Naʻe Fekauʻaki ʻApē ʻa e Ngaahi Fakahinohinó mo Au?

Naʻe faingofua maʻu pē kiate au ʻa e fili ke teunga tāú. Naʻá ku tupu hake ʻi ha ʻapi naʻe māʻolunga ai ʻa e ngaahi tuʻunga moʻuí, pea ʻi heʻeku mali ʻi he temipalé, naʻe fakamanatu mai ʻe hoku kāmení ke u teunga taau.

Neongo ia, naʻe hoko ʻa e fakatau teunga kaukau tahí ko ha meʻa ne u faingataʻaʻia ai. Ka ne taʻeʻoua ʻa e ngaahi fakahinohino ʻo e kāmení, naʻá ku kei fie tui pē ʻe au ʻa e teunga kaukau tahi te u mā ke sio mai ha taha ʻokú ma maheni ʻoku ou tui.

Naʻá ma palani mo hoku husepānití ke ma folau ʻi ha vaka folau ʻeveʻeva. Naʻá ku pehē ko e folau ʻeveʻeva ko ʻení ko e taimi lelei taha ia ke tui ai e faʻahinga teunga kaukau-tahi peheé. He ʻikai ke u sio ki ha taha ʻokú ma maheni, pea he ʻikai leva ke u ongoʻi halaia. He ʻikai ke ʻilo ʻe ha taha ia ko ha taha Siasi au, pea ʻoku ngalingali ʻe teunga tatau mo au ʻa e toenga kotoa ʻo e kakai fefine ʻi he vaká.

Ne u fakakaukau ai, ʻoku ʻikai ha fuʻu ʻuhinga fēfē ia ke u kei teunga kaukau tahi taau ai, koeʻuhí he kuó u ʻosi mali. Ko e ngaahi fakahinohino ki he teunga tāú ʻoku maʻá e kau taʻu hongofulu tupú pē ia, ko ia? Ka ne ʻi ai ha faʻahinga ongo vivili ʻi heʻeku fakakaukaú. Naʻá ku mali ʻi he temipalé. Kuó u ʻosi fakahoko ʻeku taumuʻa ke moʻui taau mo maʻu ha husepāniti moʻui tāú. Pea naʻá ku fie maʻu ke u kei fili ai pē ʻa e totonú.

Naʻá ku fakakaukau leva ke u kumi e fakamatala ki he “Teungá mo e Fōtungá” ʻi he Ki Hono Fakamālohia ʻo e Toʻu Tupú. Naʻe kiʻi fuofuoloa talu mei heʻeku lau ʻa e kiʻi tohí, pea naʻe ongo hono ngaahi leá kiate au: “Te ke lava ʻo fakahā ʻi ho valá mo ho fōtungá ʻokú ke ʻiloʻi ʻa hono mahuʻinga ʻo ho sinó. Te ke lava ʻo fakahaaʻi ko e ākonga koe ʻa Sīsū Kalaisi pea ʻokú ke ʻofa ʻiate Ia” ([2011], 6).

Naʻe toutou ongo ʻa e ngaahi lea ko iá ʻi heʻeku fakakaukaú. Ko ha ākonga ʻapē au ʻa Sīsū Kalaisi? Naʻá ku loto fiemālie nai ke tuʻu maʻu ʻi he taimi kotoa pē pea ʻi he feituʻu kotoa pē (vakai, Mōsaia 18:9)?

Talu mei ai mo ʻeku fakapapau naʻa mo ʻeku ʻi hoku taʻu 20 tupu lahí, kuo pau ke u pukepuke ʻa e ngaahi tefitoʻi moʻoni naʻá ku ako ʻi heʻeku ʻi hoku taʻu hongofulu tupú. ʻOku kei kaunga moʻoni pē ʻa e ngaahi tefitoʻi moʻoni ko iá kiate au. ʻOku ou fie hoko ko ha sīpinga lelei ki heʻeku fānaú. ʻOku ou fie maʻu ke nau ʻilo ko ha ākonga au ʻa Sīsū Kalaisi.