ផ្លូវនៃសេចក្តីសញ្ញា ៖ ផ្លូវទៅកាន់ជីវិតអស់កល្បជានិច្ច
ផ្លូវទៅកាន់ភាពល្អឥតខ្ចោះ គឺជាផ្លូវនៃសេចក្ដីសញ្ញា ហើយព្រះយេស៊ូវគ្រីស្ទគឺជាស្នូលនៃពិធីបរិសុទ្ធ និងសេចក្ដីសញ្ញាទាំងអស់ ។
ស្ដេចដ៏មានឥទ្ធិពលមួយអង្គមានព្រះរាជបំណងឲ្យបុត្រាទ្រង់ ឡើងគ្រងរាជនៅនគរមួយ ។ ព្រះអង្គម្ចាស់នោះត្រូវតែរៀន និងចម្រើនប្រាជ្ញា ដើម្បីគង់លើបល្ល័ង្កនោះ ។ ថ្ងៃមួយ ស្ដេចបានជួបនឹងព្រះអង្គម្ចាស់ ហើយបានប្រាប់អំពីផែនការរបស់ទ្រង់ ។ ទ្រង់ទាំងទ្វេបានយល់ស្របថា ព្រះអង្គម្ចាស់នោះនឹងយាងទៅឯទីក្រុងមួយផ្សេង ដើម្បីទទួលបានបទពិសោធន៍នានា ។ ទ្រង់នឹងជួបឧបសគ្គ ព្រមទាំងរីករាយនឹងការណ៍ល្អៗជាច្រើនផងដែរ ។ បន្ទាប់មក ស្ដេចបានបញ្ជូនទ្រង់ទៅឯទីក្រុងនោះ ជាកន្លែងដែលព្រះអង្គម្ចាស់ត្រូវបង្ហាញពីភាពស្មោះត្រង់ចំពោះស្ដេច ហើយបង្ហាញថា ទ្រង់សមនឹងទទួលបានឯកសិទ្ធិ និងទំនួលខុសត្រូវ ដែលស្ដេចបានមានសម្រាប់ទ្រង់ ។ ស្ដេចបានឲ្យសេរីភាពទៅព្រះអង្គម្ចាស់ជ្រើសរើសទទួលយកឯកសិទ្ធិ និងទំនួលខុសត្រូវទាំងនេះ ឬក៏អត់ វាអាស្រ័យទៅលើព្រះរាជបំណង និងភាពស្មោះត្រង់របស់ទ្រង់ ។ ខ្ញុំប្រាកដថា បងប្អូនចង់ដឹងពីអ្វីកើតឡើងចំពោះព្រះអង្គម្ចាស់នោះ ។ តើទ្រង់បានត្រឡប់ទៅគ្រងរាជនៅនគរនោះដែរឬទេ ?
បងប្អូនប្រុសស្រីជាទីស្រឡាញ់ យើងម្នាក់ៗគឺជាព្រះអង្គម្ចាស់ ឬព្រះនាងមួយអង្គនោះ ។ យើងត្រូវបានបញ្ជូនមកកាន់ជីវិតនេះ ដោយព្រះវរបិតាសួគ៌ជាទីស្រឡាញ់ ដើម្បីរីករាយនឹងពរជ័យនៃរូបកាយ ដែលនឹងក្លាយជាអមតៈ តាមរយៈដង្វាយធួន និងដំណើររស់ឡើងវិញរបស់ព្រះយេស៊ូវគ្រីស្ទ ។ យើងត្រូវបានរំពឹងឲ្យរៀបចំខ្លួន ដើម្បីត្រឡប់ទៅវត្តមាននៃព្រះវិញ ដោយការបង្ហាញថា យើងនឹង « ប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ [ យើង ] នឹងបញ្ជាដល់ [ យើង ] » ( អ័ប្រាហាំ ៣:២៥ ) ។
ដើម្បីជួយយើង ព្រះអង្គសង្គ្រោះបានយាងមកប្រោសលោះ ហើយបង្ហាញផ្លូវយើងឲ្យត្រឡប់ទៅព្រះវិញ ។ បុត្រាបុត្រីរបស់ព្រះត្រូវបានអញ្ជើញឲ្យមកឯព្រះអង្គសង្គ្រោះ ហើយបានល្អឥតខ្ចោះក្នុងទ្រង់ ។ នៅក្នុងព្រះគម្ពីរ យើងឃើញមានការអញ្ជើញឲ្យយើងមកឯព្រះអម្ចាស់ដដែលៗជាង ៩០ ដង ហើយជាងពាក់កណ្ដាលនៃការអញ្ជើញទាំងនេះ គឺជាការអញ្ជើញដោយផ្ទាល់មកពីព្រះអម្ចាស់ ។ ការទទួលយកការអញ្ជើញរបស់ព្រះអង្គសង្គ្រោះ មានន័យថាជាការទទួលពិធីបរិសុទ្ធរបស់ទ្រង់ ហើយរក្សាសេចក្ដីសញ្ញារបស់យើងជាមួយនឹងទ្រង់ ។ ព្រះយេស៊ូវគ្រីស្ទគឺជាផ្លូវ សេចក្ដីពិត និងជាជីវិត( យ៉ូហាន១៤:៦ ) ហើយទ្រង់អញ្ជើញយើង « ទាំងអស់គ្នាឲ្យមករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ ហើយទ្រង់ពុំបដិសេធអ្នកណាម្នាក់ ដែលមករកទ្រង់ឡើយ » ( នីហ្វៃទី២ ២៦:៣៣ ) ។
ការរៀនសូត្រ និងការបង្រៀនដំណឹងល្អរបស់យើង ធ្វើឲ្យការប្រែចិត្តជឿរបស់យើងលើព្រះវរបិតាសួគ៌ និងព្រះយេស៊ូវគ្រីស្ទមានកាន់តែខ្លាំងឡើង ហើយជួយយើងឲ្យកាន់តែប្រែក្លាយដូចជាទ្រង់ទាំងទ្វេ ។ ទោះជាការណ៍ទាំងអស់ពុំទាន់បើកសម្ដែង« ពេលវេលា និងរបៀបជាក់លាក់ ដែលពរជ័យនៃភាពតម្កើងឡើង[ នឹងត្រូវ ]ប្រទានឲ្យក៏ដោយ ក៏យើងមានការអះអាងអំពីវាដែរ ។( អិម. រ័សុល បាឡឺត «Hope in Christ » Liahona, ឧសភា ឆ្នាំ ២០២១ ទំព័រ ៥៥ ) ។
អាលម៉ា ជាសង្ឃជាន់ខ្ពស់ ការបង្រៀននៅដែនដីសារ៉ាហិមឡា ដែលបានរៀបរាប់អំពីការអញ្ជើញដ៏ស៊ីជម្រៅមួយដោយព្រះយេស៊ូវគ្រីស្ទ ៖
« មើលចុះ ទ្រង់បានអញ្ជើញមនុស្សលោកទាំងអស់ ដ្បិតព្រះពាហុនៃសេចក្ដីមេត្តាករុណាបានលាតសន្ធឹងមករកគេ ហើយទ្រង់មានព្រះបន្ទូលថា ៖ ចូរប្រែចិត្តចុះ នោះយើងនឹងទទួលអ្នក ។
« មែនហើយ ទ្រង់មានព្រះបន្ទូលថា ៖ ចូរមករកយើងចុះ ហើយអ្នករាល់គ្នានឹងបានទទួលទាននូវផ្លែនៃដើមជីវិត » ( អាលម៉ា ៥:៣៣–៣៤ ) ។
ព្រះអង្គសង្គ្រោះផ្ទាល់អញ្ជើញយើងឲ្យមកឯទ្រង់ ហើយទទួលនឹមទ្រង់ ដើម្បីយើងអាចបានសម្រាកនៅក្នុងពិភពលោកដ៏ច្របូកច្របល់នេះ( សូមមើល ម៉ាថាយ១១:២៨–២៩ ) ។ យើងមកឯព្រះគ្រីស្ទ ដោយ« អនុវត្តជំនឿទៅលើទ្រង់ ប្រែចិត្តជារៀងរាល់ថ្ងៃ ចុះសេចក្តីសញ្ញានឹងព្រះ នៅពេលយើងទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ហើយកាន់ខ្ជាប់ដរាបដល់ចុងបំផុត ដោយការគោរពតាមសេចក្តីសញ្ញាទាំងនោះ »( ក្បួនខ្នាតទូទៅ ៖ ការបម្រើនៅ ក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ១.២.១,គេហទំព័រChurchofJesusChrist.org ) ។ ផ្លូវទៅកាន់ភាពល្អឥតខ្ចោះ គឺជាផ្លូវនៃសេចក្ដីសញ្ញា ហើយព្រះយេស៊ូវគ្រីស្ទគឺជាស្នូលនៃពិធីបរិសុទ្ធ និងសេចក្ដីសញ្ញាទាំងអស់ ។
