Owura, Yɛpɛ dɛ Yehu Jesus

Fefɛw ber dakor bi wɔ afe 1945 mu no, aberantsɛ bi nyanee wɔ nsordaafo asopitsi. Nna oenya ne tsir edzidzi mu dɛ ɔtse ase—wɔtoow no itur wɔ n’asowa ekyir pɛɛ, mbom datserfo no ayɛ aprehyɛn, na sesei dze otum nantsew na ɔkasa yie.

Awerɛhowsɛm nye dɛ, nna akorabo no asɛɛ n’adwen fã a ɔdze kaa enyim ahorow no. Sesei ɔhwɛɛ ne yer n’enyim dɛ mbrɛ onnyim no koraa; nna ɔnnkaa noara ne maame n’enyim. Nna n’enyim a ɔwɔ ahwehwɛ no mu mpo yɛ biribi fofor ma no—onntum nnkyerɛ sɛ ɔyɛ banyin anaa basia.¹

Ɔabɛyɛ enyim-nyifuranyi—yarba a ɔakã nyimpa ɔpepe.²

Nkorɔfo a wɔyar enyim enyifura a ɔyɛ dzen no bɔ mbɔdzen dɛ wɔbɛkyer mbra egu hɔn tsir mu dze akaa binom—wobotum dze mbrɛ nsisii a ɔwɔ babasia n’enyim tse dze akaa no anaa mbrɛ nyɛnko bi twuw n’ananadze na ɔnantsew dze akaa no.

Asɛm a otsĩa ebien nye yi, ɔfa mara moho: meyɛ aberantsɛba no, nna metaa hu me nã dɛ mbra hyɛfo. Ɔno na ɔkyerɛ ber a mubotum edzi agor na ber a ɔsɛ dɛ meda, anaa ma omuo koraa no, ber a ɔsɛ dɛ mututu efuw wɔ paado hɔ.

Nna ɔdɔ me ampaara. Eso mpɛn pii na wɔ m’enyito mu, nna muhu no dɛ “Nyia Otwar dɛ Wɔyɛ Setie Ma No” ara nko.

Mfe kakra ekyir ana muruhu no dɛ ɔyɛ nyimpa ankasa. M’enyi to dɛ mannhyɛ da ara ennhu n’afɔrbɔ anaa manndwen emmbisa siantsir a daadaa ɔhyɛɛ ntar ase dze adadaw ebien noara mfe pii mu (ber a nna minya skuul ntar afofor) anaa siantsir a, wi bɔtɔ no, nna ɔabrɛ dodow na ɔpɛ papaapa dɛ mebɛda ntsɛm.

Bia ihu dɛ nsɛm ebien yi yɛ asɛm kor ara—mfe dodow ara mu, nna meyɛ dɛ enyim-nyifuranyi. Menntum annhwɛ me nã dɛ ɔyɛ nyimpa ankasa. Muhun ne mbra naaso mennhu no dɔ a ɔwɔ mu no.

Mekã dɛm nsɛm ebien yi dze kyerɛ adze kor: mususu dɛ inyim obi (anaa woara nye nyia) a ɔyar sunsum mu enyim enyifura bi.

Bia eper dɛ ibohu Nyankopɔn dɛ Egya dɔfo. Bia ehwɛ sor, na innhu ɔdɔ na ehumbɔbɔr enyim mbom mbra futuww nko a ɔwɔ dɛ idua mu kɔ wo kwan. Bia egye dzi dɛ Nyankopɔn dzi tum wɔ No sorsor, kasa dua No nkɔnhyɛfo do, na ɔdɔ wo nua babaa mbom nsumaa mu no edwen ho dɛ sɛ Ɔdɔ wo a.³ Bia esuo dadze poma no mu wɔ wo nsamu naaso innyae nntsee Agyenkwa no dɔ no a ogya wo kɔ ho no ne nkã.⁴

Mususu dɛ inyim nkorɔfo a wɔtsetse dɛm osiandɛ mber tsentsenntsen mu, nna meyɛ obi a ɔtse dɛm—nna mowɔ sunsum mu enyim-enyifura.

Modween dɛ m’abrabɔ yɛ miridzi mbra do na murudu gyinapɛn bi a ntseasee nnyi mu ho. Nna minyim dɛ Nyankopɔn dɔ wo emudzi mu ara naaso nna mankasa menntse dɔ no mma moho. Nna modwendwen mbrɛ mobɔkɔ ɔsor hɔ no pii kyɛn dɛ menye mo Sor Egya bɛtsena.

Ɔtɔfabi a, sɛ ɔwo tse dɛ emi, yebotum ebuebue hɛn ano ara, mbom yɛnntow “ɔpon ho ɔdɔ ndwom no a,”⁵ ebɛnadze na yebotum ayɛ?

