« លំដាប់នោះ យើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែវិញ »
ពេលយើងបន្ទាបខ្លួនយើង និងអនុវត្តសេចក្តីជំនឿលើព្រះយេស៊ូវគ្រីស្ទ នោះព្រះគុណនៃព្រះគ្រីស្ទ និងពលិកម្មដ៏ធួន និងនិរន្តររបស់ទ្រង់អាចធ្វើឲ្យមានការផ្លាស់ប្តូរបាន ។
មានគ្រាមួយប្រធាន ថូម៉ាស អេស ម៉នសុន បានចែកចាយរឿងរបស់ ក្លីនតុន ដូហ្វី ដែលជាឆ្មាំគុកម្នាក់ ។ « អំឡុងទសវត្សរ៍ឆ្នាំ ១៩៤០ និង ១៩៥០ [ វ៉ាដិន ដូហ្វី ] ល្បីឈ្មោះ ដោយសារការខិតខំរបស់គាត់ ដើម្បីស្ដារនីតិសម្បទាបុរសនៅក្នុងគុករបស់គាត់ ។ អ្នករិះគន់ម្នាក់បាននិយាយថា ‹ អ្នកគួរដឹងថា ខ្លារខិនវាមិនផ្លាស់ប្ដូរពណ៌សម្បុរលើខ្លួនវាឡើយ ! ›
វ៉ាដិន ដូហ្វី បានឆ្លើយថា ‹ អ្នកគួរដឹងថា ខ្ញុំមិនបានធ្វើការជាមួយសត្វខ្លារខិននោះទេ ។ ខ្ញុំធ្វើការជាមួយនឹងមនុស្ស ហើយមនុស្សផ្លាស់ប្ដូររាល់ថ្ងៃ › » ។១
ការកុហកដ៏ធំបំផុតមួយរបស់សាតាំងនោះគឺថា មនុស្សទាំងប្រុសទាំងស្រីពុំអាចផ្លាស់ប្តូរបានឡើយ ។ ការកុហកនេះត្រូវបានប្រាប់តៗគ្នា ម្ដងហើយម្ដងទៀត តាមរបៀបផ្សេងៗគ្នាជាច្រើន ដូចលោកិយប្រាប់ថា យើងមិនអាចផ្លាស់ប្តូរបានទេ—ឬអាក្រក់ជាងនេះទៅទៀត ប្រាប់ថាយើងមិនគួរផ្លាស់ប្តូរឡើយ ។ យើងត្រូវបានបង្រៀនថា កាលៈទេសៈរបស់យើងកំណត់ពីខ្លួនយើង ។ យើងគួរតែ « ឱបក្រសោបភាពពិតនៃខ្លួនយើង » លោកិយនិយាយថា « ហើយចូរស្មោះត្រង់នឹងខ្លួនឯង » ។
យើងអាចផ្លាស់ប្តូរបាន
ខណៈដែលការស្មោះត្រង់នឹងខ្លួនឯងវាជារឿងល្អមែន ប៉ុន្តែយើងគួរតែស្មោះត្រង់ខ្លួនយើងចំពោះភាពពិតប្រាកដនៃខ្លួនយើង ដែលជាបុត្រានិង បុត្រីនៃព្រះ ដែលមានចរិត និងគោលដៅនៃព្រះដើម្បីប្រែក្លាយដូចជាទ្រង់ ។២ បើសិនគោលដៅរបស់យើងគឺដើម្បីស្មោះត្រង់នឹងចរិត និងគោលដៅនៃព្រះ នោះយើងទាំងអស់គ្នាត្រូវតែផ្លាស់ប្តូរ ។ ពាក្យនៅក្នុងព្រះគម្ពីរសម្រាប់ការផ្លាស់ប្តូរគឺ ការប្រែចិត្ត ។ ប្រធាន រ័សុល អិម ណិលសុន បង្រៀនថា « មានមនុស្សច្រើនណាស់គិតថា ការប្រែចិត្តជាទណ្ឌកម្ម—ជាអ្វីមួយដែលត្រូវចៀសវាង លើកលែងតែស្ថានភាពធ្ងន់ធ្ងរបំផុតប៉ុណ្ណោះ ។ … នៅពេលព្រះយេស៊ូវគ្រីស្ទបង្គាប់ឲ្យបងប្អូន និងរូបខ្ញុំ ‹ ប្រែចិត្ត › ទ្រង់កំពុងអញ្ជើញយើងឲ្យផ្លាស់ប្ដូរ » ។៣
