Ko e Tāpuaki ʻo ʻEmau Meʻakai Tānakí

Ne u kamata mo hoku uaifi ko Pilitení Brittney, ʻi he kamata pē ʻo ʻema nofomalí ke fakatau e meʻakai ke fakatolongá. ʻI he ngaahi ʻuluaki māhina he ʻosi pē ʻema malí, ne ma fakatau ai ha ngaahi meʻa siʻi ʻoku lava ke fakatolonga ʻi he taimi kotoa pē ne ma ō ai ʻo fakatau he falekoloá. ʻI heʻema tātānaki tahatahá, ne ma tānaki ai ha meʻakai lahi. Naʻe ʻikai ke ma ʻilo pe ko e fē ha taimi te ma fie maʻu ai ke fakaʻaongaʻi, ka naʻá ma ʻilo naʻe mahuʻinga.

ʻOsi ha taʻu ʻe taha ʻo ʻema malí, ne ma hiki mei he tafaʻaki ʻe taha ʻo e fonuá ke ako ʻi he ʻunivēsití, pea naʻá ma ō pē mo ʻema meʻakai ne tānakí. Naʻe kehe ʻa e tuʻunga fakapaʻangá. Ne ma fakaʻaongaʻi kotoa ʻema paʻanga naʻe fakahuú ke ʻai ha fale, pea naʻe ʻikai ha paʻanga hū mai ʻa Pilitenī ʻi heʻene hoko ko e taha akoako faiakó. Naʻá ma fakafalala pē ki he kiʻi paʻanga hū mai ʻi heʻeku ngāue tokoni he ʻunivēsití ke totongi ʻaki e ngaahi moʻuá, ka naʻe ʻikai ke feʻunga.

Naʻe toe mafuli ʻema tuʻunga fakapaʻangá ʻo kovi ange ʻi he pō pē hono ua ʻo ʻema ʻi homa ʻapi foʻoú. Ne ofo hake ʻa Pilitenī ʻoku langa lahi hono keté, pea ʻi he ʻosi ha ngaahi houa ʻoku ʻikai pē ke holó, ne ma ō leva ki he falemahakí. Naʻe toʻo he konga ki mui ʻo e ʻaho ko iá hono ʻapenitikí.

Hili ʻene saí, ne ma tangutu hifo leva ke patiseti ʻema paʻangá. ʻI he taimi naʻá ma fikaʻi ai ʻa e ngaahi moʻua ki he māhina ʻe fā hono hokó—ʻa ia naʻe kau ai ʻa e tafa fakatuʻupakeé—naʻá ma fakatokangaʻi te ma kei lava pē ʻo moʻui ʻo ʻikai ha toe moʻua. Neongo ia, te ma lava ʻo fai ʻeni, ʻaki haʻama fakamole ʻo ʻoua ʻe toe laka ange he $25 ki he meʻakaí he māhina takitaha. Ko ha vahefāa pē ia ʻe taha ʻo e ngaahi fakamole naʻá ma faʻa faí.

Naʻe hoko ʻo mahuʻinga lahi ʻa e meʻakai tānaki ko ia naʻá ma tātānaki ʻi he taʻu kuo hilí. Naʻe feʻunga ia ke ne feau ʻemau ngaahi tefitoʻi fie maʻú ʻi ha māhina ʻe fā, peá ma fakaʻaongaʻi leva ʻa e $25 naʻe patisetiʻí ke fakatau ʻaki ha huʻakau mo ha ngaahi meʻa ʻauha ngofua kehe. Naʻe ʻikai ke ma kai ha meʻakai lelei fēfē, ka naʻe ʻikai ke ma fiekaia.

Ko e taimi ʻoku tau moʻui fakapotopoto ai mo tokoniʻi fie tokoni ʻa e niʻihi kehé, ʻoku tau maʻu ha ngaahi tāpuaki makehe. Ne ʻi ai ha taha ʻo hoku kaungā akó naʻe ʻosi hono mataʻitohí pea kole mai ke ma tokoni ange ʻi he hiki hono fāmilí. Lolotonga ʻema tokoní, kuó ne ʻeke mai pe te ma fie ʻave ʻa e meʻakai naʻe toe ʻi heʻenau ʻaisí. Ne ma maʻu heni ha kakanoʻi manu ke fakalahi ʻaki ʻema meʻakai ʻoku tānakí, koeʻuhí ko ʻene angaʻofá.

Naʻe tāpuakiʻi kimaua ʻe he ʻEikí ʻi heʻema teuteu ʻema meʻakai tānakí, totongi ʻema vahe hongofulú, mo fakahaaʻi ʻema fiefia ke tokoní. Naʻá ma lavaʻi lelei ʻa e ngaahi māhina ko iá ʻo ʻikai fie maʻu ke kole ha faʻahinga paʻanga. Ne maʻu ʻe hoku uaifí ʻi he hili ʻo e fahaʻitaʻu fakaako ko iá, ha ngāue taimi kakato, peá ma lava leva ke fakaʻaongaʻi ha paʻanga lahi ange he fakataú. Naʻá ma toe fakalahi leva ʻema meʻakai tānakí, pea hokohoko atu hono tāpuakiʻi kimaua ʻi heʻema talangofua ki he ngaahi fekau ʻa e ʻEikí.