Kilisimasí ʻi he Funga ʻo e Māmaní

ʻOku fakamanatu ʻe he fānau ʻi he funga māmaní ʻa e Kilisimasí ʻi ha ngaahi founga kehekehe. ʻOku fakamatalaʻi atu ʻe he tohi māhiná ni ha niʻihi ʻo kinautolu. Kosi ʻa e ngaahi fakatātā ko ia ʻi he peesi K16. Fakapipiki ʻa e tohi māhiná ni ʻi homou ʻapí. Kamata ʻi he ʻaho 1 ʻo Tīsemá, kumi ʻa e fakatātā ko ia ʻokú ne fakamatalaʻi ʻa e ngaahi lea ʻo e ʻaho ko iá. Fakapipiki leva ʻa e fakatātaá ʻi he tapafā ʻo e ʻaho ko iá.

ʻI Siapaní, ʻoku saiʻia ʻa e fānaú ke kai ʻa e keke faka-Kilisimasí ʻaki ʻa e situloapeulí mo e kilimí.

ʻI Finilaní, ʻoku ʻaʻahi ʻa e ngaahi fāmilí ki he ngaahi faʻitoká ʻi he efiafi kimuʻa he Kilisimasí pea nau fokotuʻu ha ngaahi teʻelango ʻi he faʻitoka honau ngaahi ʻofaʻangá.

ʻI ʻInitiá, ʻoku fokotuʻu ʻe he kakaí ha ngaahi maama ʻumea iiki ʻi ʻolunga he ʻato honau falé ke fakahā ko Sīsū ʻa e Maama ʻo Māmaní.

ʻI ʻAilaní, ʻoku fokotuʻu ʻe he ngaahi fāmilí ha ngaahi teʻelango ʻi he ngaahi matapā sioʻata honau ʻapí ke fakahā ne nau mei talitali lelei pē ʻe nautolu ʻa Mele mo Siosefa.

ʻOku tuku ʻe he fānau Siamané ʻa honau suú pe putí ʻi he veʻe tofunangá pe ʻi tuʻa ʻi he veʻe matapā ʻi muʻa honau falé. ʻI he pongipongi hokó, kuo fakafonu ʻa e ngaahi suú ʻaki ha ngahi lole.

ʻI ʻAositelēliá, ʻoku tokolahi ha kakai ʻoku nau ʻalu ki he matātahí pea nau hivaʻi ha ngaahi hiva Kilisimasi.

ʻOku hanga ʻe he ngaahi fāmili ʻi ʻAsenitiná ʻo tutu ʻi he Efiafi Kimuʻa he Kilisimasí ha ngaahi pula pepa ʻoku fuo hangē ha taiamoní pea ʻoku nau ui ia ko e globos pea nau tukuange ia ʻi he fakapoʻulí ki he langí.

ʻI Venesuelá, ʻoku sikeiti pongipongia ʻa e fānaú ʻi he ngaahi halá ʻi he pongipongi Kilisimasí.

ʻI ʻAmeliká, ʻoku teuteuʻi ʻe he kakaí ha ngaahi ʻakau ʻoku lanu mata he taʻu kotoa ʻaki ha fanga kiʻi maama, meʻa ngingila mo ha ngaahi meʻa teuteu.

ʻOku teuteuʻi ʻe he ngaahi fāmili ʻi Filipainí ʻaki ha ngaahi parols, ʻa ia ko ha ngaahi meʻa ʻoku fuo hangē ha fetuʻú ʻoku ngaohi ʻaki e kofé mo e pepa pea ʻoku fakamaama ʻaki ia ha fanga kiʻi maama iiki.

ʻI Laipīliá, ʻoku tangutu fuopotopoto ʻa e ngaahi fāmili ʻi Laipīliá ʻo kai ʻa ʻenau houa kai efiafí ʻi tuʻa. ʻOku kau ʻi he meʻatokoni fakafonua faka-Kilisimasi ʻa Laipīliá ʻa e pisikete, laise mo e pulu.

ʻI Pulukāliá, ʻoku tuʻu fakataha ʻa e kakai kotoa ʻi he tēpilé ʻi he taimi ʻoku ʻosi ai ʻa e maʻumeʻatokoni efiafí.

