Ngaahi Fakakaukau Maʻá e Efiafi Fakafāmili ʻi ʻApí
ʻOku ʻoatu ʻa e ngaahi fokotuʻu fakafaiakó ni ke ʻoatu ha ngaahi fakakaukau. ʻE lava ke ke fakaʻaongaʻi ia ki ho fāmilí.
“Ko Kimautolu Ngaahi Tuʻi ʻe Tolú,” p. 12: “Ko e lahi taha ʻo e kakaí ʻoku nau ako lelei ange pea mo manatu fuoloa ange ʻi he taimi ʻokú ke fakahoko ai ha ngaahi fakakaukau ʻaki haʻo fakaʻaongaʻi ʻa e ngaahi fakatātaá, ngaahi mapé, lea fakakulupú pe ko ha ngaahi nāunau kehe fekauʻaki mo e sió.”1 Fakakaukau ke fakaʻaliʻali ha ngaahi fakatātā mei he fakamatalá ni pe ko ha ngaahi meʻa kehe ʻi hoʻo faiako mei he fakamatalá ni. Ko e fakafaivaʻí ko ha founga ia ki hono ngāue ʻaki ha niʻihi ke hoko ko ha ngaahi nāunau ki he sió.2 Fakakaukauʻi ke nau fakafaivaʻi ʻa e ʻaʻahi ko ia ʻa e Kau Potó ki he valevale ko Kalaisí ʻi hoʻo ako ko ia mo hoʻo fāmilí.
“Lotu ʻi he ʻApasia,” p. 26: ʻE meimei ka mahino ange ki he kau mēmipa ʻo e fāmilí ia mo nau fakaʻaongaʻi e ngaahi tokāteline ʻo e ongoongoleleí, ʻi he taimi ʻoku foaki ange ai kiate kinautolu ha ngaahi faingamālie ke nau akoʻi e ngaahi tokāteline ko iá ki he niʻihi kehé.3 Fakakaukau ke akoʻi ʻe ha kau mēmipa ʻo e fāmilí ʻa e tefitoʻi moʻoni taki taha mei he fakamatalá. Hanga ʻo vahevahe ʻa e fakamatalá ki ha konga ʻe tolu ʻi ha ngaahi ʻaho siʻi kimuʻa pea fakahoko ʻa e efiafi fakafāmili ʻi ʻapí pea fakaafeʻi ha mēmipa ʻe toko tolu ʻo e fāmilí ke nau vahevahe he lolotonga e efiafi fakafāmilí ʻa e meʻa ne nau ako mei heʻenau kongá.
“Ko e Tāpuaki ʻo e Ngāué,” p. 36: ʻE lava ʻe he ngaahi talanoá ʻo fakaake ʻa e tokanga ʻa e tokotaha akó pea ʻoku faʻa hoko ia ko ha founga fakafaiako ola lelei.4 Ke fakatataaʻi ʻa e tokāteline ʻo e ngāué ʻa ia ne akoʻi ʻe Pīsope H. Tēvita Peatoní, fakakaukau ke vahevahe mei he fakamatalá ni ʻa e meʻa ne hoko tonu kia Palesiteni Tōmasi S. Monisoni, Henelī B. ʻAealingi mo Tieta F. ʻUkitofá. ʻE lava ke fakaʻosi ʻaki hoʻo kalasí haʻo fakaafeʻi ʻa e kau mēmipa ʻo e fāmilí ke nau vahevahe ha talanoa fekauʻaki mo e ngāué ʻa ia kuó ne faitāpuekina ʻa ʻenau moʻuí.