ស្ដេចបេនយ៉ាមីនបានបង្រៀនថា ដោយសារតែសេចក្ដីសញ្ញាដែលយើងធ្វើ នោះយើងក្លាយជាបុត្រាបុត្រីរបស់ព្រះគ្រីស្ទ ដែលបានបង្កើតយើងខាងវិញ្ញាណ ហើយនៅក្រោមព្រះសិរសាទ្រង់ នោះយើងបានទទួលសេរីភាព ដ្បិត « គ្មាននាមឯណាផ្សេងទៀតទេ ដែលអាចនាំមកនូវសេចក្ដីសង្គ្រោះ » ( ម៉ូសាយ ៥:៧–៨ ) ។ យើងបានសង្គ្រោះ ពេលយើងកាន់ខ្ជាប់ដល់ចុងបំផុត ដោយ « ការធ្វើតាមគំរូនៃព្រះរាជបុត្រានៃព្រះដ៏មានព្រះជន្មរស់នៅនោះ » ( នីហ្វៃទី២ ៣១:១៦ ) ។ នីហ្វៃបានទូន្មានថា ការគ្រាន់តែចូលតាមផ្លូវតូច ហើយចង្អៀតនេះពុំទាន់ចប់សព្វគ្រប់ទេ យើងត្រូវតែ « ឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប » ( នីហ្វៃទី២ ៣១:១៩–២០ ) ។
គោលលទ្ធិរបស់ព្រះគ្រីស្ទជួយយើងឲ្យស្វែងរក និងស្ថិតនៅលើផ្លូវនៃសេចក្ដីសញ្ញា ហើយដំណឹងល្អត្រូវបានរៀបចំឡើង ដើម្បីឲ្យយើងទទួលបានពរជ័យដែលបានសន្យារបស់ព្រះអម្ចាស់តាមរយៈពិធីបរិសុទ្ធ និងសេចក្ដីសញ្ញាដ៏ពិសិដ្ឋ ។ ព្យាការីរបស់ព្រះ ប្រធាន រ័សុល អិម ណិលសុន បានដាស់តឿនយើងនៅក្នុងសុន្ទរកថារបស់លោកនៅថ្ងៃទី ១៦ ខែ មករា ឆ្នាំ ២០១៨ ថា « សូមបន្ដដើរនៅលើផ្លូវនៃសេចក្ដីសញ្ញា ។ ការតាំងចិត្តរបស់បងប្អូនដើម្បីធ្វើតាមព្រះអង្គសង្គ្រោះ ដោយការធ្វើសេចក្ដីសញ្ញាជាមួយទ្រង់ បន្ទាប់មករក្សាសេចក្ដីសញ្ញានោះ នឹងបើកទ្វារទៅកាន់ពរជ័យ និងឯកសិទ្ធិខាងវិញ្ញាណសម្រាប់បុរស ស្ត្រី និងកុមារនៅគ្រប់ទីកន្លែង ។ … នៅចុងបំផុតនៃការព្យាយាមរបស់យើងម្នាក់ៗ គឺត្រូវទទួលបានអំណាចនៅក្នុងដំណាក់នៃព្រះអម្ចាស់ ផ្សារភ្ជាប់ជាមួយក្រុមគ្រួសារ ស្មោះត្រង់ចំពោះសេចក្តីសញ្ញាដែលបានធ្វើនៅក្នុងព្រះវិហារបរិសុទ្ធ ដើម្បីយើងស័ក្តិសមសម្រាប់អំណោយទានដ៏មហិមាបំផុតរបស់ព្រះ គឺជីវិតអស់កល្បជានិច្ច » ( « នៅពេលយើងបន្តឆ្ពោះទៅមុខជាមួយគ្នា » លីអាហូណាខែ មេសា ឆ្នាំ ២០១៨ ទំព័រ ៧ ) ។
ព្រះនឹងមិនបោះបង់ចោលទំនាក់ទំនងរបស់ទ្រង់ជាមួយ ឬដកយកពរជ័យដែលទ្រង់បានសន្យាអំពីជីវិតអស់កល្បជានិច្ចពីអ្នករក្សាសេចក្ដីសញ្ញាដ៏ស្មោះត្រង់ណាម្នាក់ឡើយ។ ហើយនៅពេលយើងគោរពសេចក្តីសញ្ញាដ៏ពិសិដ្ឋ នោះយើងខិតទៅកាន់តែជិតព្រះអង្គសង្គ្រោះ។ ។ អែលឌើរ ដេវីឌ អេ បែដណាបានបង្រៀនយើងពិម្សិលមិញថា សេចក្ដីសញ្ញា និងពិធីបរិសុទ្ធនៃដំណឹងល្អដំណើរការនៅក្នុងជីវិតរបស់យើងដូចជាត្រីវិស័យដើម្បីផ្តល់ឲ្យយើងនូវការណែនាំសំខាន់ៗដើម្បីមករកព្រះគ្រីស្ទ ហើយក្លាយជាកាន់តែដូចទ្រង់ ។
