Kaitaraan te Kanganga ma te Ninikoria
Koa tia n raraoma n abakin am beku? Iangoia bwa e kanga Iotua n namakinna bwa ngaia are e na reita ana mwakuri te burabeti Moote. Te mwakuri ae rangi n rawawata kairakin te bootanaomata ae Iteraera rinanon te aba ni berita e wene iroun Iotua. Uringnga bwa te aba ni berita e kaainaki irouia te bootanaomata ae Kanaan, a mwaiti aika a mamaaku ao taan buaka. Ko kona n iangoia bwa Iotua n ana namakin ao n ana konaa ni kabanea te mwakuri ae kakamaaku, ao e na bon bae ni maaku?
N te tabo ae mwaawa n te kaaua ni kibu n te moan mwakoro n Iotua, te Uea e tuanga Iotua bwa e na matoatoa ao n ninikoria—teniua te tai! (tarai kiibu 6–9). Ao imwiina te Uea e berita nakon Iotua bwa e na kairiia kaain Iteraera nakon abaia mai irouia aia bakatibu ao e koro bukina, te korakora anne ao te ninikoria e roko nakoina ibukina bwa e ongotaeka nakon tuua ni kabane, ao te—bwai riki ae kakawaki—bwa te Uea e na raonna n taabo ake e nako iai.
Te Koaua ae reitiira n 2010 bon te kateniua ni kaan nakon ana wewete te Uea nakon Iotua bwa “Ko na korakora man nininkoria” (Iotua 1:9). Te wewete ae titebo nakon te ninikoria bon am bwai. Ao taian berita bon am bwai naba. Man ana buoka te Tia Kamaiu, kona bon tokanikai naba n te wewete are ko weteaki iai ao nakon maium. E na reke iroum te korakora n tei ni kaitara te kaririaki ngkana ko ongotaeka nakon taian tua ao ni maiuakina te maiu ae kantaningaaki are e reke n Ibukin Kakorakoraan te Kairake. Ngkana ko karinea te nakoanibonga ao ni katoa wiiki ko kabooua te berita are ko karaoia n te bwabetiito, ko kona ni karekea te Tamnei ae Raoiroi bwa e na raoniko n—tainako.
A bon mwaiti bwaai aika e aki ataia ae e na kaitarai Iotua. E aki ataia bwa e na kanga n uotiia natin Iteraera nakon te aba ni berita, ma e onimaki iroun te Uea. Ko kaitarai kanganga inanon maium. Ko na kona n riki bwa temanna mai ibuakoia tabeman kaain te Ekaretia n am reirei ke n am utu. Ko kona n namakinna bwa ko kaokoroaki ke ni bwara n nano ke ni maaku. Ko kona n namakina te nano tiotio ibukin taai aika ana roko n taai ni kanganga aikai. Ma e na reke iroum te ninikoria. Te Uea bon raom. Kona onimakinna. E na buokiko bwa kona tokanikai.
Te kauring ae tamaroa aei e kuneaki n Taekan Rabakau 3:5: “Kona onimakina Iehova n nanom ni kabane; ao tai tiku ni bon ootam.” Ngkai ti karaoi nakoara, ti kabaeaki bwa tina onimakina te Uea. Ti kaungaako bwa kona karaoa aei naba. Ti tangiriko. Ti onimakiniko. Ngkoe naba kaain te roro ae rineaki ae matoatoa ao n ninikoria n ataeinimwaane.