ʻOku ʻAfioʻi ʻe he ʻOtuá ʻEtau Ngaahi Meʻafoakí

ʻI heʻeku hoko ko e tīkoní ʻi hoku taʻu 12, naʻá ku nofo ʻi Niu Sēsī, ʻoku maile ʻe 50 (kilomita ʻe 80) mei he Niu ʻIoke Sití. Naʻá ku fakaʻānaua ke u hoko ko ha taha peisipolo ʻiloa. Naʻe loto ʻeku tangataʻeikí ke ne ʻave au ki ha vaʻinga naʻe fai ʻi he Malaʻe Vaʻinga Iengikī ʻiloá, ʻi he Polongí. ʻOku ou kei lava pē ʻo sioloto ki hono vilohi ʻe Siō Tomāsiō ʻa e paté ʻo taaʻi e foʻi pulú ki he ngaahi nofoʻanga ʻi loto mālié, ʻoku tangutu pē ʻeku tangataʻeikí ʻi hoku tafaʻakí, ko e taimi pē ia ʻe taha ne ma ō fakataha ai ki ha vaʻinga peisipolo haú.

Ka ʻi ha ʻaho ʻe taha ne liliu ai heʻeku tangataʻeikí ʻeku moʻuí ʻo taʻengata. Naʻá ne ʻave au mei Niu Sēsī ki ha ʻapi ʻo ha pēteliake ne ʻosi fakanofo ʻi Sōleki Siti. Naʻe teʻeki ke u sio he tangatá kimuʻa. Naʻe tuku au ʻe heʻeku tangataʻeikí he sitepú. Ne taki atu au ʻe he pēteliaké ki ha sea, hili hono ongo nimá ki hoku ʻulú, pea tuku mai ha tāpuaki ko ha meʻaʻofa mei he ʻOtuá naʻe kau ai hano fakahaaʻi e holi maʻongoʻonga ʻo hoku lotó.

Naʻá ne pehē ko e taha au ʻo kinautolu naʻe pehē ki ai, “ʻOku monūʻia ʻa e faʻa-fakaleleí.” [Mātiu 5:9.] Naʻá ku ʻohovale ʻi ha lava ʻe ha muli moʻoni ke ʻilo hoku lotó pea ʻāʻā ai hoku matá ke sio ki he loki naʻe hoko ai e faʻahinga mana peheé. Kuo hanga ʻe he tāpuaki ʻo e ngaahi meʻa ʻoku ou malavá ʻo tokoniʻi ʻeku moʻuí, ʻeku nofomalí, pea mo ʻeku ngāue he lakanga fakataulaʻeikí.

ʻOku ou lava ʻo fakamoʻoni tuʻunga ʻi he aʻusia ko iá pea mo e ngaahi meʻa ne muimui mai aí, “He ʻoku ʻikai ke foaki ʻa e meʻa-foaki kotoa pē ki he tangata kotoa pē; he ʻoku lahi ʻa e ngaahi meʻa foakí, pea ʻoku foaki ha meʻa-foaki ki he tangata takitaha ʻi he Laumālie ʻo e ʻOtuá” (T&F 46:11).

Kuó u lava ʻo fakatokangaʻi mo mateuteu ki he ngaahi faingamālie ke ngāue ʻaki ia ki hono tāpuakiʻi kinautolu ʻoku ou ʻofa ai mo tokoniʻí, ʻi hono fakahā mai ʻe he ʻEikí kiate au ha meʻafoakí.

ʻOku ʻafioʻi ʻe he ʻOtuá ʻetau ngaahi meʻafoakí. Ko ʻeku tukupā kiate kimoutolú, pea kiate au foki, ke tau lotua ke ʻilo ʻa e ngaahi meʻafoaki kuo ʻosi foaki kiate kitautolú, ke tau ʻilo e founga hono fakatupulaki kinautolú, pea mo fakatokangaʻi ʻa e ngaahi faingamālie ʻoku tuku mai ʻe he ʻOtuá kiate kitautolu ke tau tokoniʻi ʻa e niʻihi kehé. Ka ko e taupotu tahá, ʻoku ou fakatauange ʻe ueʻi fakalaumālie kimoutolu ke tokoniʻi ha niʻihi ke nau ʻilo ʻenau ngaahi meʻafoaki mei he ʻOtuá ke nau tokoni.

Fakakaukau ke hiki hoʻo ngaahi fakakaukaú ʻi hoʻo tohinoá pe aleaʻi ia mo ha niʻihi kehe.