Ayɛyi Nkã Nyia

Mo nuambanyin nkyerɛbaa adɔfo, ɔyɛ me enyimnyamhyɛ dɛ menye hom wɔ ha anapa yi. Mobɔ mpaa daa dɛ Ewuradze behyira me.

M’enyiwa nntse dɛ nkyɛ mbrɛ nkaano wɔtse no. Mokɔree mukohun enyiwa datser, na mekãa dɛ, “munntum nnhu teleprompter no.’’

Na ɔkãa dɛ, “Oye, w’enyiwa kɔ mpanyin mu?” Ma wɔbɛyɛ ara nye no.

Ntsi no mebɛyɛ dza mubotum ayɛ.

Mepɛ dɛ menye hom kyɛ ndzɛmba bi a wɔada m’adwen do. Abosoom kakra a woetwa mu no ɔyɛ dɛ ma Nkɔnhyɛnyi Joseph abɛda m’adwen do. Matsena ase na madwendwen n’enyimnyam asodzi ho dɛ ɔbɛyɛ mberano ne mãhyɛ yi, no nkɔnhyɛnyi.

Modwen mbrɛ hɛn enyi si sɔ dɛ yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no, dɛ Joseph Smith, banyimba a ɔpɛɛ dɛ obohu dza nna ohia dɛ ɔyɛ dze nya no bɔn ho bɔnfakyɛ no, nyaa akokodur dze kɔɔr ndua kwaa bi mu a ɔbɛn ne fie wɔ Palmyra, New York, na hɔ no obu ntwɛr wɔ mpaabɔ mu, na—wɔ ɔnoara n’asɛm a wɔakyerɛw mu no—ber a odzi kan wɔ n’abrabɔ mu a, obue n’ano bɔ mpaa no (hwɛ Joseph Smith—Abakɔsɛm ,1:14).

Dɛm mber no, ber a Joseph buu ntwɛr no wɔ dza yɛfrɛ no Kwaa Krɔnkrɔn mu no, ɔsor buei. Nyimpa-su beenu bi, a hɔn hyerɛn sen ewiaber ewia, pue no do. Kor kasaa kyerɛɛ no na Ɔkãa dɛ, “[Joseph,] Oyi nye Mo Dɔba. Tsie No!” (Joseph Smith—Abakɔsɛm 1:17) Dɛm ntsi na Jesus Christ N’Asɛmpa no ne daapem ne mãhyɛ ne Nsanananmu no hyɛɛ ase.

Osian Jesus, hɛn Agyenkwa na hɛn Pomfo, kasaa kyerɛɛ banyimba Joseph na obue mberano yi a yɛtse mu no ntsi, yɛtow, “Ayɛyi nkã nyia ɔnye Jehovah kasae!’’ (Ayeyi Nkã Nyia,’’ Asɔr Ndwom, nkanee 27) Yɛda Ewuradze ase wɔ Joseph Smith na wɔ n’akokodur a onyae ho dɛ ɔkɔr ndua kwaa no mu wɔ afe 1820, a ɔbɛn ne fie wɔ Palmyra, New York.

Madwen ndzɛmba anwanwadze nyinara ho a yenyim na ndzɛmba a yɛwɔ nyinara ho. Mo nuambanyin na nkyerɛbaa, me dasee ma hom anapa yi nye mbrɛ oesi ehyira hɛn mbordo dɛ yenyim dza yenyim nyinara osiandɛ yɛwɔ Joseph Smith ntsi, mberano a odzi ewiei yi no nkɔnhyɛnyi no.

Yɛwɔ abrabɔ no botae ho ntseasee, wɔ hɛn nyimpa ban ho.

Yenyim mbrɛ Nyankopɔn tse; yenyim mbrɛ Agyenkwa no tse, osiandɛ yɛwɔ Joseph, a ɔkɔɔr ndua kwaa mu dɛ banyimba a, ɔrohwehwɛ, no bɔn ho bɔnfakyɛ.

Modwen ho dɛ ɔyɛ ndzɛmba a ɔyɛ enyimnyam na ɔyɛ nwanwa dodow mu kor a obiara a ɔwɔ wiadze yi mu no botum ehu—dɛ Ɔsor Egya na Ewuradze Jesus Christ eyi Hɔnho akyerɛ wɔ nda a odzi ekyir yi mu na dɛ Woeyi Joseph dɛ ɔdze Jesus Christ ne daapem asɛmpa no bɛsan ananmu aba.

Yɛwɔ Mormon Nwoma no. Mormon Nwoma no yɛ akyɛdze nwanwa na ahobow ma Asɔrmba no nyina. Ɔyɛ dase kor so, ahyɛmu kor so dɛ Jesus nye Christ no. Yɛwɔ osiandɛ nna Joseph fata dɛ ɔgye mprɛtse no, ɔsor kenyaan no ma ɔnam Nyankopɔn n’akyɛdze na No tum do kyerɛɛ ase na ɔdze nwoma no maa wiadze.

