Gyina Da no mu wɔ Christ mu
Jesus Christ ma hɛn kwan ma “yebotum egyina wɔ da no mu.’’
Nna ɔyɛ da a mbɛbusɛm, nsɛmbisa hwanyann, na nkyerɛkyerɛ a no mu dɔ pɔkyee ahyɛ mu mã. Ber a otwuuw hɔn enyim ara yie dɛ wɔtse dɛ “nda a wɔahoa ho, na ekyir pue fɛfɛɛfɛw, na no mu dze efun mbiew ɔnye fĩ nyina ahyɛ mã,’’1 no, Jesus kyerɛkyerɛɛ mbɛbusɛm ebiasa kãa ho faa sunsum mu ahoboaboa na osũanyiyɛ ho. Nna iyinom mu kor nye mbaabun du hɔn abɛbusɛm no.
“Na sor ahenman no wɔdze bɔto mbaabun du a wɔfaa hɔn kandzea dɛ worikehyia ayeforkun kwan no ho.
“Na hɔn mu beenum yɛɛ enyansafo, na beenum yɛɛ nkwasea.
“Na hɔn a wɔyɛɛ nkwasea no, wɔfaa hɔn nkandzea no, wɔammfa ngo annka ho:
“Na enyansafo no faa ngo guu hɔn ntoa mu kaa hɔn nkandzea no ho.
“Na ayeforkun no kyinkyinii no, hɔn nyinara totɔɔ nkom na wɔdedae.
“Na esuom no, wɔtsẽaa mu dɛ, Hwɛ, ayeforkun no reba o! Hom nkɔ nkehyia no kwan.
“Nna mbaabun no nyina soɛree na wɔkekaa hɔn nkandzea.
“Na nkwasea no see enyansafo no dɛ, Hom mma hɛn hom ngo no bi, na hɛn nkandzea rudundum.
“Na enyansafo no buaa dɛ, Oho, bɛyɛ na ɔronnsõ hɛn nye hom; na mbom hom nkɔ hɔn a wɔtɔn no hɔ nkɔtɔ homdze.
“Na ber a wɔkɔree rokɔtɔ no, ayeforkun no bae, na hɔn a wɔayɛ krado no nye no kɔr ayefor ase, na wɔtoow abow no mu.
“Na ekyir no na mbaabun nkaa no so bae bɛsee dɛ, Ewuradze, bue hɛn.”2
“Na ɔnodze, obuae see hɔn dɛ, Nokwar mese hom dɛ hom nnyim me.”3
“Dɛm ntsi, hom nweɔn, na hom nnyim da no nye dɔn no’’4
President Dallin H. Oaks bisaa nsɛmbisa a ɔgye adwendwen a odzi do yi a ɔfa Ayeforkun ne mbae ho no dɛ:5 “Na sɛ Ne mbae no yɛ ɔkyena ɛ? Sɛ yenyim dɛ ɔkyena na yebehyia Ewuradze a—ɔnam hɛn wu a ɔnnsoe do anaa ɔnam Ne mbae a enyi nnda ho kwan do a—nnkyɛ ebɛnadze na yɛbɛyɛ no ndɛ?’’6
Meesũa efi mankasa mo sũahu mu dɛ sunsum mu ahoboaboa ma Ewuradze ne mbae no nnyɛ adze tsitsir nko mbom kwan kortsee a yebenya nokwar asomdwee na enyigye.
Nna da no na mframa robɔ ma ewia epue na midzii kan tsee nsɛmfua no dɛ “Enya kokoram.’’ Ahobow kãa emi na mo kun! Ber a nna yɛtsena hɛn mu rokɔ fie wɔ kommyɛ mu rodwendwen asɛm no ho no, m’akoma kɛdaa hɛn mbambanyin baasa no hɔn do.
M’adwen mu no mibisaa Ɔsor Egya dɛ, “Murubowu a?’’
Sunsum Krɔnkrɔn no wɔsaa dɛ, “Biribiara bɛyɛ YIE.’’
Nkyii mibisaa dɛ, “Mebɛtsena ase a?’’
Bio, nyiano no bae dɛ, “Biribiara bɛyɛ YIE.’’
Meyɛɛ basaa. Ebɛnadze ntsi na menyaa dɛm nyiano noara pɛɛ sɛ mebɛtsena ase anaa mubowu o?
