Reirein te Euangkerio
Katokan Kangaanga n te Namakin nOin Ana Kawai te Uea
Te mwakoro ni karaki aio e reke man te kabwarabwara n te maungatabu ni kabuta are e moan nako n Eberi 1978. Kanikina a kaboraoaki; atuna a karinaki. Te karaki ae bwanin e kona ni kuneaki n liahona.lds.org.
A kaitarai wewete aika rikirake ni korakora ara bitiobi n reirei ma kaain te ekaretia ake aia kangaanga a irekereke riki ma te kainnano n te namakin nakon te kainnano ibukin te amwarake ke te kunikai ke te auti.
Au rongorongo, ngkanne, bon nakon te bwai ae taekinaki: katokan kangaanga n te namakin n oin ana kawai te Uea.
E tekeraoi, bwa tuan marurungin te rabwata e kaeti naba nakon kangaanga n te namakin. …
Moan Tuua n te Toronibwai
Te kaetieti n te boki ni kairi: “[Ti riai] n reirei raoi ao ni kaumakiia kaain te Ekaretia bwa a na boutokaia i bon irouia ngkana a kona ni boutokaia. Akea kaain te ekaretia ni koaua ae na … kanakoa mairouna ni bon oin nanona tabena i bon bukin boutokakina. N te maan are e kona, i aan te kairiiri mairoun teuare Mwaaka ao ma bon oin ana mwakuri, e na karekei bwaai ake a riai ibukin maiuna” ([1952], 2). …
Ti a tia n tokanikai n reireiniia raoi Aomata aika Itiaki bwa a na karekei oini bwaai ibukini kainnanoia ao ngkanne ibuobuoki nakon tararuakiia naake a aki kona n tararuaia i bon irouia.
Ngkana kaain te ekaretia e aki kona ni boutokaia i bon irouna, ngkanne e na weteia kaain ana utu, ao imwina te Ekaretia, n aroni baireana anne. …
Ngkana aomata a konabwai ma a rawa n tararuaia i bon irouia, tabera bwa ti na kabongana ana tua te Uea are te tia taningaroti e na aki kana ana kariki te tia mwakuri. (tara D&C 42:42.)
Te tua ae bebete bwa ti na tararuaira i bon iroura. Te mwakoro n taeka aei ibukin te koaua e riki bwa kanga te bwai ni katooto: “Kabanea kanna, Bwainna ni karokoa ae mka, karaoia bwa e na mwakuri, ke naako n akea te bwai anne.”
Ngke e moani katanoataa te Ekaretia te burokuraem ibukin te mweeraoi n 1936, e taku te Moani Beretitentii:
“… Ana kantaninga te Ekaretia bwa e na buokia aomata bwa a na buokiia i bon irouia” (n te Ribooti n te Maungatabu, Okitobwa 1936, 3; taeka aika rara a karinaki). …
Bon te aro ni buokira i bon iroura, tiaki te aro n anga ae waekoa. E kainnanoa warekan raoi aia bwai aomata ao aia bwai utu, ni kabane a na riai ni baireaki taekaia imwain ae iai riki ae roko mai tinaniku.
E aki kateibuaka ke n aki nanoanga te bitiobi ngkana e tangira kaain te ekaretia bwa e na mwakuri nakon are ana kabanea ni kona ibukin are e tia ni karekea man te ibuobuoki man te Ekaretia.
E na akea te maama teutana irouia kaain te ekaretia ngkana a buokaki man te Ekaretia. N norana, bwa, e a tia n anga ni kabane are e kona. …
Te bwai are I tangiria ni kan taekinna bon aio: Te tua ae titebo—te toronibwai—iai rekerekena nakon te tamnei ao te namakin. …
Ni karokoa are ti kabongana te taratara raoi, ti na kona ni karaoi nakoira n ara namakin (ao, ngaia are, n tamneira) te bwai are ti a tia ni mwakuri mwaka inanon rooro n totokoia n te aro ae riai.
Taeka n reirei
Ti tara ni karikirakea te aoraki ae buti ae te “kan reireinaki” are e kanakoa korakoran te tamnei man te Ekaretia are aekakin te bwain ae mwaitoro ae kanakoa te korakora mairoun te aomata nakon riki aoraki tabeua. …
N taetae ni karariki, a mwaiti bitiobii aika kawakini ni koonan aia tetike booma ibukin te ota ibukin katokan aorakin te nano.
Ngkana e roko temanna ma ana kangaanga, e tekebuaka, bwa te bitiobi, n akea te titiraki, ni waekoa ni kanakoi, n aki tei moa n iango bwa tera ae karaoia nakoia ana aomata. …
Te inaomata n tamnei ao te toronibwai bon te mwaaka ni boutoka inanon te Ekaretia. Ngkana ti iraeia kaain te ekaretia n anne, a na kanga ni karekea te kaotioti ibukiia? A na kanga n ataia ae iai ana burabeti te Atua? A na kanga ni karekei kaeka nakon aia tataro? A na kanga n ataia ni koaua i bon irouia? …
Karaoana Nakoia Utu
… Tabeia taama bwa a na tararua i aoia aia utu.
N tabetai, ma te nano ae raoiroi, e korakora kainnanoaia iroura natira ma tamaia are e aki kona ni karaoia.
Ngkana natiu te mwaane e kainnanoa te reireinaki, bitiobi, bon tabeu moa, ao ngkoe imwinai
Ngkana natiu te mwaane e kainnanoa te takakaro, bitiobi, N na karekea moa, ao mwina ngkoe.
Ngkana natiu te mwaane e kainnanoa kaetakina, anne bon tabeu moa, ao mwina ngkoe.
Ngkana I aki kona ni karaoa tabeu n tama, buokai moa, ao natiu imwina.
Tai rangi ni waekoa n ana tabeu mairou ae te kaikawakiia natiu.
Tai rangi ni waekoa n reireiniia ao ni katoka aia kangaanga ni kabane. Anganai bwa N na rekereke iai. Bon au mwakuri.
Ti maeka n te tai are te kakaitara e katuruturua iaora n tatabemanira te koaua ibukin karekean te bwai ae ti tangiria n te tai ae waekoa. Ti tara n tangiria n te tai ae waekoa bwaai ni kabane, n ikotaki ma katokan ara kangaanga n te tai ae waekoa. …
E boni kananonaki te maiu bwa te kakaewenako. Te rinanon te tabeaianga, taian kananokawaki, taian aki raunnano, ma taian aki tokanikai aika riiriki.
Reireiniia kaain te ekaretia bwa ngkana e reke aia bong ae rangi, ni kananokawaki teuana te tai n te tai teuana, ke tabeua n te rinan, n tei ni matoatoa ao ni kaitarai. A na bon eti bwaai.
Iai bukin ara ikakorakora n tokanikai ni kangaanga inanoni maiura.
Te tua ibukin te toronibwai ke te inaomata i bon iroum boni boton te maiu nakon te kakukurei.