Tataro ibukin te Kaeka

N te bong teuana imwiin karaoan te ukeuke n te numera, I aki roko n te uringa kabwaranakoan teuana te kanganga. I kaman katauraoai imwain karaoan te ukeuke aei, ma I aki kona ni uringa te bwai are I kamatebwaia n au auti. Bon iai n te tai anne au onimaki are I kona ni butiia Tamau are i Karawa ibukin buokau.

I baireia bwa nna butimwaea te moan namakin are I namakinna. Imwiin au tataro, I namakina bwa I kona ni kabwaranakoa te kanganga aei n ti teuana te kawai. Ma I a manga nanououa ibukina bwa e taraa n tiaki te kawai ae ena karaoaki iai te kanganga. Ma e ngae n anne ao I bon karaoia n au kawai nakon au kabanea ni konaa.

Ngke a bane n rikoaki beba n ukeuke, ara tia reirei ea rinanon te ukeuke ma ngaira. I kunea bwa te namakin are e a tia n reke irou imwiin au tataro e na bon kairai nakon te reke ae e eti, ma I a tia n aki kakauongo.

Imwiin ni karaoan te kabanea n ukeuke, I a manga kunea naba bwa I aki kona ni kabwaranakoa te kanganga, e ngae ngke Ia tia ni kaman reiakina te kanganga aei ni mwengau.

I tangiria ni butiia Tamau are i Karawa bwa ena buokai, ma I uringnga ngke I aki butimwaeaki. Ia mama ngkai ni manga bubutiia. Ma ibukina bwa I aki kona n iangoa te kawai riki teuana, I a bon tataro ni bubuti bwa ena buokai.

Ea manga oki naba te nanouoa bwa ena roko nningai te tai. Ia bon rangi n minotaki nakon are mai imwaina. Ma I a ti ni iai berita ma te Uea bwa nna bon kakauongo. Ngaia are I a taona te nanokokoraki ao ni karaoi bwai ake I kantaningaaki bwa nna karaoi.

Imwiin kaetakin te ukeuke, ara tia reirei e katanoatai ara bwi. Neiei e karaoia bwa ena kakaongora bwa e waaki man te karinan mai inano ni karokoa are e rangi n tikiraoi ana bwi. Ngke e aki wetea arau ibuakoia ake teniman aia bwi mai inano, I a kukurei bwa nna bae n reke n te kauoman n tikiraoi aia bwi mai ieta, te kabane n raoiroi are I a tibwa karekea n te numera. Ma ngke e manga aki wetea arau ibuakoia taan kauoman mai i eta, I a namakinna te bwai teuana ae kaokoro. I bon koaua raoi bwa e bon aki kona n reke irou te moanna, ma ngaia are I a moanna ni maaku bwa tao ai ngai te kabane ni buakaka au bwi ibuakoia kain au reirei.

Ma ngaia e a weteaki arau ibuakoia naake a moanna. I namakina te bwai ae tibu inanon buuau ao imwiina I ataia bwa bain te Uea inanona ao I ataa Ana Tangira ao ana tataonannano ma ngai. Ngke tabeman ataein au reirei a taku, “Ko rang kekeiaki mwaaka!” I bon ioioa atu. I tokanikai ngkana I iri ana wirikiriki te tamnei.