Ti Kanga n Reiakina taekan te Kukurei

I aki toki n iangoia bwa e korakora ara utu. Ara ataeinimwaane ake teniman ao ara ataeinnanie ake uoman bon ataei aika ongotaeka, ao iai ara kangaanga aika ti tataneiai ma ngaia. N tabetai ngkana aki ongotaeka, ao n na bon un. Imwiina ao I a manga iango bon irou, “Bukin tera ko rangin ni un nakoia?”

I aki ataia ae te perestroika—tain bitakin te tautaeka ao kaubwain te aba—e a moanna n reke iaon Russia. I aki ataia ae ana bane n akea bwain titoa iaon n nen kaako n titoa ni kabane, bwa ti na aki karekei boora inanon namwakaina ao ririki ake imwiina. E moanna ni kangaanga te maiu. Ti aki toki ni kakauntaeka, ao ngai ma kaain abau ti a bon kukuri naba n raure. E a rikirake tangirakin kabonganaan te turaki, ao temanna mairouia natira mwaane e irekereke naba iai. E tara n ae e akea te kaantaninga ke te raoiroi inanon maiura. I a aki ataia bwa antai ae n na tataro nakoina, ma I teimatoa ni bubutia te Atua ibukin buokau. Ti un ma korakorara ni kabane, ma ti tokanikai iaon ara kangaanga aei teutana imwiin teutana.

N tain te kabuebue n te 1998, ao a kuneira mitinare. E bitaki aron maiura ni kabane ngkai ti kataia ni mwananga n te kawai ae boou. Inanon nimaua te ririki ti a tia n nakon te tembora ao man tia ni kabaeaki ma ara utu ibukin te maiu are akea tokina.

Ngke e mwakuri ni mitinare ae bwanin taina natira te mwaane n te Czech Republic, e aki toki n taekinna n ana reta, “Teimatoa ni korakora ao n onimaki. Ngaira ni kabane bon te utu ae te kabanea ni kukurei.” Raoraou naba a tuangai bwa ngai te kabanea ni kukurei n aine n te aonaaba ni karekeia natiu ao tibu aika rangin ni mwaiti ao ataia bwa e na bon aki reke irou te maroa.

N tanrikaaki nakon te tai anne, ao I kakoaua bwa n aroia aomata ake a ongo iroun te Uea Beniamina, e a tia ara utu n namakina te bitaki ae korakora inanora, man riki bwa natin Kristo (tara Motiaea 5:7). Bon te bitaki ae korakora nakoiu. Imwain rikiu bwa te aomata ae Itiaki Ni Boong Aika Kaitira, ngke iangoa taekan te mate, e taona nanou ao tamneiu te nanokawaki ae korakora. I karekei korakorau ni kabane bwa iaonga ni kanakoi iango aikanne mairou. Ngkai I a karekea te rau n tamneiu.

I a tia n reiakinna bwa te kukurei e roko n aroia aika kakaokoro. E kona n reke inanon te kabanea n roo n nangin te baa ke ngkana e rootaki te aonaaba n te kabuebue. E mena naba inanon otan taai ae kabuebue inuukan tain bwakan te karau. E mena inanon moan ni baan te kai ae kiriin. E mena inanon baan te ue ae uarereke mani mainaina ni iangoa otinakona man mwangaan te kai te aboro. E mena n rotongitongin te bong ikarawa ma ngaa itoi aika ruberube. Bon te mata n nanoanga iroun temanna ae tangiraki. E taratara nako ribuakon raneanean maata n tamneia kaain te utu.

E roko irou naba te kukurei ngkana I karaoa te bwai ae raoioroi ibukin temanna riki. E kauringa tamneiu ma te mwakaro ae uarereke ngkana I tataro nakon Tamara are i Karawa. N tabetai, ngkana iangoia bwa n na tangira riki te bwai ae mwaiti riki, I uringa bwa I kainnanoia n reiakina bonganan bwaai aika irou—ae anganai ni kabane te Uea.