“Ko Kimautolu Ngaahi Tuʻi ʻe Tolú

ʻOku pehē ʻe he ngaahi tala-tukufakaholó naʻe toko tolu ʻa e kau tangata naʻe ʻaʻahi ki he tamasiʻi ko Sīsuú, ko ha tui ne maʻu mei he foʻi moʻoni ko ia naʻe tolu ʻa e meʻaʻofa naʻe foakí: ko e koula, laipeno, pea mo e mula. Ko e fakafuofuá, naʻe ʻomi ʻe he tangata taki taha ha meʻaʻofa. Neongo ia, ʻoku tui ha kau mataotao ia, mahalo naʻe toe tokolahi ange ʻa e Kau Tangata Potó ia, mahalo ʻo aʻu ki he toko 12.¹ ʻOku fakamahinoʻi ʻe he The Bible Dictionary [Tikisinale ʻo e Tohi Tapú], koeʻuhí ko e Kau Tangata Potó ko ha kau fakamoʻoni ia ki he ʻaloʻi ʻo e Fakamoʻuí, naʻe malava pē ke ʻi ai ha toe toko ua pe toko tolu kehe (vakai, Teutalōnome 19:15; 2 Kolinitō 13:1; T&F 6:28).²

ʻOku maʻu ʻa e tui ko ia ko e Kau Tangata Potó ko ha ngaahi tuʻí, mei he ngaahi potu folofola ʻi he Fuakava Motuʻá ʻoku kikiteʻi ai ha ngaahi tuʻi te nau ʻaʻahi ki he ʻEikí. ʻOku pehē ʻe he Īsaia 49:7, “ ʻE mamata pea tuʻu hake ʻa e ngaahi tuʻí,” pea lekooti ʻe he ʻĪsaia 60:10, “ ʻE tauhi kiate koe honau ngaahi tuʻí.” (Vakai foki, Saame 72:10.)

Kuo maʻu foki ʻe he kau mataotao fakaʻatamaí ha ngaahi lekooti ʻoku pehē ai ko e Kau Tangata Potó ko ha ngaahi tuʻi. ʻOku ʻi he tohi ʻa Māko Polo he senituli 13, ha lipooti mei he kolo ko Sapá ʻi Peasia ʻo kau ki ha tuʻi ʻe tolu naʻa nau ʻave ha koula, laipeno, mo ha mula ʻi haʻanau fononga ke ʻaʻahi ki ha palōfita ne toki fāʻeleʻi. Fakatatau mo e lekooti ʻa Māko Poló, ko e hingoa ʻo e kau tangatá ko Kesipā (Gaspar), Melikoa (Melchior), mo Pelitasa (Balthasar), ʻoku meimei ke fekauʻaki ʻa e ngaahi hingoá mo e Kau Tangata Potó he ʻahó ni.³

Ko e lea Kau Tangata Potó, naʻe liliu ia mei he foʻi lea faka-Kalisi ko e magoi. Ko e tupu ʻa e foʻi lea magoi, mei he lea faka-Peasiá pea ʻoku ʻuhinga ia ki he kau taulaʻeiki ʻi he lotu fakakuonga muʻa ʻi Peasiá. ʻI hono fakaʻaongaʻi ko ʻeni ʻo e foʻi lea magoi, ʻoku fakakaukau ai ha kau mataotao fakaʻatamai ko e Kau Tangata Potó ʻoku ngalingali ko ha kau taulaʻeiki ʻi ha lotu faka-Peasia. Neongo ia, naʻe pehē ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene tohi ko e Doctrinal New Testament Commentary: [Fakamatalaʻi Fakatokāteline ʻo e Fuakava Foʻoú] “Ko e pehē ko ia ko e Kau Maki ʻo Mētia mo Peasia he kuonga muʻá ʻoku ngali ko ha kau mēmipa kinautolu ʻo ha vaʻa fakalotu ne heé, ʻoku ngali hala ia. Ka, ʻoku nau hangē ha kau palōfita moʻoni, mo ha kakai angatonu hangē ko Simione mo ʻAná, pea pehē ki he kau tauhisipi, ne fakahā ki ai ʻe he ʻOtuá kuo ʻaloʻi ʻi he faʻahinga ʻo e tangatá ʻa e Mīsaia ne talaʻofá.”⁴

Naʻe omi ʻa e Kau Tangata Potó ko ā mei he feituʻu Hahaké, ʻo hangē ko e lau ʻa e hiva Kilisimasí “We Three Kings of Orient [Ko Kimautolu Ngaahi Tuʻi ʻe Tolu ʻo e Hahaké]”?⁵. ʻE lava pē ke pehē ko hono fakaʻaongaʻi ko ia ʻe Mātiu ʻa e feituʻu anga maheni ko e “hahaké,” he naʻe ʻikai ke ʻiloʻi pau ʻe ha taha ʻa e feituʻu naʻe omi mei ai ʻa e Kau Tangata Potó.⁶

