Kawain te Berita: Te Kawai nakon te Maiu ae Akea Tokina

Te uea ae korakora e tangira natina te mwaane n tautaeka iaon teuana abanueana. Te nati n uea te mwaane e riai n reirei ao n rikirake n te rabwakau n taua te kaintoka n uea. Te bong teuana, e kaitibo te uea ma te nati n uea te mwaane ao n tibwa ana iango. A boonanoia bwa te nati n uea te mwaane e na nako n te kaawa teuana ao ni karekea reiakinana. E na kaitara ma kaangaanga n ai aron naba reken te kukurei ni bwaai aika a mwaiti ikekei. Te uea e kanakoa nakon te kaawa, are e kantaningaaki iai te nati n uea te mwaane bwa e na kakoauaaki nanomatoana nakon te uea ao ni kaota ae e tau ni karekei kariaia ao tibwanga are e a tia te uea ni katauraoi ibukina. Te nati n uea te mwaane e anganaki te inaomata n rineia ni karekei kariaia ao bukinaki aikai ke e na aki reke, e a bon nakon nanon ao ana kakaonimaki. I kakoaua ae ko rangi ni kan ataia bwa tera ae riki nakon te nati n uea te mwaane. E oki rikaaki ni bwaibwai n te abanuea?

Tariu ao mwaneu, ngaira n tatabemaniira bon naati n uea mwaane ao aine. Ti a tia ni kanakomaiakaki nakon te maiu aei iroun Tamara are i Karawa ae tatangira n kukurei n rabwatara ae e na manga riki n aki mamate rinanon Ana Mwakuri ni Kamaiu ao Mangautin Iesu Kristo. Ti kantaningaaki bwa ti na tauraoi n oki nako matan te Atua man kaotakin ae ti na “karaoi bwaai ni kabane are e na [tuangiira] te Uea ae [Atuara]” (Aberaam 3:25).

Ni buokiira, te Tia Kamaiu e roko bwa e na kamaiuira ao ni kaota te kawai n oki nakon te Atua. Natin te Atua a kaoaki bwa a na roko nakon te Tia Kamaiu ao ni kakororaoaki Irouna. Inanon koroboki aika tabu, ti kunea ae 90 te tai kaokiokan te kakao aei nakoira bwa ti na kawara te Uea ao e riaon iterana ae te kakao ae onoti nakoira n tatabemaniira mai iroun te Uea. Butimwaean ana kakao te Tia Kamaiu nanona anaakin Ana otenanti ao ni kawakin ara berita ma Ngaia. Iesu Kristo bon te kawai, te koaua , ao te maiu (Ioane 14:6), ao E weteira ni kabane “bwa ti na nakoina ma ni katoonga ana raoiroi; ao akea ae totokoia ngkana e nakoina” (2 Nibwaai 26:33).

Ara kamatebwai ao ara reirei n te euangkerio e kamatoaa rairakira nakon Tamara are i Karawa ao Iesu Kristo ao n buokiira n riki n ai Aroia. E ngae ngke a bane n tuai ni kaotaki bwaai ni kaineti bwa “ningai raoi taina ao e kangaa aron karekeana iroura te kakabwaia n te karietaataaki [are ti na] anganaki,”e ngae n akea kakoaukina iroura (M. Russell Ballard, “Te Hope in Christ,” Riaona, Meei 2021, 55).

Aramwa te ibonga ae rietaata, e reirei i abaia Taraemera, e a manga taekina ana kakao ae kakawaki Iesu Kristo bwa:

“Nooria, e kanakoa te kakao nakoia aomata, bwa te bai n nanoanga e aroraki nakoia, ao e taku: Rairinanomi, ao N na butimwaeingkami.

Eng, e taku: nakomai nakoiu ao kam na kana uaan te kai ni kamaiu” (Aramwa 5:33–34).

