ចូលរួមក្នុងក្រោលនៃព្រះ
នៅក្នុងក្រោលនៃព្រះ យើងទទួលបានការមើលថែ ការបីបាច់ថែទាំពីអ្នកគង្វាលល្អ ហើយមានពរបានទទួលអារម្មណ៍នៃសេចក្តីស្រឡាញ់ដ៏ប្រោសលោះរបស់ទ្រង់ ។
ជាឪពុកម្តាយវ័យក្មេង បងប្រុស និងបងស្រីសាម៉ាដ បានរៀនដំណឹងល្អរបស់ព្រះយេស៊ូវគ្រីស្ទ នៅក្នុងផ្ទះតូចដ៏សាមញ្ញរបស់ពួកគាត់ នៅទីក្រុងសេម៉ារាំង ប្រទេសឥណ្ឌូនេស៊ី ។១ អ្នកផ្សព្វផ្សាយសាសនាពីររូបបានបង្រៀនសេចក្តីពិតដ៏អស់កល្បដល់ពួកគាត់ ដោយអង្គុយនៅជុំវិញតុតូចមួយ បំភ្លឺដោយពន្លឺភ្លើងព្រឹមៗ ដែលហាក់ដូចជាធ្វើឲ្យមានសត្វមូសច្រើនជាងពន្លឺភ្លើង ។ តាមរយៈការអធិស្ឋានដ៏ស្មោះសរ និងការដឹកនាំពីព្រះវិញ្ញាណបរិសុទ្ធ នោះពួកគាត់បានជឿលើអ្វីដែលពួកគេបានបង្រៀន ហើយបានជ្រើសរើសទទួលបុណ្យជ្រមុជទឹក ក្លាយជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ព្រោះតែការសម្រេចចិត្ត និងគំរូនៃការរស់នៅរបស់ពួកគាត់ចាប់តាំងពីពេលនោះមក វាបានផ្តល់ពរដល់បងប្រុស និងបងស្រីសាម៉ាដ ព្រមទាំងគ្រួសារពួកគាត់ក្នុងជីវិតរស់នៅ ។២
ពួកគាត់ស្ថិតក្នុងចំណោមពួកបរិសុទ្ធដែលជាអ្នកត្រួសត្រាយដំបូងនៅប្រទេសឥណ្ឌូនេស៊ី ។ ក្រោយមកពួកគាត់បានទទួលពិធីបរិសុទ្ធនៃព្រះវិហារបរិសុទ្ធ ហើយបងប្រុសសាម៉ាដបានបម្រើជាប្រធានសាខា និងជាប្រធានមណ្ឌល ហើយបានធ្វើដំណើរពេញកោះចាវ៉ាភាគកណ្ដាល ដើម្បីបំពេញកាតព្វកិច្ចរបស់គាត់ ។ មួយទសវត្សរ៍កន្លងមកនេះ គាត់បានបម្រើជាអយ្យកោដំបូងគេនៃស្តេក ស៊ូរ៉ាកាតា ប្រទេសឥណ្ឌូនេស៊ី ។
កាលពី ៤៩ ឆ្នាំកន្លងទៅ ក្នុងនាមជាអ្នកផ្សព្វផ្សាយសាសនាម្នាក់នៅក្នុងផ្ទះដ៏រាបទាប ពោរពេញដោយសេចក្តីជំនឿនោះ ខ្ញុំបានឃើញក្នុងខ្លួនពួកគាត់នូវអ្វីដែលស្ដេចបេនយ៉ាមីនបានបង្រៀននៅក្នុងព្រះគម្ពីរមរមនថា ៖ « ខ្ញុំចង់ឲ្យអ្នករាល់គ្នាគិតពិចារណាអំពីស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ។ ដ្បិតមើលចុះ ពួកគេបានពរគ្រប់យ៉ាង ទាំងខាងសាច់ឈាម និងខាងវិញ្ញាណផង » ។៣ ពរជ័យដែលហូរចូលមកក្នុងជីវិតនៃអស់អ្នកដែលធ្វើតាមគំរូ និងការបង្រៀនរបស់ព្រះយេស៊ូវគ្រីស្ទ ជាអ្នកដែលជ្រើសរើសដើម្បីត្រូវបានរាប់ក្នុងចំណោមពួកសិស្សរបស់ទ្រង់ គឺមានចំនួនច្រើន ពេញដោយអំណរ និងអស់កល្បជានិច្ច ។៤
ក្រោលនៃព្រះ