Nyiano no, dɛ ma President Russell M. Nelson kaa hɛn no, dabaa nye Jesus.⁶ Na ɔno yɛ asɛmpa papaapa.

Asɛm tsiabaa bi wɔ John nwoma mu a mepɛ. Ɔkã abɔntsen kuw bi a wɔkɔr osuanyi bi ne nkyɛn kebisaa adze bi a ohia ho asɛm. Wɔkãa dɛ, “Owura, yɛpɛ dɛ yehu Jesus.”⁷

Dza hɛn nyinara pɛ nye no—yɛpɛ dɛ yebohu Jesus dɛ Ne nyimpa ban na yɛatse No dɔ. Iyi nye siantsir a yɛyɛ dza yɛyɛ nyina wɔ Asɔr mu—na sacrament nhyiamu biara ase. Sɛ erodwendwen adzesuadze kor a ebɛkyerɛ, nhyiamu kor a wɔnyɛ ho nhyehyɛɛ, nna sɛ ibegyaa deaconfo no do hwɛ na abɔ bɔɔl agodzi o, ibotum dze nyiyimu yi ayɛ wo kwankyerɛ: ana iyi bɔboa nkorɔfo ma woeehu na wɔadɔ Jesus Christ a? Sɛ ɔnntse dɛm a, nna bɔ mbɔdzen yɛ biribi fofor.

Ber a m’enyi baa moho do dɛ mowɔ sunsum mu enyim-enyifura no, dɛ nna muhu mbra mbom munnhu Egya No N’ehumbɔbɔr enyim no, nna minyim dɛ nnyɛ Asɔr no mfom bi a. Nnyɛ Nyankopɔn Ne dze, na ɔnnkyerɛ dɛ mayew adze nyina; ɔyɛ adze a hɛn nyina wɔ dɛ yesũa. Adasefo edzikamfo wɔ Wusoɛr no ho mpo nye Ewuradze a Ɔasoɛr efi owu mu hyiae enyim na enyim mpɛn pii a wɔannkaa No; fi Ture Nda no ho kɔ Galilee mpoano, N’akadofo edzikamfo no “hun Jesus dɛ ogyina hɔ na [w]onnyim dɛ ɔyɛ Jesus a.”⁸ Nna ɔwɔ dɛ wosũa dɛ wobohu No, na hɛn so dɛm ara.⁹

M’enyi baa moho do dɛ mowɔ enyim-efura no, mehyɛɛ ase dzii Mormon n’afotu do dɛ medze “[m’]akoma mu ahoɔdzen nyina” bɔbɔ mpaa ama ɔdɔ no a Ɔdze abɔ N’esũafo anohoba no aahyɛ me mã—mo dɔ ma No na No dɔ ma me—na dɛ “mehu no dɛ mbrɛ ɔtse … na menya dɛm enyidado yi.”¹⁰ Mobɔɔ mpaa mfe pii dɛ mubotum edzi mbra kɛse a odzi kan no do dɛ mobɔdɔ Nyankopɔn na matse “nokwar kɛse a odzi kan” nkã … dɛ “Nyankopɔn dze N’akoma, ahom, adwen, na ahoɔdzen nyina dze dɔ hɛn.”¹¹

Mesan so kanee sii do kaan Nsɛmpa anan no bio—nnyɛ dɛ medze rohwehwɛ eyiyi ahyɛdze horow mbom dɛ mubohu Ne nyimpa ban na dza Ɔdɔ. Na mber pa mu no, metsee No dɔ no ase ara yie.

Jesus kãa ahyɛse no dɛ wɔsomaa No “dɛ Ɔmbɛkyekyer hɔn a hɔn akoma ebubu, Ɔmbɛpaa ɔgye mma ndɔmmumfo, nye adzehu mma enyifurafo.”¹²

Nna ɔnnyɛ ndzɛmba a wɔakyerɛw dɛ ɔwɔ dɛ ɔyɛ ara kwa anaa dɔm mu nkitahodzi tum ara; mbom mbrɛ No dɔ no bɔbea tse nye no.

Bue Nsɛmpa no mu ara; wɔ bɛyɛ krataafa biara do no yehu No dɛ Ɔroboa nkorɔfo a wɔrebrɛ—wɔ nyimpa nkitahodzi mu, sunsum mu, nye honandua mu. Ɔdze ne nsa ka nkorɔfo a wobu hɔn dɛ efifidze a hɔnho nntsew¹³ na ɔma hɔn a ɔkɔm dze hɔn edziban.¹⁴

Jesus ho asɛm a ɔyɛ wo dɛw papaapa nye hen dze? Mususu dɛ ɔkyerɛ Nyankopɔn Ne Ba no a ɔretsen nsa efua anaa ɔrema obi a wɔnnkan no nnka ho enyidado—kwatanyi no,¹⁵ Samarianyi tamfo no,¹⁶ dzebɔnyɛnyi no,¹⁷ anaa ɔman tamfo no.¹⁸ Adom a ɔtse dɛm no yɛ nwanwa.

