngkana te ongeaaba bon te kabanea ni bwai ae tabangaki karaoana? Tiaki taekan karaoan maiura bwa e na kororaoi—ma bon taekan kunean te kimwareirei inanon ara tai ni karaoa te kabanea n tamaroa ni maiuakinii berita aika tabu ake ti a tia ni karaoi ma te Atua.

Ma te aonaaba ae e a rikirake kaotakin aki onimakinan te Atua ao te nano uoua ao kariirii a rikirake, aio te tai are ti riai n kaaniira riki ma te burabeti. Ngkai ngaia bon wiin te Atua, ti kona n onimakin ake e kaumakiira, kaun ao n bubutiira bwa ti na karaoi bwaai aika kakawaki riki.

E ngae ngkana e aki beebete, bon iai n taainako te anga ni karaoa te bwai ae e eti. N ana tai ni maroro temanna te ataeinnaine ma raraona n reirei, e nanokaawaki nanona ngke aia kakaraki e bitaki nakon kabuaakakan katein te Ekaretia. E ataia bwa e aikoa kona n aki beroro—e riai ni iai te bwai ae e na karaoia. Ma te karinerine, e tuangiia ana tangira Tamara are i Karawa ao a kanga ana tua ae E katei ni kakabwaiaia ao n kamanoia Natina. E na rangi ni beebete riki ngke e a bon tei naba n akea te bwai ae karaoia. Ma tera ae kakawaki riki? Kaainakin te waaki are karaoaki irouia raoraom? Ke ti na tei n okoro bwa te tia kakoaua ibukin te Atua n “taainako ao ni bwaai nako, ao n taabo nako”?⁷

Ngkana Ana Ekaretia Iesu Kristo e na otinako mai inanon te roo, ti riai n otinako mai inanon te roo. Ngkai ngaira ainen-berita, ti riai n kaotaa ootan ara euangkerio ni kabutaa te aonaaba man ara mwakuri aika raka ao n teira n okoro. Ti reitaki ni karaoa aio ngkai ngaira natin te Atua aika aine—te taanga ae kaainaki irouia 8.2 te mirion aine man te ririki ae 11 ni waerake, ae a bane n titebo aia mwakuri. Ti ikoikota Iteraera ngkai ti kaaina te mwakuri ni kamaiu ao te karietataaki: ti kekeiaki ni maiuakina ana euangkerio Iesu Kristo, tabeakinaia aika a kainnano, kaoakiia ni kabane bwa a na karekea te euangkerio, ao katiteuanaakiia utu n akea tokina.⁸ Ana euangkerio Iesu Kristo bon te euangkerio ae kakammwakuri ao te euangkerio ni kimwareirei! Ti aaki kamwiinibaea ara konabwai ni karaoan bwaai aika a kakawaki riki. Kaubwaira ae mairoun te Atua e anganiira te ninikoria ao te onimaki iroura ni karaoa ao n riki nakon are e ataia Tamara are I Karawa bwa ti kona n riki nako iai.

Te boto ni iango ibukiia kairake n te ririki aio bon man Taeka n Rabakau 3:5–6:

“Ko na onimakina Iehova n nanom ni kabanea; ao tai mwiokoa oin am ataibwai.

“Kaitaua ni bwaai ni kabane, ao e na kaira kawaim.”

Teuana mai buakon baika kakawaki n onimakinan te Uea bon te waaki nako, ma te onimaki bwa E na kairiira e ngae ngkana e aki bwanin ara ataibwai.

Tariu, tiaki taekan te aiti kuriim. Ao tiaki taekan karaoan ae raka. Bon taekan karaoan ae e kakawaki. Bon maiuakinan ana reirei Kristo inanon maiura ngkai ti kekeiaki-mwaaka n riki n Aekakina.

Karaoan ae raka n tiku iaon te kawai ae beritanaki, rakan naba rikiraken ara onimaki iaon Iesu Kristo. Rakan rikiraken ara onimaki, rakan te nano ni kan raira n nano. Ao rakan nanora ni kan raira n nano, rakan naba kakorakoraan ara berita ma te Atua. Te reitaki n berita anne e anoira nakon te tembora ibukina bwa kawakinan ara berita inanon te temobra bon arora n teimatoa n uaa te toki.

Ngkai ti kabotoi maiura iaon Iesu Kristo, ti na kairaki ni karaoa ae bongana riki. Ao ti na kakabwaiaaki ma te korakora ni maiura n tamnei, te nanoraoi ao te kimwareirei! N aran Iesu Kristo, amen.