Toʻu Tupú
Ko e Vahevahe mo ha Kaungāmeʻá
Lolotonga haʻaku ako ʻi ha ʻaho ʻe taha ki heʻeku kalasi seminelí, kuó u maʻu ha ongo fakaʻofoʻofa mo makehe. Pea ʻi heʻeku lau ʻa e lēsoni ki he ʻaho hono hokó, ne u sioloto ki he fofonga ʻo haku kaungāmeʻa ʻi he akó mo ongoʻi mālohi ʻoku totonu keu fai ange ʻeku fakamoʻoní ki ai.
Neongo ʻene mahino ʻa e ongo ko ʻení, ka naʻá ku manavasiʻi. Naʻá ku tailiili naʻa fakasītuʻaʻi au ʻe hoku kaungāmeʻá, ʻo tautautefito he naʻe hangē naʻe ʻikai ko ha faʻahinga taʻahine ia ʻe ala tokanga ke kau ki he Siasí.
Ne ʻalu ʻeku fakakaukaú ki he lea naʻe fai ʻe Sisitā Mele N. Kuki (Mary N. Cook) ʻo e kau palesitenisī lahi ʻo e Finemuí ʻa ia naʻá ne fakatukupaaʻi ai kimautolu ke mau ngāue mālohi mo lototoʻá.1 Naʻá ku fie maʻu ke u tatau mo ia, ko ia ne u fai ai ha tohi ki he taʻahiné ni ʻo fakamoʻoniʻi ki ai e moʻoni ʻo e Siasí pea mo ʻeku saiʻia ʻi he Tohi ʻa Molomoná. ʻI he ʻaho hono hokó, ne u monoʻi ai ha Tohi ʻa Molomona, fakataha mo ʻeku tohí, ki heʻene loto kato nāunaú.
Naʻá ku ʻohovale, he naʻe mātuʻaki mahuʻingaʻia hoku kaungāmeʻá ʻi he ongoongoleleí. Talu mei he ʻaho ko iá, mo ʻene faʻa fakamatala mai ʻa e meʻa naʻá ne ʻilo ʻi heʻene ako e Tohi ʻa Molomoná. ʻOsi mei ai ha ngaahi uike siʻi, ne u fakafeʻiloaki ia ki he ongo faifekaú. Naʻá ne maʻu ʻi he meimei taimi tatau pē ha fakamoʻoni mei he Laumālie Māʻoniʻoní ko e meʻa naʻá ne akó ʻoku moʻoni. Naʻá ku tangi mo e ongo faifekaú ʻi heʻene fakamatala mai ʻa ʻene ngaahi ongó. Naʻe ʻikai fuoloa kuo papitaiso hoku kaungāmeʻá, pea naʻe fakatumutumu ʻene ongomātuʻá ke mamata ʻi he ngaahi liliu naʻe hoko ʻiate iá.
ʻOku ou mātuʻaki fiefia ʻi he lava ke u ikunaʻi ʻeku manavasiʻí pea mo tokoni ke ʻomi ʻa e ongoongoleleí ki heʻene moʻuí.