Yɛrokora Ahyɛmu Mba Ndze wɔ Ebusuasantsen a Wɔreba no mu.

Nkenyan ber dodow mu kor a ɔwɔ Mormon Nwoma no mu no nye Agyenkwa a ɔasoɛr efi owu mu no ne nserahwɛ kɔ nkorɔfo a nna wɔwɔ temple wɔ Bountiful asaase do no. Da no a ɔkyerɛkyerɛe, saa yarba, na ɔtoow gyedzi mu wiei ekyir no, Jesus twee nkorɔfo no hɔn adwen baa ebusuasantsen a wɔreba no do: “Ɔhyɛɛ dɛ wɔmfa hɔn mbofra nkakraba no mbra.”¹ Ɔbɔɔ mpaa mãa hɔn na ohyiraa hɔn nkorkor. Nkenyan sũahu no maa Agyenkwa no sũi mpɛn pii.

Na ɔkasaa kyerɛɛ nyimpadodow no, Jesus see dɛ:

“Hom nhwɛ hom mbofraba nye yi.

“Na ber a wɔrohwɛ hɔn no … wohun dɛ sor ebue, na wohun abɔfo dɛ wofi sor risian”, rosom hɔn mbofraba no.²

Maadwen sũahu yi ho mpɛn pii. Ɔyɛ dɛ ɔatɔ obiara n’akoma do! Wohun Agyenkwa no. Wɔdze hɔn nsa kãa no . Wonyim No. Ɔkyerɛkyerɛɛ hɔn. Ohyiraa hɔn. Na Ɔdɔɔ hɔn. Ɔnnyɛ nwanwa dɛ adze krɔnkrɔn a osii ekyir no, mbofraba yinom nyinii boae bɛkyekyeer ɔman a asomdwee, prɔmprɔmyɛ, na Christ-su ɔdɔ ahyɛ no mã a otsimii wɔ ebusuasantsen pii mu.³

Ana ɔnnkɛyɛ nwanwa sɛ hɛn mba botum nye Jesus Christ enya sũahu horow tse dɛm—dza ɔbɛkyekyer hɔn akoma aka No ho! Ɔto nsa frɛ hɛn, dɛ mbrɛ Ɔtoo nsa frɛɛ awofo a wɔwɔ Mormon Nwoma no mu no, dɛ yɛmfa hɛn mbofraba mbrɛ No. Yebotum aboa hɔn ma woehu hɔn Agyenkwa na Pomfo wɔ kwan a mbofra yinom yɛe no. Yebotum akyerɛ hɔn mbrɛ wobesi bohu Agyenkwa no wɔ kyerɛwsɛm no mu na wɔatow hɔn fapem wɔ No do.⁴

Ndaansa yi, nyɛnko pa bi kyerɛkyerɛɛ me biribi a nna mennhyɛ no nsew da a ɔyɛ abɛbusɛm a ɔfa ɔbarimba nyansafo a osii ne dan wɔ ɔbotan do no ho. Asɛm a ɔwɔ Luke nwoma mu no, ber a ɔbarimba nyansafo no rotow ne dan no ne fapem no, “otui ma ɔdɔe”.⁵ Nna ɔnnyɛ edwuma tootooba anaa dza ɔgow—ɔgyee mbɔdzembɔ!

Yebesi hɛn abrabɔ wɔ hɛn Pomfo, Jesus Christ, no Botan no do no, yehia dɛ yɛbɔ mbɔdzen ara yie. Yeyi egyangyandze biara akwa wɔ hɛn abrabɔ mu. Yɛbɔ mbɔdzen ara kɛpem dɛ yebohu No. Na yɛkyerɛkyerɛ hɛn mba ma wodua ayɛdze na ahyɛmu krɔnkrɔn horow do takyer No, ama sɛ ɔbra n’ehum dzendzen na nsuyirii ba a, nokwar dɛ wɔbɛba, wobenya nsunsuando kumaa bi wɔ hɔn do “osian ɔbotan a hom atow [hom] adan wɔ do ntsi.”⁶

Ahoɔdzen a ɔtse iyi nnyɛ dza ɔba mpofirmu ara. Wɔmmfa mma ebusuasantsen a odzi do no tse dɛ sunsum mu egyapadze bi. Otwar dɛ akorankor biara bɔ mbɔdzen dɛ ɔbɔhwehwɛ Ɔbotan no.

