Hom Nyɛ Christ Akãdofo Asomdwee mu

Yɛtse mber mu a “Christ akãdofo asomdwee mu”¹ wonya ɔhaw soronko. Hɔn a wɔgye dzi, wɔsɔr ahobrɛadze mu, na wɔgye Jesus Christ ho dase no ehyia nsɔhwɛ, ahohia, na abɛbrɛsɛ horow aber nyina.² Emi na me yer Mary, ɔnnson hɛn. Mfeda yinom yi yehun nsɔwdo skuul anyɛnkofo pii a wɔbɛn hɛn na asɛmpasomafo adamfofo na hɔn nyernom a wosom bo nye hɔn a nkyɛ yɛnye hɔn yɛ edwuma mu pii na wotwaa mu kɔree, anaa dɛ mbrɛ President Russell M. Nelson akã no, wɔkɔ kan kɔ ntwamutam n’afã noho. Yehu binom a wɔtsetsee hɔn wɔ gyedzi mu a woefi ahyɛmu anamɔn kwan no do.

Ɔyɛ yaw dɛ, yɛyew hɛn nana babanyin a oedzi mfe 23 a, owui wɔ kaar kor akwanhyia yaayaw mu. Anyɛnkofo adɔfo binom, ebusua mu mba, na adamfofo so asɔw apɔwmudzen mu ɔhaw pii.

Ber biara a nsɔhwɛ ba no, yedzi awerɛhow na yɛbɔ mbɔdzen dɛ yɛsoasoa kor biara n’adzesoadze.³ Yesi nkrum wɔ ndzɛmba worunntum nnyɛ na ndwom a woenntum atow.⁴ Ndzɛmba bɔn to nkorɔfo apapafo a wɔwɔ ɔnnkyebo akwantu yi mu. Ogyatanaa a ɔsɛɛ adze wɔ Maui a ɔwɔ Hawaii, Chile anaafo, na Canada yɛ mfatoho wɔ dza osisii a ɔyɛ hu a ɔtɔfabi nkorɔfo apapa hyia.

Yɛkenkan wɔ Bota a Ɔsom Bo Mapã mu dɛ Ewuradze yii kyerɛ Abraham esunsum hɔn onnyiewiei su. Abraham sũaa hɛn abrabɔ a ansaana nyimpa reba asaase do, husiei, wiadze Mbɔe, wɔresan mu eyi Ɔpomfo no, na abrabɔ yi a ɔyɛ nyimpa asetsena a otsia ebiasa ho nsɛm.⁵ Ɔpomfo no paa mu kãa dɛ:

“[Yɛbɛ]yɛ asaase ama iyinom aatsena do

“Na yɛbɔsɔ hɔn ahwɛ, dɛ sɛ wɔbɛyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no.”⁶

Sesei hɛn nyina yɛwɔ asetsena a otsĩa ebien wɔ hɛn mpontu akwantu dze kɔ enyimnyam ahenman dɛ ɔkã Nyankopɔn no nkwagye na nkwagye ntowdo ho nhyehyɛɛ kɛse no ho. Wɔdze hɛn pɛ ehyira hɛn na ɔnnkyebo abrabɔ mu nsɔhwɛ to hɛn. Iyi nye mber a wɔdze ama hɛn dɛ yɛmfa nsiesie hɛnho nhyia Nyame kwan.⁷ Ɔyɛ hɛn nhyira dɛ yenyim Jesus Christ ho nsɛm na N’asɛdze wɔ nhyehyɛɛ no mu. Yɛwɔ ndzinoa no dɛ yɛbɛyɛ N’Asɔr no a wɔdze asan ananmu aba—Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asɔrmba. Dɛ yɛyɛ Christ akãdofo asomdwee mu no yɛbɔ mbɔdzen dɛ yɛdze Ne mbrasɛm no bɔbɔ bra. Ɔnnyɛɛ mberɛw mmaa N’akãdofo no dabiarada. Nna ɔannyɛ mberɛw ama Agyenkwa no dɛ Ɔbɛhyɛ No honandua mu botae no mã.

