ʻOku Pule Hono Fakakalasí

Naʻe sio fakamamaʻu ʻa ʻĒtani ki he ngaahi vaʻinga vitiō lanu kehekehe naʻe fakaʻotu he funga laupapá. Naʻe talaange heʻene mātuʻá ʻe lava ke ne fili ha foʻi vaʻinga ʻe taha ko haʻane meʻaʻofa ki hono ʻaho fāʻeleʻí, pea naʻe lahi fau ʻa e vaʻinga ke fili mei aí! Naʻe hiki e ongo kiʻi mata ʻo ʻĒtaní mei ha vaʻinga lova kā ki ha vaʻinga feʻauhi ki ha vaʻinga hulohula. Fāifai, peá ne toʻo hake ha vaʻinga lova ʻo ʻave ki heʻene tamaí.

ʻEke ange ʻe he Tangataʻeikí “Naʻá ke maʻu ha meʻa naʻá ke saiʻia ai?”

Talaange ʻe ʻĒtani, “ʻOku ou tui ʻoku ou saiʻia he vaʻinga lova ko ʻení.”

Pehe ange Tangataʻeikí, “Ngali mālie. Ko e hā hono kalasí?”

Fulihi hake ʻe ʻĒtani e tāpuní. Naʻá ne ʻilo ʻe toki lava pē ʻo vaʻinga ʻi ha ngaahi vaʻinga tuʻunga pau. Ko e taimi naʻe fuofua maʻu ai ʻene komipiutá, naʻe talanoa mo ʻene ongomātuʻá fekauʻaki mo hono mahuʻinga ʻo e muimui ki he ngaahi tuʻutuʻuni ʻa honau fāmilí fekauʻaki mo e tuʻunga ʻo e ngaahi vaʻinga vitioó. Naʻe ʻilo ʻe ʻĒtani ʻoku lahi ha ngaahi vaʻinga ʻoku ʻi ai ha ngaahi meʻa ʻoku kovi ʻi ai, pea naʻe loto ke talangofua.

Ne maʻu ʻe ʻĒtani ʻa e kalasi ʻo e vaʻingá he tāpuní peá ne fakahā ange ki he Tangataʻeikí. Talaange ʻe ia, “ʻOku ʻai ia ki he taha kotoa pē.”

Pehē ange Tangataʻeikí, “Sai. Ta ō ʻo totongi. ʻOfa ke ke maʻu ha ʻaho fāʻeleʻi fiefia, ʻĒtani!”

Malimali ʻa ʻĒtani, mo vēkeveke ke fai mo aʻu ki ʻapi ʻo ʻahiʻahiʻi ʻene vaʻinga foʻoú. “Mālō, Tangataʻeikí!”

Naʻe ʻalu ʻa ʻĒtani ʻi ha ʻosi ha ngaahi ʻaho siʻi mei ai, ki he ʻapi hono kaungāmeʻa ko Seisí, ke vaʻinga. Naʻá na fakatou ʻi he kalasi Palaimeli tatau mo Seisi, pea naʻe lahi ʻena vaʻinga fakatahá. Naʻe ʻalu ʻa ʻĒtani mo ʻene vaʻinga vitiō foʻoú.

Pehē mai ʻa Seisi ʻi heʻene fakaava mai e matapaá, “Mālō lelei ʻĒtani. Hū mai. ʻOku ou maʻu ha vaʻinga vitiō foʻou te ta lava ʻo vaʻinga ai!”

Pehē atu ʻa ʻĒtani mo toʻo hake ʻene vaʻingá, “Mo au pē!”

Ne tangutu ʻa e ongo tamaiki tangatá ʻi muʻa he komipiutá, pea fakahū ʻe Seisi ʻene vaʻingá. ʻAsi mai hono hingoá he komipiutá, fakataha mo hono faʻahingá. Longomate ʻa ʻĒtani. Ko ha faʻahinga ʻeni ia naʻe ʻikai fakangofua ke vaʻinga ai.

Ne hū vēkeveke takai ʻa Seisi ʻaki ʻene meʻa lomí ʻi he ngaahi fakahinohinó ʻo ne kamataʻi ʻa e vaʻingá. Naʻe teʻeki ke fakatokangaʻi ʻe ʻĒtani ia ha meʻa naʻe kovi. Naʻá ne lomiʻi leva ʻene meʻa lomí ke hū mai ʻene kiʻi sianá ki he vaʻingá. Naʻe mālie, ka ko e lōloa ange ʻene vaʻingá, ko e lahi ange ia ʻe ne ongoʻi taʻe fiemālié. Naʻe teʻeki pē ke ne fakatokangaʻi ha faʻahinga meʻa naʻe kovi, ka naʻe fie muimui ki he tuʻutuʻuni hono fāmilí.

Pehē hake leva ʻa ʻĒtani, “Siʻi, Seisi, ʻoku ʻikai ngofua ia ke u vainga ha ngaahi vaʻinga he kalasi ko ʻení.”

Talaange ʻe Seisi, “Siʻi, ʻoku SAI pē ia. ʻOku ʻikai ha meʻa kovi ia ai.”

Fehuʻi ange ʻe ʻĒtani, “ʻOkú ke fakapapauʻi ia?”

Talaange ʻe Seisi, “ʻIo. ʻOku vaʻinga ai hoku fāmilí. ʻOku ou tui ko e kalasi hala naʻe ʻai ki aí.”

Feʻunga tonu pē, mo e hū mai ʻa e faʻē ʻa Seisí ki he lokí. Pehē mai ia, “Mālō lelei ongo tama. ʻOku SAI PĒ meʻa kotoa?”

Folo fāvai ʻa ʻĒtani. Pehē ange leva ia, “Mālō lelei Sisitā Mefi. Ko e meʻá pē he ʻoku ʻikai ngofua ke u vaʻinga ʻi ha ngaahi vaʻinga vitiō ʻoku kalasi peheni.”

Pehē ange ʻa Seisi, “Naʻá ku talaange ʻoku ʻikai ha meʻa kovi ia ai.”

Taʻalo atu pē nima ia ʻo e faʻē ʻa Seisí. Pehē atu ia, “ʻOua te ke tokanga ki ai ʻĒtani. ʻOku ou ʻilo ko e lahi ʻo e ngaahi vaʻinga peheé ʻoku fakakalakalasi ʻoku kovi, ka ʻoku ou tui pau ʻe tuku pē ʻe hoʻo faʻeé ke ke vaʻinga he vaʻinga ko ʻení.” Malimali pē ia pea mavahe mei he lokí.

Naʻe hoko atu pē vaʻinga ʻa Seisí, ka naʻe tuku hifo ʻe ʻĒtani ʻene meʻa lomí ki lalo. ʻEke ange leva ʻe ʻĒtani, “Seisi, fēfē ke ta vaʻinga ʻi he vaʻinga lova naʻá ku haʻu mo iá?”

Mioʻi atu pē ʻe Seisi hono matá mo kei sio pē ki he komipiutá. “ʻIkai, te u fie vaʻinga pe au heni.”

Tuʻu fakalongolongo leva ʻa ʻĒtani ki ʻolunga ʻo hū ki he loki ʻo Seisí, ʻo ne maʻu ai ha fanga kiʻi kā lova vaʻinga ke vaʻinga mo ia. Naʻe ʻikai ke fakafiefia ia tatau mo e vaʻinga vitioó, ka naʻe ongoʻi lelei ʻe ʻĒtani ʻi heʻene ʻiloʻi naʻe muimui ki he tuʻutuʻuni hono fāmilí.