Ko e Hā ʻOku Hoko Mai Ai Kiate Aú?

Ko ʻeni kuó u tokoto ʻi ha mohenga ʻi ha falemahaki pea puke lahi ke toe ʻāʻā hake. Ne talamai kiate au ʻoku ou puke he kanisā totó. Ne u puke hili pē ia ha taʻu ʻe fā e mālōlō ʻa ʻeku faʻeé mei he faʻahinga kanisā tatau. Ne faitoʻo kimo (chemotherapy) au ke toʻo ʻa e kanisaá, pea naʻe pehē ʻe he kau toketaá kuo pau ke u kimo ʻi ha taʻu ʻe ua mo e konga ke fakapapauʻi kuo ʻosi kotoa ʻa e kanisaá. Ne ʻikai ke mahino pe ko e hā ʻoku hoko ai ʻeni kiate aú pea mo e ʻuhinga ʻoku hoko ai ia ʻi he taimi ní.

Ne ʻikai fuoloa kuó u ʻilo ne ʻikai ko e kanisaá pē ʻa e faingataʻa te u fehangahangai mo iá. Ko e taha ʻo e ngaahi faitoʻo ʻoku fakaʻaongaʻi ke faitoʻo ʻaki ʻa e kanisā totó ko ha faitoʻo fakatupu ivi (steroid) ʻoku fuʻu matuʻaki mālohi moʻoni. ʻOku matuʻaki lelei ia ki hono tāmateʻi ʻo e ngaahi sela (cells) kanisā totó, ka ʻoku ʻi ai ʻene kiʻi fakatuʻutāmaki pea lava ke hoko ai ʻa e avascular necrosis (ko ha faʻahinga tuʻunga ia kuo aʻu ʻo mate ʻa e hui ko ia ʻoku ofi ki he ngaahi fehokotakiʻanga huí), kae tautautefito ʻeni ki he tamaiki fefine ʻi he toʻu ʻo e taʻu hongofulu tupú. Ne pehē ʻe heʻeku kau toketaá, ne u fuʻu taʻu siʻi ke hoko ha meʻa peheni kiate au he naʻá ku kei taʻu 12 pē. Ka neongo ia, ʻi he loto pē ʻo e māhina ʻe taha ʻo ʻeku kamata e kimó, ne hanga ʻe he faitoʻo fakatupu ivi (steroids) ʻo fakaʻauha ʻa e konga lahi ʻo hoku ngaahi hokotanga huí lalahí pea mo e ngaahi kongokonga ʻo hoku hui tuʻá. Ne u moʻui mamahiʻia. Hili ha māhina ʻe fā ʻo hono ʻilo ʻeku kanisā totó, ne fakahoko e fuofua tafa ki hoku tefito alangá ke feingaʻi ke fakaleleiʻi e maumau ne fai ʻe he ngaahi faitoʻo fakatupu iví (steroids) pea ke fakasiʻisiʻi ange ʻa e mamahiʻiá. Ne ʻikai ola lelei ʻa e tafá ʻo hangē ko ia ne u ʻamanaki ki aí, ne talamai ʻe heʻeku toketā tafá mahalo he ʻikai te u toe lava au ʻo heka ʻi ha hoosi. Ne mole fakafokifā atu ʻa e ngaahi meʻa kotoa ne u palani ki he kahaʻú.

Ko ha tokotaha ako lelei au pea naʻá ku fuʻu saiʻia ʻaupito he akó. Ko ʻeni kuo ʻikai te u toe lava ʻo ʻalu ki he akó pe ʻalu holo he naʻe fakaʻauha ʻe he kimó ia ʻa hoku ivi maluʻí. Naʻe pau ke u nofo ʻi ʻapi mo e mali foʻou ʻa ʻeku tamaí (stepmother). Ne u pehē ne kovi ʻa e tuʻunga ko ʻení ka naʻe fakaʻau ʻo toe kovi ange.

Hili e māhina ʻe ono hono tafa hoku alangá, ne pau ke toe tafa tuʻo ua ia he naʻe ʻikai ola lelei e ʻuluaki tafá. Ne u heka saliote sea teketeke pē he naʻe fuʻu mamahi ʻa e taimi ne u lue aí. Ne u ʻosi fakapapauʻi he ʻikai te u toe lava ʻo heka hoosi, pea kamata ke u hohaʻa pe te u toe lava ko ā ʻo lue. Ne ʻikai ke ongo fakalata kiate au ʻa e moʻui mahamahakí, pea moʻui mamahiʻia mo pau ko ia ke ngāue ʻaki ha saliote sea teketeké.

