Akea BEEBAN KARIAIAKAU n Rin n te Tembora

Ngke 17 au ririki, iai nanou ae korakora ni kan noora aia tembora Aomata Aika Itiaki. I maeka ma au utu, are n te tai anne akea iai te tembora. Ibukia Aomata Aika Itiaki ake a maeka i Denmark, tembora ake taian kabanea ni kaan a mena i Switzerland ao i England. Akea ae I kinaia n aaba aikai, ngaia are I bon aki kona n nako iai.

Ma ibukina ae iai au utu i Utah, I a iangoia bwa N na kaikoa au mwane bwa I aonga ni kona ni kawaria ao ni karaoi bwabetito ibukiia maate n te tembora are i Salt Lake. I kororeta nakon ai tinau ao ai tariu i Utah n nooria ngkana e raoiroi rokou ni kawaria. A rangi ni kukurei ngke a ongo au iango.

N te ririki are imwina I a tia ni kaikoa au mwane ae tau ibukin mwanangau are I kaman kariaria. Tabeua te bong imwin rokou i Utah, ti butinako ma ai tinau nakon te Salt Lake Tembora. I rangi n kukurei n noori ni matau ao ni kukurei ni karaoi bwabetito ibukiia maate. Ngke I a roko n te mataroa, ngkanne, te aomata ae mwakuri n te tembora e titirakinai te kariaia ibukin riniu n te tembora. Akea ae e a tia n tuangai mai mwaina te kariaia n rin n te tembora! E kabwarabwara te tia mwakuri bwa tera te kariaia n rin n te tembora ao e tuangai bwa I kona ni karekea teuana mairoun au bitiobi.

E makeenako nanou. I a kataua naba ti te kawaria au utu ao taraakin te tembora mai tinaniku.

N tain te aki mamatam ao te kaoti koaua n te Taabati are imwina, I namakina tangiran kan tibwauakin au koaua, n tuangiia kaain te tataro ae a rangi ni kakabwaiaaki ngkai a maeka ni kaan ma te tembora. I taekinna naba ae I tangiria ni kan rinnako i nanona ma I aki kona bwa akea au kariaia n rinnako, e ngae ngke I a kaman aki toki n reireinaki maiuakinan te kororaoi. I kaina au koaua man kaungakiia kaain te ekaretia bwa a na kakawara te tembora n reken aia tai n taainako.

Imwin te tataro, e kawarai aia bitiobi au utu ao e tuangai bwa e na kataia ni buokai ni karekea au kariaia n rin n te tembora, ao ti a bairea ara tai ni marooro. N tain te marooro, e titiraki bwa e rabakau n taetae n Imatang au biotiobu. I taku, e aki. E kaeka, “Ao ngai I babanga n taetae n Denmark.” E a makenako angin nanou riki.

Ma e taku te bitiobi, “Ngkai ko a tia n roko n te raroa aei; ti na aki bwarannano. I ataia bwa e na buokira te Uea. Ti na riai n onimaki.”

E titirakinai ana nambwa au bitiobi i Denmark, are bon iai irou. I kuba ngke I ongo bwanaan natin au bitiobi te mwaane. E tuangai are e tibwa oki man ana mition i England. Ngke I tuanga te bitiobi are te I-America ao, e taku, “E tamaroa. E kona n rairairi ibukira.”

E aki maan ao ngaira aman ti a mena iaon te tarebon—au bitiobi e anganai te marooro ibukin au kariaia n rin n te tembora, natina te mwaane e rairairi ibukin te bitiobi are kaain America. E aki maan ao e a reke au kariaia ao n tokina I a kona n rin n te tembora! I aki kona ni kabwarabwara te kimwareirei are I namakinna n ataakin ae te Uea e a tia ni kauka te kawai ibukiu.

I mare rimwi riki n te tembora ao n tia ni kakabwaiaaki n anganaki natiu aman aika tikiraoi. I rangi ni karabwa Tamau are i Karawa ngkai e tia n anganiira tembora, ao I kakaitau n ataakin ae I a tia ni kabaeaki ma au utu ao bwa, ngkana ti maiuakina te raoiroi, ti kona n uaia ni maeka n akea tokina.