Bɔ mbɔdzen dɛ ebɛkyerɛw ato hɔ aber biara a Ɔbɔ ose anaa Ɔsa yarba anaa Ɔnye abɔntsennyi to nsa dzidzi, na w’akyerɛwdua mu ink bɛsa ansaana ewie Luke kenkaan.

Ber a muhun iyi no, m’akoma huruwii dɛ mehu ɔdɔ mu ara, na mehyɛɛ ase tsee nka dɛ Ɔbɔdɔ me. Dɛ President Nelson kyerɛe no, “Irusũa mbordo afa Agyenkwa no ho no, ma ɔyɛ mberɛw dɛ ebɔtwer N’ehumbɔbɔr, No dɔ a ɔmmbɔadze.”¹⁹ Na ebɔtwer wo Ɔsor Egya na adɔ No yie.

Elder Jeffrey R. Holland akyerɛkyerɛ dɛ Jesus bae bɛkyerɛɛ “hɛn mbrɛ hɛn Onnyiewiei Nyankopɔn Egya no su na ne ban tse, mbrɛ Oetu Noho nyina esi hɔ ama Ne mba wɔ mber na ɔman biara mu.”²⁰

Paul se Nyankopɔn yɛ “ehumbɔbɔr [nyina] Egya, nye awerɛkyekyer nyina Nyankopɔn.”²¹

Sɛ innhu No dɛm a, meserɛ kɔ do bɔ mbɔdzen.

Nkɔnhyɛfo to nsa frɛ hɛn dɛ yɛnhwehwɛ N’enyim.²² Mefa iyi dɛ nkaadze dɛ yɛsom hɛn Egya, nnyɛ nhyehyɛɛ bi, na dɛ yennwie kesi dɛ yebohu Jesus dɛ ogyina hɔ ma hɛn Egya no dɔ²³ na yɛaka No do, nnyɛ Ne mbra nko.²⁴

Sɛ hɛn nkɔnhyɛfo na asomafo kasa fa ahyɛmudzi ho a, wɔnnyɛ dɛ coachfo a wɔtsena ekyir rekeka mu kyerɛ hɛn dɛ, “hom mbɔ mbɔdzen yie!” Wɔpɛ dɛ yehu dɛ hɛn ahyɛmudzi horow ne fapem fa nkitahodzi horow ho²⁵ na wobotum ayɛ sunsum mu enyim enyifura n’ano edur.²⁶ Ahyɛmudzi horow no nnyɛ mbra a yɛdze nya No dɔ; Ɔdɔ hom emudzi mu dadaada. Hɛn taferbanyinmbɔmu no nye dɛ yebenya ntseasee na yɛama dɛm ɔdɔ no awen hɛn abrabɔ.²⁷

Yɛbɔ mbɔdzen dua hɛn ahyɛmudzi mu, tse dɛ ntokura mu, dze ehu Egya no N’ehumbɔbɔr su wɔ ekyir.

Ahyɛmudzi nye Nyankopɔn No mfuae bɔbea.

Ewiei no, yebotum esũa dɛ yebohu No ber a yɛsom No. “Na ɔbɛyɛ dɛn bɛyɛ na nyimpa bohu dɛ obi yɛ no wura wɔ ber a ɔnnsoom no da?”²⁸

Mfe kakra abasen kɔ, minyaa ɔfrɛ bi a nna metse nkã dɛ monnso mu. Menyaan ntsɛm, a me yamu hyehye me—mbom asɛmfua bi baa m’adwen mu a menntsee no da: dɛ erosom wɔ Asɔr yi mu nye dɛ irigyina Nyankopɔn No dɔ esutsen mu ama Ne mba. Asɔr yi yɛ edwumayɛfo kuw aforafora a nkorɔfo kitsakitsa akese na sofi dze robɔ mbɔdzen apaa kwan ama Nyankopɔn No dɔ aatsen ekodu ne mba a wohia do.

Nyia eyɛ biara no, mbrɛ wo dadaw tse biara no, kwan wɔ hɔ ma wo wɔ Asɔr yi mu.²⁹

Fa akese na sofi na kã kuw no ho. Boa ma yɛmfa No dɔ nkɛma Ne mba na bi bɛkã wo.³⁰

Hom mma yɛnhwehwɛ No dɔ, Ne ahyɛmudzi mfuae, na nkyii yɛnye Ne mba mbɔ mu, na yɛatow “Israel Pomfo” abɔ mu:

Hom ma yɛnhwehwɛ No dɔ enyim na nkyii yɛnyɛ No mbɔbɔrhu nkuraba ema Ne mba.³² Jesus Christ ne dzin mu, amen.