Kyerɛwsɛm no da no edzi pefee dɛ: pii na wobegyaa hɔn ho ama “ dzidzi, nom, na ma w’enyi ngye, osiandɛ ɔkyena na yewu” abrabɔ.⁸ Binom so a wɔnngye nndzi tsew hɔnho hyɛ ekuw ekuw a hɔn adwen yɛ kor mu dze hwehwɛ “asɛm fofor bi”⁹ na nyimpa adwenkyerɛ.¹⁰ Wonnyim bea a wobohu nokwar no efi.¹¹

Christ akãdofo asomdwee mu wɔmmfa kwan yinom mu biara do. Yɛbɔhyew, yɛdze hɛnho hyɛ sɔn a yɛtse mu no dwumadzi mu. Yɛdɔ, yɛkyɛ, na yɛto nsa frɛ Nyankopɔn ne mba nyinara dɛ wondzi Christ nkyerɛkyerɛ no do.¹² Yedzi hɛn nkɔnhyɛnyi dɔfo President Nelson n’afotu do: yɛsan mu yi yɛbɛyɛ “siesiefo, sesei na daa.”¹³ Nkenyan kwan yi nye kyerɛwsɛm na nkɔnhyɛfo kwankyerɛ ebien nyina saa.

Afe 1829 mu no nna wɔnnkyekyeer nsananamu Asɔr no, nna Mormon Nwoma wɔmmfa mmpue guado. Nkorɔfo a woridzi aper kuw kakrabaa, a Nyankopɔn no Sunsum ekenyan hɔn, na wɔkãa Joseph Smith, Nkɔnhyɛnyi no do. Ewuradze yii kyerɛɛ Joseph afotu ma nkõdzen mber: “Mma hom nnsuro, nguambaakuw; hom nyɛ papa; ma asaase nye hɛl nyina mbɔmu ntsia hom, na sɛ hom si wɔ mo botan do a, wonnkotum edzi hom do konyim.’’¹⁴ Otuu hɔn fo so dɛ:

“Hom nhwɛ me wɔ hom adwendwen biribiara mu; mma hom nngye kyim, mma hom nnsuro.

“… “Hom ndzi nokwar, hom ndzi me mbrasɛm do, na hom benya ɔsor ahenman no edzi.”¹⁵

Ɔda edzi pefee dɛ, hɛn ɔsor nkrabea nnsesa sɛ yehu amandze wɔ abɛbrɛsɛ mu a. Hebrewfo nwoma mu no wotu hɛn fo dɛ “hom mma yɛmfa ndam mbra adom ahengua no enyim na yeenya ehumbɔbɔr na yeehu adom a ɔboa hɛn ber a ohia mu.”¹⁶ Jesus Christ nye “onnyiewiei nkwa farbaa.”¹⁷

Modɔ Mormon ne nsɛm, a ne ba Moroni sɛrɛɛ kãe, ɔkamfo “hom a hom kã Christ do asomdwee mu” … osian hom asomdwee mu nantsew a hom nye adasamba nam no ntsi.”¹⁸

Hɛn a yɛrobɔ mbɔdzen ayɛ Christ akãdofo asomdwee mu no da a ɔhyerɛn rotweɔn hɛn ber a yetsim wɔ hɛn Ewuradze na Agyenkwa, Jesus Christ do. Nsɔhwɛ kã ɔnnkyebo abrabɔ ho wɔ wiadze nyina mu na ɔba obiara n’abrabɔ mu. Aman ntamu ɔkõ akɛse na ankorankor ntamu kã ho.

Wɔtaa bisa Asɔr baanodzifo, “Dɛn ntsi na pɛrpɛr Nyame ma kwan ma ndzɛmba bɔn ba, nkaanka hɔn a wɔyɛ papa do? Dɛn ntsi na hɔn a wɔreyɛ tsenenee na wɔwɔ Ewuradze No som mu no dɛm mbusu yinom mmpar hɔn?”

Yennyim nyiano no nyina, naaso, yenyim nkyerɛkyerɛ etsitsir a ɔma hɛn kwan ma yehyia nsɔhwɛ, abɛbrɛse, na ɔhaw a yɛdze gyedzi na awerɛhyɛmu wɔ ndaamba a ɔhyerɛn a ɔrotwen hɛn mu kor biara. Fasusu mapã biara nnyi kyerɛwsɛm mu a ɔfa yerudua abɛbrɛse mu nnkyɛn asɛm a Ewuradze dze maa Joseph Smith, Nkɔnhyɛnyi no ber a ɔwɔ Liberty Efiadze no.

N’afã bi Ewuradze paa mu kãa dɛ:

“Sɛ hɛl ankasa bue n’anomu wɔ wo do a, me babanyin, hu dɛ dɛm ndzɛmba yinom nyina bɛma wo ntɔhunii, na ɔbɛyɛ wo mfaso.

“Nyimpa Ba no duaa iyinom nyina mu. Ana eyɛ kɛse sen no?

