தசமபாகம்: பரலோகத்தின் பலகணிகளைத் திறத்தல்

நம்மிடம் உள்ள அனைத்தும், நாம் இருக்கும் நிலை அனைத்தும் தேவனிடமிருந்து வந்தவை. கிறிஸ்துவின் சீடர்களாக, நாம் நம்மைச் சுற்றியுள்ளவர்களுடன் மனமுவந்து பகிர்ந்து கொள்கிறோம்.

கர்த்தர் நமக்குக் கொடுக்கிற எல்லாவற்றிலும், நம்முடைய வரவில் 10 சதவிகிதத்தை பூமியில் அவருக்கும் அவருடைய ராஜ்யத்திற்கும் திரும்பக்கொடுக்கும்படி அவர் நம்மைக் கேட்டுக்கொண்டார். நம்முடைய தசமபாகங்களில் நாம் நேர்மையாக இருக்கும்போது, அவர் நமக்கு வாக்குக் கொடுத்திருக்கிறார், “வானத்தின் பலகணிகளைத் திறந்து, இடங்கொள்ளாமற்போகுமட்டும் உங்கள்மேல் ஆசீர்வாதத்தை வருஷிக்கமாட்டேனோ.”² அவர் நம்மை தீமையிலிருந்து காப்பார் என்று வாக்குறுதி அளித்துள்ளார்.³ இந்த வாக்குறுதிகள் மிகவும் நிச்சயமானவை,⁴ கர்த்தர் அறிவிக்கிறார், “அதினால் என்னைச் சோதித்துப் பாருங்கள்,”⁵ இச்சொற்றொடர் வேதத்தில் வேறு எங்கும் காணப்படவில்லை, ஆனால் மல்கியாவில் குறிப்பிடப்பட்டுள்ளது.

பரலோகத்தின் பலகணிகள் பல வழிகளில் திறக்கப்படுகின்றன. சில உலகப்பிரகாரமானவை, ஆனால் பல ஆவிக்குரியவை. சில எளிமையானவை மற்றும் கவனிக்காமல் இருப்பது சுலபம். கர்த்தருடைய நேரத்தில் நம்பிக்கை வையுங்கள்; ஆசீர்வாதங்கள் எப்போதும் வரும்.

வாழ்க்கைத் தேவைகளைப் பெற போராடுபவர்களுடன் நாம் வருத்தப்படுகிறோம். உலகெங்கிலும் உள்ள பாதிக்கப்படக்கூடிய குழந்தைகள் மற்றும் தாய்மார்களுக்கு நிவாரணம் வழங்குவதற்காக சபை சமீபத்தில் 54 மில்லியன் அமெரிக்க டாலர்களை நன்கொடையாக வழங்கியது.⁶ உங்கள் மாதாந்திர உபவாச காணிக்கைகள் மூலம், நமது நல்ல ஆயர்கள் ஒவ்வொரு வாரமும் ஆயிரக்கணக்கானோருக்கு தற்காலிகமாக தங்கள் மேசைகளில் உணவு, முதுகில் உடைகள் மற்றும் தலைக்கு மேல் தங்குமிடம் தேவைப்படுபவர்களுக்கு உதவுகிறார்கள். இவ்வுலகின் வறுமைக்கு ஒரே நிரந்தர தீர்வு இயேசு கிறிஸ்துவின் சுவிசேஷம்தான்.⁷

மனிதர்களின் ஞானம் மனிதர்களின் விஷயங்களைப் புரிந்துகொள்கிறது, ஆனால் தேவனுடைய விஷயங்களைப் புரிந்துகொள்வது கடினம் என்று அப்போஸ்தலனாகிய பவுல் எச்சரித்தான்.⁸ நமது பணத்தின் அடிப்படையில் உலகம் தசமபாகம் பற்றி பேசுகிறது, ஆனால் தசமபாகம் என்ற பரிசுத்தமான நியாயப்பிமாணம் முக்கியமாக நமது நம்பிக்கை சம்மந்தப்பட்ட விஷயம். நம்முடைய தசமபாகங்களில் நேர்மையாக இருப்பது, நம்முடைய சொந்த அக்கறை மற்றும் ஆர்வத்திற்கு மேலாக, நம் வாழ்வில் கர்த்தருக்கு முதலிடம் கொடுக்க விருப்பத்தை காட்டுவதற்கான ஒரு வழியாகும். நீங்கள் கர்த்தரை நம்பினால், பரலோகத்தின் ஆசீர்வாதங்கள் தொடர்ந்துவரும் என்று நான் உங்களுக்கு உறுதியளிக்கிறேன்.

