ភាពជាសិស្សដ៏ក្លាហាននៅថ្ងៃចុងក្រោយ
ចូរយើងមានទំនុកចិត្ត មិនសោកស្ដាយ ក្លាហាន មិនខ្មាស់អៀន ស្មោះត្រង់ មិនភ័យខ្លាច នៅពេលយើងលើកពន្លឺរបស់ព្រះអម្ចាស់ឡើងនៅថ្ងៃចុងក្រោយ ។
សិទ្ធិជ្រើសរើសខាងសីលធម៌គឺជាអំណោយទានដ៏មានតម្លៃរបស់ព្រះចំពោះកូនចៅរបស់ទ្រង់ម្នាក់ៗ ។១ យើង « មានសេរីភាពរើសយកឥស្សរភាព និងជីវិតដ៏នៅអស់កល្បជានិច្ច តាមរយៈព្រះជាអ្នកសង្រួបសង្រួមដ៏ធំរបស់មនុស្សលោកទាំងអស់ ឬក៏រើសយកការជាប់ឃុំឃាំង និងការស្លាប់ស្របតាមការជាប់ឃុំឃាំង និងអំណាចរបស់អារក្ស » ។២ ព្រះនឹងមិនបង្ខំយើងឲ្យធ្វើល្អទេ ហើយអារក្សក៏មិនអាចបង្ខំយើងឲ្យធ្វើអាក្រក់ដែរ ។៣ ទោះជាមានមនុស្សមួយចំនួនអាចនឹងគិតថា ជីវិតរមែងស្លាប់គឺជាការប្រកួតប្រជែងមួយរវាងព្រះ និងមារសត្រូវ ជាព្រះបន្ទូលមកពីព្រះអង្គសង្រ្គោះ « ហើយសាតាំងត្រូវបានធ្វើឲ្យស្ងាត់មាត់ ហើយត្រូវបណ្ដេញចេញ ។… កម្លាំង [ របស់យើង ] ទេតើដែលត្រូវបានសាកល្បង—ពុំមែនកម្លាំងរបស់ព្រះនោះទេ » ។៤
ហេតុដូច្នេះហើយ នៅចុងបញ្ចប់ យើងនឹងច្រូតកាត់នូវអ្វីដែលការជ្រើសរើសពេញមួយជីវិតរបស់យើងបានសាបព្រួស ។៥ ដូច្នេះតើគំនិត បំណងប្រាថ្នា ពាក្យសម្ដី និងកិច្ចការទាំងមូលរបស់យើងបង្ហាញអ្វីខ្លះអំពីសេចក្ដីស្រឡាញ់របស់យើងចំពោះព្រះអង្គសង្គ្រោះ ពួកអ្នកបម្រើដ៏ជម្រើសរបស់ទ្រង់ និងសាសនាចក្ររបស់ទ្រង់ដែលបានស្ដារឡើងវិញ ? តើសេចក្ដីសញ្ញានៃពិធីបុណ្យជ្រមុជទឹក បព្វជិតភាព និងព្រះវិហារបរិសុទ្ធរបស់យើងមានន័យចំពោះយើងលើសពីការសរសើរនៃពិភពលោកនេះ ឬចំនួន« ចូលចិត្ត » នៅលើប្រព័ន្ធផ្សព្វផ្សាយសង្គមដែរឬទេ ? តើសេចក្ដីស្រឡាញ់របស់យើងចំពោះព្រះអម្ចាស់ និងបទបញ្ញត្តិរបស់ទ្រង់ខ្លាំងជាងសេចក្ដីស្រឡាញ់របស់យើងចំពោះអ្វី ឬនរណាម្នាក់ផ្សេងទៀតនៅក្នុងជីវិតនេះដែរឬទេ ?