ʻOku ngāue ʻaki ʻe ha kau mataotao fakaʻatamai ʻe niʻihi ʻa e Saame 72:10 ko ha fakamoʻoni ia ko e kau tangatá naʻa nau omi mei he ngaahi feituʻu ʻo Sipeini, ʻItiopea, mo Saute ʻAlepea he ʻaho ní: “ ʻE ʻomi ʻa e ngaahi meʻaʻofá ʻe he ngaahi tuʻi ʻo Tāsisí pea mo e ngaahi motú: ʻe ʻoatu ʻa e ngaahi meʻafoaki ʻe he ngaahi tuʻi ʻo Sipa mo Sepá.” ʻOku tui ha niʻihi ia ko e Kau Tangata Potó naʻa nau omi mei Peasia (ʻa ʻIulani ʻo onopōní) pea mahalo pē ko ha kau Siu, koeʻuhí he naʻe tokolahi ha kakai hakoʻi Siu naʻe nofo ʻi he feituʻu ko iá he taimi ko iá.⁷

ʻOku hanga ʻe hono fakafōtunga fakaʻaati ʻo e ʻAloʻí ʻo fakaʻata mai e Hū ʻa e Kau Tangata Potó ki ha valevale ne toki fāʻeleʻi, ʻo hangē ai ko ʻenau ʻaʻahí naʻe fakahoko ia ʻi ha taimi nounou pē mei he ʻaloʻi ʻo e Fakamoʻuí. Ka, ʻoku fakahā ʻe he folofolá, naʻe ʻikai ke ʻi ai ʻa e Kau Tangata Potó ʻi hono ʻaloʻi ʻo Sīsū ʻi he fale tauhiʻanga ʻo e fanga manú pe ʻi ha faʻahinga taimi lolotonga ʻEne kei pēpē valevalé. Naʻe toki ʻaʻahi ki mui ʻa e Kau Tangata Potó ki he tamasiʻi ko Sīsuú mo ʻEne faʻē ko Melé. “Pea ʻi heʻenau hū ki he falé, naʻa nau mamata ki he tamsiʻí naʻe ʻi heʻene faʻē ko Melé, mo nau fakatōmapeʻe ʻo hū kiate ia: pea … nau ʻatu kiate ia ʻa e ngaahi meʻaʻofa; ko e koula, mo e laipeno, mo e mula” (Mātiu 2:11).

Ko e hā naʻe ʻomi ai ʻe he Kau Tangata Potó ha faʻahinga meʻaʻofa hāhāmolofia pehē kia Sīsuú? ʻOku tui ha kau mataotao fakaʻatamai tokolahi ko e ngaahi meʻaʻofá ko ha fakataipe. Naʻe fakataipe ʻa e koulá ki he tuʻunga fakatuʻi ʻo Sīsuú, laipenó ki Hono tuʻunga fakalangí, mo e mulá ki Heʻene faingataʻiá mo ʻEne pekiá, he ko e mulá naʻe ngāueʻaki ia ko e fakanamulelei ʻo e ngaahi sino pekiá ki honau telió.⁸

ʻI hono fakahinohino ko ia ʻe Hēlota ʻa e Kau Tangata Potó ki Pētelihemá, naʻá ne talaange kiate kinautolu, “Ka mou ka ʻilo ia, mou fakahā mai kiate au, koeʻuhí ke u ʻalu atu ʻo hū foki kiate ia” (Mātiu 2:8). Neongo ia, fakatatau mo e fakamatala ʻa Mātiú, ko e Kau Tangata Potó “naʻe valokia ʻa kinautolu ʻe he ʻOtuá ʻi he misi, ke ʻoua te nau toe ʻalu kia Hēlota,” pea, hili ʻenau ʻaʻahi ki he tamasiʻi ko Sīsuú, ne fakalaka ʻa e Kau Tangata Potó ʻia Hēlota ʻo “nau ʻalu ki honau fonuá ʻi ha hala kehe” (Mātiu 2:12). Naʻe houhau lahi ʻa Hēlota, ko e ʻikai ngata pē ʻi he ʻikai fai ʻa e Kau Tangata Potó ki heʻene tuʻutuʻuní, ka koeʻuhí he kuo ʻi ai ʻeni ha tamasiʻi ʻoku nofo ʻi Pētelihema te ne puleʻi ha ʻaho ʻa e puleʻangá.

ʻOku toe fakaongo lelei mai ʻe he The Bible Dictionary [Tikisinale ʻo e Tohi Tapú] ʻa ʻetau tui fekauʻaki mo e Kau Tangata Potó: “[Ko ha kau tangata angatonu naʻe ʻomi ʻi ha fekau ke fakamoʻoniʻi ʻa e ʻi māmani ʻa e ʻAlo ʻo e ʻOtuá … ʻOku ngalingali ko ha kau fakafofonga kinautolu ʻo ha vaʻa ʻo e kakai ʻo e ʻEikí ʻoku hangē nai mei he fakahahake ʻo Pālesitainé, ne nau omi, ʻo tataki ʻe he Laumālié, ke nau mamata ki he ʻAlo ʻo e ʻOtuá, pea nau foki ki honau kakaí ke fakamoʻoniʻi kuo ʻaloʻi moʻoni ʻa e Tuʻi ko ʻĪmanuelá ʻi he kakanó.”⁹