Kaansa m’asɛm anapa yi da famu mpo a, no mu dɔ, na Nkɔnhyɛnyi Joseph Smith na hɔn a wɔmaa no tsipia, na wonyaa pɛ dɛ wɔbɛma no tsipia wɔ ne mbabun ber mu no, hɔn ho dɔ ahyɛ mu mã, mo nuambanyin na nkyerɛbaa.

Mepɛ dɛ me kamfo ne maame anapa yi. Maadwen ho aber nyina, mbrɛ osi yɛ nwanwa nye dɛ mber a Joseph fii Kwaa Krɔnkrɔn no mu kɔr fie, fii dɛm sũahu mu ekyir no, na ɔkãa dza osii kyerɛɛ ne maame no, Lucy Mack Smith gyee no dzii.

M’enyi sɔ n’egya na no nuambanyin na ne nkyerɛbaa na n’ebusua a, wɔmaa no tsipia wɔ asodzi kɛsenara a Ewuradze dze too no do dɛ ɔmbɛyɛ nkɔnhyɛnyi a ɔdze Jesus Christ ne daapem asɛmpa ne mãhyɛ no bɛsan ananmu aba wɔ asaase no do bio no.

Ntsi me dase anapa yi nye dɛ minyim dɛ Jesus Christ nye wiadze n’Agyenkwa na Pomfo. Menyim so dɛ hɛn Ɔsor Egya na Ewuradze Jesus Christ puei na Wɔkasaa kyerɛɛ Joseph na Wosiesiee no dɛ ɔmbɛyɛ nkɔnhyɛnyi.

Ɔyɛ me ahobow, na minyim pefee dɛ hom mu dodowara so dɛmara, wɔ mbrɛ woesi ehyira hɛn ma yenyim dza yenyim a ɔfa hɛn botae wɔ abrabɔ mu ho, siantsir a yɛwɔ ha, dza ɔwɔ dɛ yɛbɔ mbɔdzen yɛ na yewie yɛ wɔ hɛn abrabɔ mu daa daa. Yɛnam kwan no do dɛ yɛrobɔ mbɔdzen esiesie hɛnho, dakor dakor biara, dɛ yɛbɛyɛ yie kakra, yɛbɛyɛ ayamuyie yie kakra, yɛbɛyɛ ahosiesie yie kakra ama dɛm da no, a ɔbɛba ampara no, ber a yebotwa mu asan akɔ hɛn Ɔsor Egya na Ewuradze Jesus Christ hɔn enyim.

Ɔrebɛn kakra ma me. Ɔnnkɛkyɛr na medzi mfe 95. Nda binom mu no, me mba kã kyerɛ me dɛ wɔdwen dɛ m’enyi efir sen dɛm koraa, naaso ɔnnyɛ hwee. Mereyɛ dza mubotum ayɛ.

Mbom bɛyɛ mfe 50 mu no, nuambanyin na nkyerɛbaa, wɔayɛ me adom ma maakɔ wiadze nyina mu wɔ mo dwumadzi dɛ Asɔr no ne Wiadze Mfɛndzanan Tumdzifo. Wɔayɛ nhyira nwanwa. Ɔyɛ me dɛ makɔ wiadze ne beebiara. Menye Asɔrmba edzi ehyia wɔ wiadze nyina mu.

O, mbrɛ misi dɔ hom. Ebɛn enyimnyam sũahu na wɔayɛ—dɛ mobɔhwɛ hom enyim, mobɔwɔ hom nkyɛn, na maatse hom dɔ a hom wɔ ma Ewuradze na ma Jesus Christ n’asɛmpa ne Nsanananmu no.

Ɔsor Egya nweɔn hɛn sesei na Onhyira dza ɔbɔkɔ do nyinara wɔ ehyiadzi yi ase. Na yenya Ewuradze no Sunsum ma ɔnhyɛ hɛn akoma mu mã, na hɛn dɔ ma Jesus Christ n’asɛmpa—hɛn Agyenkwa dɔfo, Ewuradze Jesus Christ—no nyin ber a yɛper dɛ yɛbɔsom No na yesie Ne mbrasɛm na yɛayɛ tse dɛ Ɔno ara yie osiandɛ yɛaba wiadze mfɛndzanan ehyiadzi ase. Beebiara a hom wɔ no wiadze yi mu no, Nyankopɔn nhyira hom. Ewuradze no Sunsum nka hɛn ho. Yɛntse ɔsor tum ber a yɛbɔmu sɔr wɔ ehyiadzi nhyiamu yi mu no.

Medze me dasee na dasegye gya hom dɛ minyim dɛ Jesus nye Christ no. Ɔyɛ hɛn Agyenkwa, na hɛn Pomfo. Ɔyɛ hɛn nyɛnko mapã. Jesus Christ ne dzin krɔnkrɔn no mu, amen.