Bon te Tia Kamaiu ae e kaoira bwa ti na Nakoina ao n uota Amona iaora bwa ti aonga ni karekea te motirawa n te aonaaba ae mangaongao aei (taraa Mataio 11:28–29). Ti riai n nakon Kristo rinanon “kamwakuran ara onimaki i [Rouna], te rairannano n tebong koraki, karaoan berita aika tabu ma te Atua ni karaoan otenanti ni kamaiu ao ni karietataki, ao te teimatoa ni karokoa te toki ni kawakin ara berita” (Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 1.2.1, ChurchofJesusChrist.org). Te kawai nakon te kakororaoaki bon kawain te berita ae tabu, ao Kristo bon boton taian otenant ao berita ni kabane.

Te Uea ae Beniamina e reirei bwa ibukin te berita are ti karaoi, ti riki bwa naati mwaane ao aine iroun Kristo, are e a tia ni manga bungiia tamneira, ao ti kainaomataaki i aan te ara anne, bwa “bon akea te ara riki teuana are e na reke mai iai te kamaiuaki” (taraa Motiaea 5:7-8). Ti kamaiuaki ngkai ti teimatoa ni karokoa te toki man “iran te katooto are e a tia ni kaotia Natin te Atua ae maiu” (2 Nibwaai 31:16). E anga reirei Nibwaai bwa bwaai aikai ni kabane aki ti karaoaki man touan te kawai ae eti man irariki; ti riai ni “waaki nako man teimatoa inanon Kristo, ma te kantaninga ae tamaroa ma ni kororaoi, ma tangiran te Atua ma aomata ni kabane” (taraa 2 Nibwaai 31:19–20).

Ana reirei Kristo e buokiira ni kunea ao n tiku iaon kawain te beita ae tabu, ao te euangkerio e bon barongaaki bwa ana berita ni kakabwaia te Uea a karekeaki rinanon otenanti ao berita aika tabu. Ana burabeti te Atua, Beretitenti Russell M. Nelson, e kauringiira n te kanakobwanaa n Tianuare 16, 2018 n “tiku iaon kawain te berita. Am motinnano n ira te Tia Kamaiu ni karaoan berita aika tabu ma Ngaia ao ni kawakin berita akanne e na kauka te mataroa nakon kakabwaia n tamnei ma te tibwanga ae tauraoi nakoia mwaane, aine, ao ataei n taabo nako. … Te toki ae ti bane ni uaiakinna bon te kakorakoraki n te mwaaka n ana auti te Uea, ni kabaeaki bwa utu, kakaonimaki nakon berita aika a karaoaki n te tembora are e katauiira ibukin ana bwaintituaraoi te Atua, ae te maiu are akea tokina.” (”As We Go Forward Together,” Riaona, Eberi. 2018, 7).

Te Atua E na bon aki kitana Ana reitaki, ke ana kakabwaia ae te maiu ae akea tokina mairouia, aomata ake a kawakin aia berita. Ao ngkae ti kawakin ara berita aika tabu, ti kaan riki ma te Tia Kamaiu. Ngkoananoa E reireinira Unimwaane David A. Bednar bwa berita aika tabu ao otenanti n te euangkerio a mwakuri inanon maiura n aron te kambwati n anganiira kawaira nakon Kristo ao n riki n Aekakina.

Taian berita a kaota te kawai n oki rikaaki nakon te Atua. Te otenanti ni bwabetito ao karekean ana bwai n tituaraoi te Tamnei ae Raoiroi, katabuaki nakon te nakoanibonga, ao te toa a kairiira nakon ana tembora te Uea ni karekea Ana otenanti ni karietataaki.

I tangiria n taekinii uoua bwaai ae ara Tia Kamaiu e katuruturui ni buokiira n teimatoa ni kawakin taian berita:

1. Te Tamnei ae Raoiroi e kona ni kauringiira n ana reirei te Tia Kamaiu, ao n tiku iroura n aki toki (taraa Ioane 14:16, 26). E kona n riki bwa raoraora ni katoa tai ni kairiira iaon kawain te berita ae tabu. Beretitenti Russell M. Nelson e reirei bwa “ni boong aika imwaiira, e na bon aki kona ni kamaiuaki tamneira n akean te kawakinaki, kairaki, karaunano, ao reitinakon ana kakairi te Tamnei ae Raoiroi” (“Revelation for the Church, Revelation for Our Lives,” Riaona, Meei 2018, 96).

