Nofo Taha e Tokanga ʻa e Kau ʻAposetoló ʻi he Tui ki he ʻEiki ko Sīsū Kalaisí lolotonga ha ʻAʻahi ki Filipaini

Naʻe ʻaʻahi ʻa ʻEletā Tēvita A. Petinā mo ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá, fakataha mo ha kau taki kehe pē ʻo e Siasí ki he ʻĒlia Filipainí ʻi he 24 ʻo ʻAokosí ki he 2 ʻo Sepitema, 2012.

Naʻe akoʻi ʻe he Kau Takí e tokāteliné ʻi he ngaahi konifelenisi fakatakimuʻa ʻa e lakanga fakataulaʻeikí, ngaahi fakataha lotu ʻa e kau tāutaha kei talavoú, ngaahi konifelenisi fakasiteiki, mo e ngaahi fakataha mo e kau faifekaú pea poupouʻi e Kāingalotú ke fakamālohia ʻenau tui kia Sīsū Kalaisí.

Naʻe tali ʻe ʻEletā Petinā ha ngaahi fehuʻi ʻa e kau tāutaha kei talavoú lolotonga ha fakataha makehe ʻi Lakuna. Naʻá ne fakamatala ʻo pehē, “Naʻe fakaʻaongaʻi ʻe he Fakamoʻuí ʻa e ngaahi fehuʻí ko e taha ʻo ʻEne ngaahi tefitoʻi meʻangāue fakafaiakó. Kapau te tau feinga ke fai ha ngaahi fehuʻi ʻaonga pea ʻi he ueʻi ʻa e laumālié ʻi he taimi ʻoku tau fakalaulauloto ai mo lotú, ʻe lava ke tau kau ʻi ha founga ʻo e akó te tau malava ke maʻu ai e ueʻi fakalaumālie pea maʻu ʻetau ngaahi talí mei he Laumālie Māʻoniʻoní.”

Ne fonu hake e falelotú, holó, mo e ngaahi vahaʻaloki ʻo e Siteiki Senitā Lekasipií he ʻaho Sāpaté he kāingalotú ʻi he ako ʻa ʻEletā Kuki ʻo pehē, “ʻOua naʻa tuku ke ueʻi ʻe hoʻomou loto veiveiuá ʻa hoʻomou tuí.”

Naʻá ne fakamamafaʻi ʻa hono mahuʻinga ʻo e hoko ʻa e husepānití mo e uaifí ko ha hoa ngāue tuʻunga tatau ʻi he nofo-malí ʻo hangē ko hono akoʻi ʻi he “Ko e Fāmilí: Ko ha Fanongonongo ki Māmani” (Liahona mo e Ensign, Nōv. 2010, 129).

Naʻe fakafeʻiloaki ʻa ʻEletā Kuki ki he kāingalotú ʻi he ʻosi ʻa e fakatahá.

Ne fononga vaka mo pasi e kāingalotu mo e kau faifekau ʻi Iloilo he Motu ko Paneí he houa ʻe nima ki he ngaahi fakatahaʻanga ko ia naʻe akonaki ai ʻa ʻEletā Petinā ʻo kau ki hono fakamālohia ʻenau tui kia Sīsū Kalaisí mo e tokoni ki he niʻihi kehé ke nau haʻu kia Kalaisí.

Naʻe fakamatala fakanounouʻi ʻeni ʻe he faifekau taimi kakato ko Sisitā Menikaili ʻoku ngāue ʻi he Misiona Filipaini Iloiló, “ʻOku fie maʻu ke tau akoʻi e ongoongolelei ʻa Sīsū Kalaisí, ka ʻoku totonu ke tau manatuʻi maʻu pē ko e faiako moʻoní ʻa e Laumālie Māʻoniʻoní.”

Naʻe fakahā ʻe ʻEletā Kuki ki he kakai lalahi kei talavou ʻi Kakaiani ti Oló, “ʻOku fie maʻu ʻa hoʻomou angamāʻoniʻoní, pea ʻoku fie maʻu ke toe mālohi ange ʻa e puleʻangá ni. ʻE ʻi ai e meʻa ʻe hoko ko e tupu mei he mālohi ʻo e Siasí ʻi Filipainí ʻa ia te ne faitāpuekina e kakai kotoa ʻo ʻĒsiá.”

Naʻá ne poupouʻi e kāingalotú ke nau tokanga taha ki he meʻa ʻoku mahuʻinga tahá, ikunaʻi ʻa e fakataʻetaʻetuí, ngāue ʻaki ʻa e tuí, pea mali ʻi he temipalé.

Naʻe pehē ʻe Kālo V. Kulisanito ko e palesiteni ʻo e Siteiki ʻIlikani Filipainí, “Naʻe mahuʻinga [lahi] ʻa e taimi totonu hono akoʻi ʻo e ngaahi tefitoʻi moʻoní mo e ngaahi fakakaukau fakafolofola naʻa nau vahevahé. Ko e moʻoni ko e ngaahi tefitoʻi moʻoni ia ʻoku tau fie maʻu he ʻaho ní. … ʻI he ngaahi uiuiʻi kotoa ʻoku tau maʻú, ko e mahuʻinga tahá ʻoku ʻi he fāmilí ia.”

Naʻe fakamulituku ʻaki e ʻaʻahi ʻa e kau ʻAposetoló ki Filipainí ʻenau fakataha mo ha ongo fakafofonga Filipaini ki he Sēnatú mo ʻenau kau atu ki ha polokalama fakafonua naʻe fakahoko ʻe he toʻu tupu ʻo e fonuá.