ការអញ្ជើញរបស់អាលម៉ាដល់អស់អ្នកដែលមកជុំគ្នានៅឯទឹកមរមន ឲ្យទទួលយកសេចក្ដីសញ្ញានៃពិធីបុណ្យជ្រមុជទឹក គឺចាប់ផ្តើមដោយឃ្លានេះ ៖ « ហើយឥឡូវនេះ ដោយអ្នករាល់គ្នាមានបំណងចង់ចូលរួមក្នុងក្រោលនៃព្រះ » ។៥
ក្រោល ឬក្រោលចៀមគឺជាវាលធំមួយ ជារឿយៗគេសង់របងថ្មព័ទ្ធជុំវិញ ដើម្បីការពារសត្វចៀមនៅពេលយប់ ។ វានោះមានច្រកតែមួយប៉ុណ្ណោះ ។ នៅពេលល្ងាច អ្នកគង្វាលហៅសត្វចៀម ។ ពួកវាស្គាល់សំឡេងគាត់ ហើយក៏ចូលទៅក្នុងក្រោលដោយសុវត្ថិភាពតាមច្រកទ្វារនោះ ។
ប្រជាជនរបស់អាលម៉ាបានដឹងថា អ្នកគង្វាលឈរនៅច្រកទ្វារតូចនៃក្រោលនោះ ព្រោះចៀមចូលមក នោះគាត់អាចរាប់ចៀមទាំងនោះ ៦ ហើយបើមានចៀមណារបួស និងឈឺ នោះគាត់នឹងបានដឹង និងមើលថែវាម្តងមួយៗ ។ សុវត្ថិភាព និងសុខុមាលភាពរបស់ចៀម វាអាស្រ័យទៅលើឆន្ទៈរបស់ចៀមនោះ ដើម្បីចូលមកក្នុងក្រោល ហើយស្ថិតនៅក្នុងក្រោលនោះ ។
ក្នុងចំណោមពួកយើង ប្រហែលជាមានអ្នកខ្លះមានអារម្មណ៍ថា ពួកគាត់នៅសសៀរៗហ្វូងចៀម ប្រហែលពួកគេគិតថា ខ្លួនមិនសូវសំខាន់ ឬមានតម្លៃ ឬពួកគេពុំនៅក្នុងក្រោលនោះ ។ ហើយពេលនៅក្នុងក្រោលចៀមនោះ នៅក្នុងក្រោលនៃព្រះ ជួនកាលយើងអាចនឹងជាន់ជើងគ្នា ដែលចាំបាច់ត្រូវប្រែចិត្ត ឬអភ័យទោសឲ្យគ្នា ។
ប៉ុន្តែអ្នកគង្វាលល្អ៧—អ្នកគង្វាលពិតរបស់យើង—គឺល្អជានិច្ច ។ នៅក្នុងក្រោលនៃព្រះ យើងទទួលបានការមើលថែ ការបីបាច់ថែទាំរបស់ទ្រង់ ហើយមានពរបានទទួលអារម្មណ៍នៃសេចក្តីស្រឡាញ់ដ៏ប្រោសលោះរបស់ទ្រង់ ។ ទ្រង់មានបន្ទូលថា « យើងបានចារឹកឯងទុកនៅផ្ទៃបាតដៃរបស់យើង ហើយអស់ទាំងកំផែងឯងនៅចំពោះភ្នែកយើងជានិច្ច » ។៨ ព្រះអង្គសង្គ្រោះរបស់យើងបានចារឹកអំពើបាប ការឈឺចាប់ ទុក្ខវេទនារបស់យើង៩ និងគ្រប់អស់ទាំងភាពអយុត្តិធម៌ក្នុងជីវិតយើងដាក់នៅលើផ្ទៃព្រះហស្តទ្រង់ ។១០ មនុស្សទាំងអស់ត្រូវបានស្វាគមន៍ឲ្យទទួលពរជ័យទាំងនេះ នៅពេលពួកគេ « មានបំណងចង់ចូលរួម »១១ ហើយជ្រើសរើសស្ថិតនៅក្នុងក្រោលនេះ ។ អំណោយទាននៃសិទ្ធិជ្រើសរើស គឺពុំគ្រាន់តែជាសិទ្ធិដើម្បីជ្រើសរើសដោយសាមញ្ញនោះទេ វាជាឱកាសជ្រើសរើសត្រូវ ។ ហើយជញ្ជាំងនៃក្រោលនេះ ពុំមែនជាការបង្ខិតបង្ខំនោះទេ ប៉ុន្តែជាប្រភពនៃសុវត្ថិភាពខាងវិញ្ញាណវិញទេតើ ។
ព្រះយេស៊ូវបានបង្រៀនថា មាន « ហ្វូងតែមួយ និងអ្នកគង្វាលតែមួយ » ។១២ ទ្រង់បានមានបន្ទូលថា ៖
