Ngkai Ai Bon Taina
Aio te tai ae ti na reireinaki iai. Aio te tai ae ti na raira nanora iai. Aio te tai ae ti na kona ni kakabwaiaia aomata.
Tariu ao mwaaneu aika tangiraki, te maungatabu aei e riki bwa te tai ae e na ururingaki n aanga aika a mwaiti. Ti a tia ni kakabwaiaaki man taian tataro, marooro, ao katangitang. Ti a tia ni kaungaaki irouia ana toro te Uea.
Ti karekei kaetieti aika moan te kakawaki ibukin taai aika a na roko. Au tataro bwa e a tia n taetae nakoimi te Tamnei ni kaineti ma bwaai ake e tangiria te Uea bwa kam na karaoi.
Ti aki kona n atai kanoan boong aika a na roko. E bibitaki tein kanoan te bong. Birin kaubwain te aba e kaangaanga ataakina. Kabuanibwai aika a karina man tauan kanoan boong ke aomata, kabuanibwai, ao te aoraki a kona ni bita te maiu ni waekoa. Mwakuri aikai a riaon ara konaa ni bairei aroia. Ma iai bwaai tabeua aika ti kona n bairea aroia, n aron ae ti na kanga ni kabongana ara tai ni katoabong.
I tangira te boem aei mairoun Henry Van Dyke, are e katokaaki iaon te Sundial i Wells College i New York. E kangai taekana:
Te nuu man tamnein tabonbaiu
E kaokoroi taai aika a na roko ma taai ake ngkoa.
Imwaain anne, e mwanionako te aoa ae tuai ni kaoti
Inanon te roo, ao ae riaon korakoram.
I akuuna bon te rain ae tuai man oki,
Te aoa ae bua, ai tiaki am bwai:
Teuana te aoa n tii ngaia bon ae inanon baim,—
Ao NGKAI ike e mena iai te nuu.1
Eng, ti riai n reiakinaki man kanoan taai aika a nako, ao eng, ti riai ni katauraoi ibukin taai aika a na roko. Ma ti ngkai ae ti kona iai ni karaoia. Ngkai bon te tai ae ti kona n reiakinaki iai. Ngkai bon te tai ae ti na kona n rairinanora iai. Ngkai bon te tai ae ti na kona ni kakabwaiaiia aomata tabeman ao “ni kakorakorai baimi aika bwaka.”2 N aron ana taeka n reirei Moomon nakon natina te mwaane ae Moronaai, “Ti na botumwaaka ni beku; bwa iai ara mwakuri ae ti na karaoia [i-nanon] menara n rabwatara ae te tano, bwa ti aonga n tokanikai i aon ana kairiribai te raoiroi, ma ni karekea motirawan tamneira n uean te Atua.”3
A aki kona ni matu taan kakaitara. E na iai te kakaitara n taainako nakon te koaua. I kaokioka au kaumaki nakoimi n te ingabong aei ni karaoi baike a na karikirakea tamaroam n te maiu n tamnei, n aron are e a tia n maroro iaona Dieter F. Uchtdorf , are e na kateimatoa ni waakirake rinanon kangaanga ao taai ni kakabwaia aika a nang kaoti.
Tamaroan maiun tamneira e rikirake ngkana ti nebonebo n te tembora ao ni karikirakei ara atatai ni abakin ao nanon te kakabwaia aika ti karekei n te tembora. I butingkami bwa kam na kaitarai kawain te aonaaba man kabotoi nanomi iaon kakabwaia aika akea tokina n te tembora. Am tai ikekei e uoti kakabwaia ibukin te maiu ae akea tokina.
Ngkai e a rikirake te Ekaretia, ti kekeiaki ni katei riki tabeua tembora. Abwi ma aua tembora aika a tabe ni kateaki ngkai. A mwaiti riki aika a na kabouaki. I tataro ibukiia taan mwakuri aika mwaatai ake a mwakuri iaon karikirake aikai ni kabutaa te aonaaba.
Inanon te tataro ni kakaitau, I kukurei ni katanoatai babaire ni katean tembora aika a boou n aono aikai: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; and Modesto, California.
Tembora aika tebwi ma itua aikai a na kakabwaiai maiuia aomata aika mwaiti n iteran te rabuna ake uoua. I tangiri ngkami, tariu ao mwaaneu. Ma ae kakawaki riki, te Uea e tangiriko. Bon ngaia ami Tia Kamaiu ao te tia Kabooira. E kaira ao n tararua Ana Ekaretia. Ti bia riki bwa aomata aika a tau iroun te Uea, are e taku, “Kam na riki bwa au aomata, ao N na riki bwa Atuami.”4
Aikai I a taekin n aran Iesu Kristo ae tabu, amen.