இயேசு சொன்னார் “இராயனுடையதை இராயனுக்கும், தேவனுடையதை தேவனுக்கும் செலுத்துங்கள்.” ⁹ உயிர்த்தெழுந்த இரட்சகர் மல்கியாவில் காணப்பட்ட தம்முடைய வாக்குத்தத்தங்களை தங்கள் பதிவேட்டில் எழுதும்படி நேபியர்களிடம் கேட்டார்.¹⁰ நம் நாளில், தசமபாகம் பற்றிய தெய்வீக நியாயப்பிரமாணத்தை கர்த்தர் மீண்டும் உறுதிப்படுத்தி, அறிவித்தார்: “இது என்னுடைய ஜனங்களின் தசமபாகத்திற்கான ஆரம்பமாயிருக்கும். வருஷந்தோறும் தங்களுடைய சகல வருமானத்திலிருந்தும் பத்தில் ஒரு பாகத்தை [அவர்கள்] கொடுப்பார்களாக, என்றென்றைக்கும் இது அவர்களுக்கு ஒரு நிரந்தர நியாயப்பிரமாணமாயிருக்கும்.”¹¹

தசமபாகம் எவ்வாறு வழங்கப்பட வேண்டும் என்பதை கர்த்தர் தெளிவாகக் கூறினார், “தசமபாகங்களையெல்லாம் பண்டசாலையிலே கொண்டுவாருங்கள்;”¹² அதாவது, தசமபாகங்களை அவரது மறுஸ்தாபிதம் செய்யப்பட்ட ராஜ்யமான பிற்காலப் பரிசுத்தவான்களின் இயேசு கிறிஸ்துவின் சபைக்கு கொண்டு வாருங்கள்.¹³ இந்த பரிசுத்த தசமபாகங்களைப் பயன்படுத்துவது பிரதான தலைமை, பன்னிரு அப்போஸ்தலர் குழுமம், தலைமை ஆயர், “மற்றும் அவர்களுக்கு என்னுடைய சொந்த குரல்,” ஆகியோரைக் கொண்ட ஆலோசனைக்குழுவால் ஜெபத்துடன் பரிசீலிக்கப்படும் என்று அவர் வழிகாட்டினார். ¹⁴

இந்த பரிசுத்தமான நிதிகள் சபையின் தலைவர்களுக்கு சொந்தமானவை அல்ல. அவை கர்த்தருக்கு சொந்தமானவை. அவருடைய வேலையாட்கள் தங்களுடைய உக்கிராணத்துவத்தின் பரிசுத்தத் தன்மையை நன்கு அறிந்திருக்கிறார்கள்.

தலைவர் கார்டன் பி. ஹிங்க்லி இந்த குழந்தைப்பருவ அனுபவத்தை விவரித்தார்: “நான் சிறுவனாக இருந்தபோது என் அப்பாவிடம் ஒரு கேள்வியை எழுப்பினேன் … சபை நிதியின் செலவு பற்றி. எனது தசமபாகங்களையும் காணிக்கைகளையும் செலுத்துவது தேவன் கொடுத்த என் கடமை என்பதை அவர் எனக்கு நினைவூட்டினார். நான் அவ்வாறு செய்யும்போது, [என் அப்பா சொன்னார்] நான் கொடுப்பது இனி என்னுடையது அல்ல. நான் அதை அர்ப்பணித்த கர்த்தருக்குச் சொந்தமானது.” அவரது தந்தை மேலும் கூறினார்: “சபை அதிகாரிகள் என்ன செய்கிறார்கள் என்பதைப் பற்றி கவலைப்பட வேண்டியதில்லை, [கார்டன்]. அவர்கள் கர்த்தருக்குப் பதிலளிக்க வேண்டியவர்கள், அவர்கள் தங்களிடம் கணக்கு வைத்திருக்க வேண்டும்.”¹⁵

“கர்த்தருக்குப் பதிலளிக்க வேண்டியவர்” என்பதன் கனத்தை நாம் ஆழமாக உணர்கிறோம்.

