សារលិខិតផ្តើម
ពួកយើងគោរពដល់បុត្រីទាំងឡាយរបស់ព្រះនៅក្នុងសម័យប្រជុំដ៏ពិសេសនេះ ដោយផ្តោតទៅលើកង្វល់របស់ពួកគាត់ និងអស់អ្នកដែលនៅក្នុងអង្គការរបស់ពួកគាត់ផងដែរ ។
បងប្អូនស្ត្រីជាទីស្រឡាញ់នៅពេលយើងចាប់ផ្តើមសម័យប្រជុំស្ត្រីនៃសន្និសីទទូទៅដ៏ពិសេសនេះ ខ្ញុំរីករាយផ្តល់នូវសារលិខិតណែនាំនេះមកពីគណៈប្រធានទីមួយ ។
សម័យប្រជុំថ្ងៃសៅរ៍របស់យើងមានប្រវត្តិសាស្ត្រមួយដែលមានគោលបំណង និងមានទស្សនិកជនផ្សេងគ្នាផងដែរ ។ នាល្ងាចនេះយើងដាក់បន្ថែមទៅលើប្រវត្តិសាស្រ្តនោះ ពេលយើងចាប់ផ្តើមផ្តោតលើគោលបំណង និងនីតិវិធីថ្មីមួយសម្រាប់ពេលអនាគត ។ ដំណឹងល្អរបស់ព្រះយេស៊ូវគ្រីស្ទមិនផ្លាស់ប្តូរឡើយ ។ គោលលទ្ធិនៃដំណឹងល្អមិនផ្លាស់ប្តូរឡើយ ។ សេចក្តីសញ្ញាផ្ទាល់ខ្លួនរបស់យើងក៏មិនផ្លាស់ប្តូរដែរ ។ ប៉ុន្តែប៉ុន្មានឆ្នាំមកនេះ ការប្រជុំដែលយើងប្រារព្ធឡើងដើម្បីចែកសារលិខិតរបស់យើងមានការផ្លាស់ប្តូរ ហើយទំនងជានឹងផ្លាស់ប្តូរបន្តទៀតនៅឆ្នាំខាងមុខៗ ។
ឥឡូវនេះ ការប្រជុំល្ងាចថ្ងៃសៅរ៍នេះគឺជាសម័យប្រជុំនៃសន្និសីទទូទៅ ពុំមែនជាសម័យប្រជុំរបស់អង្គការជំនួយណាមួយឡើយ ។ ដូចជាគ្រប់សម័យប្រជុំទាំងអស់នៃសន្និសីទទូទៅដែរ ការរៀបចំផែនការ អ្នកឡើងនិយាយ និងតន្ត្រីត្រូវបានចាត់តាំងដោយគណៈប្រធានទីមួយ ។
យើងបានសុំឲ្យប្រធាន ជីន ប៊ី ប៊ីងហាំ គណៈប្រធានទូទៅនៃសមាគមសង្គ្រោះ ដឹកនាំសម័យប្រជុំនេះ ។ នាពេលអនាគតសម័យប្រជុំល្ងាចថ្ងៃសៅរ៏ អាចនឹងត្រូវដឹកនាំដោយអ្នកកាន់តំណែងទូទៅម្នាក់របស់សាសនាចក្រ ដូចជា សមាជិកនៅក្នុងគណៈប្រធានទូទៅនៃសមាគមសង្រ្គោះ យុវនារី និងអង្គការបឋមសិក្សា ដែលបានចាត់តាំងដោយគណៈប្រធានទីមួយ ។
រាត្រីនេះ សម័យប្រជុំល្ងាចថ្ងៃសៅរ៍នៃសន្និសីទទូទៅនឹងផ្តោតទៅលើកង្វល់ទាំងឡាយរបស់បងប្អូនស្ត្រីនៃពួកបរិសុទ្ធថ្ងៃចុងក្រោយ ។ ការណ៏នេះនឹងរួមបញ្ចូលទាំងគោលលទ្ធិរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គោលនយោបាយទាំងឡាយរបស់សាសនាចក្រដែលទាក់ទងជាពិសេសចំពោះស្ត្រី និងការទទួលខុសត្រូវទូទៅ និងការងាររបស់អង្គការជំនួយផ្សេងៗ ដែលរួមមានស្ត្រី និងក្មេងស្រីនៃសាសនាចក្រ ។ តាមរយៈសម័យប្រជុំនេះទោះបីជាមានការចាក់ផ្សាយដោយទូលំទូលាយទៅកាន់ទស្សនិកជននៅទូទាំងពិភពលោក ដូចជាសម័យប្រជុំទាំងអស់នៃសន្និសីទទូទៅក្តី ក៏ទស្សនិកជនដែលត្រូវបានអញ្ជើញឲ្យចូលរួមនៅក្នុងមជ្ឈមណ្ឌលសន្និសីទសម្រាប់សម័យប្រជុំនេះគឺមានស្ត្រី និងយុវនារីដែលមានអាយុចាប់ពី ១២ ឆ្នាំឡើងទៅ ។ យើងមានថ្នាក់ដឹកនាំបព្វជិតភាពមួយចំនួន ដែលធ្វើជាអធិបតីលើអង្គការនានា មកចូលរួមផងដែរ ។
អ្វីដែលយើងកំពុងចាប់ផ្តើមនៅទីនេះ គឺឆ្លើយតបទៅនឹងធនធានទំនាក់ទំនងបច្ចុប្បន្ន ដែលមានសម្រាប់ថ្នាក់ដឹកនាំ និងសមាជិកភាពនៃសាសនាចក្ររបស់ព្រះអម្ចាស់នៅទូទាំងពិភពលោក ។ គោលលិទ្ធនៃដំណឹងល្អរបស់ព្រះយេស៊ូវគ្រីស្ទគឺសម្រាប់មនុស្សគ្រប់រូប ដូច្នេះហើយនោះជាការជំរុញទឹកចិត្តដ៏ចម្បង ព្រមទាំងពង្រីកវិសាលភាពនៃការផ្សព្វផ្សាយរបស់យើង ។ ពួកយើងគោរពដល់បុត្រីទាំងឡាយរបស់ព្រះនៅក្នុងសម័យប្រជុំដ៏ពិសេសនេះ ដោយផ្តោតទៅលើកង្វល់របស់ពួកគាត់ និងអស់អ្នកដែលនៅក្នុងអង្គការរបស់ពួកគាត់ផងដែរ ។
យើងមានអំណរគុណដែលបច្ចេកវិទ្យាខាងការចាក់ផ្សាយពេលនេះ ផ្តល់លទ្ធភាពដល់ថ្នាក់ដឹកនាំសាសនាចក្រធ្វើការបំពាក់បំប៉នលម្អិត តាមរយៈការថ្លែងទៅកាន់អ្នកចូលរួមជាក់លាក់ពីចម្ងាយ ។ យើងក៏ស្វាគមន៍ ដែលឱកាសធ្វើដំណើរនាពេលបច្ចុប្បន្នកំពុងបើកឲ្យមានច្រើនឡើងផងដែរ ។ វាអនុញ្ញាតឲ្យយើងអាចបញ្ជូនថ្នាក់ដឹកនាំសាសនាចក្រ ធ្វើដំណើរទៅបំពាក់បំប៉នភាពជាអ្នកដឹកនាំដោយផ្ទាល់ ជាទៀងទាត់តាមតម្រូវការផងដែរ ។
នេះជាកិច្ចការរបស់អម្ចាស់នៃព្រះយេស៊ូវគ្រីស្ទ ។ យើងគឺជាអ្នកបម្រើរបស់ទ្រង់ បានដឹកនាំដោយព្រះវិញ្ញាណបរិសុទ្ធរបស់ទ្រង់ ។ យើងសូមឲ្យពរជ័យនៃព្រះអម្ចាស់ចាក់ស្រោចលើពួកអ្នកដឹកនាំនៃអង្គការទាំងនេះ ស្ត្រី និងយុវនារីស្មោះត្រង់ទាំងឡាយ ដែលបម្រើព្រះអម្ចាស់នៅក្នុងអង្គការទាំងនេះ និងក្នុងជីវិតពួកគេផ្ទាល់ម្នាក់ៗផងដែរ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