Yɛregye Jesus Christ no ho Dase wɔ Kasa na Nyɛe mu.

Enuma ber no anohoba horow a yɛbɔ mu kor nye dɛ yɛwɔ pɛ dɛ yɛdze Jesus Christ ne dzin bɔto hɛn do. Mo botae ndɛ nye dɛ yɛkaa hɛn ho dɛ yebotum akyerɛ Nyankopɔn dɛ yɛdze Ne Ba ne dzin to hɛn do ber a yɛgye dase wɔ kasa na nyɛe mu, wɔ mpɛn dodow a yebotum, dɛ Jesus nye Christ no.

No Wusoɛr ekyir a Ɔkɔsomee na Ɔkyerɛkyerɛ nkorɔfo a wɔwɔ America mantɔw no, Agyenkwa no paa mu kãa dɛ:

“Ana wɔnnkenkaan kyerɛwsɛm no, dza ɔkã dɛ hom mfa Christ ne dzin nto hom do no? Osiandɛ dzin yi na wɔdze bɛfrɛ hom wɔ da a odzi ewiei no mu.

“Na obiara a ɔbɛfa me dzin ato no do, na obetsim ekodu ewiei no, dɛm nyimpa no na wɔbɛgye no nkwa wɔ da a odzi ewiei no mu.”¹

President Russell M. Nelson akyerɛkyerɛ hɛn dɛ “yɛdze hɛn ndzeyɛɛ na nsɛnkã—repaa mu kã na yɛregye dase kyerɛ nkaafo no—dɛ Jesus nye Christ no, kã yɛrefa Agyenkwa no Ne dzin ato hɛn do no ho.’’²

Dɛ yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mba no, yɛwɔ nhyira na adom dɛ yegyina dɛ Ewuradze na Ne dzin ho adasefo wɔ beebiara a yɛwɔ no.³ Sɛ yɛper bɔ hɛn bra ma ɔnye Jesus Christ n’asɛmpa saa a, hɛn su bɛyɛ hɛn Pomfo na Ne dzin ho dase atseasefo. Bio no, yɛgye Christ ho dase wɔ nsɛnkãe mu ber a yɛnye nkaafo kyɛ dza yɛgye dzi, yɛwɔ ho atsenkã, anaa yenyim wɔ Jesus Christ ho.

Sɛ ahobrɛadze mu ara yedua hɛn nsɛnkãe na nyɛe do kyɛ Ewuradze ho dase a, Sunsum Krɔnkrɔn no si no pi⁴ kyerɛ hɔnom a wɔdze akoma pa, wobue hɔn akoma mu, na adwen da hɔ no dɛ nokwar Jesus nye Christ no.⁵

Mepɛ dɛ menye hom kyɛ asɔrmba hɔn nkenyan fasusu ebien na ɔnnkyɛree a wɔkyerɛ Nyankopɔn dɛ wɔdze Jesus Christ ne dzin to hɔn do ber a wɔkã Noho asɛm na wɔgye Ewuradze ho dase mapã wɔ Asɔr nhyiamu horow mu ho asɛm

Fasusu a odzi kan: Mber a emi na me yer, Elaine, yɛkɔɔr Spain wɔ afe 2022 mu no, yɛkɔɔr Kwesida nhyiamu horow wɔ Asɔr no no tɔw kakraba bi mu wɔ hɔ. Ber a nna metsena enyim na me yer tsena mboanofo mu no, muhun dɛ nna ɔtsena ɔbaa panyin bi nkyɛn. Sacrament nhyiamu no baa ewiei no, menantsewee kɔr Elaine nkyɛn na mibisaa no dɛ ɔnda me edzi nkyerɛ ne nyɛnko fofor no. Ɔyɛe na ɔkyerɛɛ dɛ ɔbaa yi, a ɔnnyɛ Asɔrba no, aserɛ Asɔr no bɛyɛ mfe ebien. Metsee dɛm no, mibisaa ɔbaa Nyame-suronyi no dza ɔma ɔasan n’ekyir ba hɛn nhyiamu horow no mber tsentsen a ɔtse dɛm. Akomka mu ara ɔbaa no buaa dɛ, “Mepɛ dɛ me ba ha osiandɛ hom kã Jesus Christ ho asɛm wɔ hom nhyiamu horow mu.’’

Nna ɔda edzi pefee dɛ, Asɔrmba a wɔwɔ dɛm tɔw no mu wɔ Spain no kãe, kyerɛkyerɛe, na wɔgyee Christ ho dase wɔ hɔn nhyiamu horow mu.

Fasusu a otsĩa ebien: Mosoom wɔ Brazil apaamu wiei no, menyaa dwumadzi fofor dɛ monsom wɔ Asɔr Asoɛe. Ber a yetuii kɔr Salt Lake City, wɔ afe yi mu Ayɛwoho n’ewiei no, yɛkɔɔr Kwesida nhyiamu horow wɔ hɛn ward fofor na ɔyɛ ahomka mu. Nna nhyiamu yinom mu kor yɛ akɔnkye na dasegye nhyiamu. Obu mu ara yedzii sacrament wiei no, asɔrmba soɛree kegyinae na wɔgyee dase a ɔka akoma wɔ Agyenkwa no ho nkorkor. Nna nhyiamu no tsim Jesus Christ do na nna yetum tse Sunsum no pefee. Yɛmee na hɛn gyedzi hyɛɛ dzen. Sɛ Asɔr n’anyɛnkofo, a nokwar mu ara wɔrohwehwɛ nokwar no, nna nkyɛ wɔwɔ dɛm nhyiamu hɔ a, nkyɛ wobohu dɛ iyi nye Jesus Christ N’Asɔr no.

Ebɛn nhyira na ɔyɛ dɛ hɛn Asɔr nhyiamu horow no yɛ nsanmuyi akwanhorow ma hɛn dɛ yɛgye Christ ho dase na yɛyɛ sɛnkyerɛdze ma Nyankopɔn dɛ yedzi ehurusi wɔ Ne Ba ne dzin a yɛdze to hɛn do no mu.

Afei, hom ma menkã mfatoho tum bi a yɛdze Jesus Christ ne dzin roto hɛn do na yerudua ndzeyɛe do regye No ho dase ho asɛm.

Dzifuu a oetwa mu no, mekãa Elder Jonathan S. Schmitt ho ma yɛkɔr Feather River California Temple wɔ Yuba City no mbue ano. Hɔ no ɔyɛɛ me adom ma midzii ekuwekuw enyim nye hɔn kɔr temple aprɔwbɔ. Nna hɔn mu kor ,Virgil Atkinson yɛ Asɔrba, a ɔkã kuw yinom kor ho, na n’anyɛnkofo beesuon a wɔwɔ som binom mu. Yɛrokɔ nserahwɛ n’ewiei no, wɔ temple nsɔwano dan kor mu no, sũ sii Onuabanyin Atkinson ber a ɔkyerɛɛ no dɔ ma n’anyɛnkofo a wɔbaa temple dɛm da no. Ntsɛmara a nna ɔyɛ dɛ oewie ekyir no, ɔbaa bi a ɔwɔ kuw no mu soɛree gyinae na ɔkãa dɛ, “Hɛn nyina yɛdɔ Virgil. Ɔmmfaa ne gyedzi nnhyɛɛ hɛn do dabiara da. Naaso ɔmmfɛr so wɔ ho. Dza ɔgye dzi ara na ɔdze bɔ bra.”

Mber asen no, Onuabanyin Atkinson ne Christ-su abrabɔ no asom dɛ tum dase ama n’anyɛnkofo. Ne fasusu yɛ dase dzendzen dɛ ɔdze Christ ne dzin ato no do.

Murowie no, hom ma menye hom nkyɛ adzesũa a musũae wɔ mbrɛ yebesi dze Christ ne dzin ato hɛn do na yɛagye No ho dase ber a yɛrobɔ Asɔr no ne dzin a ɔtsen ho asɛm.

President Nelson, Nyankopɔn no nkɔnhyɛnyi tseasefo, wɔ afe 2018 wiadze mfɛndzanan ehyiadzi mu asɛm a ɔtoo no dzin “Asɔr No ne Dzin a Ɔtsen,’’ kãa dɛ:“ Ɔyɛ nsiesie. Ɔyɛ Ewuradze Ne mbrasɛm. Joseph Smith annto Asɔr no a wodua no mu dze sanee bae no dzin; nna Mormon so annyɛ dɛm. Agyenkwa Ɔnoara na Ɔsee dɛ: “Na dɛm na wɔbɛfrɛ m’asɔr wɔ nda a odzi ekyir no mu, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mpo.”[Nkyerɛkyerɛ na Ahyɛmudzi 115:4].”⁶

Hɛn nyinara yefii wiadze mfɛndzanan ehyiadzi hɔ dɛm da no a yɛgyee to hɛn do na yesi enyimpi dɛ yɛbɛka nkɔnhyɛnyi no do na fi dɛm ber dze rokɔ no yɛdze Asɔr no ne dzin a oeyi akyerɛ no edzi dwuma. Mohwɛ moho yie ankasa dze hwɛ no pefee dɛ medze Asɔr no ne dzin a ɔtsen no bedzi dwuma. Mber kakra a odzi kan no, nna ɔwɔ dɛ meda moho do yie papaapa na memma moho kwan na monnkɔ akwan dadaw no ho. Mber a odzi kan ekyir no, minyaa ahomka dɛ medze Asɔr no ne dzin a woeyi akyerɛ no bedzi dwuma. Megye to mu dɛ, mber pii no, nna mobɔ Asɔr no ne dzin ntsɛntsɛm. Okehiaa me dɛ nna nkorɔfo rennkyɛn hɔn aso mma Asɔr no ne dzin mu, na nna wɔbɔdwen dɛ ɔyɛ tsentsen dodow.

Naaso, ekyir no muhun dɛ medze akoma pa rekã Asɔr no ne dzin mu no maa me akwanhorow a ɔsom bo dɛ mekã Jesus Christ ne dzin na nokwar megye Agyenkwa no ho dase ber a mepaa mu kã Ne dzin a ɔwɔ N’Asɔr ne dzin mu no. Mesanee so hun dɛ sɛ menye nkaafo kã Asɔr no ne dzin a ɔtsen a, metaa kaa Jesus Christ na metsee Ne nhyɛdo wɔ m’abrabɔ mu.

Yɛreka nkɔhyɛnyi do no, hɛn nyinara yebotum agye Jesus Christ ho dase yie ber a yɛrobɔ Asɔr no ne dzin a ɔtsen, na dɛm ntsi yɛafa Ewuradze ne dzin ato hɛn do yie mu ara.

Ahomgyeda anapa yi, megye dase enyigye mu dɛ President Nelson yɛ Nyankopɔn no nkɔnhyɛnyi tseasefo na dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo nye Christ N’Asɔr a wɔdze asan ananmu aba. Ahobrɛadze mu ara megye Nyankopɔn ne Ba na No krɔnkrɔnyɛ ho dase. Ɔno nye Nyankopɔn N’Abakan na Ne Ba Kortonoo, hɛn Agyenkwa na Pomfo, Emmanuel no.⁷ Jesus Christ ne dzin mu, amen.