Yɛnye Christ Renantsew wɔ Ahyɛmudzi Nkitahodzi mu

Me nyɛnko pa IIan kyerɛɛ me anamɔn kwan bi wɔ Israel. Ɔkãa dɛ, “Wɔfrɛɛ no Jesus Anamɔn Kwan,’’ “osiandɛ ɔno nye anamɔn kwan fi Nazareth dze kɔ Capernaum a pii gye dzi dɛ Jesus nantseew do.’’ Meyɛɛ m’adwen hɔ na hɔnara dɛ mepɛ dɛ menantsew dɛm kwan no do, ntsi mehyɛɛ ase yɛɛ Israel akwantu ho nhyehyɛɛ.

Adapɛn esia ansaana ankwantu no, mubuu m’anankoroma. Mo kun haaw wɔ epira no ho; a nna me haw kɛse nye mbrɛ bosoom kor ekyir no mibesi bɛnantsew “Jesus Anamɔn Kwan no.’’ Mowɔ asowadzen su, ntsi menntwa wimuhɛn tsikitsi no mu.

Mekaa dɛ mehyia hɛn Israenyi kwankyerɛfo dɛm Obiradzi anapa fɛɛfɛw no. Muhurui fii hɛn no mu sii famu na motwee poma a wɔdze hyɛ ambɔtoadze na scooter a wɔdze anankroma tõ do. Mya, hɛn kwankyerɛfo, hwɛɛ me nan no na ɔkãa dɛ, “Ao, menngye nndzi dɛ ibotum anantsew kwan yi wɔ dɛm tsebea no mu.’’

Mubuaa dɛ, “Ebia munnkotum.” “Naaso biribiara nnyi hɔ a obesiw me kwan dɛ mommkɔbɔ mbɔdzen.’’ Ɔbɔɔ ne tsir adze kakra dze pen do, na yɛhyɛɛ ase. Mepɛ n’asɛm wɔ dɛm ho, dɛ ɔgyee dzii dɛ mubotum anantsew kwan a nna me nan mu ebu.

Marankasa muduaduaa anamɔn kwan kuronkuron na mbobaa akɛse no mu mber tsiabaa a obiara nnka mo ho. Nkyii, Mya hun dɛ nokwar mu ara sɛ m’epira mpo a, mepɛ dɛ menantsew wie no, ɔtwee ntampeehoma kakrabaa, dze kyekyeer me skuuta ne nsa, na ɔhyɛɛ ase dɛ ɔrotwe. Ɔtwee me foow akoko, duaa ankama efuw mu, na ɔdze faa Galilee Po n’egya no. Akwantu n’ewiei no, mekyerɛɛ me ndaase ma kwankyerɛnyi ahomkanyi no, a ɔboaa me ma mo wiee biribi a nkyɛ mara ankasa munnkotum ayɛ ewie dabiarada no.

Mber a Ewuradze frɛɛ Enoch dɛ ontu kwan nkɔ asaase ne nyina do na ɔngye No ho dase no, Enoch twentweɔnee.¹ Nna oyim dɛ ɔyɛ aberantsɛ ara, na ne kasaa yɛ nyaa. Obesi dɛn botum anantsew dɛm anamɔn kwan no wɔ ne tsebea no mu? Nna dza oebubu wɔ no mu no efura n’enyiwa. Ewuradze ne nyiano ma no wɔ dza nna osiw no kwan no yɛ tsiabaa na hɔnara: “Enye me nnantsew.’’² Tse dɛ Enoch no, otwar dɛ yɛkaa dɛ Onyia no a wopiraa no na wobubuu no maa hɛn no³ bɛma ɔnnkyebo kwan ma ɔayɛ n’edwuma wɔ hɛn mu, mbom Ɔnnse hɛn dɛ hɛn nko yenhyia dɛm nsɔhwɛ horow no.⁴ Ma hɛn asɛm no mu dur tse biara no, anaa ma hɛn anamɔn kwan no da sesei no, Ɔbɔtõ nsa afrɛ hɛn dɛ yɛnye No nnantsew.⁵

