Nanora ni Kabane

Tabeua te bong imwain ae E anga maiuna ibukira, E mena Iesu Kristo n te tembora i Ierutarem, e tarataraia aomata n angabwai nakon te tabo ni mwane n te tembora. “A bati ake a kaubwai ake a nnea te mane ae bati ,” ma, e roko te aine ae mate buuna, “ao e nnei uoua te rebeta .” E uarereke ana mwaiti, n te aro are e aki kainnanoa korean mwiina.

Tamnei

Te aine ae mate buuna e anga uoua te rebeta.

Ma te angamwane ae uarereke aei e nano iai te Tia Kamaiu. Ni koauana, e bane nanona iai n te aro are “E weteia ana reirei, ao E taku nako ia, E koaua ae I a tuang-ngkami, ba e kamaiti riki ana bwai ni nnei te aine ane e mate buna anne nakoia akekei ni kabaneia ake a nnei i nanon te ne ni mane:

“Ba a bane ni nnei mani kaubwaia; ao neienne e kabane ana bwai ni nnei, ake roona man aki-kaubwaina.”¹

N te nonori ae uarereke aei, E katerea iai te Tia Kamaiu aron katinean ara angabwai n Abanueana—ao e okoro ma aron katinean bwaai iroura. Iroun te Uea, mwaitin te angabwai e aki katineaki ni mwaitina ae rin n te ne ni mwane ma bon mani bitakin nanon te aomata are e anga.

Ni kamoamoan te aine ae mate buuna, E anga te kainibare te Tia Kamaiu n aron katinean iriiran Iesu ni kawai aika a mwaiti. E reirei Iesu bwa e kona ni bubura ke n uarereke ara angabwai, ma anganano ni kabane, e riai n nako man te nano ae bwanin raoi.

E taekinaki te reirei aei n ana onon te burabeti Amareki: “Kam na nakon Kristo, ae Atuan Iteraera ae Tabu, ao kam na karekea ana kamaiu, ma mwaakan ana kabomwi. Eng, kam na nakoina, ao kam na anganna tamneimi bwa ami karea nakoina.”²

Tera aron karaoan aei? E bati iroura, ae taraia bwa ti aki kona n anga nanora ni kabanea. E bati taben ara iango. Tera arora ni kabaeranta tabera inanon maiura ma tibwangara ae ti na anga nanora ni kabane nakon te Uea?

Tao oin te kangaanga bwa ti taraa te baeranti bwa tibwatibwaan ara tai ni bwaai aika mwaiti. N te taratara aei, ara motinnano nakon Iesu Kristo e na riki bwa teuana mai buakon tabera ae ti riai ni baronga tain karaoana. Ma tao iai riki te kawai ae tamaroa.

Ngai ma kainnabau ae Harriet, e mamate nanora n te bwatika. Bon te anga teuana ni kamarurung ao e riki naba bwa ara tai ni marooro. Ngkana ti bwatika, I bon aki ikentauti, e nakoraoi ara bong n tamaroan te aonnaba ao n ara marooro ibon imarenara. E burenibwai ae ti na katuua ara iango ni kabaerantan ara bwatika. Ti a rangi ni maan ni bwabwatika n te aro are ai akea iangoana iroura—e a riki bwa te bwai ae ti taneiai iai.

Ma ngkana I tabe n taraa te aomata ae tibwa reirei te bwatika, I kauringaki bwa e bon aki beebete te kabaeranti n te bwatika. E kainnanoa te tai ae bati. E kainnanoa te kataneiai ae bati. E kainnanoa te tataonannano. E na iai te bwaka tetaina ke uatai.

Te bwai ae kakaawaki bwa, naake a rabakau ni kabaeranti n te bwatika, e reke irouia te reirei aika a kakaawaki aikai:

Tai taraa waem.

Taraa mooa.

Taraa kawaim. Katuua am iango n am tabo are ko uaiakinna. Toutou. Te kabaeranti bon te waaki nako.