« ឯអ្នកដែលចូលតាមទ្វារ នោះជាអ្នកគង្វាលចៀមពិត ។ …
ហើយហ្វូងចៀមស្តាប់តាមសំឡេងគាត់ដែរ …
… ហើយចៀមក៏ដើរតាមក្រោយទៅ ដ្បិតវាស្គាល់សំឡេងគាត់ » ។១៣
បន្ទាប់មកព្រះយេស៊ូវបានថ្លែងថា « ខ្ញុំជាទ្វារ បើអ្នកណាចូលតាមខ្ញុំ នេះនឹងបានសង្គ្រោះ »១៤ ទាំងបង្រៀនយ៉ាងច្បាស់ថា មានផ្លូវតែមួយគត់ចូលទៅក្នុងក្រោលនៃព្រះ ហើយមានផ្លូវតែមួយគត់ដើម្បីបានសង្គ្រោះ ។ គឺដោយសារ និងតាមរយៈព្រះយេស៊ូវគ្រីស្ទ ។១៥
ពរជ័យកើតមានដល់អស់អ្នកដែលនៅក្នុងក្រោលនៃព្រះ
យើងរៀនរបៀបចូលរួមក្នុងក្រោល ចេញមកពីព្រះបន្ទូលព្រះ ដែលជាគោលលទ្ធិដែលព្រះយេស៊ូវគ្រីស្ទ និងពួកព្យាការីរបស់ទ្រង់បានបង្រៀន ។១៦ ពេលយើងធ្វើតាមគោលលទ្ធិនៃព្រះគ្រីស្ទ ហើយចូលរួមនៅក្នុងក្រោល តាមរយៈសេចក្តីជំនឿទៅលើព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹក និងពិធីបញ្ជាក់ ហើយបន្តស្មោះត្រង់១៧ នោះអាលម៉ាបានសន្យានូវពរជ័យជាក់លាក់ផ្ទាល់ខ្លួនចំនួនបួន ។ បងប្អូន អាច ( ១ ) « បានប្រោសលោះដោយព្រះ » ( ២ ) « បានរាប់ជាមួយនឹងពួកអ្នកនៃដំណើររស់ឡើងវិញទីមួយ » ( ៣ ) « មានជីវិតដ៏នៅអស់កល្បជានិច្ច » ហើយ ( ៤ ) ព្រះអម្ចាស់នឹង « ស្រោចព្រះវិញ្ញាណទ្រង់មកលើអ្នករាល់គ្នាយ៉ាងបរិបូរណ៍ » ។១៨
បន្ទាប់ពីអាលម៉ាបានបង្រៀនអំពីពរជ័យទាំងនេះហើយ នោះប្រជាជនបានទះដៃរបស់ពួកគេដោយអំណរ ។ នេះជាមូលហេតុ ៖
ទីមួយ ៖ ប្រោសលោះមានន័យថា សងបំណុល ឬផុតកាតព្វកិច្ច ឬបានរួចពីភាពអាសន្ន ឬគ្រោះថ្នាក់ ។១៩ គ្មានកម្រិតនៃការអភិវឌ្ឍខ្លួនណាដែលយើងអាចធ្វើដើម្បីឲ្យយើងជ្រះស្អាតពីអំពើបាបដែលយើងបានប្រព្រឹត្ត ឬបានជាសះស្បើយពីដំបៅ ដែលយើងបានរងទុក្ខ ដោយគ្មានដង្វាយធួនរបស់ព្រះយេស៊ូវគ្រីស្ទនោះឡើយ ។ ទ្រង់គឺជាព្រះប្រោសលោះរបស់យើង ។២០
ទីពីរ ៖ ដោយសារការរស់ឡើងវិញរបស់ព្រះគ្រីស្ទ នោះមនុស្សទាំងអស់នឹងបានរស់ឡើងវិញដែរ ។២១ បន្ទាប់ពីវិញ្ញាណចាកចេញពីរូបកាយយើងទៅ នោះយើងនឹងទន្ទឹងចាំដោយឥតសង្ស័យដល់ថ្ងៃដែលយើងអាចមានរូបកាយរស់ឡើងវិញម្តងទៀត ដើម្បីឱបក្រសោបអស់អ្នកដែលយើងស្រឡាញ់ ។ យើងនឹងអន្ទះសាចង់ស្ថិតនៅក្នុងចំណោមអស់អ្នកដែលបានរស់ឡើងវិញលើកទីមួយ ។