Ne u lotu ki heʻeku tamai Hēvaní pea ʻoku ou ʻilo ne ʻi ai mo ha kakai tokolahi kehe ne nau toe lotua foki au. Lolotonga ko ia hoku ngaahi faingataʻaʻia, ne u lotu ke fakamoʻui au, ke toe moʻui hoku ngaahi hokotanga huí pea ke ʻoua naʻá ku toe fakahoko ʻa e toenga ʻo e faitoʻo kimó. Naʻá ku ongoʻi ʻoku ʻikai tali ʻa ʻeku ngaahi lotú he naʻe kei fie maʻu pē ke u ʻalu ki he Senitā Fakafaitoʻo ʻa e Fānau Palaimelí (Primary Children’s Medical Center) ʻi Sōleki Sití he uike kotoa pē ke fakahoko ha toe kimo. Ne u kei mamahiʻia pē. Pea naʻá ku kei heka saliote sea teketeke pē. Ne ʻi ai ha taimi ne kamata ke u fakakaukau ai ne vale nai ʻeku ongomātuʻá ʻi heʻena tui ki ha ʻOtua ʻoku ʻikai fakafanongo mai ki ha kiʻi taʻahine ʻoku puke.

ʻI he ngaahi taʻu kimuʻá, ne u foua ai ha meʻa tatau ʻi hono ʻahiʻahiʻi ʻo ʻeku tuí ʻi heʻeku lotu ke sai ʻa ʻeku faʻeé. Ne pau ke fakamānava kasa pea ʻikai ke ne lava ʻo lue holo ʻi fale ko ʻene ongoʻi vaivaiá. Ne u lotu peá u ʻamanaki pea toe lotu ʻe hoko ha mana ʻo fakamoʻui ai ia. Neongo ia, ne ʻikai hoko ia kiate ia. Hili ʻene mālōloó, ne u ʻiloʻi ʻe lava ke tau lotu ki he meʻa ko ia ʻoku tau fie maʻú ʻi he lahi taha te tau ala lavá ka ʻoku fie maʻu ke tau lotua ʻa e ngaahi meʻa totonu—ʻo lotu ke fakahoko ʻa e finangalo ʻo e ʻEikí—ke tali ʻa ʻetau lotú.

ʻI heʻeku manatuʻi ʻa e lēsoni ko ʻení, ne liliu ai ʻa ʻeku ngaahi lotú mei he “Fakamolemole ʻo fakamoʻui aú” ki he “Tamai Hēvaní, ʻoku ou fakaʻamu ke ʻosi ʻa e ngaahi ʻahiʻahí ni, ka te u tali Ho finangaló.” ʻI he liliu pē ko ia ʻeku ngaahi lotú, ne u ʻiloʻi kuó u kātakiʻi faingofua ange ʻa e kimó pea toe lelei ange mo hoku ʻulungāangá. Ko e kamataʻanga pē ia ʻo e ngaahi tāpuakí mo e tali ki heʻeku ngaahi lotú mo e ngaahi fehuʻí.

Ne foaki mai ʻe heʻeku tamaí mo e kui tangatá ha ngaahi tāpuaki lakanga fakataulaʻeiki lahi. ʻI he taimi kotoa ne fie maʻu ai ke fai haku tafa, ne u kolea ha tāpuaki. Ne tokoniʻi au mo hoku fāmilí ʻe he ngaahi tāpuakí ke mau maʻu ha fiemālie fekauʻaki mo e tafá. Ne ʻi ai ha taimi ʻe taha ne u mofi ai pea fie maʻu ke mau ō ki fale mahaki. Ne tāpuakiʻi ai ʻe heʻeku tamaí mo ha kaungāʻapi kimuʻa pea mau oó. ʻI heʻemau aʻu atu ko ia ki he matapā ʻo e loki fakatuʻutāmakí, ne mole e mofí pea naʻe ʻikai fie maʻu ke u nofo fale mahaki he pō ko iá. ʻOku ou ʻilo ko e mālohi ʻo e lakanga fakataulaʻeikí ko ha meʻaʻofa ia mei ha Tamai Hēvani ʻofa.