លក្ខខណ្ឌរបស់ព្រះ
អ្នកបង្កើតសុសវែរកុំព្យូទ័រប្រើសេចក្តីថ្លែងការណ៍ជាលក្ខខណ្ឌ ដើម្បីបញ្ជាកុំព្យូទ័រអំពីអ្វីដែលត្រូវធ្វើ ។ ជួនកាល គេហៅសេចក្តីថ្លែងការណ៍នោះថាជា សេចក្តីថ្លែងការណ៍បើសិន-ជា ។ គឺដូចសមីការ បើសិន x ពិត នោះត្រូវរក y ។
ព្រះអម្ចាស់ក៏ប្រតិបត្តិតាមលក្ខខណ្ឌផងដែរគឺ ៖ លក្ខខណ្ឌនៃសេចក្តីជំនឿ លក្ខខណ្ឌនៃសេចក្តីសុចរិត លក្ខខណ្ឌនៃការប្រែចិត្ត ។ មានឧទាហរណ៍ជាច្រើនអំពីសេចក្តីថ្លែងការណ៍ដែលមានលក្ខខណ្ឌមកពីព្រះដូចជា ៖
« បើសិនជា អ្នកកាន់តាមព្រះបញ្ញត្តិទាំងឡាយរបស់យើង ហើយកាន់ខ្ជាប់ដរាបដល់ចុងបំផុត [ នោះ ] អ្នកនឹងបានជីវិតដ៏នៅអស់កល្បជានិច្ច គឺជាអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ » ។៤
ឬ « បើសិនជាអ្នករាល់គ្នាសូមសួរដោយចិត្តស្មោះសរ គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ [ នោះទ្រង់នឹងសម្ដែងសេចក្ដីពិតនៃការណ៍នេះដល់អ្នក ដោយព្រះចេស្ដានៃព្រះវិញ្ញាណបរិសុទ្ធ » ។៥
សូម្បីតែសេចក្តីស្រឡាញ់របស់ព្រះ ដែលគ្មានដែនកំណត់ និងល្អឥតខ្ចោះ ក៏ស្ថិតនៅក្រោមលក្ខខណ្ឌផងដែរ ។៦ ឧទាហរណ៍ ៖
« បើ អ្នករាល់គ្នាកាន់តាមបញ្ញត្តិខ្ញុំ [ នោះ ] នឹងនៅជាប់ក្នុងសេចក្តីស្រឡាញ់របស់ខ្ញុំ ដូចជាខ្ញុំបានកាន់តាមបញ្ញត្តិនៃព្រះវរបិតាខ្ញុំ ហើយក៏នៅជាប់ក្នុងសេចក្តីស្រឡាញ់របស់ទ្រង់ដែរ » ។៧
អែលឌើរ ឌី ថត គ្រីស្តូហ្វឺសិន បានពន្យល់បន្ថែមអំពីសេចក្តីពិតនៃដំណឹងល្អនេះ ពេលលោកបង្រៀន ៖ « មនុស្សមួយចំនួនទម្លាប់និយាយថា ‹ ព្រះអង្គសង្គ្រោះស្រឡាញ់ខ្ញុំ ទោះខ្ញុំជាមនុស្សបែបណាក៏ដោយ › ហើយនោះជាការពិតណាស់ ។ ប៉ុន្តែទ្រង់មិនអាចយកយើងទៅនគររបស់ទ្រង់ ទោះយើងជាមនុស្សបែបណាក៏ដោយនោះទេ « ដ្បិតគ្មានអ្វីដែលមិនស្អាតអាចអាស្រ័យនៅទីនោះ ឬនៅក្នុងវត្តមានរបស់ទ្រង់បានឡើយ » [ ម៉ូសេ ៦:៥៧ ] ។ អំពើបាបរបស់យើងត្រូវតែបានដោះស្រាយជាមុនសិន » ។៨
