Hɛn Nyɛnko Aber Nyina

Mo nuambanyin na nkyerɛbaa adɔfo, ehyiadzi yi mu no wɔayɛ hɛn adom dɛ nyikyerɛ ehue. Ewuradze Jesus Christ n’asomfo akasa na wɔbɛkã nokwar, nkuranhyɛ na kwankyerɛ nsɛm.

Dasegye horow a wɔagye no wɔ ehyiadzi yi ase dɛ Ewuradze dua Sunsum Krɔnkrɔn no mu kasa kyerɛ hɛn ankorankor no akã m’akoma. Sɛ yɛbɔ mpaa na yetsie Sunsum no ne nkenyan a, yenya nhumu kɛse na nhyira a ɔma hɛn kwankyerɛ dua nda dzen a ɔda hɛn enyim no mu.

Yɛatse bio President Russell M. Nelson no kɔkɔbɔ dɛ, “nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ n’akwankyerɛ, ne kyerɛpɛn, n’awerɛkyekyer, na ne daa daa nhyɛdo nnkã ho.’’¹

Dɛm nkɔnhyɛ kɔkɔbɔ no egya me ma madwendwen dza mebɛkyerɛkyerɛ me mba, mbanana, na nanasum afa mbrɛ wobesi benya kwankyerɛ a ohia kɛse yi wɔ nda a ɔyɛ dzen a ɔda hɔn enyim no mu.

Ntsi ndɛ m’asɛm yɛ krataa tsiabaa a medze rema m’asefo ama woeetum aaboa hɔn ber a mennkã hɔn ho wɔ enyigye nda a ɔda enyim no. Mepɛ dɛ wohu dza mebohu a obotum aboa hɔn.

Mabɛtse ase yie dza wobehia ma woenya Sunsum Krɔnkrɔn no ne nhyɛdo aber nyina wɔ nda a wɔbɛtsena ase mu no. Na menya nkenyan dɛ ndɛ menkã mankasa mo sũahu ho asɛm a ɔfa moroto nsa afrɛ Sunsum Krɔnkrɔn no ma Ɔabɛyɛ me nyɛnko aber nyina, dɛ mbrɛ mubotum. Me mpaabɔ nye dɛ nkyɛ meetum aahyɛ hɔn nkuran.

Mebɛhyɛ hɔn ase dɛ wɔndwen na wɔmbɔ Helaman ne mbabanyin, Nephi na Lehi, na Ewuradze no nkowaa binom a wɔnye hɔn reyɛ edwuma no hɔn mpaa ho. Wohyiaa ɔkõtsia yaayaw. Nna wɔrosom wɔ emumuyɛ bea na wɔnye ator yerɛyerɛw dzii esi. Mefa akokodur, na hom so botum, efi nyiyimu kor wɔ Helaman ne nkyerɛwee no mu.

“Na afe a ɔtɔ do eduosuon akron no mu no aperdzi pii hyɛɛ ase. Na ɔbaa dɛ Nephi na Lehi, nye hɔn enuanom mu pii a wonyim a ɔfa no nkyerɛkyerɛ ho nokwar botae no nyaa nyikyerɛ mpii da biara, dɛm ntsi wɔkãa nsɛmpa no kyerɛɛ dɔm no araa wogyaa hɔn aperdzi no wɔ dɛm afe noara mu.”²

Asɛm yi hyɛ me nkuran, na obotum ahyɛ hom nkuran. Helaman ne mbabanyin no sũahu horow a wonyaa no Sunsum Krɔnkrɔn ho no kyerɛkyerɛɛ hɔn na ɔmaa hɔn akwankyerɛ. Iyi ma me awerɛhyɛmu dɛ yebotum enya nkyerɛkyerɛ na yeesũa efi Sunsum no hɔ nkakrankakra, regye dza yehia, na nkyii sɛ yɛyɛ krado a, yɛagye bi akã ho.

Menya nkuranhyɛ wɔ dɛm kwan yi ara do fi Nephi n’asɛm mu a wɔsee no dɛ ɔnsan nkɔ Jerusalem nkɛgye Laban mprɛtse no. Hom kaa nsanmuyi a ɔyɛɛ. Ɔkãa dɛ: “Mobɔkɔ akɛyɛ ndzɛmba a Ewuradze ahyɛ no.”³

Nephi no sũahu a onyaa no Sunsum Krɔnkrɔn ho wɔ dɛm soma no ama me akokodur mpɛn pii ber a mahyɛ ndwuma binom ase a minyim dɛ ndwuma no fi Ewuradze hɔ mbom ɔyɛ dɛ ma ɔbor mo sũahu dadaw do na ɔbor dza muhu dɛ mo mbɔdzembɔ botum ayɛ no.

Hom kaa dza Nephi kãe wɔ no sũahu ho: “Nna adze asã; na memaa [mo nuambanyin no] sumaa afasu no ekyir. Na wosumaa hɔnho no, emi, Nephi, moweaweaa kɔr kurow kɛse no mu na misii mu dɛ morokɔ Laban ne fie.”