நீங்கள் கர்த்தருக்கு அர்ப்பணித்த தாராளமான தசமபாகம் மற்றும் காணிக்கைகளில் இருந்து, கடந்த ஆண்டு ஒரு பில்லியன் அமெரிக்க டாலர்களுக்கு மேல் தேவைப்படுபவர்களை ஆசீர்வதிக்க பயன்படுத்தப்பட்டது.¹⁶

மறுஸ்தாபிதம் செய்யப்பட்ட சுவிசேஷத்தை உலகம் முழுவதும் எடுத்துச் செல்லும் நமது முக்கியமான பொறுப்பில், 71,000 ஊழியக்காரர்கள் 414 ஊழியங்களில் சேவை செய்கிறார்கள்.¹⁷ உங்களின் தசமபாகம் மற்றும் காணிக்கைகள் காரணமாக, ஊழியக்காரர்கள், அவர்களது குடும்ப நிதி நிலைமையைப் பொருட்படுத்தாமல், சேவை செய்ய முடிகிறது.

உலகம் முழுவதும் வரலாறு காணாத அளவில் ஆலயங்கள் கட்டப்பட்டு வருகின்றன. தற்போது, 177 ஆலயங்கள் செயல்பாட்டில் உள்ளன, 59 தற்போது கட்டுமானம் அல்லது புதுப்பிக்கப்பட்டு வருகின்றன, மேலும் 79 ஆலயங்கள் திட்டமிடல் மற்றும் வடிவமைப்பில் உள்ளன.¹⁸ உங்கள் தசமபாகங்கள் ஆலயத்தின் ஆசீர்வாதங்களை கர்த்தர் மட்டுமே எதிர்பார்க்கக்கூடிய இடங்களில் இருக்க அனுமதிக்கின்றன.

195 நாடுகள் மற்றும் பிராந்தியங்களில் ஆயிரக்கணக்கான கூடுமிடங்கள் மற்றும் பிற வசதிகளுடன் 30,000 க்கும் மேற்பட்ட சபைகள் உள்ளன.¹⁹ உங்களின் விசுவாசமிக்க தசமபாகத்தின் காரணமாக, நீங்கள் அறிந்திராத நீதியுள்ள பரிசுத்தவான்களிடையே, நீங்கள் ஒருபோதும் செல்லாத தொலைதூர இடங்களில் சபை நிறுவப்படுகிறது.

சபை தற்போது ஐந்து உயர் கல்வி நிறுவனங்களுக்கு நிதியுதவி செய்கிறது.²⁰ இவை 145,000க்கும் மேற்பட்ட மாணவர்களுக்கு சேவை செய்கின்றன. நமது வேதபாட வகுப்புகள் மற்றும் முதிர் வேதபாட வகுப்புகளில் ஒவ்வொரு வாரமும் ஒரு லட்சத்து பத்தாயிரம் வகுப்புகள் கற்பிக்கப்படுகின்றன.²¹

இந்த ஆசீர்வாதங்களும் இன்னும் பலவும் நேர்மையான தசமபாகம் செலுத்தும் ஒவ்வொரு பொருளாதார சூழ்நிலையிலும் உள்ள இளைஞர்கள் மற்றும் முதியவர்களிடமிருந்து பெருமளவில் வருகின்றன.

தசமபாகம் என்ற தெய்வீக நியாயப்பிரமாணத்தின் ஆவிக்குரிய வல்லமை, நன்கொடையளிக்கப்பட்ட பணத்தின் அளவைக் கொண்டு அளவிடப்படுவதில்லை, ஏனென்றால் வசதியானவர்கள் மற்றும் ஏழைகள் இருவரும் தங்கள் வருமானத்தில் 10 சதவிகிதம் பங்களிக்க கர்த்தரால் கட்டளையிடப்பட்டுள்ளனர்.²² கர்த்தர் மீது நம்பிக்கை வைப்பதால் வல்லமை கிடைக்கிறது.²³