អ្វីដែលទន់ខ្សោយអាចក្លាយទៅជាខ្លាំងពូកែ
ពរជ័យនៃការទទួលបានព្រះចេស្តារបស់ព្រះដើម្បីជួយយើងឲ្យផ្លាស់ប្តូរ ក៏មានលក្ខខណ្ឌផងដែរ ។ ព្រះអង្គសង្គ្រោះបានបង្រៀន ដោយមានបន្ទូលតាមរយៈព្យាការីមរ៉ូណៃ នៅក្នុងព្រះគម្ពីរមរមន ៖ « ហើយបើសិនជាមនុស្សលោកមករកយើង នោះយើងនឹងបង្ហាញដល់ពួកគេនូវភាពទន់ខ្សោយរបស់ពួកគេ ។ យើងឲ្យភាពទន់ខ្សោយទៅមនុស្ស ដើម្បីឲ្យពួកគេអាចបានរាបសា ហើយគុណរបស់យើង មានគ្រប់គ្រាន់សម្រាប់មនុស្សទាំងអស់ដែលបន្ទាបខ្លួននៅចំពោះយើង ដ្បិតបើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង លំដាប់នោះ យើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ។៩
សូមមើលឲ្យល្អិតល្អន់នូវអ្វីដែលព្រះអម្ចាស់កំពុងបង្រៀនយើងនៅត្រង់នេះ យើងមើលឃើញថាដំបូងទ្រង់មានបន្ទូលថា ទ្រង់ប្រទានភាពទន់ខ្សោយ, ជាទម្រង់ឯកវចនៈ ទៅមនុស្សទាំងប្រុសទាំងស្រី ដែលជាផ្នែកមួយនៃបទពិសោធន៍ក្នុងជីវិតរមែងស្លាប់របស់យើង ជាស្ថានភាពធ្លាក់ ឬខាងរូបកាយ ។ យើងបានប្រែជាមនុស្សប្រុសស្រីខាងសាច់ឈាម ដោយសារតែការធ្លាក់របស់លោកអ័ដាម ។ ប៉ុន្តែតាមរយៈដង្វាយធួនរបស់ព្រះយេស៊ូវគ្រីស្ទ នោះយើងអាចឈ្នះលើភាពទន់ខ្សោយ ឬស្ថានភាពធ្លាក់របស់យើងបាន ។
បន្ទាប់មកទ្រង់មានបន្ទូលថា ព្រះគុណរបស់ទ្រង់មានគ្រប់គ្រាន់ ហើយ ថាបើសិនជាយើងនឹងបន្ទាបខ្លួន ហើយមានសេចក្តីជំនឿជឿលើទ្រង់ នោះទ្រង់នឹង « ធ្វើឲ្យ អ្វីពហុវចនៈ ] ដែលទន់ខ្សោយក្លាយទៅជាខ្លាំងពូកែចំពោះ [ ពួកយើង ] វិញ » ។ និយាយម៉្យាងទៀតថា នៅពេលយើងផ្លាស់ប្តូរស្ថានភាពធ្លាក់ និងភាពទន់ខ្សោយរបស់យើងជាមុនសិន នោះយើងនឹងអាចផ្លាស់ប្តូរអាកប្បកិរិយារបស់យើង និងភាពទន់ខ្សោយរបស់យើងបានផងដែរ ។
តម្រូវការនៃការផ្លាស់ប្ដូរ
ចូរយើងរំឭកពីតម្រូវការដើម្បីផ្លាស់ប្តូរ យោងតាមលំនាំរបស់ព្រះអម្ចាស់ ៖
ទីមួយ យើងត្រូវបន្ទាបខ្លួនរបស់យើង ។ លក្ខខណ្ឌរបស់ព្រះអម្ចាស់សម្រាប់ការផ្លាស់ប្តូរគឺការបន្ទាបខ្លួន ។ ទ្រង់បានមានបន្ទូលថា « បើសិនជា ពួកគេបន្ទាបខ្លួននៅចំពោះយើង » ។១០ ពាក្យផ្ទុយនឹងការបន្ទាបខ្លួននោះគឺភាពឆ្មើងឆ្មៃ ។ យើងមានភាពឆ្មើងឆ្មៃនៅពេលដែលយើងគិតថា យើងដឹងល្អជាង—នៅពេលអ្វីដែល យើង គិត ឬទទួលអារម្មណ៍មានអាទិភាពលើសអ្វីដែល ព្រះ ទ្រង់រាជតម្រិះ ឬមានព្រះទ័យ ។