Dwen aberantsɛba no a ɔwɔ ɔhaw bea bi no a ohyiaa Ewuradze wɔ sar bea bi do no ho. Nna Jacob etu kwan tsentsenntsen efi fie. Anafua sum mu no, onyaa adaasõ bi a nna ɔnnyɛ atwer nko na ɔwɔ mu mbom nna ahyɛmudzi anohoba horow etsitsir san so wɔ mu a, dza mepɛ dɛ mefrɛ no nsa-tseaba enum anohoba ka ho.⁶ Dɛm anafua no Ewuradze begyinaa Jacob ne nkyɛn, daa Noho edzi dɛ Jacob n’egya ne Nyankopɔn, na nkyii bɔɔ anohoba dɛ:

• Menye wo nam.

• Mobɔhwɛ wo do.

• Medze wo bɛba fie bio.

• Minnkegya wo hɔ.

• Mibesie m’anohoba ama wo.⁷

Nna Jacob wɔ nsan mu yi dɛ ɔyɛ. Nna obotum asan mu eyi dɛ ɔbɔbɔ ne bra ara a n’egya ne Nyankopɔn ka ho, anaa Obotum asan mu eyi dɛ ɔbɔbɔ enyimpsi bra a ɔnye No wɔ ahyɛmudzi nkitahodzi. Mfe pii ekyir no Jacob gyee abrabɔ a ɔdze ahyɛmudzi anohoba horow no bɔe ho dase dɛ: “Nyankopɔn … gyee me do wɔ m’ahohia mu, na odzii m’ekyir wɔ kwan a mutui no mu no.’’⁸ Dɛmara dɛ Ɔyɛe maa Jacob no, Ewuradze beyi hɛn mu kor biara ano wɔ hɛn ahohia da mu sɛ yɛsa mu yi dɛ yɛdze hɛn abrabɔ bɛmontan Ne dze ho a. Ɔabɔ anohoba dɛ ɔnye hɛn bɛnantsew wɔ kwan no mu do.

Yɛfrɛ nantsew yi ahyɛmudzi anamɔn kwan no—anamɔn kwan a ɔdze enuma ahyɛmudzi hyɛ ase na ogya kɔ ahyɛmudzi horow mu yie a yɛyɛ no wɔ temple mu. Ebia itse nsɛm no na edwendwen ho dɛ ayɛ ewie. Ebia dza ihu nyinara yɛ ehiadze anamɔn kwan. Ehwɛ no yie a ɔda biribi a ɔyɛ nhyɛ edzi yie. Ahyɛmudzi nnyɛ dza ɔfa nhyehyɛɛ nko ho, a ɔwɔ mu dɛ no so hia. Ɔfa nkitahodzi ho. President Russell M. Nelson kyerɛkyerɛɛ dɛ, “Ahyɛmudzi anamɔn kwan no ne nyina nye hɛn nkitahodzi a yɛnye hɛn Nyankopɔn wɔ.’’⁹

Dwendwen awar ahyɛmudzi ho. Awar ber no hia, naaso dɛmara na nkitahodzi a ɔbɔkɔdo wɔ abrabɔ a wɔbɔbɔmu atsena no ekyir no so hia. Dɛmara yɛ nokwar ber a yɛnye Nyankopɔn wɔ ahyɛmudzi nkitahodzi no. Wɔakyekyer su, na enyidado horow bɔwɔ kwan no do. Naaso Ɔtõ nsa frɛ hɛn mu kor biara dɛ yɛmbra dɛ mbrɛ yebotum, a yɛdze akoma pa, na “yɛmper nkɔ kan’’¹⁰ a Ɔno wɔ hɛn nkyɛn, a yɛwɔ awerɛhyɛmu dɛ N’anohoba nhyira no bɛba. Kyerɛwsɛm bɔ hɛn nkaa dɛ ɔtaa dɛ anohoba no ba wɔ Ɔnoara ne mber mu na wɔ Ɔnoara no kwan mu: mfe 38,¹¹ mfe 12,¹² ntsɛmara.¹³ Dɛ mbrɛ w’anamɔn kwan bɛyɛ no, dɛmara na No mboa bɛyɛ.¹⁴