Ɔkɔ do kã dɛ, “Na Sunsum no gyaa me kɔr hɔ a nna minnyim dza merekɛyɛ.”⁴

Minyim dɛ Sunsum no maa Nephi kwankyerɛ sima kor sima kor anafua no mu wɔ Ewuradze no soma ho no, ahyɛ me nkuran.

Yehia, na hom behia, Sunsum Krɔnkrɔn N’ayɛnkoyɛ aber nyina. Sesei, yɛpɛ, naaso yenyim fi sũahu mu dɛ ɔnnyɛ mberɛw dɛ yebenya. Hɛn mu kor biara wɔ hɛn daa daa abrabɔ mu no yɛdwen, na yɛkã, na yɛyɛ ndzɛmba a obotum afom Sunsum no.

Sɛ dɛm ba a, dɛ ma ɔbɛba no, Ewuradze bɛma yɛatse dɛ Ɔmmpɛ. Na bia yɛbɔdwen dɛ ɔyɛ hɛn nko. Ohia dɛ yɛbɛkaa anohoba a ɔyɛ nokwar a yenya no dapɛn biara ber a yenu hɛnho na yedzi sacrament no, “Ama aber nyina [ye]enya no Sunsum ma ɔnye hɔn atsena.”⁵

Sɛ atse Sunsum Krɔnkrɔn ne nhyɛdo nkã ndɛ a, ɔyɛ adanse a ɔyɛ dɛ Werdambɔ no reyɛ edwuma wɔ w’abrabɔ mu.

Dɛ mbrɛ Elder Jeffrey R. Holland akã no: “Ber biara a nkõdzen kɛse yinom ba no, onnyi dɛ yegyaa hɛnho ma suro dɛ Nyankopɔn apow hɛn anaa Onntsie hɛn mpaabɔ. Otsie hɛn. Ohu hɛn. Ɔdɔ hɛn.”⁶

Dɛm awerɛhyɛmu no aboa me. Sɛ metse dɛ Ewuradze akɔ ekyirekyir, ber a me mpaabɔ ho mbuae yɛ dɛ ma ɔakyɛr no, mesũa dɛ mibedzi President Nelson n’afotu do dze ahwehwɛ m’abrabɔ mu dze enya akwan enu moho. Ɔkaa hɛn dɛ, “Daa daa nnuho nye ahotsew no kwan, na ahotsew dze tum ba.”⁷

Sɛ ihu dɛ ɔyɛ wo dzen dɛ ibɛtse Sunsum Krɔnkrɔn ne nkã a, bia ibotum adwendwen ho sɛ biribi wɔ hɔ a ohia dɛ inu woho wɔ ho na inya ho bɔnfakyɛ a.⁸ Ibotum dze gyedzi abɔ mpaa dze ehu dza ibɛyɛ a woho bɛtsew na dɛm ntsi afata dɛm Sunsum Krɔnkrɔn n’anyɛnkoyɛ aber nyina no yie ara.

Sɛ ipɛ dɛ inya Sunsum Krɔnkrɔn n’anyɛnkoyɛ a, otwar dɛ edze botae papa hwehwɛ. Otwar dɛ wo botae horow no yɛ Ewuradze no botae horow no. Sɛ wo botae su yɛ pɛsɛankonya dodow a, ɔbɛyɛ dzen dɛ ibenya na ibɛtse Sunsum no ne nkenyan.

Saafee no ma emi na ɔwo nye yɛbɛpɛ dza Agyenkwa no pɛ. Ɔdɔ mapã ma Christ na ohia dɛ ɔkyerɛ hɛn botae horow. Hɛn mpaabɔ hia dɛ wɔyɛ “Dza mepɛ nyina nye dza ipɛ. Wo pɛ nyɛ hɔ.”

Mobɔ mbɔdzen dɛ mekaa Agyenkwa no N’afɔrbɔ na No dɔ ma me. Nkyii, sɛ mobɔ mpaa ma Ɔsor Egya dze da ase a, menya ɔdɔ na awerɛhyɛmu dɛ Ɔatse me mpaa no na dɛ mebenya dza oye koraa ma me ma hɔn a modɔ hɔn no. Ɔhyɛ me gyedzi dzen.

Ndzɛmba nyina a Sunsum Krɔnkrɔn no gye ho dase no, dza ɔsom bo kɛse ma hɛn nye dɛ Jesus Christ, Nyankopɔn Ne Ba tseasefo no. Agyenkwa no bɔɔ anohoba dɛ, “Sɛ Okyigyinafo no a mibefi Egya no nkyɛn masoma no hom hɔ no, nokwar Sunsum a ofir Egya no mu no, sɛ onya ba a, ɔno bedzi mo ho dase.”⁹

Mfe pii a wɔabɛsen kɔ no minyaa foon do ɔfrɛ fi enã bi a ɔrehaw hɔ. Ɔkãa kyerɛɛ me dɛ ne babaa etu efi fie akɔ ekyirekyir. Ɔtsee wɔ nkitahodzi kakra a ɔnye ne babaa no nyae dɛ biribi ronnkɔ do yie koraa. Ɔserɛɛ me dɛ moboa no.