ʻI he ʻaho Kilisimasi ʻi Suētení, ʻoku tui ʻe he ʻofefine lahi tahá ha kofu hina ʻoku ʻi ai hano āfei lanu kulokula peá ne ʻave ʻa e meʻakai pongipongi ʻa e ongomātuʻá kiate kinaua ʻi heʻena kei ʻi mohengá.

ʻI Hōlaní, ʻoku fakafiefia ʻa e ngaahi fāmilí he Efiafi Kimuʻa he Kilisimasí ʻaki haʻanau inu koko mafana mo kai banketletter, ko ha keke ʻoku hangē ko e mataʻitohi ʻuluaki ʻo e hingoa fakaiku ʻo e fāmilí.

ʻI Noaué, ʻoku kai kasitati laise ʻa e fānaú. ʻOku maʻu ʻe he tokotaha ko ia ʻo e fānaú te ne maʻu ʻa e nati kuo fūfuuʻí ha lole puka pe ko ha konga sokoleti.

ʻOku kosi ʻe he ngaahi fāmili ʻi Mekisikoú ha ngaahi sīpinga ʻi ha fanga kiʻi tangai pepa ke ngaohiʻaki ha fanga kiʻi maama pe farolitos. ʻOku fokotuʻu leva ha ngaahi teʻelango ʻi he loto farolitos, pea fokotuʻutuʻu ia ʻi he ngaahi ʻaluʻangá, matapā sioʻatá pe funga falé.

ʻOku foaki ange ki he fānau ʻi Sipeiní ha ngaahi meʻavaʻinga, lole pe ko ha ngaahi meʻalea iiki ʻi heʻenau ʻalu mei heʻapi ki he ʻapi ʻo lau ha ngaahi veesi pe hiva Kilisimasí.

ʻI he uike ʻe taha kimuʻa he Kilisimasí, ʻoku tui ʻe he fānau ʻĪtalí ha teunga faka-tauhisipi pea nau ʻalu mei he ʻapi ki he ʻapi ʻo hiva ha ngaahi hiva mo lau ha ngaahi maau.

ʻOku foaki ange ʻi he kai efiafí ki he fānau ʻi ʻIngilaní ha kiʻi tiupi ʻoku kofu ʻaki ha pepa, ʻa ia ʻoku ui ko e ʻone Kilisimasi. ʻOku pā leʻolahi ʻa e foʻi tiupí ʻi he taimi ʻoku fusiʻi aí. ʻOku ʻi loto ha kiʻi tatā pepa, kiʻi maau pe ko ha kiʻi meʻavaʻinga siʻisiʻi.

ʻI Nuʻu Silá, ʻoku lahi ha ngaahi kolo ʻoku nau fakahoko ha ngaahi fakafiefia ʻi he ngaahi paʻaké. ʻOku fanongo ai ʻa e kakaí ki ha kau hiva ongoongoa ʻoku nau hivaʻi ha ngaahi hiva Kilisimasi.

ʻOku ʻā pongipongia ʻa e ngaahi fāmili ʻi Tongá ke ngaohi pea tufaki ha kai pongipongi ki honau kaungāʻapí. ʻOku loto vēkeveke ʻa e fānaú ke nau ʻave ʻa e ngaahi meʻatokoni pongipongi ko ʻení mo vakai pe ko e hā ʻe ʻomi ʻe he kaungāʻapí.

ʻI Palakuaí, ʻoku teuteuʻi ʻe he kakaí honau ʻapí ʻaki ʻa e fisiʻiniú.

ʻI Lepanoní, ʻoku tō ʻa e pīsí, uité, pīní mo e lenitolí ʻi ha uike ʻe ua kimuʻa he Kilisimasí. ʻOku ngāue ʻaki ʻa honau fisí ke ʻātakaiʻi ʻaki ʻa e fakatātā ko ia ʻo e ʻaloʻí ʻi honau ʻapí.

ʻI Kaná, ʻoku ʻā e ngaahi fāmilí ʻo vaʻinga. Kimuʻa siʻi pē pea hoko ʻa e tuʻuapoó, ʻoku nau lau leva ʻa e ngaahi sekoni pea aʻu ki he ʻaho Kilisimasí.

Neongo ʻoku tau fakafiefiaʻi ia ʻi ha ngaahi founga kehekehe, ʻoku ʻomi ʻe he Kilisimasí ha faingamālie ke tau fakamanatu ai ʻa hono ʻaloʻi ʻo Sīsū Kalaisí.