“… Mma nnsuro dza nyimpa bɛyɛ, osiandɛ Nyame nye wo wɔ hɔ afebɔɔ kesi afebɔɔ.¹⁹

Ɔda edzi pefee dɛ, yɛwɔ Egya a ɔwɔ Sor a Onyim hɛn na Ɔdɔ hɛn ankorankor na Ɔtse hɛn amandzehu ase emudzi mu. Ne Ba, Jesus Christ, nye hɛn Agyenkwa na Pomfo.

President Russell M. Nelson na President M. Russell Ballard etsĩm akã Preach My Gospel nwoma fofor a otsĩa ebien no ho mfaso ara yie!²⁰ Menye hɔn kyɛ hɔn enyigye no. Nwoma fofor yi, ɔrekyerɛkyerɛ kyerɛwsɛm mu no, kã no ndamyɛ mu dɛ:

“No werdam afɔrbɔ mu, Jesus Christ faa hɛn yaw, amandzehu, na mbrɛwyɛ too noho do. Osian iyi ntsi, Onyim a ‘Ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse’ (Alma 7:12; hwɛ nyiyimu 11 so. Ɔto nsa frɛ hɛn dɛ yɛmbra no hɔ, na sɛ yɛyɛ a, Ɔma hɛn ahomgye, enyidado, ahoɔdzen, nhumu, na ayarsa (Matthew 11:28; hwɛ nyiyimu 29–30 so).

“Sɛ yɛtwer Jesus Christ na No Werdambɔ no a, Obotum aboa hɛn ma yɛasɔw hɛn nsɔhwɛ, nyarba, na yaw. Enyigye, asomdwee na awerɛkyekye botum ahyɛ hɛn mã. Dza ɔyɛ nsisi nyina wɔ abrabɔ mu no ɔnam Jesus Christ No Werdambɔ no do obotum atsen no.’’²¹

Yebotum enyigye mu ara yɛayɛ Christ akãdofo asomdwee mu.

Hɛn Egya n’enyigye nhyehyɛɛ ma Ne mba no nnyɛ asetsena ansaana yɛreba asaase yi do na hɛn ɔnnkyebo abrabɔ yi nko na ɔkã ho mbom daakye onnyiewiei nkwa, a enyimnyam nkabɔmu kɛse a yɛnye hɔn a yɛayew hɔn no kã ho. Wɔbɛtsen dza wɔafom biara, na yebuhu emudzi mu na yeenya nhumu na ntseasee a odzi mu.

Asɔr baanodzifo dze nhumu yi ato obia a ɔanantsew aba agor nyɛɛ ebiasa ne finimfin.²² Hɔn a wonnyim Egya ne nhyehyɛɛ no nntse dza osii wɔ nyɛɛ a odzi kan no anaa hɛn asetsena ansaana yɛreba asaase do no na botae a wɔkyekyeer no hɔ, na wɔnntse nkyerɛkyerɛ mu na botae a ɔba wɔ nyɛɛ a otsĩa ebiasa a, ɔyɛ Egya ne nhyehyɛɛ ne mãhyɛ enyimnyam mu no ase.

Dodowara nntum nnhu dɛ Ne nhyehyɛɛ ɔdɔ na mãhyɛ mu no, hɔn a ɔyɛ dɛ woenya sintɔ a ɔnnyɛ hɔn mfom no, ewiei no wɔbɛgye hɔn.²³

Kyerɛwsɛm no da no edzi pefee dɛ: Christ akãdofo asomdwee mu a wɔyɛ tsenenee no, wɔkã Agyenkwa No do, na wosie Ne mbrasɛm no wobehyira hɔn. Kyerɛwsɛm kor a ohia papaapa ma hɔn a wɔyɛ tsenenee, a hɔn gyinabew wɔ abrabɔ mu mmfa ho no, kã Ɔhen Benjamin n’asɛm a ɔkãa kyerɛɛ no nkorɔfo no. Ɔbɔ anohoba dɛ hɔn a wodzi mbrasɛm no nokwar do no, wohyira hɔn wɔ wiadze ndzɛmba yi nyina mu na “[wɔgye] hɔn kɔ sor … [na] wɔnye Nyankopɔn aakɛtsena wɔ enyigye a onnyi ewiei da tsebea no mu.”²⁴