உங்களது தாராளமான தசமபாகங்கள் மூலம் வெளிப்படுத்தப்பட்ட கர்த்தரின் கூடுதல் சபையின் சேமிப்புக்களை பலப்படுத்தியுள்ளது, நாம் இதுவரை அனுபவித்த எதையும் தாண்டி கர்த்தரின் பணியை முன்னேற்றுவதற்கான வாய்ப்புகளை வழங்குகிறது. அனைத்தும் கர்த்தரால் அறியப்படுகின்றன, காலப்போக்கில், அவருடைய பரிசுத்த நோக்கங்கள் அனைத்தும் நிறைவேறுவதைக் காண்போம்.²⁴

தசமபாகத்தின் ஆசீர்வாதங்கள் பல வழிகளில் வருகின்றன. 1998 ஆம் ஆண்டில், தொழில்நுட்பத்தில் சிறந்த கண்டுபிடிப்புகளின் சமூகமான சிலிக்கான் ஸ்லோப்ஸ் என்று அழைக்கப்படும் யூட்டா பகுதியில் ஒரு பெரிய சபை கூட்டத்திற்கு அப்போதைய மூப்பர் ஹென்றி பி. ஐரிங்குடன் சென்றேன். அது வளர்ந்து வரும் செழுமையின் காலமாக இருந்தது, மேலும் மூப்பர் ஐரிங் பரிசுத்தவான்களிடம் தங்களிடம் உள்ளதை மற்றவர்களுடன் ஒப்பிட்டுப் பார்ப்பது மற்றும் இன்னும் அதிகமாக விரும்புவது பற்றி எச்சரித்தார். அவர்கள் நேர்மையாக தசமபாகம் கொடுக்கும்போது, அதிகமான பொருள்சார் சொத்துக்களுக்கான ஆசை குறைந்துவிடும் என்ற அவருடைய வாக்குறுதியை நான் எப்போதும் நினைவில் வைத்திருப்பேன். இரண்டு ஆண்டுகளில், தொழில்நுட்ப குமிழி வெடித்தது. பலர் தங்கள் வேலைகளை இழந்தனர், மேலும் நிதிநிலை சமாளிப்பில் நிறுவனங்கள் போராடின. தலைவர் ஐரிங்கின் ஆலோசனையைப் பின்பற்றியவர்கள் ஆசீர்வதிக்கப்பட்டனர்.

அவருடைய வாக்குறுதி எனக்கு இன்னொரு அனுபவத்தை நினைவூட்டியது. நான் 1990-ல் ஊழியத்தலைவராக பணியாற்றியபோது 12 வயதான சார்லோட் ஹ்லிமியை பிரான்சின் கார்காசோன் அருகே சந்தித்தேன். ஹ்லிமி குடும்பத்தினர் எட்டு குழந்தைகளுடன் ஒரு சிறிய குடியிருப்பில் வாழும் ஒரு விசுவாசமான, எளிமையான குடும்பம். அவர்கள் சுவரில் இரட்சகர் மற்றும் தீர்க்கதரிசியின் படம் வைத்திருந்தார்கள். அவரது கோத்திர பிதா ஆசீர்வாதத்திற்கான நேர்காணலில், நான் சார்லட்டிடம் நேர்மையான தசமபாகம் கொடுக்கிறீர்களா என்று கேட்டேன். அவர் பதிலளித்தார், “ஆம், தலைவர் ஆண்டர்சன். தசமபாகம் செலுத்துவதால் கிடைக்கும் உலகப்பிரகார மற்றும் ஆவிக்குரிய ஆசீர்வாதங்கள் உள்ளன என்று என் அம்மா எனக்குக் கற்றுக் கொடுத்துள்ளார். எப்பொழுதும் தசமபாகத்தை செலுத்தினால், நமக்கு எதுவும் தேவைப்படாது என்று என் அம்மா எனக்குக் கற்றுக் கொடுத்தார். தலைவர் ஆண்டர்சன், எங்களுக்கு எதுவும் தேவையில்லை.”

படம்

ஹ்லிமி குடும்பம்.