2. Te Tia Kamaiu e moa n anga te otenanti n te toa bwa ti na ururingnga n tainako ao bwa e na memena Tamneina iaora n tainako. Te bwabetito e kauka te mataroa nakon te maiu ae akea tokina, ao te toa e buokiira ni kateimatoaira ni waaki rake iaon kawain te berita ae tabu. Ngkai ti anaa te toa, e na riki bwa te kakoaua nakon te Tama bwa ti na aki toki n ururingnga Natina n taainako. Ao ngkai ti aki toki n ururinga ao ni kawakin Ana tua, ti na karekea Tamneina iaora. Reitan te kakabwaia aei, te Uea e kabooua te berita ni kabwaraan ara bure ngkai ti karinanoira n rairii nanora man ara bure.

N tiku n teimatoa nakon ara berita, ti riai ni kekeiaki ni karekea te Tamnei n taai nako ni katauraoira bwa ti na tau n taua te toa, ao arona naba, bwa tina anaa te toa n tainako bwa e angoa ni memena Tamneina iaora.

Ngke ai tibwa nimaua ana ririki natira te aine, iai ana kaa ae uarereke ae buti man te baetere ao e mamate nanona ni kabutia ni katobibia te auti. N te tairiki teuana, e kawarai ao n taku, “Daddy, e aki kona ni buti au kaa. Ti kona ni karekea bwaana te bentiin man am ka ao ni kanoaia iai bwa e aonga ni manga buti? Tao e bon kainnanoa bwaana n aron am kaa bwa e na buti.”

I noria imwiina bwa e a bane kanoan te baetere, I taekinna bwa ti kona ni manga kabutia tao imwiin teuana te aoa. Ma nanona n rangi ni kukurei, e taku, “Ngaia raoi! Ti na uotia nakon te tabo ni bwaa.” Ma I ti katomaa te baetere nakon te iti n tiatinna, ao imwiin teuana te aoa e a kona ni buti n te ka, ae e buti man te baetere ae tiatinaki. E reiakinna imwiina bwa e rangi ni kakawaki n tainako n tiatina te baetere man ti katomaana nakon te iti.

Ngkai e reiakinna natira te aine aron te reitaki imarenan te baetere ao te korakora ni kabuta ana kaa n takakaro, ti reiakina naba aron Iesu Kristo, te toa, ao te Tamnei. Ti kainnanoa te Tamnei ni buokiira ni borau rinanon te maiu aei ngkai ti kakaonimaki ni kawakin berita, ao te toa n anganiira te korakora ni maiun tamneira. Kabouakin ara berita are ti karaoia n te bwabetito ao tauakin te toa e uotiira n te onimaki ae nene nakon berita ni kabane ake tabeua. Te toki ae kakukurei e na reke ngkai ti kamatebwai ma te tataromwaka ao ni karinea ana kakao te Tia Kamaiu ao ni kakatonga n Ana kakabwaia ake E beritanii. E taku, “Ao bwa kam aonga n kawakiningkami raoi man baarekan te aonaba, ko na nakon te auti n tataro ao ni karaoi mwakuri aika tabu n au bong ae e tabu” (Reirei ao Berita aika Tabu 59:9).

I kakoauaa bwa naake a kawakin berita aika tabu koaua a beritanaki te rau n te aonaaba aei ao te maiu akea tokina n te aonaaba are e na roko” (Reirei ao Berita aika Tabu 59:23). I kaota koauana bwa ngkai ko anaa katotongan rabwatan te Tia Kamaiu rinanon te toa, ko na karekea Tamneina bwa e na kairiko iaon kawain te berita ao n teimatoa n onimaki nakon am berita. N aran Iesu Kristo, amen.