សេចក្ដីសញ្ញាទាំងឡាយ គូសផ្លូវត្រឡប់ទៅរកព្រះវិញ ។ ពិធីបរិសុទ្ធនៃពិធីបុណ្យជ្រមុជទឹក និងការទទួលអំណោយនៃព្រះវិញ្ញាណបរិសុទ្ធ ការតែងតាំងបព្វជិតភាព និងពិធីសាក្រាម៉ង់ ដឹកនាំយើងទៅកាន់ព្រះវិហារបរិសុទ្ធរបស់ព្រះអម្ចាស់ ដើម្បីទទួលពិធីបរិសុទ្ធនៃភាពលើកតម្កើងរបស់ទ្រង់ ។
ខ្ញុំសូមលើកឡើងរឿងពីរយ៉ាង ដែលព្រះអង្គសង្គ្រោះយើងបានសង្កត់ធ្ងន់ ដើម្បីជួយយើងឲ្យរក្សាសេចក្ដីសញ្ញាដោយស្មោះត្រង់ ៖
-
ព្រះវិញ្ញាណបរិសុទ្ធអាចបង្រៀនយើង រំឭកយើងអំពីការបង្រៀនរបស់ព្រះអង្គសង្គ្រោះ និងគង់នៅជាមួយយើងជារៀងរហូត ( សូមមើល យ៉ូហាន ១៤:១៦, ២៦ ) ។ ទ្រង់អាចជាដៃគូដ៏ខ្ជាប់ខ្ជួនរបស់យើង ដើម្បីដឹកនាំយើងនៅលើផ្លូវនៃសេចក្ដីសញ្ញា ។ ប្រធាន រ័សុល អិម ណិលសុន បានបង្រៀនថា « នៅពេលខាងមុខ យើងនឹងមិនអាចរស់ខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ លួងលោមចិត្ត និងមានឥទ្ធិពលដ៏ខ្ជាប់ខ្ជួនមកពីព្រះវិញ្ញាណបរិសុទ្ធនោះ » ( « Revelation for the Church, Revelation for Our Lives » Liahonaខែ ឧសភា ឆ្នាំ ២០១៨ ) ។
-
ព្រះអង្គសង្គ្រោះបានតាំងពិធីបរិសុទ្ធនៃសាក្រាម៉ង់ឡើង ដើម្បីឲ្យយើងអាចចងចាំទ្រង់ ហើយមានព្រះវិញ្ញាណរបស់ទ្រង់គង់នៅជាមួយនឹងយើងជាដរាប ។ ពិធីបុណ្យជ្រមុជទឹកបើកទ្វារទៅកាន់ជីវិតអស់កល្បជានិច្ច ហើយពិធីសាក្រាម៉ង់ ជួយយើងឲ្យឈានទៅមុខយ៉ាងខ្ជាប់ខ្ជួននៅលើផ្លូវនៃសេចក្ដីសញ្ញា ។ កាលយើងទទួលទានសាក្រាម៉ង់ វានឹងជាទីបន្ទាល់មួយចំពោះព្រះវរបិតាថា យើងពិតជាចងចាំដល់ព្រះរាជបុត្រាទ្រង់ជានិច្ច ។ ហើយនៅពេលយើងចងចាំទ្រង់ជានិច្ច និងរក្សាបទបញ្ញត្តិរបស់ទ្រង់ នោះយើងនឹងមានព្រះវិញ្ញាណរបស់ទ្រង់គង់នៅជាមួយយើង ។ បន្ថែមលើការសន្យានេះ ព្រះអម្ចាស់បានរំឭកអំពីការផ្ដាច់បាបដែលបានសន្យា ពេលយើងប្រែចិត្តពីអំពីបាបដោយចិត្តរាបសា ។
ដើម្បីបន្តស្មោះត្រង់ចំពោះសេចក្ដីសញ្ញារបស់យើង យើងគួរតែព្យាយាមឲ្យមានព្រះវិញ្ញាណរៀបចំយើងឲ្យទទួលពិធីសាក្រាម៉ង់ដោយស័ក្ដិសម ដូចគ្នានោះដែរ យើងទទួលពិធីសាក្រាម៉ង់ជាទៀងទាត់ ដើម្បីយើងមានព្រះវិញ្ញាណជានិច្ច ។
