Ko ha Fakakaungāmeʻa Foʻou

Naʻá ku tangutu ʻi ha tēpile maʻu meʻatokoni hoʻatā mo hoku ngaahi kaumeʻá ʻi he taimi ne u fakatokangaʻi atu ai ha kiʻi tamasiʻi foʻou naʻe ui ko Maikolo ʻa ia naʻe toki hiki mai ki heʻemau taimi maʻu meʻatokoni hoʻataá. Naʻe hangē naʻe ʻikai ke ne fuʻu ʻiloʻi lelei ha tahá ka naʻe loto fiemālie pē ke ʻi ai hano ngaahi kaungāmeʻa foʻou. Naʻe fakakaukau ia ke tangutu fakataha mo ha tamaiki tangata matuʻotuʻa, naʻa nau fakangalingali tokua ko hono ngaahi kaungāmeʻa kinautolu ʻi ha taimi nounou ka naʻe fakaiku ʻo nau fakakata ʻaki ia. Naʻa nau fakakata maʻu pē ʻaki ia kae ʻoua ke kamata tangi. Naʻá ku mamata ki he hoko ʻa e meʻá ni, pea naʻá ne uesia lahi moʻoni au. Naʻá ku toki ʻilo ki mui ʻoku faingataʻaʻia fakaʻatamai ʻa Maikolo.

Naʻá ku pehē leva ke u ʻeke kia Maikolo pe ʻoku fie tangutu he tafaʻaki ʻo hoku ngaahi kaungāmeʻá mo au. Talamai ʻe ia ʻikai, mahalo koeʻuhí he naʻe manavasiʻi ke toe fakakata ʻaki ia ʻe he kakaí. Naʻe fakakaukau ia ʻe sai ange ke tangutu tokotaha pē.

ʻI he ʻaho hono hokó, naʻá ku ʻalu ki ai ʻo fakafeʻiloaki ia ki hoku ngaahi kaungāmeʻá. Naʻe lava pē ke u tala naʻe fiefia ʻi he ʻikai ke u foʻí, pea kamata leva ke ma talanoa. Naʻá ku ʻilo ko ha taha lelei ia he kohí (tic-tac-toe). ʻOku meimei ke ʻikai toe lavaʻi ʻe ha taha. Naʻá ku toe fakatokangaʻi foki e fakautuutu hono potó. ʻOkú ne ʻilo kotoa ʻa e kau palesiteni ʻAmeliká mo lava ke tala atu ʻa e ngaahi taʻu ne nau ngāue aí. ʻOku tōtō atu, ka ʻoku ʻikai fuʻu tokolahi e kakai ne loto ke sio fakalaka atu ʻi he ngaahi meʻa naʻe ʻikai ke ne lavá. Naʻe manukiʻi au ʻe ha niʻihi ʻo e fānau ako kehé ʻi heʻeku tangutu fakataha mo iá, ka naʻe ʻikai ke u tuku ke nau uesia au. Naʻá ku saiʻia he feohi mo Maikoló.

Ko e ʻaho kotoa pē ne ma fakataha ai ke maʻu meʻatokoni hoʻatā, naʻe lava ke u tala naʻe kamata ke hoko ʻa Maikolo ko ha taha fiefia ange. Naʻá ne ʻamanaki ki he maʻu meʻatokoni hoʻataá ʻi he ʻaho kotoa pē, pea pehē pē mo au. Ko e meʻa ne u pehē ko ha kiʻi ngāue tokoni ʻofa peé ne hoko ia ko e kamataʻanga foʻou moʻoni ʻo ha feohi fakaʻofoʻofa.