មារសត្រូវ និងបរិវាររបស់វាតែងតែខិតខំបំផ្លាញកិច្ចការរបស់ព្រះគ្រីស្ទ និងពួកសាវករបស់ទ្រង់ជានិច្ច ។ បទបញ្ញត្តិរបស់ព្រះអង្គសង្គ្រោះ បើមិនត្រូវបានបដិសេធទាំងស្រុង ក៏ត្រូវបានមនុស្សជាច្រើននៅក្នុងពិភពលោកសព្វថ្ងៃនេះយល់ឃើញថាគ្មានតម្លៃដែរ ។ ពួកសារទូតរបស់ព្រះដែលបង្រៀនសេចក្ដីពិតដែល « មនុស្សមិនចូលចិត្ត » ជារឿយៗត្រូវបានគេបណ្ដេញចេញ ។ សូម្បីតែព្រះអង្គសង្គ្រោះផ្ទាល់ត្រូវបានគេហៅថាជា« អ្នកល្មោភស៊ីផឹកច្រើន »៦ ដោយរងការចោទប្រកាន់ពីបទរំខានដល់អារម្មណ៍សាធារណៈ និងនាំឲ្យមានការទាស់ទែងគ្នា ។ ព្រលឹងដែលទន់ខ្សោយ និងកុហក « ពិគ្រោះគ្នាពីដំណើរយ៉ាងណានឹងចាប់ទ្រង់ ដោយនូវព្រះបន្ទូល »៧ ហើយ « និកាយ » នៃពួកគ្រីស្ទានរបស់ទ្រង់កាលពីបុរាណ « នៅគ្រប់ទីកន្លែង គេតែងតែនិយាយអាក្រក់ » ។៨
ព្រះអង្គសង្គ្រោះ និងពួកអ្នកដើរតាមទ្រង់ពីបុរាណបានប្រឈមនឹងឧបសគ្គដ៏ធ្ងន់ធ្ងរទាំងក្រៅទាំងក្នុង ហើយយើងក៏ដកពិសោធន៍រឿងនេះដូចគ្នាដែរ ។ សព្វថ្ងៃនេះ វាមានការលំបាកដើម្បីរស់នៅតាមសេចក្ដីជំនឿរបស់យើងដោយចិត្តក្លាហាន ដោយគ្មានការស្ដីបន្ទោសមួយចំនួនពីលោកិយដោយផ្ទាល់ និងតាមអនឡាញណាស់ ។ ការធ្វើតាមព្រះអង្គសង្គ្រោះដោយមានទំនុកចិត្តគឺជារឿងល្អ ប៉ុន្តែពេលខ្លះយើងអាចនឹងទទួលបាននូវការរិះគន់ពីអ្នកដែលយល់ស្របតាមទស្សនវិទ្យា« ស៊ីផឹកសប្បាយ »៩ ជាទីកន្លែងដែលសេចក្ដីជំនឿលើព្រះគ្រីស្ទ ការគោរពប្រតិបត្តិ និងការប្រែចិត្តត្រូវបានជំនួសដោយការបោកបញ្ឆោតថា ព្រះនឹងកែសម្រួលអំពើបាបតូចតាច ដោយសារទ្រង់ស្រឡាញ់យើងខ្លាំង ។
ការមានព្រះបន្ទូល « ដោយសំឡេងរបស់ [ ទ្រង់ ] ផ្ទាល់ ឬក៏ដោយសំឡេងនៃពួកអ្នកបម្រើរបស់ [ ទ្រង់ ] ក្ដី »១០តើព្រះអង្គសង្គ្រោះពុំបានមានព្រះបន្ទូលអំពីជំនាន់របស់យើងថា « មានគ្រាមក ដែលគេមិនទ្រាំទ្រនឹងសេចក្ដីបង្រៀនដ៏ត្រឹមត្រូវទេ គឺគេនឹងមានត្រចៀករមាស់ ហើយនឹងហៅគ្រូកាន់តែច្រើនឡើង មកបង្រៀនឲ្យត្រូវចិត្ត » ហើយថាមនុស្សជាច្រើន « នឹងងាកត្រចៀកចេញពីសេចក្ដីពិត បែរទៅតាមរឿងព្រេងវិញ » ទេឬអី ?១១តើទ្រង់ពុំបានព្រះកន្សែងដោយមានព្រះបន្ទូលថា « គេថ្វាយបង្គំអញឥតប្រយោជន៍ទេ ព្រោះគេបង្រៀនសេចក្ដីដែលជាបញ្ញត្តិរបស់មនុស្សវិញ»១២ទេឬអី ? តើទ្រង់ពុំបានព្រមានថា « ក្នុងចំណោមអ្នករាល់គ្នា ក៏នឹងកើតមានមនុស្ស ដែលនឹងអធិប្បាយសេចក្ដីទំនាស់ខុសដែរ ដើម្បីនឹងទាញនាំពួកសិស្សទៅតាមគេវិញ »១៣ទេឬអី ? តើទ្រង់ពុំបានទតឃើញជាមុនថា « សេចក្ដីអាក្រក់ [ នឹងត្រូវបានហៅ ] ថាជាល្អ ហើយសេចក្ដីល្អថាជាអាក្រក់វិញ »១៤ហើយថា « ឯពួកសត្រូវរបស់អ្នកណា នោះគឺជាពួកអ្នកនៅផ្ទះជាមួយនឹងខ្លួននោះឯង »១៥ទេឬអី ?