இப்போது 45 வயதான மற்றும் ஆலயத்தில் முத்திரிக்கப்பட்டிருக்கும் சார்லோட் தனது கதையைப் பகிர்ந்து கொள்ள எனக்கு அனுமதி அளித்து இவ்வாறு கூறினார்: “தசமபாகம் பற்றிய எனது சாட்சியம் அந்த நேரத்தில் மிகவும் உண்மையானது, இப்போது அது இன்னும் வலுவாக உள்ளது. இந்த கட்டளைக்கு நான் மிகவும் நன்றியுடன் இருக்கிறேன். நான் அதன்படி வாழும்போது, நான் தொடர்ந்து தாராளமாக ஆசீர்வதிக்கப்படுகிறேன்.²⁵

ஒரு நாள், நாம் ஒவ்வொருவரும் நமது பூலோக பயணத்தை முடிப்போம். இருபத்தைந்து ஆண்டுகளுக்கு முன்பு, என் மாமியார் மார்த்தா வில்லியம்ஸ் புற்றுநோயால் இறப்பதற்கு சில நாட்களுக்கு முன்பு, அவருக்கு அஞ்சலில் ஒரு சிறிய காசோலை வந்தது. அவர் உடனே என் மனைவி கேத்தியிடம் தசமபாகம் கொடுக்க காசோலை கேட்டார். அவளது அம்மா மிகவும் பலவீனமாக இருந்ததால், அவரால் எழுத முடியவில்லை, கேத்தி அவருக்காக காசோலையை எழுத முடியுமா என்று கேட்டார். அவளுடைய அம்மா பதிலளித்தார், “இல்லை கேத்தி. நானே அதைச் செய்ய விரும்புகிறேன்.” பின்னர் அவர் அமைதியாக சொன்னார், “நான் கர்த்தருக்கு முன்பாக சரியாக இருக்க விரும்புகிறேன்.” கேத்தி தன் தாயாருக்காக செய்த கடைசி காரியங்களில் ஒன்று, அவரது தசமபாக உறையை தன் ஆயரிடம் ஒப்படைத்தது.

என் சகோதர சகோதரிகளே, பிற்காலப் பரிசுத்தவான்களின் இயேசு கிறிஸ்து சபை “இருளில் இல்லை”²⁶ பூமி முழுவதும் குறிப்பிடத்தக்க ஆசீர்வாதங்களைக் கொண்டுவருகிறது. முன்னோக்கி நம்மை உற்சாகப்படுத்துபவர்களும் உற்சாகப்படுத்தாதவர்களும் இருப்பார்கள். அப்போஸ்தலர்களான பேதுரு மற்றும் யோவானின் அற்புதங்களைக் கண்டு, எருசலேமில் உள்ள சபையை எச்சரித்த ஞானி கமாலியேலின் வார்த்தைகளை நான் நினைத்தேன்:

“இந்த மனுஷருக்கு ஒன்றுஞ்செய்யாமல் இவர்களை விட்டுவிடுங்கள், இந்த யோசனையும் இந்தக் கிரியையும் மனுஷரால் உண்டாயிருந்ததானால் அழிந்துபோம்:

“தேவனால் உண்டாயிருந்ததேயானால், அதை ஒழித்துவிட உங்களால் கூடாது; தேவனோடே போர்செய்கிறவர்களாய்க் காணப்படாதபடிக்குப் பாருங்கள்.”²⁷

நீங்களும் நானும் பூமியில் தேவனின் முக்கியமான பணியின் ஒரு பாகமாக இருக்கிறோம். அது வீணாகாது, ஆனால் இரட்சகர் திரும்பி வருவதற்கான வழியை ஆயத்தம் செய்து, உலகம் முழுவதும் நகர்ந்து கொண்டே இருக்கும். தலைவர் ரசல் எம். நெல்சனின் வார்த்தைகளுக்கு நான் சாட்சியளிக்கிறேன்: “வரும் நாட்களில், உலகம் எப்போதும் கண்டிராத இரட்சகரின் வல்லமையின் மிகப் பெரிய வெளிப்பாடுகளை நாம் காண்போம். இப்போதும் அவர் திரும்பும் நேரத்திற்கும் இடையில்… விசுவாசிகளுக்கு எண்ணற்ற சிலாக்கியங்களையும், ஆசீர்வாதங்களையும், அற்புதங்களையும் அளிப்பார்.”²⁸

இதுவே எனது சாட்சியம். இயேசுவே கிறிஸ்து. இது அவருடைய பரிசுத்தப் பணி. அவர் மீண்டும் வருவார். இயேசு கிறிஸ்துவின், நாமத்தினாலே, ஆமென்.