Naʻá ku fiefia ke mamata ki ha kau talavou mo ha kau finemui ʻi muʻa he Fakataha Lomá (Roman Forum) ʻi he peesi 32 ʻo e Liahona ʻo Sepitema 2008. Naʻá ku ngāue fakafaifekau ʻi ʻĪtali he 1971. Lolotonga ʻeku ngāue fakafaifekau ʻi Lomá, naʻá ku akoʻi ai mo hoku hoá ha ongo tamaiki fakaʻofoʻofa moʻoni ko ʻAlapeto (Alberti) mo Masimo (Massiomo) Ti Feo, ʻo na papitaiso ki mui ai. Fakakaukau ki he fiefia naʻá ku maʻu ʻi heʻeku mamata ʻi he fakamatala ko ʻeni kia Tenisi Ti Feo (Denise De Feo) ko e ʻofefine ia ʻo Masimo, kuo hoko he taimí ni ko e palesiteni ʻo e Siteiki Loma ʻĪtalí. Naʻá ku toe ʻilo ai foki kuo hoko ʻa ʻAlapeto ko ha palesiteni fakakolo ʻi Kānata. ʻOku ou fakafetaʻi ki he ʻEikí ʻi he meʻa ne hoko heʻeku ngāue fakafaifekaú mo ʻeku lava ke mamata ki he fua ʻo ʻEne ongoongoleleí.

ʻI he lolotonga ʻo e ngaahi taimi mamahí, ʻoku ou faʻa tafoki ki he Liahoná ke u lau ai e ngaahi pōpoaki mei he palōfitá mo e kau ʻaposetoló. ʻOku ʻomi ʻe heʻenau ngaahi leá ha fiefia ki hoku laumālié. Fakamālō atu ʻi he makasiní ni! ʻOkú ne tokoniʻi au ke u ongoʻi ʻa e ʻofa ʻa ʻeku Tamai Hēvaní mo hoku Huhuʻi ko Sīsū Kalaisí.