E kauaeaki te reirei aei nakon karekean te baeranti inanon maiura ngkai taan iriira Iesu Kristo. Aron tibwatibwaan am tai ma korakoram n tibwangam aika a kakaawaki a na okoro iroun temanna ma temanna ao n te tai teuana nakon teuana. Ma tii teuana, ara toko bwa Iriiran Kawain ara Mwatita, Iesu Kristo, ao n oki rikaaki ni maeka ma Tamara are i Karawa. Ti okoro n arora ao baika a riki ni maiura ma ara toko e riai n tiku n arona ao n aki bibitaki.³

Eng, aomata aika e mamate nanoia n te bwatika, a na buokaki ni kabootauan te bwatika ma iriiran Iesu. Naake aki bwaka n te karinan aei, tai raraoma. Iai au katoto ae I taku bwa a na oota iai, mmwaane nako, aine, ao ataei.

Iriiran Iesu, bon teuana naba te bwai, ae kona ni kabootauaki ma kiban te wanikiba.

Ko a tia ni karaua n iangoa kamimiin te wanikiba ae totoa ni kona ni kibarake mai aontano ma ni kiba? Tera te bwai ae kakibai wanikiba aikai n te aro ae tamaroa i karawa, ni kiba riaon taari ma aaba?

E bebete kaekana, e kiba te wanikiba ngkana e ukaki baina n te ang. Karen te ang e anga te korakora are ngaia e kiba iai te wanikiba. Ma e na kanga n tau korakoran te ang ni kakiba te wanikiba? Kaekan aei bon te waaki rake.

E aki kona ni kiba te wanikiba ngkana e tei n aki kakamwakuri n te marae. E ngae ngke e matoa te ang, e bon aki kona ni kiba te wanikiba ni karokoa ae e kabutaki te wanikiba nako mooa, e korea te ang ni butina.

N aron butin te bwatika are ngaia e kabaeranta te bwatika, mwaingin te wanikiba nako mooa boni ngaia are e kakiba te wanikiba.

Tera nanon aei ni kabootauana ma iriiran Iesu Kristo? Nanona bwa ngkana ti tangiria ni kabaeranta maiura, ao ngkana ti tangiria bwa e na tabekira rake te Tia Kamaiu, ti riai n aki manikangare ke ni kabwabwakaa ara motinnano nako Ina ao Ana euangkerio. N aron te aine ae mate buuna i Ierutarem, ti riai n anganna nanora ni kabane. Tao e uarereke ara angabwai, ma e riai n nako man nanora ma tamneira.

Iriiran Iesu Kristo bon tiaki te tibwanga ae uarereke. Te Tia Kamaiu boni ngaia oin karaoan bwaai nako aika ti karaoi. Tiaki te kakibotu inanon mwanangara. Tiaki te nuuka ni kawai ke kanikinaean te aba. Boni Ngaia “te kawai, ao te koaua, ao te maiu: akea ane nako n te Tama, ba ti i Roun [Iesu Kristo].”⁴ Aio te Kawai ao tokin kawaira.

Te baeranti ao te kiba e reke ngkana ti “waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane.”⁵

Ao ai tera aron tabera ma tibwangara aika a bati inanon maiura? Kawaraia ara utu, te reirei ma te katauraoi ni kareke mwakuri, karekean boon te maiu, tabeakinaia ara utu, te ibuobuoki n ara kaawa—tera barongaan baikai? E karau nanora te Tia Kamaiu:

“E ataingkami Tamami are i karawa ba a kai nanomi ngkana akea baikai i roumi.

“Ma kam na ukoukora moa uean te Atua ma ana raoiroi; ao a na bane n raonaki baikai nako imi.”⁶

Ma tiaki nanona bwa e nang bebete.⁷ E na bon kainnanoa te karea ao te angabwai.

E na iai mwakuri aika a riai n toki ao iai naba bwaai aika a riai n rikirake.