ស្ដេចបេនយ៉ាមីនបានបង្រៀនថា « មនុស្សខាងសាច់ឈាមជាសត្រូវដល់ព្រះ … ហើយនឹងនៅយ៉ាងនេះជារៀងដរាបតទៅ លើកលែងតែគេ… សម្រាតភាពខាងសាច់ឈាមចេញ ហើយក្លាយទៅជាអ្នកបរិសុទ្ធវិញ តាមរយៈដង្វាយធួននៃព្រះគ្រីស្ទដ៏ជាព្រះអម្ចាស់ ហើយក្លាយទៅដូចជាកូនក្មេង ងាយប្រដៅ ស្លូតបូត [ និង ] រាបសា » ។១១
ដើម្បីផ្លាស់ប្តូរ យើងត្រូវតែសម្រាតភាពខាងសាច់ឈាមចេញ ហើយក្លាយទៅជាទាបរាបសា និងងាយប្រដៅ ។ យើងបន្ទាបខ្លួនសមល្មមដើម្បីធ្វើតាមព្យាការីដែលនៅរស់ ។ បន្ទាបខ្លួនសមល្មមដើម្បីចុះ និងកាន់តាមសេចក្តីសញ្ញានៃព្រះវិហារបរិសុទ្ធ ។ បន្ទាបខ្លួនសមល្មមដើម្បីប្រែចិត្តរាល់ថ្ងៃ ។ យើងត្រូវបន្ទាបខ្លួនសមល្មម ដើម្បីចង់ផ្លាស់ប្តូរ ដើម្បី « ប្រគល់ចិត្ត របស់យើង ដល់ព្រះ » ។១២
ទីពីរ យើងត្រូវតែមានសេចក្ដីជំនឿលើព្រះយេស៊ូវគ្រីស្ទ ។ ជាថ្មីម្តងទៀត ព្រះបន្ទូលរបស់ព្រះអង្គសង្គ្រោះ ៖ « បើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង »១៣ នោះទ្រង់នឹងប្រទានអំណាចដល់យើងឲ្យយកឈ្នះលើភាពទន់ខ្សោយរបស់យើង ។ ការបន្ទាបខ្លួនរួមជាមួយនឹងសេចក្តីជំនឿលើព្រះយេស៊ូវគ្រីស្ទ នឹងអនុញ្ញាតឲ្យយើងទទួលបានអំណាចនៃព្រះគុណរបស់ទ្រង់ និងភាពពោរពេញនៃពរជ័យដែលមាន ដោយសារដង្វាយធួនរបស់ទ្រង់ ។
ប្រធាន ណិលសុន បានបង្រៀនថា « ការប្រែចិត្តដ៏ពិតចាប់ផ្ដើមដោយសេចក្ដីជំនឿថា ព្រះយេស៊ូវគ្រីស្ទមានព្រះចេស្ដាដើម្បីសម្អាត ព្យាបាល និងពង្រឹងយើង ។ … គឺសេចក្ដីជំនឿ របស់យើង ដែលចាក់សោបើកព្រះចេស្តានៃព្រះមកក្នុងជីវិត របស់យើង » ។១៤
