I Kona Ni Kaina Au Bitiniti N Te Taabati?

Tenua te wiiki imwin are I tia ni kauka nanou, karekea te euangkerio, ao ni karaoa te babaire ae kakawaki ae N na bwabetitoaki n 2001, I kaea te kiraati n Reirei n Taabati are ti kakarabakuakina iai kakawakin kawakinan te bong ae te Taabati.

Ngkai te tia bitiniti ngai ae nakoraoi au butiniti ma au taan mwakuri aika bati, I tia ni mwakuri n te Taabati n raka iaon 20 te ririki. Ma ngkai e a mataata raoi nakoiu kakawakin te bong aei, I a iangoia n tuangiia au manatia n te titoa bwa ti na aki kaukuuki n te Taabati.

Tabeua wiiki imwin katanoataakin au babaire, au manatia ake teniman a tuangai bwa tabeman taani bobwai, riki tiareirei, a titiraki ngkana ti kona ni kauka ara titoa n te Taabati are na roko. I mwakuri n te bitiniti ni kanre i Papantla, ao aomata a kainnanoia ni kaboi kanre ao piñatas ni katauraoi ibukin te El Día del Niño (Aia Bong Ataei), are e na karaoaki n te Moanibong are e na roko. N Aia Bong Ataei, are karaoaki n Eberi 30 i Mexico, a bwatei reirei ao a takakaro, ao ataei a anganaki aia kanre.

“Ningabong, n te Kaonobong, N na tuangi ngkami,” I tuangiia au manatia.

Ngke I roko ni mwengau, I tuanga kainnabau te bwai are riki. I kantaningaia bwa e na kangai, “Kaukia. Bwa are, ti teuana te Taabati.” Ma tiaki ana kaeka anne.

Ma te bwana ae matoatoa, e tuangai bwa ngai atuun te utu ao boni ngai ae N na baireia. Ma ngkanne e manga titirakinai, “Ngkana arona bwa n te Taabati aio ao temanna e tuangko bwa ko na kona ni karekea te kaubwai ae bati ke ko na kawaraki iroun Tamam are I Karawa, e nga ae ko na rineia?”

Ana titiraki a buokai n ata kakawakin butimwaean te Uea ni katoa Taabati, ao I ataia bwa N na tei iaon au babaire. Karinean te Uea bon te bwai ae te kabanea ni kakawaki ae ti kona ni karaoia n te Taabati, ao maikanne are I a aki kona ni kabua au tai ni karaoa anne.

Ngkana ti kamenai bwaai ibukin te Uea imwain bwaai ibukiia aomata, ti na anganaki te koaua ibukin te bong ae te Taabati. Ibukin katabuan te bong ae te Taabati, ti a tia ngaira ma ara utu ni korakora kakabwaiakira, ao au bitiniti naba. Ti bia anganaki kakabwaian karinean te bong ae te Taabati.