Ko ha Meʻaʻofa ʻo e ʻOfá

Hili e mate ʻo e pisinisi teuteu meʻakai ʻa ʻeku tangataʻeikí, ne fehangahangai hoku fāmilí mo ha palopalema fakapaʻanga lahi moʻoni. ʻOku ou manatuʻi e foki mai ʻeku fineʻeikí ki ʻapi ʻoku fakatē-loʻimata, kae ʻikai ke ne fie tala mai kiate kimautolu ʻa e meʻa kuo hokó, ʻo aʻu ai pē ki he ʻosi ʻeku ʻeke ange pe ko e hā ʻa e palopalemá. Naʻe ʻikai hano taimi kuo mau hiki ki ha kiʻi fale loki taha he ko ia pē naʻa mau lava ʻo totongí.

Ki muʻa hení, naʻe hoko maʻu pē ʻa e faʻahitaʻu Kilisimasí ko ha taimi ʻo e feimeʻatokoni lahi moʻoni, ʻo e vala foʻou, ʻo e ngaahi fakafiefia, ʻo e ʻeva ki ha ngaahi feituʻu fakaʻofoʻofa, pea mo ha ngaahi meʻaʻofa ke tufa mo maʻu mai. Naʻe talēniti ʻaki heʻemau fineʻeikí e meʻa ne mau ui ʻaki ia, ʻa ia ko e “Faʻē ʻo e Kilisimasí.” Naʻe saiʻia he foakí, pea ʻi he Kilisimasi kotoa pē naʻá ne loto vēkeveke mo vahevahe ʻofa ki he niʻihi ne nau feohí. ʻI heʻemau fakaʻau ke lalahi angé, ne hoko leva hono fakakaukauʻi ʻo e kakai kehé ʻo lahi ange heʻemau fakakaukau kiate kimautolú, ko ha ʻulungāanga ne mau feinga ke fakatupulaki.

Ka ʻi he taʻu ko ʻení, naʻe ʻikai ke mau toe ʻilo pe ko e hā ʻe faí. Naʻe hohaʻa ʻa e fineʻeikí koeʻuhí he ʻe hoko ʻeni ko homau fuofua Kilisimasi mavahe mei homau ʻapi totonú. Naʻá ne hohaʻa koeʻuhí he naʻe ʻikai ha meʻa te ne lava ʻo fakakaukau ki ai ke ne vahevahe mo e kakaí. Neongo ia, naʻa mau fakalotolahiʻi ia koeʻuhí he naʻa mau ʻiloʻi te mau lava pē, ʻi he fanga kiʻi founga pē ʻamautolu, ke fai ha faʻahinga meʻa ke vahevahe ai ʻa e laumālie ʻo e Kilisimasí.

Ka, ko e mālō pē ʻemau moʻui, pea naʻa mau toe feinga foki ke tauhi ʻa e melinó ʻi homau ʻātakaí. Naʻe ʻikai ko ha Kalisitiane ʻa e fefine naʻá ne puleʻi ʻa e falé, pea naʻá ne taʻefiemālie kiate kimautolu koeʻuhí ko ʻemau ʻā hengihengia ke lotu fakafāmili mo hiva himí. Naʻe fakaʻaaki ia heʻemau hivá koeʻuhí he naʻe hoko mai pē hono lokí ki homau lokí. Taimi lahi naʻe lāunga, ko ia ne mau feinga leva ke hiva leʻo siʻi ke ʻoua ʻe fakahohaʻasi. Ko e taimi naʻá ne ʻilo ai he ʻikai ke tuku ʻemau lotu fakafāmili he pongipongí, naʻe holo ai pē ʻene lāungá ʻo ʻosi.

Fāifai pea haʻu ha fakakaukau ki heʻeku tangataʻeikí. Naʻá ne ongoʻi ʻoku totonu ke mau hivaʻi ha ngahi hiva faka-Kilisimasi ki he fefine pule ʻo e falé, ko ʻemau meʻaʻofa Kilisimasi ia ki aí. Naʻe fiefia ʻa e taha kotoa he foʻi fakakaukaú ni—tuku kehe pē au. Naʻá ku fakafepakiʻi fefeka, mo fakamanatu ki hoku fāmilí ʻa e ngaahi lāunga naʻá ne fai ʻi heʻemau ngaahi lotu fakafāmilí. Naʻá ku fokotuʻu ange ke mau hiva ki ha taha te ne fakahoungaʻí kae ʻikai ko e fefiné ni.