ទីបី តាមរយៈព្រះគុណរបស់ទ្រង់ នោះទ្រង់អាចធ្វើឲ្យអ្វីដែលទន់ខ្សោយក្លាយទៅជាខ្លាំងពូកែបាន ។ បើសិនជា យើងបន្ទាបខ្លួនយើង ហើយមានសេចក្តីជំនឿលើព្រះយេស៊ូវគ្រីស្ទ នោះ ព្រះគុណរបស់ទ្រង់នឹងអាចឲ្យយើងផ្លាស់ប្តូរបាន ។ និយាយម្យ៉ាងទៀតថា ទ្រង់នឹងប្រទានអំណាចឲ្យយើងផ្លាស់ប្តូរ ។ ការណ៍នេះអាចធ្វើទៅបាន ដោយសារទ្រង់មានបន្ទូលថា « គុណរបស់យើងមានគ្រប់គ្រាន់សម្រាប់មនុស្សទាំងអស់ » ។១៥ ព្រះគុណដែលពង្រឹង និងផ្តល់អំណាចរបស់ទ្រង់ ប្រទានអំណាចដល់យើងឲ្យយកឈ្នះលើឧបសគ្គ ទាំងអស់ ការលំបាក ទាំងអស់ និងភាពទន់ខ្សោយ ទាំងអស់ នៅពេលយើងព្យាយាមផ្លាស់ប្តូរ ។
ភាពទន់ខ្សោយដ៏ធំបំផុតរបស់យើងអាចក្លាយទៅជាភាពខ្លាំងបំផុតរបស់យើងបាន ។ យើងអាចផ្លាស់ប្តូរ ហើយ « ក្លាយជាសត្វលោកថ្មី » ។១៦ អ្វីៗដែលទន់ខ្សោយពិតជាអាច « ក្លាយទៅជាខ្លាំងពូកែចំពោះ [ យើង ] វិញ » បានមែន ។១៧
ព្រះអង្គសង្គ្រោះបានរៀបចំដង្វាយធួនដ៏និរន្តរ និងអស់កល្បជានិច្ចរបស់ទ្រង់ ដើម្បីឲ្យយើងពិតជាអាចផ្លាស់ប្តូរ ប្រែចិត្ត និងប្រែកាន់តែប្រសើរឡើង ។ យើងពិតជាអាចកើតជាថ្មីម្តងទៀតបាន ។ យើងអាចយកឈ្នះលើទម្លាប់ ការញៀន និងសូម្បីតែ « បំណងប្រព្រឹត្តអំពើទុច្ចរិត » បាន ។១៨ ក្នុងនាមជាបុត្រាបុត្រីរបស់ព្រះដែលពេញដោយក្ដីស្រឡាញ់ដែលគង់នៅស្ថានសួគ៌ នោះយើងមានអំណាចនៅក្នុងខ្លួនយើងដើម្បីផ្លាស់ប្តូរ ។
គំរូនៃការផ្លាស់ប្ដូរ
ព្រះគម្ពីរមានពោរពេញដោយគំរូនៃបុរស និងស្ត្រីដែលបានផ្លាស់ប្តូរ ។
សុលដែលជាពួកផារិស៊ី និងជាអ្នកធ្វើទុក្ខបុកម្នេញយ៉ាងសកម្មដល់ព្រះវិហារគ្រីស្ទានជំនាន់ដើម១៩ បានក្លាយទៅជាប៉ុល ជាសាវកម្នាក់របស់ព្រះអម្ចាស់ព្រះយេស៊ូវគ្រីស្ទ ។
អាលម៉ាធ្លាប់ជាសង្ឃម្នាក់នៅក្នុងទីជំនុំក្តីរបស់ស្តេចណូអេដ៏ទុច្ចរិត ។ លោកបានស្តាប់ឮពាក្យរបស់អ័ប៊ីណាដៃ បានប្រែចិត្តទាំងស្រុង ហើយបានក្លាយជាអ្នកផ្សព្វផ្សាយសាសនាម្នាក់ដ៏អស្ចារ្យនៃព្រះគម្ពីរមរមន ។
កូនប្រុសរបស់លោកគឺអាលម៉ា បានចំណាយពេលក្នុងយុវវ័យរបស់លោកខិតខំបំផ្លាញសាសនាចក្រ ។ លោកនៅក្នុងចំណោម « មនុស្សអាក្រក់បំផុតក្នុងចំណោមមនុស្សដែលមានបាបទាំងឡាយ »២០ រហូតដល់លោកបានផ្លាស់ប្តូរចិត្តលោក ហើយក្លាយទៅជាអ្នកផ្សព្វផ្សាយសាសនាដ៏មានអានុភាព តាមរយៈកិច្ចខិតខំផ្ទាល់របស់លោក ។