តើចុះពួកយើងវិញ ? តើយើងគួរតែតក់ស្លុត ឬភ័យខ្លាចដែរឬទេ ? តើយើងគួរតែរស់នៅតាមសាសនារបស់យើងក្នុងរបៀបដែលមនុស្សដទៃមិនយល់ដែរឬទេ ? ពិតជាពុំមែនទេ ! ដោយមានសេចក្ដីជំនឿលើព្រះគ្រីស្ទ យើងមិនត្រូវភ័យខ្លាចសេចក្ដីត្មះតិះដៀលរបស់មនុស្សឡើយ ក៏កុំឲ្យស្រយុតចិត្តដោយពាក្យបង្កាច់របស់គេដែរ ។១៦ ដោយមានព្រះអង្គសង្គ្រោះមើលខុសត្រូវ និងព្យាការីទាំងឡាយដែលនៅរស់ដើម្បីដឹកនាំ ហើយណែនាំយើង« តើអ្នកណាអាចទាស់នឹងយើងបាន ? »១៧ ចូរយើងមានទំនុកចិត្តមិនសោកស្ដាយ ក្លាហាន មិនខ្មាស់អៀន ស្មោះត្រង់ មិនភ័យខ្លាច នៅពេលយើងលើកពន្លឺរបស់ព្រះអម្ចាស់ឡើងនៅថ្ងៃចុងក្រោយ ។១៨
ព្រះអង្គសង្គ្រោះបានបញ្ជាក់យ៉ាងច្បាស់ថា « ដូច្នេះ អស់អ្នកណាដែលទទួលថ្លែងប្រាប់ ពីខ្ញុំនៅមុខមនុស្សលោក នោះខ្ញុំនឹងទទួលថ្លែងប្រាប់ពីអ្នកនោះនៅចំពោះព្រះវរបិតាខ្ញុំដែរ ។… តែអ្នកណាដែលមិនព្រមទទួលស្គាល់ខ្ញុំនៅមុខមនុស្សលោកទេ នោះខ្ញុំក៏មិន ព្រមទទួលស្គាល់អ្នកនោះនៅចំពោះព្រះវរបិតាខ្ញុំ » ។១៩
ដូច្នេះ ខណៈដែលមនុស្សមួយចំនួនចង់បានព្រះដែលគ្មាននូវបទបញ្ញត្តិ ចូរយើងថ្លែងទីបន្ទាល់ដ៏មុតមាំតាមប្រសាសន៍របស់អែលឌើរ ឌី ថត គ្រីស្តូហ្វឺសិនថា « ព្រះដែលពុំតម្រូវអ្វីទាំងអស់ គឺដំណើរការដូចជានឹងព្រះដែលពុំមានព្រះជន្មផងដែរ » ។២០
ខណៈដែលមនុស្សមួយចំនួនចង់ជ្រើសរើសបទបញ្ញត្តិដែលពួកគេធ្វើតាម ចូរយើងទទួលយកការអញ្ជើញរបស់ព្រះអង្គសង្គ្រោះដោយអំណរពេញលេញដើម្បី « រស់នៅតាមគ្រប់ទាំងព្រះបន្ទូលដែលចេញពីព្រះឱស្ឋព្រះមក » ។២១
ខណៈដែលមនុស្សជាច្រើនជឿថាព្រះអម្ចាស់ និងសាសនាចក្ររបស់ទ្រង់បណ្ដោយឲ្យធ្វើ « អ្វីក៏ដោយដែលចិត្ត [ យើង ] ចង់ »២២ ចូរយើងប្រកាសដោយក្លាហានថា វាគឺជារឿងខុសឆ្គងដើម្បី « តាមពួកមានគ្នាច្រើន ដើម្បីប្រព្រឹត្តសេចក្តីអាក្រក់ »២៣ ដោយសារ « ហ្វូងមនុស្សពុំអាចធ្វើឲ្យអ្វីដែលព្រះបានប្រកាសថាខុសទៅជារឿងត្រឹមត្រូវបានឡើយ » ។២៤
« ចូរចងចាំ ចូរចងចាំ … តើព្រះបញ្ញត្តិទាំងឡាយនៃព្រះ តឹងរឹង [ តែនាំមកនូវការសង្គ្រោះ ]យ៉ាងណាទៅ » ។២៥ ការបង្រៀនបទបញ្ញត្តិទាំងនេះឲ្យច្បាស់លាស់ ពេលខ្លះត្រូវបានគេមើលឃើញថាជាទង្វើនៃការរើសអើង ។ ដូច្នេះហើយ ចូរយើងបង្ហាញពេញដោយការគោរពថា វាគឺជារឿងដ៏ចាំបាច់ដើម្បីស្រឡាញ់បុត្រនៃព្រះដែលឱបក្រសោបជំនឿផ្ទុយពីយើង ។