Ne dze yɛ ahobrɛadze somdwuma. Jesus Christ behyia hɛn wɔ bea a yɛwɔ dɛ mbrɛ yɛtse yi ara. Iyi nye ture no, mbeamudua no, na nda no ne siantsir. Wɔsomaa Agyenkwa no dɛ ɔmbɔboa hɛn ma yendzi konyim.¹⁵ Mbom yɛretsena beebi a yɛwɔ no remmfa ɔgye a yɛrohwehwɛ no mmba. Dɛmara dɛ Oenngyaa Jacob hɔ wɔ dɛtse no mu no, ɔnnyɛ Ewuradze ne pɛ dɛ obegya hɛn mu biara wɔ beebi a yɛwɔ no.

Ne dze yɛ ɔsorkɔ somdwuma. Ɔbɛyɛ edwuma wɔ hɛn mu¹⁶ dze epegya hɛn akɔ beebi a Ɔwɔ no na, wɔ kwan no mu no, ɔaboa hɛn ma yɛabɛyɛ dɛ mbrɛ Ɔtse no. Jesus Christ baa dɛ ɔrebepegya hɛn.¹⁷ Ɔpɛ dɛ ɔboa hɛn ma yɛbɛyɛ. Iyi nye temple no ne siantsir

Otwar dɛ yɛkaa dɛ, nnyɛ kwan no nko na ɔbɛma hɛn ntowdo, ɔyɛ nyɛnko no––hɛn Agyenkwa. Na iyi nye ahyɛmudzi nkitahodzi ne siantsir.

Mber a nna mowɔ Israel no, mokɔɔr Anee Afasu ne nserahwɛ. Jewfo no dze, iyi no nye bea krɔnkrɔn dodow wɔ Israel. Ɔyɛ hɔn temple no dza wɔaka nyinara. Hɔn mu dodow hyɛ hɔn afadze apapa no sɛ wɔrokɔ bea krɔnkrɔn yi a; hɔn afadze nsan mu yi no yɛ wɔnye hɔn Nyankopɔn nokwar nkitahodzi ho sɛnkyerɛdze. Wɔkɔ afasu no ho kɛkenkan kyerɛwsɛm, kɔ sɔr, na wokohue hɔn mpaabɔ gu ho. Hɔn totɔserɛ dɛ wobenya temple wɔ hɔn finfinim no gye hɔn da biara, hɔn mpaabɔ biara, ahyɛmudzi fie ho pɛ dzendzen yi. M’enyi gye hɔn nokwar ho.

Mber a yɛsanee fi Israel baa fie no, metsiei nkɔmbɔdzi no a ɔbɛn me no yie mu ara a ɔfa ahyɛmudzi horow ho. Muhun nkorɔfo a woribisa, dɛ Ebɛnadze ntsi na ɔwɔ dɛ menantsew ahyɛmudzi anamɔn kwan do? Ana ohia dɛ mehɛn fie a wɔyɛ ahyɛmudzi horow wɔ mu? Ebɛnadze ntsi na mehyɛ garment krɔnkrɔn no? Ana ɔwɔ dɛ medze moho hyɛ menye Ewuradze ahyɛmudzi nkitahodzi mu? Nyiano ma nsɛmbisa apapa na wohia yinom no nnyɛ dzen: Ogyina nkitahodzi mpɛnpɛndo kor a ipɛ dɛ enye Jesus Christ nya do.¹⁸ Hɛn mu kor biara wɔ dɛ yɛhwehwɛ hɛnara hɛn mbuae ma ankorankor nsɛmbisa no a wɔdɔ bun mu ara yie no.