ម៉ូសេត្រូវបានយកទៅចិញ្ចឹមនៅក្នុងគ្រួសារផារ៉ោន ហើយបានធំឡើងនៅក្នុងវាំងដ៏ប្រណិត ក្នុងនាមជាព្រះអម្ចាស់មួយអង្គនៃអេស៊ីព្ទ ។ ប៉ុន្តែនៅពេលលោកបានស្គាល់ខ្លួនលោកជានរណា និងបានដឹងពីគោលដៅនៃភាពជាព្រះរបស់លោក នោះលោកបានផ្លាស់ប្តូរ ហើយក្លាយទៅជាព្យាការីចែងច្បាប់ដ៏ធំនៅក្នុងព្រះគម្ពីរសញ្ញាចាស់ ។២១
ខ្ញុំតែងកោតសរសើរដល់ ជេមស៍ ប៊ី ខីស័រ ដែលជាជីតារបស់ភរិយាខ្ញុំជានិច្ច ដោយសារតែការផ្លាស់ប្តូរយ៉ាងធំក្នុងចិត្តរបស់គាត់ផ្ទាល់ ។២២ ដោយបានកើតពីពួកបរិសុទ្ធថ្ងៃចុងក្រោយដ៏ស្មោះត្រង់ជាបព្វការីជនអ្នកត្រួសត្រាយនៅឯជ្រលងភ្នំសតល៍ លេក នោះគាត់បានបាត់បង់ម្តាយទាំងក្មេងវ័យ ហើយពុះពារឆ្លងកាត់យុវវ័យរបស់គាត់ ។ អំឡុងពេលវ័យជំទង់ និងយុវមជ្ឈិមវ័យរបស់គាត់ដែលបានចេញឆ្ងាយពីសាសនាចក្រ ជាពេលដែលគាត់បានបង្កើតទម្លាប់អាក្រក់មួយចំនួន ។ ប៉ុន្តែគាត់បានជួប ហើយរៀបការនឹងស្ត្រីដ៏ស្មោះត្រង់ម្នាក់ ហើយពួកគេបានចិញ្ចឹមបីបាច់កូនប្រាំនាក់ជាមួយគ្នា ។
នៅក្នុងឆ្នាំ ១៩៤៣ បន្ទាប់ពីរយៈពេលជាច្រើនឆ្នាំដ៏លំបាកនៃវិបត្តិសេដ្ឋកិច្ចដ៏ធ្ងន់ធ្ងរ និងអំឡុងពេលសង្គ្រាមលោកលើកទីពីរ នោះ បាដ នេះជាឈ្មោះដែលមិត្តភក្តិ និងគ្រួសារគាត់ហៅគាត់ បានចាកចេញពីរដ្ឋយូថាហ៍ ហើយប្តូរទៅរស់នៅទីក្រុង ឡូស អេនជើរលេស រដ្ឋ កាលីហ្វ័រញ៉ា ដើម្បីស្វែងរកការងារធ្វើ ។ អំឡុងគ្រាដែលនៅឆ្ងាយពីផ្ទះនេះ គាត់បានរស់នៅជាមួយបងស្រីរបស់គាត់ និងស្វាមីគាត់ ដែលកាលនោះកំពុងបម្រើជាប៊ីស្សពនៅវួដរបស់ពួកគេ ។
ដោយសេចក្តីស្រឡាញ់ និងឥទ្ធិពលរបស់បងស្រីគាត់ និងបងថ្លៃគាត់ នោះគាត់បានចាប់ផ្តើមបណ្ដុះចំណាប់អារម្មណ៍គាត់ឡើងវិញទៅលើសាសនាចក្រ ហើយបានចាប់ផ្តើមអានព្រះគម្ពីរមរមនរៀងរាល់យប់ ពីមុនចូលសម្រាន្ត ។
យប់មួយអំឡុងពេលគាត់អាននៅក្នុង អាលម៉ា ជំពូក ៣៤គាត់បានរំជួលចិត្ត នៅពេលគាត់អានពាក្យដូចតទៅនេះ ៖
« មែនហើយ ខ្ញុំចង់ឲ្យអ្នករាល់គ្នាចេញមក ហើយចូរកុំធ្វើចិត្តរឹងរូសទៀតឡើយ ។ …
ដ្បិតមើលចុះ ជីវិតនេះគឺជាពេលវេលា សម្រាប់ឲ្យមនុស្សប្រុងប្រៀបខ្លួនទៅជួបនឹងព្រះ មែនហើយ មើលចុះពេលវេលានៃជីវិតនេះ គឺជាពេលវេលាសម្រាប់ឲ្យមនុស្សប្រព្រឹត្តការងារទាំងឡាយរបស់ខ្លួន » ។២៣