Yesua adzesua yi fi nkyerɛwee bi so mu wɔ Mormon Nwoma no mu. Ber a Ɔhen Benjamin kãa ne kasaa a odzi ewiei kyerɛɛ no nkorɔfo no, wɔboaboa hɔn ano dɛ ebusua ebusua tsie n’asɛm.⁷ Ɔhen Benjamin gyee dase a tum wɔ mu faa Jesus Christ ho, na ne dasee no kenyann nkorɔfo no kɔr bun mu. Wɔpaa mu kãa dɛ:

“Sunsum no … dze nsakyer kɛse aba hɛn akoma mu. …

“Na yɛpɛ dɛ yɛnye hɛn Nyame dzi ahyɛmu dɛ yɛbɛyɛ ne pɛ … hɛn nkwa da nyina.”⁸

Obi botum enya enyidado dɛ mbofraba a hɔn awofo enya nsakyer a ɔtse dɛm kɔ bun mu no benyin ebenya nsakyer na wɔayɛ ahyɛmu ama hɔn ho. Naaso, ɔnam siantsir ntsi bi a wɔannkã wɔ nkyerɛwee no mu no, mbofra no mu bi ennya enyigye wɔ hɔn awofo hɔn ahyɛmu a wɔyɛe no ho. Mfe pii ekyir no, “ɔbaa dɛ ebusuasantsen a wɔaba do no mu mba pii enntum anntse ɔhen Benjamin ne nsɛm no ase, osiandɛ ber a ɔkasaa kyerɛɛ no nkorɔfo no nna wɔyɛ mbofra nkakraba ntsi wɔanngye hɔn egyanom no hɔn amambra no enndzi.

“Wɔanngye dza wɔakã a ɔfa owusoɛr anaa dza ɔfa Christ ne mbaa ho no enndzi. …

“Na wɔamma woennuma hɔn; eso wɔanndɔm asɔr no. Na wɔyɛ nkorɔfo a hɔnho nntsew osian mbrɛ hɔn gyedzi tse ntsi.”⁹

Ebɛn awerɛhow asɛm nye yi! Ebusuasantsen a wɔreba no dze, gyedzi wɔ Jesus Christ mu nnyɛ dza ɔdɔɔ sõ ma abɛyɛ hɔn “egyanom gyedzi.” Wohia dɛ wonya hɔnara hɔn gyedzi wɔ Christ mu ma hɔn ho. Dɛ Nyame n’ahyɛmu nkorɔfo no, yebesi dɛn botum dze pɛ a wɔnye No bedzi ahyɛmu na woesie bɛhyɛ hɛn mba hɔn akoma mu?

Yebotum ahyɛ ase ber a yeridzi Nephi ne fasusu do: “Yɛkã Christ ho asɛm, yedzi dɛw wɔ Christ mu, yɛbɔ Christ ho asɛmpa no dawur, yɛhyɛ Christ ho nkɔm, na yɛkyerɛw dɛ mbrɛ hɛn nkɔnhyɛ tse, ama hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.”¹⁰ Nephi ne nsɛm kyerɛ daa daa mbɔdzembɔ dɛ, yɛbɛkyerɛkyerɛ hɛn mba Christ ho nsɛm. Yebotum ahwɛ no pefee dɛ ahyɛmu nkorɔfo hɔn ndze nnyɛ dzinn wɔ mbasantsen a wɔreba no hɔn asowa mu na Jesus nnyɛ Kwesida-adzesua asɛntsir nko.¹¹

Ahyɛmu nkorɔfo hɔn ndze no wohu no wɔ hɛnara hɛn dasegye mu nsɛm. Wohu no wɔ nkɔnhyɛfo atseasefo hɔn nsɛm mu. Na wɔdze tum ara yie akora no do wɔ kyerɛwsɛm no mu. Hɔ na hɛn mba bɛba ebohu Jesus na woenya nyiano ama hɔn nsɛmbisa. Hɔ na wobosua Christ ne nkyerɛkyerɛ no ama hɔn ho. Hɔ na wobenya enyidado. Iyi besiesie hɔn ama abrabɔ nyina a wɔbɔhwehwɛ nokwar no na wɔabɔ bra wɔ ahyɛmudzi anamɔn kwan no do.

Modɔ dɛm afotu yi a ofi President Russell M. Nelson hɔ dɛ:

“Henfa na yebotum akɔ eketsie No?

“Yebotum yɛakɔ kyerɛwsɛm no mu. Wɔkyerɛkyerɛ hɛn Jesus Christ na N’asɛmpa, No Werdambɔ ne kɛseyɛ, na hɛn Egya n’enyigye na ɔpon ho nhyehyɛɛ kɛse no ho nsɛm. Daa daa yɛdze hɛnho rehyɛ kyerɛwsɛm mu no hia papaapa ma sunsum mu asetsena, tsitsir ara wɔ nda yinom mu a begyabegyayɛ rodɔɔ sõ. Sɛ yɛmee wɔ Christ ne nsɛm mu daa daa a, Christ ne nsɛm no bɛkyerɛ hɛn mbrɛ yebesi egyina nkõdzen a yɛanndwen ho da dɛ obesi no, no enyim.”¹²

Ntsi eremee wɔ Christ ne nsɛm mu na iretsie No ne tse dɛn? Oye, ɔtse dɛ dza oye ma wo biara! Obotum ayɛ dɛ eroboaboa w’ebusua ano nye hɔn rekasa fa ndzɛmba a Sunsum Krɔnkrɔn no kyerɛkyerɛɛ wo wɔ wo kyerɛwsɛm nsũae mu a edze Bra, Bɛka Mo Do ridzi dwuma. Obotum ayɛ dɛ eroboaboa wo mba ano da biara na enye hɔn rekenkan nyiyimu kakra efi kyerɛwsɛm no mu na nkyii erohwehwɛ akwan horow dɛ wɔbɔbɔ mu edzi mber dze apensampɛnsa dza wosũae no mu. Ɔwo hwehwɛ dza oye ma wo na w’ebusua na bɔ mbɔdzen dɛ ibɛyɛ yie kakra da biara.