Afei awerɛfir mu ara asomdwee hyɛɛ mo honandua nyina mu mã ber a wɔbɔ me nkaa dɛ: Onnhia dɛ yɛdze ahoper bɔkɔ fie akɛkyerɛkyerɛ hɛn mba mbrɛ wosi bɔ mpaa. Wonyim mbrɛ wosi nya nyiano na awerɛkyekyer fi mpaabɔ mu. Onnhia dɛ yɛdze ahoper bɔkɔ fie na yɛakyerɛkyerɛ hɔn kyerɛwsɛm no anaa nkɔnhyɛfo atseasefo hɔn nsɛm. Wonyim dɛm nsɛm no dada dɛ ahoɔdzen na ntseasee fibea. Onnhia dɛ yɛdze ahoper bɔkɔ fie na yɛakyerɛkyerɛ hɔn nnuhu, Owusoɛr no, Nsanananmu no, nkwagye ho nhyehyɛɛ, onnyiewiei ebusua ebusua, anaa Jesus Christ ne nkyerɛkyerɛ mapã no ho asɛm.
Dɛm ber mu no ebusua ewimbir fie nhyiamu, kyerɛwsɛm nsũae nhyiamu, gyedzi mpaabɔ a yɛabɔ, nhyira a wɔdze ama, dase a woedzi, ahyɛmudzi a wɔayɛ na woesie, Ewuradze ne fie a wɔakɔ, na Ahomgyeda a woesie biara hia—ao, mbrɛ osi hia dodow a! Nna mber apa ho dɛ yɛdze ngo bogu hɛn kandzea mu. Nna yehia asɔmu kor biara, na yehia no sesiara!
Osian Jesus Christ na N’asɛmpa ne nsanananmu ntsi, sɛ mowu a, m’ebusua benya awerɛkyekyer, ahoɔdzen, na da kor bi yɛasan abɔmu. Sɛ metsena ase a, mebenya tum kɛse ho kwan wɔ asaase yi do ma ɔaboa me, ɔama me tsipia, na ɔasa me yarba. Ewiei no, osian Jesus Christ ntsi, biribiara bɛyɛ YIE.
Yesũa no yie fĩ Nkyerɛkyerɛ na Ahyɛmudzi mu dza “YIE’’ tse.
“Na dɛm da no, sɛ meba wɔ m’enyimnyam mu a, nna abɛbu a mekãe a ɔfa mbaabun du no ho no bɛhyɛ mã.
“Na hɔn a wɔyɛ enyansafo na wɔgyee nokwar no, na wɔfaa Sunsum Krɔnkrɔn no dze yɛɛ hɔn kwankyerɛfo, na wɔamma wɔanndaadaa hɔn no—nokwar, mese hom dɛ worunntwa hɔn nnto famu na wɔnntow hɔn nnkyen ogya mu, mbom, wobotum egyina wɔ da no mu.’’7
Jesus Christ ma hɛn kwan ma “yebotum egyina wɔ da no mu.’’ Yeregyina wɔ da no mu n’ase nnkyerɛ dɛ yɛbɛyɛ ndzɛmba pii a enyi da kwan dɛ yɛbɛyɛ no. Dwen ahwehwɛ a ɔma ndzɛmba yɛ akɛse ho. No botae tsitsir nnyɛ dɛ ɔma ndzɛmba yɛ akɛse ara. Obotum so aboa kan ano wɔ faakor ma ɔayɛ dzen. Yehia ara dɛ yɛdze hɛn mbɔdzembɔ bɔboa ano wɔ faakor, na yɛayɛ Jesus Christ ne kan mboanofo. Yehia nyikyerɛ sũahu horow a ɔyɛ krɔnkrɔn beberee.
Israel etsifi atɔe hɔ no, bepɔw fɛɛfɛw nsɛdo bi wɔ hɔ a wɔfrɛ no “bepɔw ebunebun.’’ Bepɔw Carmel8 yɛ ahaebun afe mu nyina osian bosu nkakrankara ɔtoto do no ntsi. Edzidzi no kɔ do daa daa. Tse dɛ Carmel bosu no,9 ber a yɛhwehwɛ dze “ndzɛmba a ɔfa tseneneeyɛɛ ho,’’10 “ndzɛmba nketsenketse do,’’11 mee hɛn akra no, hɛn dasee na hɛn mba hɔn dasee runnwu!
Sesei, bia erodwen dɛ, “Mbom Akyerɛbaa Wright nnyim m’ebusua. Yeridzi aper ankasa na yɛnntse dɛ iyi.’’ Noara nye no. Minnyim w’ebusua. Naaso Nyankopɔn a Ɔwɔ ɔdɔ, ehumbɔbɔr, tum, nyimdzee, na enyimnyam a ɔmmbɔadze da no nyim.