អំឡុង ពេល គាត់អានខគម្ពីរទាំងនេះ អារម្មណ៍ដ៏មានឥទ្ធិពលមួយបានកើតឡើងចំពោះគាត់ ហើយគាត់បានដឹងថា គាត់ត្រូវតែផ្លាស់ប្តូរ ប្រែចិត្ត ហើយគាត់បានដឹងពីអ្វីដែលគាត់ត្រូវធ្វើ ។ គាត់បានក្រោកពីគ្រែដេករបស់គាត់ ហើយលុតជង្គង់ចុះ រួចចាប់ផ្តើមអធិស្ឋាន ដោយអង្វរដល់ព្រះអម្ចាស់ឲ្យអភ័យទោសដល់គាត់ ហើយប្រទានដល់គាត់នូវកម្លាំង ដែលគាត់ត្រូវការ ដើម្បីធ្វើការផ្លាស់ប្តូរក្នុងជីវិតគាត់ ។ ការអធិស្ឋានរបស់គាត់បានទទួលចម្លើយ ហើយចាប់តាំងពីពេលនោះមក គាត់មិនដែលងាកមើលក្រោយឡើយ ។ បាដ បានបន្តបម្រើនៅក្នុងសាសនាចក្រ ហើយបន្តធ្វើជាពួកបរិសុទ្ធថ្ងៃចុងក្រោយដ៏ស្មោះត្រង់ ដ៏មានការតាំងចិត្ត រហូតដល់ចុងបញ្ចប់នៃជីវិតគាត់ ។ គាត់បានផ្លាស់ប្តូរគ្រប់យ៉ាង ។ គំនិតគាត់ ដួងចិត្តគាត់ ទង្វើគាត់ អាកប្បកិរិយារបស់គាត់បានផ្លាស់ប្តូរ ។
បងប្អូនប្រុសស្រី ជោគវាសនា និងគោលបំណងដ៏ទេវភាពរបស់យើងនៅទីបំផុតគឺដើម្បីក្លាយជាដូចជាព្រះវរបិតាសួគ៌ និងព្រះអង្គសង្គ្រោះព្រះយេស៊ូវគ្រីស្ទ ។ យើងធ្វើកិច្ចការនេះ ពេលយើងផ្លាស់ប្តូរ ឬប្រែចិត្ត ។ យើង « ទទួលព្រះភក្ត្ររបស់ ព្រះអង្គសង្គ្រោះ នៅក្នុងទឹកមុខ [ របស់យើង ] » ។២៤ យើងប្រែជាមនុស្សថ្មី ជ្រះស្អាត ផ្សេងពីមុន ហើយយើងបន្តធ្វើបែបនេះយ៉ាងសាមញ្ញជារៀងរាល់ថ្ងៃ ។ ជួនកាលវាហាក់ដូចជាការបោះពីរជំហានទៅមុខ ហើយថយក្រោយមួយជំហានវិញ ប៉ុន្តែយើងបន្តឆ្ពោះទៅមុខនៅក្នុងសេចក្តីជំនឿដោយរាបសា ។
ហើយពេលយើងបន្ទាបខ្លួនយើង និងអនុវត្តសេចក្តីជំនឿលើព្រះយេស៊ូវគ្រីស្ទ នោះព្រះគុណនៃព្រះគ្រីស្ទ និងពលិកម្មដ៏ធួន និងនិរន្តររបស់ទ្រង់ អាចធ្វើឲ្យមានការផ្លាស់ប្តូរបាន ។
ខ្ញុំសូមធ្វើជាសាក្សី និងថ្លែងទីបន្ទាល់ថា ព្រះយេស៊ូវគ្រីស្ទគឺពិតជាព្រះអង្គសង្គ្រោះ និងព្រះប្រោសលោះរបស់យើងមែន ។ ព្រះគុណរបស់ទ្រង់គឺពិតជាមានល្មមគ្រប់គ្រាន់ ។ ខ្ញុំសូមប្រកាសថាទ្រង់គឺ« ជាផ្លូវ ជាសេចក្តីពិត ហើយជាជីវិត » ។២៥ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