យើងអាចទទួលយក ហើយគោរពគ្នាដោយពុំចាំបាច់គាំទ្រដល់ជំនឿ ឬទង្វើរបស់ពួកគេដែលពុំស្របនឹងព្រះឆន្ទៈរបស់ព្រះអម្ចាស់ឡើយ ។ វាពុំចាំបាច់ត្រូវបូជាសេចក្ដីពិតនៅលើអាសនានៃការចុះសម្រុងគ្នា និងភាពចង់បានខាងសង្គមនោះឡើយ ។
ទីក្រុងស៊ីយ៉ូន និងទីក្រុងបាប៊ីឡូនពុំត្រូវគ្នាទេ ។ « គ្មានអ្នកណាអាចនឹងបម្រើចៅហ្វាយពីរនាក់បានទេ » ។២៦ ចូរយើងគ្រប់គ្នាចងចាំនូវសំណួរដ៏ស៊ីជម្រៅរបស់ព្រះអង្គសង្គ្រោះថា « ហេតុអ្វីបានជា ហៅខ្ញុំថា ឱ ព្រះអម្ចាស់ៗអើយតែមិនធ្វើតាមពាក្យខ្ញុំវិញដូច្នេះ ? »២៧
យើងអាចបង្ហាញសេចក្ដីស្រឡាញ់របស់យើងចំពោះព្រះអម្ចាស់តាមរយៈការគោរពប្រតិបត្តិដោយស្ម័គ្រស្មោះអស់ពីចិត្ត ។
បើបងប្អូនមានអារម្មណ៍ពិបាករវាងភាពជាសិស្សរបស់បងប្អូន និងលោកិយនេះ សូមចងចាំថា ព្រះអង្គសង្គ្រោះរបស់បងប្អូនដែលពេញដោយក្តីស្រឡាញ់ « ទ្រង់បានអញ្ជើញ … ដ្បិតព្រះពាហុនៃសេចក្ដីមេត្តាករុណាបានលាតសន្ធឹងមករក [ បងប្អូន ] ហើយទ្រង់មានព្រះបន្ទូលថា ៖ ចូរប្រែចិត្តចុះ នោះយើងនឹងទទួលអ្នក » ។២៨
ប្រធាន រ័សុល អិម ណិលសុន បានបង្រៀនថា ៖ « ព្រះយេស៊ូវគ្រីស្ទ នឹងធ្វើកិច្ចការដ៏អស្ចារ្យបំផុតរបស់ទ្រង់មួយចំនួន នៅចន្លោះពេលនេះរហូតដល់ពេលទ្រង់យាងមកម្ដងទៀត » ។២៩ ប៉ុន្តែលោកក៏បានង្រៀនដែរថា « អស់អ្នកដែលជ្រើសរើសផ្លូវរបស់ព្រះអម្ចាស់ទំនងដូចជាត្រូវស៊ូទ្រាំនឹងការបៀតបៀន » ។៣០ ការត្រូវបាន « ទ្រាំសេចក្តីដំនៀល ដោយព្រោះព្រះនាមទ្រង់ »៣១ ពេលខ្លះអាចជាវាសនារបស់យើងកាលដែលយើង « អនុញ្ញាតឲ្យព្រះបន្ទូលទ្រង់…មានឥទ្ធិពលលើអ្វីដែលបងប្អូនធ្វើរាល់ថ្ងៃ » ។៣២
ព្រះអង្គសង្គ្រោះមានបន្ទូលថា ៖ « មានពរហើយ អ្នកណាដែល មិន រវាតចិត្តដោយព្រោះខ្ញុំ »។៣៣ នៅកន្លែងផ្សេងទៀតយើងរៀនថា « ពួកអ្នកដែល ស្រឡាញ់ ក្រឹត្យវិន័យទ្រង់ នោះមានសេចក្តីសុខដ៏លើសលុប ហើយគ្មាន ហេតុនឹងចំពប់ដួលឡើយ » ។៣៤ គ្មានទាល់តែសោះ ! ដូច្នេះ សូមសួរខ្លួនយើងថា « ខ្ញុំបានស៊ូទ្រាំមួយរយៈ ប៉ុន្តែកាលណាកើតមានសេចក្តីទុក្ខលំបាក ឬសេចក្តីបៀតបៀនដោយព្រោះព្រះបន្ទូល នោះ តើខ្ញុំរសាយចិត្តចេញភ្លាមដែរឬទេ ?៣៥ តើខ្ញុំបានស្ថាបនាយ៉ាងរឹងមាំលើសិលានៃព្រះយេស៊ូវគ្រីស្ទ និងពួកអ្នកបម្រើរបស់ទ្រង់ដែរឬទេ ?
ពួកទស្សនវិទូខាងសីលធម៌គាំទ្រថា សេចក្ដីពិតគ្រាន់តែជាការទទួលស្គាល់ពីសំណាក់មនុស្សក្នុងសង្គម ហើយគ្មានភាពត្រូវ និងខុសឡើយ ។ អ្វីដែលពួកគេកំពុងលើកឡើងគឺថា គ្មានអំពើបាប៣៦ ថា « អ្វីៗក៏ដោយ ដែលមនុស្ស [ ធ្វើ ] គឺគ្មានទោសសោះ »៣៧ ជាទស្សនវិទ្យាមួយដែលមារសត្រូវរីករាយនឹងប្រកាសថា វាបានបង្កើតទស្សននេះ ! ដូច្នេះហើយ ចូរយើងប្រុងប្រយ័ត្នចំពោះចចកពាក់ស្បែកចៀមដែលតែងតែជ្រើសរើស ហើយ « ជារឿយៗប្រើកម្មសិទ្ធិបញ្ញារបស់ខ្លួនដើម្បីបិទបាំងកំហុសតូចតាចខាងអាកប្បកិរិយារបស់ពួកគេ[ ផ្ទាល់ ] » ។៣៨
បើយើងពិតជាចង់ក្លាយជាពួកសិស្សដ៏ក្លាហានរបស់ព្រះគ្រីស្ទមែន យើងពិតជារកឃើញវិធី ។ បើមិនដូច្នោះទេ មារសត្រូវផ្ដល់នូវជម្រើសដ៏ទាក់ទាញ ។ ប៉ុន្តែក្នុងនាមជាពួកសិស្សដ៏ស្មោះត្រង់ « យើងពុំចាំបាច់សោកស្ដាយចំពោះសេចក្តីជំនឿរបស់យើង ឬ ដកយកអ្វីដែលយើងដឹងថាជាការពិតវិញឡើយ » ។៣៩
ជាចុងបញ្ចប់ ខ្ញុំសូមថ្លែងអំពីពួកអ្នកបម្រើទាំង ១៥រូបរបស់ព្រះដែលអង្គុយពីក្រោយខ្ញុំ ។ ខណៈដែលខាងលោកិយ « ប្រាប់ដល់ពួកអ្នកមើលឆុតថា កុំឲ្យមើលឡើយ ហើយដល់ពួកហោរាថា កុំឲ្យទាយ »៤០ នោះពួកអ្នកស្មោះត្រង់ « បានពាក់មកុដដោយព្រះពរទាំងឡាយមកពីលើ មែនហើយ និងដោយព្រះបញ្ញត្តិទាំងឡាយដ៏មិនតិចដែរ និងដោយវិវរណៈទាំងឡាយតាមវេលា » ។៤១
មិនគួរឲ្យភ្ញាក់ផ្អើលទេ បុរសទាំងនេះតែងតែទទួលរងការវាយប្រហារពីសំណាក់អ្នកដែលមិនសប្បាយចិត្តជាមួយព្រះបន្ទូលរបស់ព្រះ កាលព្យាការីប្រកាស ។ អស់អ្នកដែលបដិសេធព្យាការីមិនបានដឹងថា « គ្មានពាក្យទំនាយណាក្នុងគម្ពីរ ដែល [ ត្រូវ ] ស្រាយបានតាមតែចិត្ត » ឬជាលទ្ធផលនៃឆន្ទៈរបស់មនុស្សនោះឡើយ តែ « [ ថា ] មនុស្សបរិសុទ្ធរបស់ព្រះ[មានប្រសាសន៍ឥឡូវនេះ ] ដែល [ ត្រូវ ] បានទាយ ដោយសារព្រះវិញ្ញាណបរិសុទ្ធទ្រង់បណ្តាល » ។៤២