ទីបី ៖ ជីវិតអស់កល្បជានិច្ចមានន័យថា ការរស់នៅជាមួយព្រះ និងរស់នៅដូចជាទ្រង់ ។ វាជា « អំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ »២២ ហើយវានាំមកនូវអំណរដ៏ពោរពេញ ។២៣ វាគឺជាគោលបំណង និងគោលដៅដ៏សំខាន់នៃជីវិតយើង ។
ទីបួន ៖ ភាពជាដៃគូនឹងសមាជិកនៃក្រុមព្រះ គឺព្រះវិញ្ញាណបរិសុទ្ធនឹងប្រទានការណែនាំ និងការលួងលោមដែលត្រូវការជាច្រើន អំឡុងជីវិតរមែងស្លាប់នេះ ។២៤
សូមពិចារណាពីមូលហេតុអពមង្គលមួយចំនួន ៖ ទុក្ខវេទនាកើតមកពីអំពើបាប២៥ ភាពសោកសៅ និងភាពឯកាពេលមនុស្សជាទីស្រឡាញ់ស្លាប់ ហើយការភ័យខ្លាចមកពីភាពមិនច្បាស់ថាអ្វីនឹងកើតឡើងនៅពេលយើងស្លាប់ទៅ ។ ប៉ុន្តែនៅពេលយើងចូលទៅក្នុងក្រោលនៃព្រះ ហើយរក្សាសេចក្តីសញ្ញារបស់យើងជាមួយទ្រង់ នោះយើងមានអារម្មណ៍សុខសាន្ត ព្រោះដឹង និងទុកចិត្តថា ព្រះគ្រីស្ទនឹងប្រោសលោះយើងចេញពីអំពើបាប ថាការបែកចេញពីរូបកាយ និងវិញ្ញាណនឹងបញ្ចប់ទៅយ៉ាងឆាប់ ហើយថាយើងនឹងរស់នៅអស់កល្បជានិច្ចជាមួយព្រះនៅក្នុងស្ថានភាពដ៏រុងរឿងបំផុតមួយ ។
ទុកចិត្តលើព្រះគ្រីស្ទ ហើយធ្វើសកម្មភាពដោយសេចក្តីជំនឿ
បងប្អូនប្រុសស្រី ព្រះគម្ពីរមានពេញទៅដោយគំរូនៃព្រះចេស្តាដ៏មានមហិទ្ធិឫទ្ធិនៃព្រះអង្គសង្គ្រោះ និងសេចក្តីមេត្តាករុណា និងព្រះគុណដ៏អាណិតអាសូររបស់ទ្រង់ ។ អំឡុងពេលនៃការងារបម្រើនៅលើផែនដីរបស់ទ្រង់ ពរជ័យនៃការព្យាបាលរបស់ទ្រង់កើតមានដល់អស់អ្នកដែលទុកចិត្តលើទ្រង់ ហើយបានធ្វើសកម្មភាពដោយជំនឿ ។ ឧទាហរណ៍ មនុស្សពិការនៅស្រះទឹកបេថែសដា បានដើររួច ពេលគាត់ជឿធ្វើតាមការត្រាស់បង្គាប់របស់ព្រះអង្គសង្គ្រោះឲ្យ « ក្រោកឡើង យកគ្រែអ្នកដើរទៅ » ។២៦ អស់អ្នកដែលឈឺ ឬរងទុក្ខដោយជំងឺណាក៏ដោយនៅដែនដីបរិបូរ៍ត្រូវបានព្យាបាលឲ្យជា នៅពេលពួកគេ « ដើរឆ្ពោះទៅមុខព្រមគ្នា » ។២៧
ដូចគ្នានេះដែរ ដើម្បីទទួលបានពរជ័យដ៏អស្ចារ្យដែលបានសន្យាដល់អស់អ្នកដែលចូលរួមក្នុងក្រោលនៃព្រះ នោះវាតម្រូវឲ្យយើងគ្រាន់តែ—យើងត្រូវជ្រើសរើសចូលមកប៉ុណ្ណោះ ។ អាលម៉ាជាកូនបានបង្រៀនថា « ហើយឥឡូវនេះ ខ្ញុំសូមប្រាប់អ្នកថា អ្នកគង្វាលល្អនឹងហៅរកអ្នក ហើយបើសិនជាអ្នកស្ដាប់តាមសំឡេងលោក នោះលោកនឹងនាំអ្នកចូលក្នុងក្រោលរបស់លោក » ។២៨
