VROOM. VROOM. VROOM. Ne sio ki tuʻa ʻa ʻEsilī ʻi hono matapā sioʻatá. Naʻe sio ki ha loli lanu pulū. Naʻe sio ki ha ngaahi fokotuʻunga kelekele lalahi. Ko e langa ʻeni ʻe honau kaungāʻapí hanau fale foʻou.

Fehuʻi ʻe ʻEsilī, “Ko e hā ʻokú ne ʻai ʻa e ngaahi fokotuʻunga kelekelé? Ko hai ʻokú ne langa e ngaahi falé?”

Talaange ʻe he Fineʻeikí, “Ko e ngaahi lolí ʻoku nau ʻai ʻa e ngaahi fokotuʻunga kelekelé. Ko e kau langá ʻoku nau langa ʻa e ngaahi falé.”

Pehē ange leva ʻa ʻEsilī, “Talamai heʻeku faiakó naʻe ngaohi ʻe Sīsū ʻa e meʻa kotoa pē.”

Naʻe pehē atu leva ʻa e Fineʻeikí, “ʻIo, naʻe ngaohi ʻe Sīsū ʻa e meʻa kotoa pē ʻoku nau langa ʻaki e ngaahi falé.”

Sio ʻa ʻEsilī ki honau loto ʻataʻataá. Pea ʻeke ange ʻe ʻEsilī, “Hangē ko e ʻuluʻakaú, mo e maká, mo e kelekelé?”

Talaange ʻe he Fineʻeikí, “ʻIo. Naʻe toe ngaohi foki ʻe Sīsū mo hotau sinó. ʻE lava ʻe hotau sinó ke langa ha ngaahi meʻa.”

Naʻe fiefia ʻa ʻEsilī. Naʻe tokoni ʻa Sīsū ki hono kaungāʻapí ke nau lava ʻo langa ha fale. Naʻá ne ʻilo ʻe lava ʻo tokoni ange foki kiate ia ke ne ngaohi ha ngaahi meʻa.