ដូចជាប៉ុលដែរ បុរសនៃព្រះទាំងនេះ « មិន … មានសេចក្តីខ្មាស ចំពោះការធ្វើបន្ទាល់ពីព្រះអម្ចាស់នៃយើង » ឡើយ ហើយជា [ ពួក ] អ្នក « ជាប់គុក »របស់ទ្រង់៤៣នៅក្នុងន័យថា គោលលទ្ធិដែលពួកលោកបង្រៀនពុំមែនជារបស់ពួកលោកឡើយ ប៉ុន្តែជារបស់ផងទ្រង់ដែលបានហៅពួកលោក ។ ដូចជាពេត្រុសដែរ ពួកលោក « និយាយពីការដែល[ ពួកលោក ]បានឃើញ ហើយឮ » ។៤៤ ខ្ញុំសូមថ្លែងទីបន្ទាល់ថាគណៈប្រធានទីមួយ និងកូរ៉ុមនៃពួកសាវកដប់ពីរនាក់គឺជាបុរសល្អស្មោះត្រង់ដែលស្រឡាញ់ព្រះ និងកូនចៅរបស់ទ្រង់ ហើយជាមនុស្សដែលទ្រង់ស្រឡាញ់ ។ យើងគួរតែទទួលយកពាក្យសម្ដីរបស់ពួកលោកហាក់ដូចជាបានមកពីព្រះឱស្ឋរបស់ព្រះអម្ចាស់ផ្ទាល់ « ដោយសេចក្ដីអត់ធន់ និងសេចក្ដីជំនឿគ្រប់យ៉ាង ។ ដ្បិតដោយសារការធ្វើការទាំងនេះហើយ ទ្វារស្ថាននរកនឹងពុំដែលឈ្នះ [ យើង ] ឡើយ … ហើយព្រះអម្ចាស់ដ៏ជាព្រះ ទ្រង់នឹងកម្ចាត់អំណាចនៃសេចក្ដីងងឹតចេញពី [ យើង ] ទៅ » ។៤៥
« គ្មានដៃដែលមិនស្អាតស្អំណា អាចបញ្ឈប់កិច្ចការនេះពីការរីកចម្រើនឡើយ »៤៦ វានឹងឆ្ពោះទៅមុខដោយជោគជ័យទាំងមាន ឬគ្មានបងប្អូន ឬរូបខ្ញុំ ដូច្នេះ « ចូររើសយកព្រះណាដែលឯងចង់គោរពប្រតិបត្តិតាមនៅថ្ងៃនេះចុះ » ។៤៧ សូមកុំចាញ់បោក ឬបំភិតបំភ័យដោយសំឡេងរំខានរបស់មាសត្រូវដែលបន្លឺចេញពីអគារដ៏ធំ និងទូលាយ ។ ឯកតាវាស់សំឡេងរបស់វាមិនអាចប្រៀបបាននឹងឥទ្ធិពលដ៏ស្ងប់ស្ងាត់នៃសំឡេងដ៏តូចរហៀងទៅលើចិត្តសង្រេង និងវិញ្ញាណទន់ទាបបានឡើយ ។
ខ្ញុំសូមថ្លែងទីបន្ទាល់ថា ព្រះគ្រីស្ទមានព្រះជន្មរស់ ថាទ្រង់គឺជាព្រះអង្គសង្គ្រោះ និងព្រះប្រោសលោះរបស់យើង ហើយថាទ្រង់ដឹកនាំសាសនាចក្ររបស់ទ្រង់តាមរយៈគណៈប្រធានទីមួយ និងកូរ៉ុមនៃពួកសាវកដប់ពីរនាក់ ការណ៍នេះអះអាងថា យើងមិនត្រូវ « គ្រប់អស់ទាំងខ្យល់នៃសេចក្តីបង្រៀនបោក ហើយផាត់យើងចុះឡើង » ឡើយ ។៤៨
ប្រធាន ណិលសុន បានបង្រៀនថា « សិស្សពិតរបស់ព្រះយេស៊ូវគ្រីស្ទស្ម័គ្រចិត្តឈរឡើង បញ្ចេញមតិ ហើយខុសពីមនុស្សនៃលោកិយ ។ ពួកគេពុំខ្លាច មានការលះបង់ និងភាពក្លាហាន » ។៤៩
បងប្អូនប្រុសស្រី វាគឺជាថ្ងៃល្អដើម្បីរឿងល្អៗ ! នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