Nsɛmbisa a bia iribisa no yɛ akoma a odzi yaw wɔ wo kra no bun mu ne nsɛmbisa. Yehu nsɛmbisa a ɔtsetse dɛm wɔ kyerɛwsɛm krɔnkrɔn no mu:
“Kyerɛkyerɛfo, ɔnnyɛ wo asɛm dɛ yɛrehera?’’12
“M’enyidado wɔ henfa?’’13
“Ebɛnadze na [me]nyɛ,ama dɛm fua kebii yi eefi [mo]do?’’14
“Na nyansa dze, hen na wobohu? na ntseasee ananmu so wɔ hen?’’15
“Obesi dɛn bɛyɛ na [me]etum esuo adze papa biara mu yie?’’16
“Ewuradze, ebɛnadze na epɛ dɛ meyɛ?’’17
Na nkyii nyiano dɛɛdɛw no ba daa dɛ:
“Ana egye dzi dɛ tum wɔ Christ mu dze kɔ nkwagye mu?’’18
“Hwɛ, ana Ewuradze ahyɛ hɛn mu binom dɛ mma wonnya ne papayɛ?”19
“Ana hom gye dzi dɛ [Obotum] ayɛ yi?’’20
“Egye nkɔnhyɛfo no dzi?’’21
“Ana hom kyerɛ gyedzi wɔ hom ɔpon ho wɔ nyia ɔbɔɔ hom no mu?”22
“Ana asaase nyinara ɔtsɛmbuafo nnkɛyɛ dza ɔtsen bi a?’’23
M’anyɛnkofo adɔfo, yennkotum akyɛ hɛn ngo, naasao yebotum akyɛ Ne kan. Ngo a ɔwɔ hɛn nkandzea no mu no nnkotum aboa hɛn ma “[ye]gyina wɔ da no mu’’ nko mbom obotum asan ayɛ kwan a ɔhyerɛn anamɔn kwan a ogya hɔn a yɛdɔ hɔn no kɔ Agyenkwa hɔ, nyia Ɔayɛ krado gyina hɔ “ebue n’abasa mu regye’’ hɔn.24
“Mbrɛ Ewuradze se nye yi; Sianka wo ndze wɔ osũ ho, na w’enyinwa wɔ nyinsuwa ho na wobotua w’edwuma kaw, … na wobefi ɔtamfo n’asaase do aba bio.
“Na enyidado wɔ hɔ ma w’ewiei, Ewuradze na ɔse, na wo mba bɛsan aba hɔnankasa hɔn ahẽ do bio.’’25
Jesus Christ nye “enyidado ma w’ewiei’’ no. Biribi a yennyi, anaa yɛnnyɛe, nnsiw kwan dɛ hɛn nsa bɛka N’afɔrbɔ a onnyiewiei na ɔmmbɔadze no. Ɔno nye siantsir kor a hɛn asɛm nnkowie dabiara da.26 Dɛm ntsi hom, “mper nkɔ kan ngyina pintsinn wɔ Christ mu, nya enyidado a ɔhyerɛn na odzi mu, na hom nya Nyankopɔn nye nyimpa nyina ho dɔ. Dɛm ntsi, sɛ [yɛ]per kɔ kan, na [yɛ]mee wɔ Christ n’asɛm mu, na [ye]tsim kodu ewiei a, hwɛ dɛm na Egya no se: [Ye] benya onnyiewiei nkwa.’’27
Onnyiewiei nkwa yɛ onnyiewiei dɛwdzi. Dɛwdzi wɔ abrabɔ yi mu, sesiara—hɛn nda mu nsɔhwɛ nyina ekyir no, mbom osian Ewuradze no mboa dɛ Ɔbɔboa ma yeesũa efi mu na ewiei no yeedzi do konyim no—na dɛwdzi a wɔtow ho abaw a onnhyia wɔ abrabɔ a ɔreba no mu ntsi a. Wɔbɛpepa nyinsuwa, wɔbɛsã akoma ebubu no yarba, wobohu dza ɔyewee no, ehiadze benya nyiano, ebusua ebusua bɛsan ananmu, na dza Egya no wɔ nyinara bɛyɛ hɛn dze.28
Hwɛ Jesus Christ na tsena ase29 nye me dasee wɔ “[hɛn] akra no Guanhwɛfo nye Hwɛdofo,’’30 dɔfo Jesus Christ, ne dzin krɔnkrɔn mu, amen.