ជាច្រើនឆ្នាំមុន មិត្តជាទីស្រឡាញ់ម្នាក់ បានស្លាប់ដោយសារជំងឺមហារីក ។ ពេលភរិយារបស់គាត់ ស្សារ៉ុន បានសរសេរប្រាប់លើកដំបូងពីរោគវិនិច្ឆ័យរបស់គាត់ នោះនាងបាននិយាយ ៖ « យើងជ្រើសយកសេចក្តីជំនឿ ។ សេចក្តីជំនឿលើព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ សេចក្តីជំនឿលើផែនការរបស់ព្រះវរបិតាសួគ៌ និងសេចក្តីជំនឿដែលថា ទ្រង់ជ្រាបដឹងពីតម្រូវការរបស់យើង ហើយបំពេញការសន្យារបស់ទ្រង់ » ។២៩
ខ្ញុំបានជួបពួកបរិសុទ្ធថ្ងៃចុងក្រោយជាច្រើននាក់ដូចជា ស្សារ៉ុន ដែលមានអារម្មណ៍សុខសាន្តក្នុងចិត្ត ពេលនៅក្នុងក្រោលនៃព្រះដោយសុវត្ថិភាព ជាពិសេសពេលមានការល្បួង ការផ្ទុយ ឬសេចក្តីវេទនាកើតឡើង ។៣០ ពួកគេបានជ្រើសរើសមានសេចក្ដីជំនឿលើព្រះយេស៊ូវគ្រីស្ទ ហើយធ្វើតាមព្យាការីរបស់ទ្រង់ ។ ព្យាការីជាទីស្រឡាញ់របស់យើងគឺប្រធាន រ័សុល អិម ណិលសុន បានបង្រៀនថា « អ្វីៗគ្រប់យ៉ាងដែលល្អក្នុងជីវិត—គ្រប់ពរជ័យដែលសំខាន់ដ៏អស់កល្ប—ចាប់ផ្ដើមដោយសេចក្ដីជំនឿ » ។៣១
ចូលមកក្នុងក្រោលនៃព្រះទាំងស្រុង
ជីតាលារបស់ខ្ញុំឈ្មោះ ជេមស៍ សរយ័រ ហូលមែន បានមករដ្ឋយូថាហ៍នៅក្នុងឆ្នាំ ១៨៤៧ ប៉ុន្តែគាត់ពុំបានមកក្នុងចំណោមអ្នកដែលមកដល់នៅខែកក្កដាជាមួយ ព្រិកហាំ យ៉ង់ នោះទេ ។ យោងតាមកំណត់ត្រាគ្រួសារ គាត់បានមកពេលក្រោយក្នុងឆ្នាំនោះ គាត់ទទួលខុសត្រូវដើម្បីនាំចៀមមក ។ រហូតដល់ខែតុលាទើបគាត់បានមកដល់ជ្រលងភ្នំ សលត៍ លេក ទាំងគាត់ និងចៀមបានបានមកដល់ដោយសុវត្ថិភាព ។៣២
បើប្រៀបទៅរឿងនោះ ពួកយើងមួយចំនួនគឺស្ថិតនៅលើវាលទំនាបនៅឡើយ ។ មនុស្សគ្រប់គ្នាពុំបានមកដល់ជាមួយក្រុមទីមួយទេ ។ មិត្តជាទីស្រឡាញ់របស់ខ្ញុំ សូមបន្តដំណើរ—ហើយជួយអ្នកដទៃ—ឲ្យចូលមកក្នុងក្រោលនៃព្រះទាំងស្រុង ។ ពរជ័យនៃដំណឹងល្អរបស់ព្រះយេស៊ូវគ្រីស្ទគ្មានដែនកំណត់ទេ ដោយសារពរជ័យទាំងនោះគឺអស់កល្បជានិច្ច ។
ខ្ញុំមានអំណរគុណយ៉ាងជ្រាលជ្រៅដែលបានក្លាយជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ខ្ញុំសូមថ្លែងទីបន្ទាល់អំពីសេចក្តីស្រឡាញ់របស់ព្រះវរបិតាសួគ៌ និងព្រះប្រោសលោះរបស់យើងគឺព្រះយេស៊ូវគ្រីស្ទ និងភាពសុខសាន្តដែលកើតមកពីទ្រង់ទាំងទ្វេ—ទាំងភាពសុខសាន្តក្នុងចិត្ត និងពរជ័យដែលមាននៅក្នុងក្រោលនៃព្រះ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