Mohwehwɛe hun ne babaa no ne fie kyerɛkyerɛnyi no. Etse dɛm dzin no a ibotum akã dɛ wɔakyɛr ara yie. Mefrɛɛ no. Nna ɔyɛ aberantsɛba. Naaso ɔkãa kyerɛ me dɛ ɔno na n’adamfo woenyan anafua no a nnyɛ babaa no nko na wɔrodwen no ho, mbom wɔdze nkenyan dɛ ɔreba abɛyɛ nsanmuyi a ɔdze awerɛhow na yaw bɛba. Dɛm Sunsum mu nkenyan noara nko no, wɔkɔree kɔhwɛɛ no.

Ahyɛse no nna ɔmmpɛ dɛ ɔkã ne gyinabew ho asɛm kyerɛ hɔn. Wɔdze nkenyan no wɔtotɔe serɛɛ no dɛ onnu noho na ɔmfa anamɔn kwan a Ewuradze wɔ ma no no. Megye dzi dɛ ɔdze Sunsum no, nkyii ohun dɛ, kwan nko a wobotum ehu dza wonyim fa n’abrabɔ ho no befi Nyame. Enã daan n’akoma mu nsɛnhia maa Ɔsor Egya na Agyenkwa no. Nna wɔasoma Sunsum Krɔnkrɔn no akɔ fie akyerɛkyerɛfo no hɔ osiandɛ wɔwɔ pɛ dɛ wɔbɔsom Ewuradze. Woedzi afotu na anohoba no a ɔwɔ Nkyerɛkyerɛ na Ahyɛmudzi no mu no do:

“Ma ayamuyie nhyɛ w’abadaa mu mã, a onngyaa da mfa mma nyimpa nyina, nye gyedzi fifo no, na ma ɔbrapa nsiesie w’adwen mu a onngyaa da, nkyii w’awerɛhyɛmu wɔ Nyame enyim bɛhyɛ dzen; na asɔfodzi ho nkyerɛkyerɛ mu ndzepa no bɔsosɔ wo kra do tse dɛ bɔw a ofi sor.

“Na ibenya Sunsum Krɔnkrɔn no n’anyɛnkoyɛ no aber nyina, na w’ahempoma bɛyɛ ahempoma a ɔnnsakyer wɔ tsenenee na nokwar mu; na w’ahendzi bɛyɛ ahendzi a ɔwɔ hɔ daapem na ɔbɛpem egu wo do efi afebɔɔ kesi afebɔɔ a ɔnnam nhyɛ kwan biara do.”¹⁰

Megye dase dɛ Ewuradze edzi N’anohoba do. Wɔsoma Sunsum Krɔnkrɔn no kɔ Jesus Christ N’Asɔr mu ahyɛmu nkorɔfo nokwafo hɔ. Afei, hom sũahu horow no bɛyɛ soronko, na Sunsum no bɛkyerɛ wɔ kwan a ɔbɛfata hom gyedzi na mbrɛ hom botum enya nyikyerɛ ama homho na nkorɔfo a hom dɔ na hom som hɔn no. Medze m’akoma nyina bɔ mpaa dɛ hom awerɛhyɛmu benyin.

Megye me dase dɛ Nyame Egya no tse ase. Ɔdɔ hom. Ɔtse hom mpaabɔ biara. Jesus Christ bɔɔ mpaa maa Egya no dɛ Ɔnsoma Sunsum Krɔnkrɔn ma Ɔmbɛma kwankyerɛ, awerɛkyekyer, na Ɔngye nokwar ho dase nkyerɛ hɛn. Egya no na No Dɔba no puei Joseph Smith do wɔ ndua kwãa bi mu. Nkɔnhyɛnyi Joseph Smith dze akyɛdze na Nyankopɔn no tum kyerɛɛ Mormon Nwoma no ase.

Ɔsor abɔfo dze asɔfodzi nsaafee no saan ananmu bae. President Russell M. Nelson yɛ nkɔnhyɛnyi tseasefo no ma asaase no nyina.

Dɛ meyɛ Jesus Christ dasefo no, minyim dɛ Ɔtse ase na Ɔno na Odzi N’Asɔr no kan. Emi na ɔwo yɛwɔ kwan dɛ yenya Sunsum Krɔnkrɔn no dɛ hɛn nyɛnko aber nyina na wosi nokwar yinom pi ber a yɛkaa na yɛdɔ Agyenkwa no, yenu hɛnho na yɛserɛ dɛ No dɔ no bɔwɔ hɛn akoma mu. Mobɔ mpaa dɛ nkyɛ hom enya dɛm nhyira no na Sunsum Krɔnkrɔn n’anyɛnkoyɛ ndɛ na hɛn abrabɔ mu da biara. Modɔ hom. Jesus Christ ne dzin krɔnkrɔn no mu, amen.