Yehu dɛ hɛn mu dodowara ehyia honandua mu na sunsum mu ehum wɔ hɛn abrabɔ mu, binom dze ɔsɛɛ kɛse ba. Egya a ɔwɔ Sor dɔfo na Ne Ba Jesus Christ, a ɔyɛ N’Asɔr no a wɔdze asan ananmu aba no ne tsir no, ama hɛn kyerɛwsɛm na nkɔnhyɛfo dze esiesie hɛn na wɔabɔ hɛn kɔkɔ wɔ esian ho, na wɔama hɛn kwankyerɛ dze ama yɛaayɛ ahoboa na wɔabɔ hɛnho ban. Nkyerɛkyerɛ binom hia ndzeyɛɛ ntsɛmara, na binom so ma hɛn bambɔ mfe pii ndaamba mu. Ewuradze ne nyienyim ma “Nkyerɛkyerɛ na Ahyɛmudzi no, Ɔfã 1 otu hɛn fo dɛ “[yen]dzi nkɔnhyɛfo no hɔn nsɛm do no.”²⁵

Ɔfã 1 so bɔ hɛn kɔkɔ, “Hom nsiesie homho, hom nsiesie homho mma dza ɔreba no.”²⁶ Ewuradze bɛma No nkorɔfo no kwan ma wɔdze ayɛ ahosiesie wɔ dza ɔreba no mu.

Ewuradze maa President Brigham Young nyikyerɛ a ɔyɛ ndam wɔ Sanda 14, 1847 mu, wɔ Winter Quarters.²⁷ Iyi yɛ nyikyerɛ fasusu yie wɔ mbrɛ Ewuradze si yɛ nkorɔfo ahoboa wɔ dza ɔbɛba ho. Nna Ahotseweefo anokwafo no ahyɛ ase rutu akɔ Salt Lake Bɔnsa ne mbepɔw guandɔbea no. Nna woesi Nauvoo Temple no ewie konyimdzi mu na wɔagye nkwagye ayɛdze krɔnkrɔn horow. Woepĩa hɔn efi Missouri, na hɔn etsiafo no epĩa hɔn efi Nauvoo wɔ awɔw ber awɔwawɔw mu. Nyikyerɛ no maa Brigham afotu wɔ mbrɛ wobesi bɛyɛ akwantu no ho ahoboa. Ewuradze maa abɔbɔfo, ekunafo, ngyanka, na hɔn a wɔrosom wɔ Mormon Nsordaafokuw hɔn ebusua ebusua hɔn nhwɛe bɛyɛɛ ehiadze kɛse, ber a Ahotseweefo kuw baatan no rokɔ kan wɔ hɔn esian akwantu no.

Dza ɔkã afotu ho a Ɔdze ama dɛ wɔmbɔ tsenenee bra no, Ewuradze tsĩi nkyerɛkyerɛ ebien mu a ɔkɔ do dzi dwuma ndɛ.

Odzi kan, Ɔhyɛɛ hɔn nkuran dɛ “hom mfa adwontow, nye ayerbɔ, nye asaw, nye ayɛyi mpaabɔ, nye ndaase nyi Ewuradze ayɛw.”²⁸

Otsĩa ebien, Ewuradze tuu hɔn fo dɛ sɛ “hom werɛ how a, hom mfa ntotɔserɛ mfrɛ Ewuradze hom Nyankopɔn, ama hom akra eedzi dɛw.”²⁹

Kɔkɔbɔ ebien yi yɛ afotu kɛse ma hɛnankasa hɛn nda yi. Abrabɔ a ayeyi, ndwom, na ndaase ahyɛ mu mã no nya nhyira soronko W’enyi regye na erotwer ɔsor mboa dua mpaabɔ mu yɛ kwan mapã edze abɛyɛ Christ akãdofo asomdwee mu. Erobɔ mbɔdzen atsew w’enyim aber nyina boa ma ekwetsir wo kra a ɔbɔm.

Ndwom yi a okenyan ne nsansanee a odzi ewie no dze nyiano no ankasa ba dɛdɛɛdɛw: “Asaase nnyi awerɛhow biara a ɔsor nnkotum apepa.”³⁰

Dɛ meyɛ Ewuradze Jesus Christ Ɔsomafo no, megye dase dɛ “Christ akãdofo asomdwee mu” wobenya ankorankor asomdwee wɔ abrabɔ yi mu na ɔsor nkabɔmu enyimnyam mu. Megye dase a otsim wɔ Agyenkwa no No krɔnkrɔnyɛ ho na No Werdambɔ no nokwar ho. Ɔyɛ hɛn Agyenkwa na hɛn Pomfo. Jesus Christ ne dzin mu, amen.