Ka naʻe vili pē ʻeku tangataʻeikí, mo ne pehē ʻe ala hoko ʻeni ko ha founga ke mau fakahaaʻi ai kiate ia ko hono ngaahi kaungāmeʻa kimautolu neongo ʻoku mau kau ki ha tui fakalotu kehe. Naʻe ʻikai haʻaku toe fili ka ke kau fakataha mo e fāmilí ʻi hono fili mo ako e ngaahi hiva ke hivaʻi ki aí.

ʻI he Efiafi Kimuʻa he Kilisimasí, ne mau tukituki atu ai hono matapaá. Naʻe ʻikai ke ne fakaava ʻe ia e matapaá, pea naʻe kamata ke u ʻita mo fakamanatu ange ki heʻeku tangataʻeikí e molenoa homau iví. Ka ʻi heʻeku vakavakai takaí, naʻá ku fakatokangaʻi ʻoku malimali kotoa ʻa e kau mēmipa hoku fāmilí—naʻa nau fiefia ʻi he meʻa naʻa mau faí. Naʻá ku ongoʻi ha loto holi ke u maʻu ʻa e faʻahinga ongo tatau.

Naʻe fāifai pea fakaava mai ʻe he fefine pule ʻo e falé hono matapaá, pea hangē naʻe ʻikai ke ne fakapapauʻi ʻa e meʻa ke faí. Ne fakahā leʻo siʻi ange pē ʻe heʻeku tangataʻeikí ʻoku mau fiefia ke hiva maʻana, pea kapau ʻe sai pē, ʻoku mau fie hū atu ki hono loki nofoʻangá. Naʻe maleʻei leva ki he tafaʻakí ka mau hū atu. Naʻa mau hivaʻi ʻa e ngaahi hiva fakalotu kotoa pē naʻa mau manatuʻí—kotoa pē ʻa e ngaahi hiva ne mau akó mo ia naʻe ʻikai ke mau akó. Naʻe ʻikai hano taimi kuo ʻi ai ha ongo fakafiefia ʻi he lokí. Neongo naʻa mau ʻilo mahalo he ʻikai mahino ki ai ʻa e ʻuhinga ʻo e fakaleá, ka naʻe malimali ʻi he taimi naʻa mau hiva aí. Naʻá ne toe talamai foki kiate kimautolu naʻe taʻe-lata pea ʻi heʻene mamata ki heʻemau kātoa fakatahá naʻe fakatupu ai ʻene ʻofa ki hono fāmilí. Ki muʻa pea mau mavahé, naʻa mau talamonū ange ke ne maʻu ha Kilismasi mo ha Taʻu Foʻou fiefia. Naʻe fakamālō mai, pea mau foki leva ki homau lokí.

ʻI heʻeku feinga ke u mohe he pō ko iá, naʻá ku fakakaukau ki he meʻa ne hokó. Naʻe mahino kiate au ko e meʻaʻofa faka-Kilisimasi moʻoní ʻoku ʻikai fie maʻu ia ke fakatau mei he falekoloá pe ngaohi ʻi ʻapi; ta ko e loto mo e fakaʻamu ia ʻoku tau maʻu ke fai e meʻa te tau lavá ke fiefia ai hotau faʻahingá. Naʻá ku fakatokangaʻi ko e meʻaʻofa maʻongoʻonga taha te tau lava ke foaki he taimi Kilisimasí, ʻoku ʻikai fie maʻu ai ha paʻanga lahi ia, ka ko ha meʻaʻofa pē ʻo e ʻofá.

Naʻá ku ʻilo ʻi he pō ko iá naʻe ongoʻi ʻe hoku fāmilí ʻa e laumālie ʻo e Kilisimasí ʻi heʻenau fakahoko e kiʻi ngāue tokoní ki ha kaungāʻapi naʻe taʻelata.