Bukin tera ti Kainnanoa ana Boki Moomon

Booki aika tabu a kaota te banna man kamanenaan kakoaua aika bati ni katea te koaua i nanon ana Ekaretia Kristo. Ana Boki Moomon e ikota te kauoua ni kakoaua nakon te Baibara bwa te kakoaua ibukin Kristo. Unimwaane Mark E. Petersen (1900–84) man te Kooram n Abotoro are te Tengaun ma Uoman e taku n te taina, “Oina ni koaua ae ti karekea ana Boki Moomon are a na kamatoaki taeka ni kabane ni wiia taani kaotioti aika uoman ke teniman. (Taraa 2 I-Korinto. 13:1.) Iai iroura te Baibara; iai iroura naba ana Boki Moomon. A karekei uoua bwanaa—uoua waorim ni boki aika tabu—man uakoraki n aomata ni kawai aika kaokoroaki n te maranga ae bubura, ni uakoraki a kaota aia kakoaua nakon arona n Atua te Uea Iesu Kristo.”¹ Beretitenti Ezra Taft Benson (1899–1994) e a tia n reitia, “Ti riai n aki mwaninga bwa te Uea i bon irouna e katauraoa ana Boki Moomon bwa oin Ana kakoaua.”²

Ti ataia bwa “bwaai aika mataata ma ni kakaawaki … a tia n anaaki man” te Baibara i nanon te tai (1 Nibwaai 13:40). Ana Boki Moomon e kamataata ana reirei Kristo ao ni uota bwaninin te euangkerio nakon te aonaaba teuana riki te tai (taraa 1 Nibwaai 13:38–41). Ibukin te katotoo, ana Boki Moomon e buokiira n ataia bwa te bwabetito e riai ni karaoaki n te kateboaki (taraa 3 Nibwaai 11:26) ao bwa ataei aika uarereke aki kainnanoa te bwabetito (taraa Moronai 8:4–26).

Iotebwa Timiti e kakoaua bwa ana Boki Moomon bon “kingiin ara ekaretia.”³ Man te tai are ti ataa aio, e aki taraa n ae e manennanti bwa Ana Ekaretia Iesu Kristo Ibukiia Aika Itiaki ni Boong Aika Kaitira e kateaki n Eberi 6, 1830, tii te 11 te bong i mwiin are ana Boki Moomon e a kona ni kabooaki nakon te botanaomata ni Maati 26, 1830. Te Ekaretia e aki kateaki ni karokoa kingiina ae te boki ae tabu e a kona n reke irouia ana membwa.

Ni kaineti ma ana Boki Moomon, Iotebwa Timiti e anga reirei bwa “e na kaania riki te Atua te aomata ngkana e iri nanon reirei ake a taekinaki i nanona, nakon taian boki riki tabeua.”⁴ Iai mwaakana ni bitii maiu—n ikotaki ma maium ao nake ko tibwaua ana Boki Moomonin ma ngaia. Beretitenti Henry B. Eyring, Moan Kauntira n te Moan Beretitentii, e a tia ni kakoaua, “Ana mwakuri ana Boki Moomon i aon anuam, mwaakam, ao ninikoriam n riki bwa te tia kakoaua ibukin te Atua e bon koaua. Te reirei ao te katoto ni kakaonimaki i nanon te boki anne e na tabekiko, kairiko, ao ni kaungako. … Kamatebwaian ana Boki Moomon n te tataro e na katea te onimaki iroun te Atua te Tama, iroun Natina ae Tangiraki, ao n Ana euangkerio. E na karikirakea am onimaki irouia ana burabeti te Atua, ake ngkoa ao ngkai. … E kona ni uotiko ni kaaniko riki nakon te Atua nakon boki riki tabeua. E kona ni bita te maiu nakon ae tamaroa riki.”⁵