Ko Hono Akoʻi ʻo ʻEku Faiakó

ʻI ha faʻahitaʻu fakatōlau he ngaahi taʻu lahi kuo hilí, ne u hoko ai ko ha tokotaha ako mataʻitohi foʻou ʻi he ʻUnivēsiti Kolomupia ʻi Niu ʻIoke Sití. Ne akoʻi ʻe heʻemau palōfesá ʻi ha loki ako lahi ne fonu ʻi ha kau ako ha ngaahi sīpinga fakaonopooni ʻo ha ngaahi tohi fakakuonga muʻa. ʻI heʻene lau mai ko ia ha lisi ʻo ha ngaahi hiki tatau taʻefakalao (forgeries), ne u ʻohovale ʻi heʻene tānaki atu ʻa e Tohi ʻa Molomoná ki heʻene lisí.

Ne u ʻiloʻi he taimi pē ko iá he ʻikai te u lava ʻo mavahe mei he loki akó taʻe te u fai ha meʻa. He ʻikai ke tuku ke tō noa e ʻamanaki ʻa ʻeku ngaahi kuí, ʻa ia ne hanga ʻe heʻenau fakamoʻoni ki he Tohi ʻa Molomoná ʻo tataki kinautolu ke feilaulauʻi ʻa e meʻa kotoa pē.

Hili e kalasí, ne u ʻalu atu ki he palōfesá, ʻa ia naʻá ne lolotonga maʻu ʻa e tuʻunga fakafaiako māʻolunga ko ia ko e Sālesi ʻAnitoní ʻi Kolomupiá. ʻI he taʻu ʻe 100 tupu kuo hilí, ne haʻu ʻa Māteni Hālisi ke ʻaʻahi kia Palōfesa ʻAnitoni ʻi Kolomupia. Nē toʻotoʻo ʻe Māteni ha pepa ne ʻi ai e ngaahi tātongitongi ne hiki tatau mei he ngaahi lauʻi peleti ne liliu mei ai e Tohi ʻa Molomoná.

Naʻá ku manatuʻi ne fakamatalaʻi mai ʻe heʻeku tamaí ha tohi ne fai ʻe heʻene tamaí fekauʻaki mo Māteni Hālisi. Ne fakamatala ʻa ʻeku kui tangatá ki heʻene sio kia Māteni ʻi ha taimi nounou pē kimuʻa pea mālōlō ʻa Misa Hālisí. ʻI hono ʻeke ange ʻe heʻeku kuitangatá fekauʻaki mo e Tohi ʻa Molomoná, ne mālanga hake ʻa Māteni mei hono mohengá o fai ha fakamoʻoni mālohi. Naʻá ne mamata ki ha ʻāngeló, peá ne fanongo ki hono leʻó pea naʻá ne mamata ki he ngaahi lauʻi peleti koulá.

Naʻá ku pehē ange ʻi he leʻo tetetete ki heʻeku palōfesá, “Ko hoku hingoá ko Taiana, ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko ha tohi folofola ia kiate au ʻa e Tohi ʻa Molomoná. ʻOku ou fie fanongo ki hoʻo ngaahi ʻuhinga ʻokú ke ui ai ia ko ha hiki tatau taʻe fakalao.”

ʻI heʻema lue atu ʻi he loto ʻapi akó, ne hanga ʻe he palōfesá, ʻa ia naʻá ne ʻosi lau ʻa e Tohi ʻa Molomoná ʻo fakamatalaʻi mai ʻa e ngaahi meʻa ʻokú ne fakaʻikaiʻi ai ʻa ʻene moʻoní. Ne hiki fakavavevave kinautolu pea ʻi heʻene ʻosí, ne u fehuʻi ange, “ ʻE lava ke u hiki ʻa e ngaahi meʻa ko ia ʻoku ou ʻilo mei he ngaahi maʻuʻanga tokoni fekauʻaki mo e kaveingá ni ke tali ʻaki ʻa e ngaahi meʻa ʻokú ke taʻe fiemālie aí?” Naʻá ne tali ia.

Ne u lue leva ʻo foki ki falemohe, tāpuniʻi e matapā hoku lokí, tūʻulutui ʻo lotu pea kamata leva ke u tangi. Ne u ongoʻi vaivai mo taʻefeʻunga. Meʻamālié ko e efiafi ko iá ne fai ai ha ʻekitivitī faka-Siasi. Hili ha fealeaʻaki ne u fiemālie ai, ne u kole ha tokoni mei he kau faifekau taimi kakato ne ʻi aí. Naʻá na vahevahe mai ha ngaahi maʻuʻanga fakamatala naʻá ne meimei fakamatalaʻi kotoa ʻa e ngaahi poini ko ia ne ʻomi ʻe heʻeku palōfesá. Ne u fekumi leva ʻi he laipeli lahi ko ia ʻa Kolomupiá. Naʻá ku tali ʻa e ngaahi fehuʻi ʻa palōfesá ʻi heʻeku pepá peá u ʻoange mo ʻeku fakamoʻoni ki hono moʻoni ko ia ʻo e Tohi ʻa Molomoná. Ne u ʻoange leva ia kiate ia.

Naʻá ku tali ʻi ha ngaahi uike ki heʻene talí. Ne faifai peá u ʻeke ange pe kuó ne lau ia.

Naʻá ne pehē mai, “ ʻIo, pea ne u ʻoange ia ki hoku uaifí ke ne lau. Naʻá ne talamai kiate au, ‘Tatau ai pē pe ko e hā e meʻa te ke faí, ʻoua naʻá ke fakaʻauha ʻa e tui ʻa e tokotaha ako ko iá.’” Naʻá ne tafoki leva ʻo ʻalu.

ʻI he fakaofi mai ko ia ʻa e Kilisimasí, ne mālohi ʻa ʻeku ongoʻi ke foaki ki ai ha tatau ʻo e Tohi ʻa Molomoná. Ne u maʻu ha tatau peá u tānaki atu ki ai ʻa ʻeku fakamoʻoní peá u fakamālō ange ki ai ʻi heʻene lau ʻa ʻeku pepá. Ne u kofukofuʻi ʻa e tohí ʻaki ha pepa Kilisimasi pea foaki ange kiate ia. Ne taimi nounou mei ai naʻá ku maʻu ha kiʻi tohi mei ai ʻi heʻene tohinima pē ʻaʻaná ʻo ne fakahā ai ʻa ʻene fakamālō ko ʻene maʻu ha tatau ʻo e “tohi fakaofó ni.”

ʻI heʻeku lau ʻa ʻene ngaahi leá, ne u tangi. Ne fanafana mai ʻa e Laumālié he ʻikai toe toʻo hake ʻe he palōfesá ni ʻa e Tohi Molomoná ke manukiʻi. Ne u fakamālō ko e hanga ʻe he Laumālié ʻo fakamolū e ngaahi lotó pea tokoniʻi au ke u ʻiloʻi ʻa e founga ke akoʻi ʻaki ʻeku faiakó.