Medze nye iyi: Menantsew anamɔn kwan yi dɛ ɔsor hɔn babaa “dɔfo,’’¹⁹ krɔnkrɔn mu ara wonyim me²⁰ na wɔ bun mu ara wɔgye me dzi.²¹ Dɛ ahyɛmu ba no, mefata dɛ megye anohoba²² nhyira. Masan mu eyi²³ dɛ menye Ewuradze bɛnantsew. Ɔafrɛ me²⁴ dɛ mingyina dɛ Christ ne dasefo. Sɛ metse nkã dɛ anamɔn kwan no rehyɛ mo do a, wɔdze adom tum no hyɛ me dzen²⁵. Aber biara a mehɛn Ne fie no, menye No nya ahyɛmudzi nkitahodzi a no mu dɔ ara yie. No Sunsum a wɔdze tseew mo ho²⁶ N’akyɛdze no wɔdze akyɛ me²⁷ na woyi me si hɔ²⁸ dɛ menkyekyer n’ahenman. Ɔnam daa daa nnuhu na miridzi sacrament no dapɛn dapɛn kwan do no, murusũa dɛ mebegyina pintsinn²⁹ na makɔdo ayɛ yie.³⁰ Menye Jesus Christ nantsew anamɔn kwan yi, a morohwɛ anohoba da no kwan ber a Ɔbɛba bio. Afei wɔbɔsɔɔw me ayɛ Ne dze³¹ oepegya me sor dɛ Nyankopɔn ne babaa krɔnkrɔn³².

Iyi nye siantsir a menantsew ahyɛmudzi anamɔn kwan no.

Iyi nye siantsir a metakyer ahyɛmudzi anohoba horow no.

Iyi nye siantsir a mehɛn N’ahyɛmudzi fie no.

Iyi nye siantsir a mehyɛ garment krɔnkrɔn no dɛ daadaa nkaadze.

Osiandɛ mepɛ dɛ mobɔ bra a menye No wɔ enyimpisi ahyɛmudzi nkitahodzi.

Ebia wo so yɛ dɛmara. Hyɛ ase wɔ beebi a ewɔ no.³³ Ma mma wo tsebea nnsiw wo kwan. Kaa dɛ, anamɔntu anaa bea a idzi wɔ anamɔn kwan no do nnhia nkyɛn wo kan nkɔree.³⁴ Bisa obi a egye no dzi a ɔwɔ ahyɛmudzi anamɔn kwan no do ma ɔmfa wo nkyerɛ Agyenkwa no a hɔn woebohu no no. Sũa No ho asɛm yie. Fa wo ho hyɛ nkitahodzi no mu ber a enye No ridzi ahyɛmu. Wo mfe anaa wo tsebea mmfa ho. Ibotum nye No anantsew.

Yɛnantseew Jesus Anamɔn Kwan wiei ekyir no, Mya ennyi ne ntampeehoma no. Ogyaa no a nna ɔkyekyer me skuuta no. Nda kakra a odzi do no, me mba mbasirmba na hɔn nyɛnko no mu kor biara nyaa kwan twuuw me faa Jerusalem stiitsi mu.³⁵ Wɔhwɛ no pefee ma mesanee kɔr me kyerɛwsɛm mu nsɛm wɔ Jesus ho no bio Wɔbɔɔ me nkaa wɔ mbasantsen a wɔreba no hɔn ahoɔdzen no ho. Yebotum esũa efi hɔn hɔ. Hom wɔ nokwar pɛ dɛ wohu ɔweɔmfo no, Jesus Christ. Hom wɔ awerɛhyɛmu wɔ ntampeehoma n’ahoɔdzen no a ɔmontan hɛn ka No no. Hom wɔ akyɛdze dɛ wɔboa binom ano kɔ No hɔ.³⁶

Ndaase mu ara, yɛbɔmu nantsew anamɔn kwan yi, a yɛhyehyɛ hɛn ho nkuran wɔ kwan no do.³⁷ Sɛ yɛnye Christ kyɛ hɛn ankorankor sũahu a, yɛbɛhyɛ hɛn ankorankor nokwardzi dzen. Megye iyi ho dase wɔ Jesus Christ ne dzin mu, amen.