Naʻe Fakatupu ʻa e Māmaní maʻá e Fānau ʻa e Tamai Hēvaní

Naʻe pehē ange ʻa ʻAna, “Tāmani! Sio ki he ngaahi fetuʻú kotoa.” Naʻe hanga hake ʻa e taha kotoa ʻi he fāmili ʻo ʻAná mei heʻenau veʻe afí. Naʻe hangē naʻe lauimilioná ʻa e ngaahi fetuʻu ʻi he langi kaupōʻulí.

Pehē ange ʻa e Fineʻeikí, “Kiʻi fakakaukau, ko e ngaahi fetuʻu takitaha ko ʻeé ko e taha ia ʻo e ngaahi fakatupu ʻa e Tamai Hēvaní.”

Naʻe fokotuʻu ange leva ʻe he Tangataʻeikí¸ “Tau fakalau takitaha mai ha meʻa pē taha ʻoku tau saiʻia taha ai naʻe fakatupu ʻe he Tamai Hēvaní maʻatautolu.”

Ne pehē vave ange ai ʻa Taniela, “ʻOku ou ʻilo. ʻOku ou saiʻia he ngaahi peau lalahi ne tau sio ai he ʻōsení he taʻu kuo ʻosí.”

Naʻe ʻikai ke ʻilo ʻe ʻAna ia pe ko e hā te ne filí. Naʻe fakakaukau ki he laʻā māfaná, mo e ngaahi matalaʻi ʻakau namu leleí. Fāifai peá ne manatuʻi e lahi ʻo ʻene saiʻia kotoa he fanga kiʻi monumanu fulufulu moluú. Talaange leva ʻe ia, “Ko e fanga monumanú!”

Naʻe kamata ke tetetete ʻa ʻAna pea hanga leva ʻe he Tangataʻeikí ʻo takatakaiʻi ʻaki ia ha sipi kafu. Pehē ange leva ʻa e Tangataʻeikí, “ʻI he ʻosi hono fakatupu kotoa e ngaahi meʻa fakaʻofoʻofa ko ʻení ʻe he Tamai Hēvaní maʻa ʻEne fānaú, naʻá Ne ʻafioʻi naʻa nau lelei.”

Naʻe maʻu ʻe ʻAna ha ongoʻi māfana mo fiefia ʻi loto. Naʻá ne fusi hake leva ʻa e sipí ki hono kumukumú pea toe sio hake ki he ngaahi fetuʻú. Peá ne fanafana leva, “Mālō, Tamai Hēvani.”