ʻOku ʻi ai ha momeniti te u manatuʻi maʻu pē, ko e ʻaho ko ia ne u foki mai ai ki ʻapi mei fale mahaki hili hono talamai ʻoku ou puke he kanisā totó. Ne ʻosi hanga ʻe he kau Finemuí mo e kau Fineʻofá ʻo fetuku ʻeku ngaʻotoʻotá mei he loki ʻi lalo falé (basement) ki ha loki ʻi ʻolunga ke u ofi ange ki heʻeku ongomātuʻá pea ʻoua naʻá ku toe ngāue ʻaki ʻa e sitepú. Ne nau ʻosi fakamaʻa pea teuteuʻi ʻa e lokí ke hoko ia ko ha feituʻu fakaʻofoʻofa ke u nofo ai lolotonga ʻeku puké. Ne fakahoko ki hoku fāmilí ha ngaahi ngāue tokoni lahi. Ne faingataʻa ke u tali ʻa e ngāue tokoní ʻi he kamataʻangá. ʻI he taimi ne fakahoko mai ai ʻe he kakaí ha ngāue tokoni kiate aú, ne u ongoʻi ʻo hangē ʻoku ʻikai te u lava ʻo fai ha ngāue maʻaku. Ka neongo ia, ne vave ʻeku ʻilo ʻoku sai pē ke te kole tokoni. ʻI heʻeku ongoʻi saí, ne kamata ke u fekumi ki ha ngaahi faingamālie ke tokoni lahi ange ai ki he niʻihi kehé. Ne u kamata ke u tokoni ʻi he lahi taha ne u ala lavá. ʻOku ou maʻu ha ongo fakafiefia ʻi heʻeku tokoniʻi ʻa e niʻihi kehé. Kuó u ʻilo ʻeni ko e taimi ʻoku ou tuku ai ke tokoniʻi au ʻe he niʻihi kehé, ʻoku ou ʻoange ha faingamālie ke nau maʻu ʻa e ngaahi ongo fakafiefia tatau.

Kuó u ako ke fakakaukau lahi ange ki he kahaʻú mo ʻeku ngaahi filí he naʻe ofi ʻaupito ke u mate. Ne u faʻa fanongo ʻi he akó ki ha lāunga ʻa ha tamaiki fefine fekauʻaki mo e “kovi e fōtunga honau ʻulú he ʻaho ko iá.” ʻI heʻeku tangutu ko ia ʻi hoku saliote sea teketeke lanu pingikií pea mo tui louʻulu loí, ne u fakakaukau, “ ʻAmusia kimoutolu ʻoku ʻi ai homou louʻulu!” Ne faʻa lāunga ʻa e tamaiki fefiné he mamahi honau vaʻé ʻi hono tui mo lue holo ʻaki e sū ʻeté. Ne u fakakaukau pē kiate au, “ ʻAmusia kimoutolu ʻoku mou lava ʻo lue.” ʻI he taimi ní, ʻoku ou feinga ke tokanga ange ki he meʻa ʻoku mahuʻingá kae ʻikai ko e fanga kiʻi meʻa iiki ne u faʻa hohaʻa ki aí.

Kuó u ako ʻi he ngaahi taʻu kuo hilí ha ngaahi meʻa lahi kehe ʻo fakafou ʻi he ngāahi tāpuaki ʻo ʻeku maʻu ʻa e kanisā totó pea mo e faingataʻaʻia koeʻuhí ko e kimó. Kuó u toe vāofi ange mo ʻeku Tamai Hēvaní. Kuo tupulaki ʻa ʻeku fakamoʻoní. Pea kuó u ako ki he meʻa ko ia ʻoku mahuʻinga moʻoní. Kuó u ako ke fakahoungaʻi ʻa e fanga kiʻi meʻa kotoa ʻoku fakahoko mai kiate au ʻe he kakaí. Ko ʻeni kuo fakaʻau ke siʻisiʻi ange ʻa e kanisaá pea haʻu māmālie pē ʻa e malava ko ia ke u ngāue ʻaki ʻa e niʻihi hoku ngaahi hokotanga huí. ʻI he fakaʻau ko ia ke u sai angé, ʻoku kei haʻu pē ʻa e ngaahi tāpuakí mo e ngaahi meʻa ko ia ke u ako mei aí.

Ko e hā leva hono ʻuhinga ʻoku hoko mai ai ia kiate aú? Ko e hā ʻoku hoko ai ia he taimi ní? ʻOku ʻikai ke u toe fai ʻe au ʻa e ngaahi fehuʻi ko iá he kuó u tupulaki fakalaumālie lolotonga hoku ngaahi faingataʻaʻiá. Kuó u ʻilo ko hai au he naʻe lahi pehē ʻa e ʻofa ʻa e ʻEikí kiate au ʻo Ne tuku ke u aʻusia ʻa e ngaahi ʻahiʻahí pea mo e ngaahi tāpuaki ʻe lava ke haʻu mo iá.