Te Karea ao te angabwai bon tuan karawa aika ti berita nako iai n te tembora ae tabu. Iai baika a inanoi iai tuua aikai ma a aki titebo. Te karea bon kaakan te bwai teuana ao e oneaki mwina n te bwai ae kakaawaki riki. Ngkoa, Ana aomata te Atua a anga moani bunin aia tiibu bwa karinean rokon te Mesia. N te tai teuana ma teuana, Aomata aika Itiaki a katikui nanoia, mwengaraoia, ao a anga maiuia ibukin te Tia Kamaiu.

Iai bwaai aika a bubura ao uarereke, aika ti riai ni katikui bwa e aonga ni bwanin arora n iira Iesu Kristo.⁸ Bwaai aika ti katikui a katerei bwaai aika a kakaawaki iroura. E tabu te karea ao e kukurei iai te Uea.⁹

Te angabwai bon iai teuana okorona man te anga karea. Ngkana ti angabwai, ti aki kabuoka te karea iaon te bao ni karea. Ma, ti anga bwa e na kabonganaaki ni katomauaa ana mwakuri te Uea. Ti anga nako Ina ao Ana mwakuri aika tabu.¹⁰ Ti karekei ara tarena mairoun te Uea ao ti kataia ni karawatai, ni kamwaiti, n te aro bwa e na ibuobuoki ni katea abanuean te Uea.¹¹

E karako mai iroura ae e na tuangaki bwa e na anga maiuna ibukin te Tia Kamaiu. Ma ti bane ni kaoaki bwa ti na tabua maiura nako Ina.

Ngkae ti ukora kaitiakan maiura man taraa te Tia Kamaiu n ara iango n taai nako,¹² a na botaki bwaai ni kabane n te karinan teuana. Ao ara mwakuri inanon maiura aikoa uamae n aron ae e aki baeranti.

Inanon te tai, e riki bwa te mwakuri ae tii teuana.

Teuana te kukurei.

Teuana te kantaninga ae tabu.

Bon te tibwanga n tangira ma ni beku iroun te Atua. Bon tangiran ma te beku ibukia natin te Atua.¹³

Ngkana ti tirobaea maiura ao ara mwakuri aika a bati, ti konaa n namakinna bwa ti aikoa kona uotara. Ma ngkana ti teuana tibwangara—tangiran ao te beku iroun te Atua ma Natina, ni kawai aika a bati—e na kakukurei karaoan te mwakuri.

Aio nanon arora n anga nanora ni kabane—katukan bwaai aika a tineira ao kabanean ara bwai nakon te Uea ao Ana mwakuri.

Tariu ao mwaneu ao raraou aika kam tangiraki, e na iai taai ake ko na iangoia iai bwa e na kona n mwaiti riki ae ko konaa ni karaoia. E ataa nanom Tamara are i Karawa. E ataia bwa ko aki kona ni karaoi bwaai ni kabane ake e tangiria nanom. Ma ko kona n tangira ao ni beku iroun te Atua. Ko riai ni kabanea korakoram ni kawakina Ana tua. Ko kona n tangira ao ni buokiia Natina. Ao am mwakuri e na kaitiaka nanom ma ni katauraoiko nakon taai aika imwaim.

Aio te bwai ae e ataia te aine ae mate buuna n te tabo n angamwane n te tembora. E ataia bwa e aki kaubwai Iteraera n ana angabwai are uarereke, ma e kona ni bita ao ni kakabwaia neiei—ibukina bwa, e ngae ngke e uarereke ana angabwai, aio bon ana bwai ni kabane.

Ngaia are, raou aika tangiraki ao ngkami taan iriira Iesu Kristo, ti riai n “aki kua ni karaoan ae raoiroi, bwa [ti] kawenea aan te mwakuri ae korakora.” Ao man bwaai aika uarereke e kaoti “te bwai ae korakora.”¹⁴

I kaota au koaua bwa e koaua aei, ao I kaota au koaua bwa Iesu Kristo bon ara Mwatita, ara Tia Kamaiu, ao bon tii Ngaia te kawai n okira Tamara are i Karawa. N aran Iesu Kristo ae tabu, amen.