Buokaki n te Tamnei

Te tia mwakuri n te kateitei e wene n te tabo are e bwaka iai, e rengerenge ni baeranti iaon te kai ae ruaiwa te inti (23 cm) rababana ao 100 te buuti (30 m) n te eea. Teuaei e bwakaraki n te kaibiti are e rebwe iai man kaikoaka baina ma rangana are te angamaing.

Ngkai ngaia te taokita are e mwakuri ma te Yorkshire Air Ambulance, n tararuaa te aono are i meangin England, I aki kona n ataia bwa tera te tareboon ibukin te kabuanibwai are e na manga roko ke tera te bwai ae e na karaoia ngkana e a kaitaraa n te tabo are e mena iai.

N te bwai ae e riki aei, te aomata are e ikoaki e aki kona ni mwaing ni karekea maiuna ni karokoa a karaoaki ikoakina. I a tabekaki rake iaon te kurain n nen te kaako ae te biti rabwatana. Ngke I a roko irarikin te ikoaki, te tia kateitei e tauai mai akuu n au tiaekiti, kaanga ai aron ana mwakuri te kurain bwa I aonga ni kona n noora te ikoaki.

N aekan te bwai ae riki aei, e ririki au tai ni kataneiai I aonga ni kona n tuooa raoi te aomata ae ikoaki aei, Iaon bubuan waena ao e a kaman tia ni bwainnaorakiaki iroun temanna are e tabe ma te moan ibuobuoki n te tabo ni kateitei. Te bwai ae e tataneiai ni karaoaki, N na bon riai moa ngai ni karaoa te ukeuke bwa baikara aika a uruaki ngkai bon anne te bwai ae ti a tia ni kataneiaaki bwa tina irii.

Ma ngke I a kataia n roko iai ao e wiiririki te Tamnei nakoiu: “Tai kanakoa te rabuna anne.” Ngaia are I aki riinga. Teniua te bwai ae riki n te tai anne, I a kaungaaki irouia tabeman ake a ibuobuoki—te moan tia kaeka, bon raou ni mwakuri are iaon tano, ao te taokita—are e na tuoa te ikoaki iaon bubuan ni wae, ao te kateniua riki n tai, ana wiirikiriki te Tamnei bwa n na aki riinga te rabuna. Ngke ea rau raoi te aomata are e ikoaki ao tia tabekia nako aon te nnen te kaako are te kairababa n tei, ao tia uaia ni karuoaki nako aontano, ao ni katokaaki nakon te onaoraki ma teuaei.

N te tabo are e bubutimwai kabuanibwai aika a karina, a tei kaain te tiim n taningaira. Temanna te taokita e waekoa ni kouta rabunan te ikoaki iaon bubuan waen te ikoaki. N te tai ae e waekoa ao ea uki matan te ikoaki n te ia, ao ea tiinako te rara n aki akaka. Inanon te enuwaromenta are a tauaki mwiin bwai iai, te bwai ae kakamaaku aei ea waekoa ni katokaki. Ngke arona bwa e riki aei iaon te kairababa n tei 100 te buuti rietana, te aomata are e ikoaki e na bon aki kona ni maiu.

Ni katoa ingabong I tataro ao ni butiia Tamau are i Karawa bwa e na buokai, bwa e na kakabwaiaai bwa nna kaungaaki n namakina te atatai bwa nna buokiia tariu ao mwaaneu are a kaainnano n te bong aei. Te bwai are I kaitibo ma ngaia n ririki aika a bwakanako, ea tia n reireinai bwa te namakin ke te wiirikiriki are e anganai te Tamnei, te ongotaeka. Bwa te ongotaeka ea tia naba ni katanai.

Te katoto, teuana mai ibuakon nakoau bon te tia borau, ni kaira te bairati n te erikabuta nakon taabo ake a riki bwaai iai. Te erikabuta ibukin kabuanibwai e kona n kiba n taabo nako, n te aro are e bon rangi ni kakawaki bwa ana roko n te tabo are e riki te kabuanibwai iai n te tai ae waekoa, ma e bon karekea naba te ananga ni kabuanibwai nakon maiuiia kaain te erikabuta. Ngke tia kiba n te raroa ae e riaon 140 te maaire (225 km) n te aoa, uaea ibukin te iti ma te tareboon a bon kona n aki nooraki. Ao a kona ni korouaa rabwatan te erikabuta n te tai ae waekoa.

N te mwananga teuana tia ruo rikaaki nakon te aba nakon te tabo ae rangi n aobuaka. N te tai ae e waekoa e tuangai te Tamnei, “Katuka te kiribiboote inano!” Ea manga oki riki n te tai ae e waekoa, I namakinna, “Katuka te kiribiboote inano!” Ngaia are I a rara nako mooa ni katuka au kiribiboote iaon nnena irarikin bubuan waeu. Ao ngke I karaoa nne, e a itiaki au taratara, O I a noora uaean te iti are e mena iaara. “Te uaea! Te uaea! Te Uaea inano!” ai bon tii anne ae I kona n taekinna. Ao e ngae ngke tia bon roko n te uaea ao ni kona n rebwetaua, te bwairati e waekoa ni kaeka ao ea tabekiira rake ni kamaiura. Bon anne te kabanea ni kaan nakon te kabanibwai ae I a tia ni kaitibo ma ngaia. N akea ana ibuobuoki te Tamnei, te kabuanibwai anne e na bon rangi ni kaanganga aron katokana.

I bon rangi ni kukurei n ana kawai n tangira Tamara are i Karawa are e bon atai kainnanora ni bwaai nako. Te Uea e teimatoa n tararuaira. E tangirira bwa tina katanaki n te maiu n tamnei ao n okira mweengana, ngaia are E teimatoa n taetae nakoira n te bwana ae uarereke ni bwanaan te Tamnei. Te bwai ae ti riai ni karaoia bon te ongora ao te ongotaeka.