Hwɛ nhumu yi fi Teaching in the Savior’s Way: mu “Efa no ankorankor a, ewimbir fie nhyiamu, kyerɛwsɛm nsũae nhyiamu, anaa asɛmpa ho nkɔmbɔ twetwe bɛyɛ dɛ ɔnnrennyɛ dodow biara. Naaso, mbɔdzembɔ nkakrakra ɔnnyɛ dzen no, a wɔwɔw do yɛ no mber pii no, botum ayɛ tum na ahoɔdzen kyɛn adzesua kɛse bi a ɔnntaa nnsi anaa. adze tsitsir bi. … Ntsi ma mmpa aba, na ma ɔnnhaw wo dɛ ibɛyɛ biribi kyinkyinɛnn aber biara. Wɔw wo mbɔdzembɔ ara no do.”¹²

Hɛn asodzi horow krɔnkrɔn mu kor nye dɛ yɛboa hɛn mba ma wobohu kɔ bun mu na tsitsir ara dɛ Jesus nye Christ no, Nyankopɔn Tseasefo Ne Ba no, hɔn ankasa hɔn Agyenkwa na Pomfo, a ogyina N’asɔr ne tsir! Yennkotum ama kwan ma hɛn ahyɛmu ndze no ayew anaa komm sɛ yɛkã Ɔno a.

Ibɔdwen dɛ itɔ sin wɔ dzibew yi mu, naaso nnyɛ ankonam da. Mfatoho, ward abaguafo wɔ tumdzi dɛ wɔyɛ kyerɛkyerɛnyi bagua nhyiamu ma awofo. Abosoom anan biara nhyiamu yinom mu no,, awofo botum aboa ano esua efi hɔn mu kor biara suahu horow mu, apɛnsapɛnsa mbrɛ wobesi bɛhyɛ hɔn ebusua ebusua dzen mu, na woesua Christsu nkyerɛkyerɛ ne fapem. Nhyiamu yi ɔwɔ dɛ ɔkɔ do wɔ asɔr no ne dɔnhwer a otsĩa ebien ber mu.¹⁴ Asɔrba a bishop eyi no na odzi baano na odzi kyerɛkyerɛnyi baguafo nhyiamu nhyehyɛɛ no do a ɔdze Erekyerɛkyerɛ wɔ Agyenkwa No Kwan do no dzi dwuma dɛ mboa tsitsir.¹⁵ Bishopfo, sɛ sesei wo ward nnyɛ kyerɛkyerɛnyi baguafo nhyiamu mma awofo a, enye wo Kwesida Skuul president na ward baguafo hɔnankasa nhyehyɛ.¹⁶

M’ayɛnkofo adɔfo wɔ Christ mu, hom reyɛ dza oye koraa kyɛn ma hom dwen. Hom nkɔ do nyɛ ho edwuma. Hom mba rohwɛ, wɔretsie, na worusua. Sɛ hom kyerɛkyerɛ hɔn a, hom bɛba ebohu hɔn nokwar awosu dɛ Nyankopɔn ne mbambanyin na mbabaa. Ebia hɔn werɛ befir Agyenkwa no wɔ mber tsiabaa bi mu, naaso mobɔ hom anohoba dɛ, No werɛ nnkefir hɔn da! Mber no a Sunsum Krɔnkrɔn no kasa kyerɛ hɔn no bɔkɔ do atsena hɔn adwen na akoma mu. Na da kor wo mba bɛgye Enos ne dasee no dɛ: Minyim dɛ m’awofo yɛ nyimpa a wodzi pɛrpɛr, “na hwɛ, [wɔ]yɛn me wɔ … Ewuradze so ho setsie nye kasa kyerɛ mu—na nhyira nkã me Nyame ne dzin wɔ ho.”¹⁷

Wɔmma yɛngye Agyenkwa ne nsato no ntomu na yɛmfa hɛn mba mbrɛ No. Sɛ yɛyɛ a, wobohu No. Wɔbɛtse Ne nkã. Wobenyim No. Ɔbɛkyerɛkyerɛ hɔn Obehyira hɔn. Na, ao mbrɛ osi dɔ hɔn a. Na, ao, mbrɛ misi dɔ No. Jesus Christ ne dzin krɔnkrɔn no mu, amen.