កាលកូនស្រីយើងមានអាយុប្រាំឆ្នាំ នាងមានកូនឡានប្រើថាមពលថ្ម ហើយគាត់ចូលចិត្តបើកវានៅជុំវិញផ្ទះ ។ ល្ងាចមួយ នាងបានមករកខ្ញុំ ហើយនិយាយថា « ប៉ា ឡានកូនលែងដើរហើយ ។ តើយើងអាចយកសាំងខ្លះពីឡានប៉ា ចាក់ក្នុងឡានកូន ដើម្បីឲ្យវាបើកបានម្ដងទៀតឬទេ ? ប្រហែលជាវាត្រូវការសាំងដូចឡានប៉ាដែរ » ។
ក្រោយមក ខ្ញុំបានសង្កេតឃើញថា ថ្មវាជិតអស់ភ្លើងហើយ ដូច្នេះខ្ញុំបាននិយាយថា យើងនឹងអាចបើកវាបានវិញប្រហែលមួយម៉ោងទៀត ។ នាងបាននិយាយដោយរំភើបចិត្តថា « ចាស ! យើងនឹងយកវាទៅការ៉ាសសាំង » ។ ខ្ញុំគ្រាន់តែដោតភ្លើងសាកថ្មវា ហើយមួយម៉ោងក្រោយមក នាងអាចបើកឡាននោះបានវិញ ពេលវាសាកថ្មរួចហើយ ។ ក្រោយមកនាងបានដឹងថា វាសំខាន់ដើម្បីបញ្ចូលថ្មជានិច្ច ដោយដោតវាទៅភ្លើងអគ្គិសនី ។
ដូចដែលកូនស្រីរបស់យើងបានរៀនពីទំនាក់ទំនងរវាងថ្ម និងថាមពល ដើម្បីបើកឡានបាន នោះយើងក៏រៀនអំពីទំនាក់ទំនងរវាងព្រះយេស៊ូវគ្រីស្ទ ពីធីសាក្រាម៉ង់ និងព្រះវិញ្ញាណផងដែរ ។ យើងត្រូវការព្រះវិញ្ញាណ ដើម្បីជួយយើងឲ្យធ្វើដំណើរឆ្លងកាត់ជីវិតរមែងស្លាប់នេះ នៅពេលយើងរក្សាសេចក្តីសញ្ញាដោយស្មោះត្រង់ ហើយយើងត្រូវការពិធីសាក្រាម៉ង់ដើម្បីផ្ដល់ថាមពលដល់ជីវិតខាងវិញ្ញាណរបស់យើង ។ ការរំឭកសេចក្ដីសញ្ញាបុណ្យជ្រមុជទឹក និងការទទួលទានសាក្រាម៉ង់របស់យើង នាំឲ្យយើងមានភាពស្មោះត្រង់ចំពោះសេចក្ដីសញ្ញាផ្សេងៗទៀត ។ នៅពេលយើងសិក្សាដោយការអធិស្ឋាន ហើយគោរពតាមការអញ្ជើញរបស់ព្រះអង្គសង្គ្រោះ ហើយរីករាយនឹងពរជ័យដែលទ្រង់បានសន្យា នោះយើងច្បាស់ជាមានការបញ្ចប់ដោយរីករាយ ។ ទ្រង់បានមានព្រះបន្ទូលថា « ហើយប្រយោជន៍ឲ្យអ្នកអាចរក្សាខ្លួនឲ្យបានពេញលេញ កុំឲ្យប្រឡាក់ពីលោកិយ នោះអ្នកត្រូវទៅដំណាក់នៃការអធិស្ឋាន ហើយថ្វាយសាក្រាម៉ង់របស់អ្នកឡើងនៅថ្ងៃបរិសុទ្ធរបស់យើងចុះ » ( គោលលទ្ធិ និង សេចក្ដីសញ្ញា ៥៩:៩ ) ។
ខ្ញុំសូមថ្លែងទីបន្ទាល់ថាអ្នករក្សាសេចក្ដីសញ្ញាទាំងឡាយត្រូវបានសន្យាថានឹងមានសេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក ។( គោលលទ្ធិ និង សេចក្ដីសញ្ញា ៥៩:២៣ ) ។ ខ្ញុំសូមធ្វើជាសាក្សីថា នៅពេលបងប្អូនទទួលទាននិមិត្តរូបព្រះអង្គសង្គ្រោះនៅក្នុងពិធីសាក្រាម៉ង់ជាទៀងទាត់ នោះបងប្អូននឹងមានព្រះវិញ្ញាណទ្រង់ ដើម្បីដឹកនាំបងប្អូននៅលើផ្លូវនៃសេចក្ដីសញ្ញា ហើយបន្តស្មោះត្រង់ចំពោះសេចក្ដីសញ្ញារបស់បងប្អូន នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